سلسلة سلوكيات القيادة - الحلقة العاشرة (ثقافة استخدام الأنوار)

[SYD]

السلام عليكم ورحمة الله وبركاته
كل عام وانتم بخير بمناسبة شهر رمضان الكريم اعاده الله عليكم بالخير واليمن والبركات

انا حالي زي حال معظم المصريين ممن يلبسون النظارة الطبية وموضوع الأنوار المبهرة دة شئ بيتعب عيني جدا

احيانا ابقي ماشي بالعربية علي الطريق الدائري والاقي الي ورايا راح مصدرلي النور العالي في المراية سواء كان عايز يعدي او رزالة
طبعا لو عايز يعدي وعمل كدة فورا في اول فرصة بعديه لأنه ضغط علي ايدي الي بتوجعني
اما لو رزالة ف يا أما بهدي وابعد عنه واخليه يعديني يا أما بقلب المراية عندي لأني بجد مش بعرف ابص في المرايه نهائيا

ولما ببقي ماشي وبشوف حد عامل كدة بلاقي المنظر شبيه بأنه كأنه بيعمله أشعة علي ظهره او سكان بماسح ضوئي

وياسلام لو الي مشغل النور دة ميكروباص او عربية نقل او نص نقل
سبحان الله مش عارف بيجيبوا منين اللمبات المبهرة دي وكأن مقاسها 1500/2400 مش زي بتاعتنا يادوب 90/100

المصيبة في النور العالي دة ان الواحد مش بيعرف يبص في المراية الصالون او مراية الجنب يعني بمعني ادق عمي مؤقت لحين انك تعديه وبعد كدة ترجع الدنيا تاني عادي والرؤية تشتغل

نيجي لتاني نقطة وهي السيارات المقابلة
مش عارف ليه الناس مش بتحط في اعتبارها انه بيؤذي القادم في الجهة المقابلة بنور عربيته والعجيب اكتر انك ممكن تكون عربيتك نورها علي قدها وتلاقيه بيقلبلك النور العالي فعينك لحد لما يعميك او تطفيله النور
هو طبيعي انك طالما بتشتكي من النور يبقي من باب اولي انك ماتنورش نورك، بس ساعات مش بتلحق تطفي النور وتلاقيه هو سباق بالتقليب، واحيانا اخري تبقي انت مش منور النور وتلاقيه هو منور النور وكمان الفوجات

اتمني يا جماعة لو نحاول نراعي بعضنا ونقدر ان ممكن النور العالي دة يؤذي غيرنا وممكن يسببله في مشاكل بسبب انك بتجبره انه مايستخدمش مراياته ونحاول نخلي ثقافتنا استخدام الأنوار بالحكمة عند اللزوم

Best Practice
- حاول الألتزام باللمبات الموصي بها من المصنعين وفي الغالب بتكون 90/100
- لو عايز تمشي علي الطريق فالأصل في استخدام النور الواطي وليس العالي
- لو ماشي في طريق وعايز تتجاوز السيارة التي امامك استخدم النور العالي كقلاب وليس انك تصدره في عينيه
- لو ماشي في طريق وفي سيارات في المقابل حاول اطفاء الأنوار ان أمكن ولو عندك فوج لايت ياريت تستخدمه عوضا عن نور السيارة

والله المستعان
،
،

أقرأ ايضاً

http://www.nilemotors.net/Nile/236883-a.html#post3873704363

http://www.nilemotors.net/Nile/236188-a.html#post3873695189

http://www.nilemotors.net/Nile/235537-a.html#post3873686975

http://www.nilemotors.net/Nile/235535-a.html#post3873686912

http://www.nilemotors.net/Nile/234943-a.html#post3873680644

[Elawany13]

نسيت الزينون
حسبى اللع ونعم الوكيل فيمن يستخدموا الزينون وبيأذوا الناس بيه
الزينون وصل للموتوسيكلات الصينى والتكتوك

