لازم احكي ... مصيبة حصلت انهاردة

[koko616]

معلش استحملوني هحكي بالتفصيل

انهاردة الضهر كده كنت نايم و صحيت ملقتش العربية ... طلع ان اخويا اخدها عشان يزودلي زييت الباور ( انا كنت قايله انه ناقص و عايز يتزود ) ... لقيته بيتصل بيا بيقولي انا عند بتاع الزيت و بيقول ان فيه نوعين واحد موبل و التاني مش فاكر اسمه كده ... المهم قالي موبل ب 25 جنيه و التاني ب 8 جنيه ... قولتله لا هات الموبل

و قفلت معاه و نمت تاني ... بعدها بشوية رجع من برا لقيته بيقولي افرح يا عم ظبطلك العربية ... سألته انت عملت ايه

قالي ظبطلك زيت الباور زي ما انت عايز ... و كشف على زيت الفتيس لقاه ناقص و عايز يتزود فزوده ( هو قالي الجملة دي و انا يكاد يكون اغما عليا :o )

ملحوظة : عربيتي لانسر بومة 2007 اوتوماتيك لسه شاريها مستعملة من اسبوع و عاملة 44 الف كيلو ... و صاحب العربية قالي متغيرش زيت الفتيس غير عند 80 الف كيلو

انا اول ما سمعت من اخويا الجملة دي صرخت فيه و قولتله زيت الفتيس ايه ده اللي بتاع الزيت غيره ؟؟؟؟؟ ( انا قريت هنا انه مينفعش يتغير غير في التوكيل و بيتعمل بجهاز معقد كده و تمنه فوق ال 300 جنيه )

المهم قولتله عمل ايه المجنون ده ؟ قالي ولا حاجة متخفش هو شاف المقاس لقاه ناقص ... قام جاب نفس ازازة الزيت اللي حط منه في الباور ابو 25 جنيه و زوده على زيت الفتيس

مش هكدب عليكوا ... انا تقريبا جالي سكتة قلبية بعد ما سمعت الجملة دي

و استفسرت منه اكتر ... قالي انه كمان مصفاش الزيت القديم ولا في الباور و لا في الفتيس ... يعني زود على القديم

و بيقولي العربية شغال معملتش مشاكل معاه و هو راجع

نزلت بصيت على ازازة الزيت اللي زوده على الباور و على الفتيس

لقيته مكتوب عليه زيت موبل ... لناقل الحركة الاتوماتيك


حد يفهمني ايه الهبل بقى اللي حصل ده ؟؟ و كده اودع الفتيس و لا اللي اتعمل ده صح ؟؟؟

[WalidAdel]

تقريبا تقريبا صح و الله اعلم
بس استني راي بقية الاعضاء هايفدوك اكتر مني في حد يكون معاه العربيه
و طالما كان ناقص يبقي كان لازم يتزود و الزيت صح هو اللي مكتوب عليه ناقل الحركه الاوتوماتيك

[MR_MAMI]

ان شاء الله الاعضاء بيفيدوك

[koko616]

يعني كل ده صح ؟؟ زيت الباور هو هو زيت الفتيس ؟؟ و ب 25 جنيه ؟؟؟ و يتزود على القديم عادي ؟؟؟؟ و مش في التوكيل ؟

[الغزالى]

على مهلك يا باشا وبراحه على اخوك .... محصلش حاجة فعلا زيت الباور هوا هوا نفسه زيت الاتوماتيك .... وانا مجرب دة فى الكيا سيفيا جبت زيت باور موبيل برضو بتاع الجير الاتوماتيك .... يعنى متقلقش محصلش حاجة ..... ولو قلقان قوى روح التوكيل وغير الزيت .... او اطلب تشتريه وشوف شكله لو هوا هوا .... يبئى خلاص متغيروش .... لو مختلف يبئى لحقت العريبه .... وحصل خير فى الاول والاخر .... ومبروك على العريبه وربنا يباركلك فيهاااا ....................

