رشة كارتيرة

[al_manara]

السلام عليكم

اكيد المصطلح دة بنسمعة كتير في سوق العربيات (رشة كارتيرة) هل دة يعيب العربية
في ناس كتير لقيتها بتقول دواخل فبريكة ولقيت معناها ان احتمال تكون الكارتيرة او الشنب مرشوشين
وفي ناس تانية بتقول دواخل فبريكة بالكامل دي بتبقي كلها سليمة من جوة
فهل العربية الي رشة كارتيرة فيها مشكلة ؟

[د.أحمد سمير]

هو عموما مصطلح راشة كارتيرة مش مصطلح وارد قوي ..
الغالب بيتقال رقم كارتيرة أو رقم فخذة وده تلاقيه منتشر كتير جداً في الفيات القديم .
وذلك لوجود رقم الشاسية القديم على الكارتيرة اليمين أو الشمال .
أما لو رقم الشاسية مدقوق على القايم الشمال فده معناه إن المرور دق الرقم لضياع الرقم الأصلي نتيجة حادثة كبيرة .
الخلاصة مفيش عربية راشة كارتيرة إلا لو عملت حادثة دمرت الجانب اليمين أو الشمال للعربية بما أدى لاعوجاج الحوض على الأقل ، ده لو ماكنتش الحادثة دمرت الصدر كمان وبهدلت حوض الموتور .
يعني مينفعش تحت أي ظرف عربية راشة كارتيرة تكون دواخل فابريكة بأي حال .
راشة كارتيرة يعني عاملة حادثة .. بس خلاص

تقبل خالص مودتي

[ahmed1981]

فهل العربية الي رشة كارتيرة فيها مشكلة ؟

أكيد فيها مشكلة
وزي كلام الدكتور أحمد
حصل لها حادث تسبب في وجوب إستعدال الكارتيرة أو الربع أو المدفع أو أي جزء آخر في الدواخل وبالتالي بعد إستعداله يتم رشه
الفرق أن سعر تلك السيارة يكون أقل من مثيلتها التي ليس بها رش في الدواخل بنسبة تتناسب مع سبب الرش وحجمه

[hazem_khidr]

ال127 بالذات فيها الشكله دي
مش بشرط حادثه
و لكن لان رقم الشاسيه بتاعها محطوط في مكان ضغيف البارومه بتسرح فيه بسهوله
ف المرور بينقل رقم الشاسيه في القايم

[al_manara]

تسلم ايديكم علي الردود الوافية