[Ashraf_Ibrahim]

كلامك سليم جدا
بس لو رجلاش النور مظبوط النور المقابل مش هيئذيك ولا حاجة
انا مبعرفش امشي بدون نور حتى لو الطريق كله منور اساسا بس دي مسألة تعود
لأن حصلت قبل كدة على طريق بنها تقريبا الطريق منور وفجأة النور قطع وحصلت كوارث بسبب ان نور العربيات كان مطفي
فعلى ايه يا عم انا نوري شغال 24 ساعة ما دام الدنيا ضلمة
العالي انا طبعا معاك في النقطة دي
ولما حد بيصدرلي العالي ورايا بعديه واقوم كابس عليه ومصدرله العالي ويعيش بقا
ههههههههههههههههههههههه
اما النقل وما شابه في المقابل فالحمد لله اللمبتين اللي ركبتهم جداد عاملين شغل معاهم
النقل بقا بيطفيلي النور علشان اطفي نوري
انا مركب اوزرام نايت بريكر 60/55 بدون اي تعديلات بس نورها حلو الحمد لله

[فتح الباب]

احيى وبشده صاحب الموضوع وخصوصا انه اثار موضوع مهم جدا جدا لكن للاسف لدى ناس كثير غير مهم وعلى فكره انا كنت فاكر اننى الوحيد الذى يقود قياده صحيحه ليلا ده انا تعبت جدا من البهايم اعزكم الله
تقول البهيم طلع من الزريبه وجلس فى السياره كى يقود ليلا ايه القرف ده مش ممكن معقول فى بنى ادم عديم الاحساس بالطريقه دى استحاله طبعا الا اذا كان طالع من زريبه فعلا وانا اسف لاستخدامى بعض التعابير التى لا احب ان يسمعها منى زملائى الاعزاء ولا انا ايضا لكن فعلا ده اقل شىء فى تقديرى المهم نرجع للانوار ؟
مصنعوا السيارات عملوا نورين فى السياره عالى وواطى لماذا العالى ممكن استعماله بدون مقابل تضايقه او فليشر تنبيه لمن امامك او عندما يخلو الطريق امامك سواء مقابل او امامك سياره اما الواطى طبعا فى المقابل او امامك سياره وليس كما يظن البعض الواطى للمقابل فقط وعندما لا تجيد اطفاء الواطى بالتبادل مع المقابل فلا ملامه عليك طبعا مش فتاكه منى ولا حاجه فقبل ان اذكر هذا الكلام ذكره قبلى زميل زو ذوق رفيع وعالى ويستحق هذه المواصفات لطالما اهتم بموضوع كهذا كما هو يعتبر ايضا مقياس لمدى ذوق الشخص مره اخرى تحياتى لصاحب الموضوع وتخيل انا عندما اقابل شخص كمثلك بالطريق ملتزم باستعمال الانوار بيكون هاين لى ان استوقفه واشكره على ما هو فيه من ادميه ذو عقل يفكر والا ما كان فرق بيننا وبين اى مخلوق اخر فلو كل واحد استعمل عقله فى اتفه الاشياء لما احد تضايق من احد لكن تقول ايه مصريين بقى قصدى فهلويين تحياتى الخاصه. شكرا

[omaroof]

معظم الناس فى مصر بتشتكى من النور العالى وفوجئت انهم بيتكلمو على النور العادى ( يعنى لف الزراع بتاع النور لفتين) وده المفروض النور العادى جدا وان كل الناس تبقى منوراه
للاسف الثقافه عندنا اننا لازم نمشى على النور اللى بينور التابلوه والنور الجانبى الضعيف والخلفى وده طبعا موش صحيح
العالى اللى فعلا ماينفعش استخدامه هوا النور الباهر ( وضع زراع النور الى الامام ) وده يتم استخدامه فى الطرق المظلمه جدا فى حاله عدم وجود سيارات غيرك لانه فعلا مؤذى وللاسف ناس كتير بتنوره وهى على الصحراوى وبتكون النتيجه انه بيعمى اللى ماشى امامه والمقابل له