---------------------------------
على فكرة اتضحك عليك الزيت ب 20 جنيه العلبه

[haroun707]

ياباشا من الافضل انك تتصل بالتوكيل علشان فى بعض السيارات لها انواع محدده زى الزيت الابيض مثلاً ولازم تحكيلهم اللى حصل وهما يقولولك ايه الصح

[rompo10]

ماتقلقش هو هو الزيت بس المهم ان زيت الفتيس الاوتوماتيك بيتقاس والعربيه علي المارشديه يعني لو هو قاس الزيت والعربيع علي p هايبان ناقص جرب انت وشوف المقاس والعربيه علي المارشديه

[gta10]

لا طبعا زيت الفتيس الاوتوماتيك بتاع اللانسر بومه لازم يتغير فى التوكيل و مايكونش اى زيت لازم يكون زيت cvt اللى هى atf diqueen sp-111 و كمان زيت موبيل بتاع الباور العلبة لتر ب 45 جنيه

[AutoTycoon]

اول مرة اعرف ان زيت الباور هو زيت الفتيس !

[ahmedhawas]

الموضوع بيتوقف على العربية هل هي 1300 ولا 1600سي سي:
لو 1300 : أوتوماتيك عادي ، وبتستخدم زيت الأوتوماتيك العادي بتاع الباور ، وسعره اللتر 45 جنيه.
لو 1600 : من 2006 الى 2009 دي أوتوماتيك cvt وزيتها مختلف عن زيت الأوتوماتيك العادي ، وموجود في التوكيل.
ياريت تهتم ياباشا ، لان حاجة زي دي ممكن تطير الفتيس !!

[M.Alaa92]

استاذى العزيز اطلع ع التوكيل احسنلك عشان البومة ال 2007 cvt و لية زيت مخصوص مش بتاع الباور دى لو 1600
لو 1300 عادى مش نشكلة

[حماده المصري]

بالضبط كده

البومه الفتيس ال سي في تي الي مبينقلش ده ليه زيت فتيس خاص لونه ابيض وتقريبا اللتر ب 100 الحق بقى انجز الموضوع ده ويفضل متحركش العربيه الا لميكانيكي او حتى يجيلك تحت البيت واشتري انت زيت الفتيس من التوكيل او اي مكان تاني وغيره

وحاول تكون حريص جدا الفتيس الاستيراد ب 7 الف

[SYD]

طبعا انا ماعنديش لانسر ومش عارف انسب زيت اتوماتيك ليها
بس الي اعرفه ان زيت الباور حاجة وزيت الأوتوماتيك حاجة

انا عربيتي زيت الباور بتاعها لونه ابيض

والله المستعان
،
،

[rahmanboud]

زيت الباور هو زيت الفتيس الأتوماتيك وهو زيت ناقل للحركة سواء فى الإسكاترا وحركتها أو فى صندوق التروس الأتوماتيك أما مسألة إنه لازم يكون زيت مخصوص دى مش فارقه خالص وبتكون توصية من الشركة المصنعه للعربيه نظير إتفاق إعلانى مشترك بين شركة الزيت والشركة المصنعه للعربيه " عملية تسويق باحته ونظير مبلغ بتدفعه شركة الزيت للشركة المصنعه للعربيه علشان الإعلان " والكلام ده مش إرتجالى لأنى عملى كمهندس بإحدى شركات البترول وتحديدا الخاصة بعمل الإضافات اللى على الزيوت أعلم إنه
معظم إختلافات الزيوت بتبقى فى الشكل الخارجى اللون مثلا وده بيكون إضافة للتمييز منها ما هو الأبيض أو الأحمر أو البنى فى زيت الباور أما الخصائص الرئيسيه واحده وتقع تحت شروط ومواصفات عالميه
زى مياه الردياتير ودى كمان من إنتاجنا ساعات بيكون اللون المميز لها الأخضر وأوقات أخرى بيكون اللون الأحمر هو المضاف " عملية تسويق "لكن فى النهاية هى مياة ردياتير والمادة الرئيسيه فيها والمؤثره هى مادة الجيليكول وموجودة فى المياة ذات اللون الأحمر أو الأخضر

[cheetos_892005]

لا المشكلة مش زي حضرتك بتقول ماركه معينه و ميتسوبيشي بتوصي بماركة تانيه

لا

لو العربيه 1600 غتيس cvt بيبقى ليها نوع زيت تاني مخصوص اصلا غير زيت الاوتوماتيك العادي

والله اعلم