[SYD]

نسيت الزينون
حسبى اللع ونعم الوكيل فيمن يستخدموا الزينون وبيأذوا الناس بيه
الزينون وصل للموتوسيكلات الصينى والتكتوك

الزينون دة موضوع تاني خالص وبرة الscope

ربنا يهدي الجميع

فعلا لبولد بتاع التوك توك تلاقيه فرحان وماشي معلي الصوت اخر حاجة ومركب الزينون وعمال يرقص وهو سايق زي العبيط

الله المستعان
،
،

[SYD]

كلامك سليم جدا
بس لو رجلاش النور مظبوط النور المقابل مش هيئذيك ولا حاجة
انا مبعرفش امشي بدون نور حتى لو الطريق كله منور اساسا بس دي مسألة تعود
لأن حصلت قبل كدة على طريق بنها تقريبا الطريق منور وفجأة النور قطع وحصلت كوارث بسبب ان نور العربيات كان مطفي
فعلى ايه يا عم انا نوري شغال 24 ساعة ما دام الدنيا ضلمة
العالي انا طبعا معاك في النقطة دي
ولما حد بيصدرلي العالي ورايا بعديه واقوم كابس عليه ومصدرله العالي ويعيش بقا
ههههههههههههههههههههههه
اما النقل وما شابه في المقابل فالحمد لله اللمبتين اللي ركبتهم جداد عاملين شغل معاهم
النقل بقا بيطفيلي النور علشان اطفي نوري
انا مركب اوزرام نايت بريكر 60/55 بدون اي تعديلات بس نورها حلو الحمد لله

النور الواطي مفيش منه مشكلة، انا كمان طول الليل اول لما بركب العربية بنور النور وعليه لحد لما اروح، هي بس مشكلته في المقابل بضطر اقفله

النقل التقيل مالوش حل لا في المقابل ولا حتي لو انا وراه وجمبه ولا اي حاجة واحسن حاجة اجتنابه

الله المستعان
،
،

[SYD]

احيى وبشده صاحب الموضوع وخصوصا انه اثار موضوع مهم جدا جدا لكن للاسف لدى ناس كثير غير مهم وعلى فكره انا كنت فاكر اننى الوحيد الذى يقود قياده صحيحه ليلا ده انا تعبت جدا من البهايم اعزكم الله
تقول البهيم طلع من الزريبه وجلس فى السياره كى يقود ليلا ايه القرف ده مش ممكن معقول فى بنى ادم عديم الاحساس بالطريقه دى استحاله طبعا الا اذا كان طالع من زريبه فعلا وانا اسف لاستخدامى بعض التعابير التى لا احب ان يسمعها منى زملائى الاعزاء ولا انا ايضا لكن فعلا ده اقل شىء فى تقديرى المهم نرجع للانوار ؟
مصنعوا السيارات عملوا نورين فى السياره عالى وواطى لماذا العالى ممكن استعماله بدون مقابل تضايقه او فليشر تنبيه لمن امامك او عندما يخلو الطريق امامك سواء مقابل او امامك سياره اما الواطى طبعا فى المقابل او امامك سياره وليس كما يظن البعض الواطى للمقابل فقط وعندما لا تجيد اطفاء الواطى بالتبادل مع المقابل فلا ملامه عليك طبعا مش فتاكه منى ولا حاجه فقبل ان اذكر هذا الكلام ذكره قبلى زميل زو ذوق رفيع وعالى ويستحق هذه المواصفات لطالما اهتم بموضوع كهذا كما هو يعتبر ايضا مقياس لمدى ذوق الشخص مره اخرى تحياتى لصاحب الموضوع وتخيل انا عندما اقابل شخص كمثلك بالطريق ملتزم باستعمال الانوار بيكون هاين لى ان استوقفه واشكره على ما هو فيه من ادميه ذو عقل يفكر والا ما كان فرق بيننا وبين اى مخلوق اخر فلو كل واحد استعمل عقله فى اتفه الاشياء لما احد تضايق من احد لكن تقول ايه مصريين بقى قصدى فهلويين تحياتى الخاصه. شكرا

متشكر جدا لحضرتك علي زوقك وكلامك الحلو دة

انا لما اتكلمت في الموضوعات دي كلها من الأنوار للكلاكس للفلاشر للسرعات لباقي الموضوعات فاتكلمت فيها لأني ملتزم ومش بلاقي حد ملتزم فبتجنن بصراحة

يعني من ضمن الموضوعات الي كنت كاتبها موضوع عن الزوق في التعامل والشكر ودة اقل ما فيها وكان اسمه "حاجة مستفزة جدا" http://www.nilemotors.net/Nile/22676...post3873583122
فعلا انا ممكن يجيلي السكر لما بتحصلي الحركة دي والمدام دايما تقولي سيبك منهم هما تربيتهم كدة وشوية كلام من دة عشان تهديني

انا اتشرفت بمرور حضرتك

والله المستعان
،
،

[SYD]

معظم الناس فى مصر بتشتكى من النور العالى وفوجئت انهم بيتكلمو على النور العادى ( يعنى لف الزراع بتاع النور لفتين) وده المفروض النور العادى جدا وان كل الناس تبقى منوراه
للاسف الثقافه عندنا اننا لازم نمشى على النور اللى بينور التابلوه والنور الجانبى الضعيف والخلفى وده طبعا موش صحيح
العالى اللى فعلا ماينفعش استخدامه هوا النور الباهر ( وضع زراع النور الى الامام ) وده يتم استخدامه فى الطرق المظلمه جدا فى حاله عدم وجود سيارات غيرك لانه فعلا مؤذى وللاسف ناس كتير بتنوره وهى على الصحراوى وبتكون النتيجه انه بيعمى اللى ماشى امامه والمقابل له

حضرتك في درجة نور اسمها النور الصغير او نور التابلوه (دة طبعا ما ينفعش يتمشي عليه الا لو الطريق منور كويس اوي وانت شايف كويس او في عربيات في المقابل وانت مش عايز تؤذيه)

وفي نور اسمه الواطي (دة بيتمشي عليه في معظم الأحيان، وعند التخطي بتضطر تقلب بينه وبين النور العالي)

وطبعا اخر درجة نور اسمه العالي (دة مش بيتمشي عليه تحت اي حال من الأحوال، ولا حتي لو الطريق ظلمة كحل)

علي فكرة وحتي لو الطريق منور يستحسن تنور النور الواطي بردو عشان يكون منبه للعربيات اثناء التخطي وكمان لو في حد عايز يخرج من شارع وانت علي الطريق الرئيسي فياخد باله منك

ربنا يستر طريقنا

والله المستعان
،
،

[SASA3]

فيه مرايات التعتيم التلاقائى ده ب 40 جنيه و بتتعمل خصوصى عند بتوع المرايات
و لو انت لابس نظاره فيه عدسات اسمها photo gray
على ما اتذكر ده برضه فيها تعتيم اول ما نور عالى ييجى فيها زى نور الشمس
يعنى اول ما اطلع بيها فى الشمس تقلب نضاره شمس و بليل بترجع عادى شفاف بس ان جه عليها نور عالى بتطفى تانى

[sharpvision]

فعلا ياجماعه حتى النور الواطى (العادى ) بتاع العربيات المقابله بقى مؤذى يعنى مش العالى وبس ,, نفسى السلوكيات تتغير بقى وصاحب العربيه مايلعبش فى نور العربيه اللى المصنع منزلها بيه لان النور العادى مش مؤذى للمقابل.......

[ahmed_mido1889]

الفكره كمان ان المفروض لو فيه واحد جاي في المقابل

ومفيش بلوكات في نص الطريق تفصل بين الاتجاهين

المفروض النور يبقي بالتبادل

بتنور نورك تكشف الطريق

وتطفيه وهو ينور نوره يكشف الطريق ويطفيه

مش افضل منور النور وكاشف لنفسي واعميه واخليه يلبس بلاعات او مطبات

[shaddadfalcon1]

ببقي هتشل لما ابقي منور النور الواطي وماشي عشان الطريق منيل بستين نيله والاقي البشر اللي في وشي كله عمال يرعشلي ومره واحد قام كاسر عليا في طريق رايح جاي ولم نفسه تاني وبعد ماعدي بيزعق ويقول اطف يالنور كان ساعتها هاين عليا انزل اولع فيه

ده غير اللي فاكر نفسه اذكي خواته ويبقي طافي نور العربيه كله وماشي كل شويه يشغل النور العالي او مشغل النور الصغير وعمال يرعش بالعالي عشان يشوف قدامه وكنت راكب مع سواق تاكسي بقوله شغل النور وسيبه بيقولي لاازاي كده تعمي اللي قدامك قلتله يعني انتي لما كل شويه بتشغل العالي مش بتعمي اللي قدامك يقولي لاعادي مانا بشغله واطفيه تاني

ده غير النقل اللي بيحطو كشاف ورا من تحت العربيه وفي اللي شغال علي طول واللي بيشغل مع الفرامل

حاجه تقهر

في طريق بمشي عليه عند اهلي رايح جاي كذا مره ابقي مروح بالليل والاقي العربيه نزلت من علي االأسفتل لاني لاشايف قدامي من اللي جاي في وشي ولا شايف ورايا من اللي ورايا وكله مصدر النور العالي

[Elawany13]

معظم الناس فى مصر بتشتكى من النور العالى وفوجئت انهم بيتكلمو على النور العادى ( يعنى لف الزراع بتاع النور لفتين) وده المفروض النور العادى جدا وان كل الناس تبقى منوراه
للاسف الثقافه عندنا اننا لازم نمشى على النور اللى بينور التابلوه والنور الجانبى الضعيف والخلفى وده طبعا موش صحيح
العالى اللى فعلا ماينفعش استخدامه هوا النور الباهر ( وضع زراع النور الى الامام ) وده يتم استخدامه فى الطرق المظلمه جدا فى حاله عدم وجود سيارات غيرك لانه فعلا مؤذى وللاسف ناس كتير بتنوره وهى على الصحراوى وبتكون النتيجه انه بيعمى اللى ماشى امامه والمقابل له

أحيانا كثيرة فى طرقنا الغير مؤهله للسير والضيقة
بيكون النور العادى كمان مبهر ومؤذى
أنا غالبا بمشى بنور التابلوه
وفوانيس الشبورة

[SYD]

فيه مرايات التعتيم التلاقائى ده ب 40 جنيه و بتتعمل خصوصى عند بتوع المرايات
و لو انت لابس نظاره فيه عدسات اسمها photo gray
على ما اتذكر ده برضه فيها تعتيم اول ما نور عالى ييجى فيها زى نور الشمس
يعنى اول ما اطلع بيها فى الشمس تقلب نضاره شمس و بليل بترجع عادى شفاف بس ان جه عليها نور عالى بتطفى تانى

فكرة جامدة جدي
انا ماعرفش ان في حاجة اسمها مرايات تعتيم، فاكر انها بتنزل فبريكة فقط
طب مين بيعملها ؟؟؟ وياتري هضطر اغير القمرة الفبريكة ؟؟؟؟ ولا دة مجرد فاميه بيتلزق ؟؟؟؟

ارجو التفاصيل

والله المستعان
،
،