مببتدئ ارجو المساعده من فضلكم

[romioromio]

السلام عليكم
انا اليوم الحمد لله حققت حلمي بامتلاك اول سياره لي في حياتي
و اشتريت دايو ليجانزا موديل 2002

بس انا ابيض ميح
والله اشترتها كده بالشكل كان من واحد شكله طيب ومحافظ عليها وشكلها نظيف

بس انا مابهمش في العربيات خالص ومبتدئ بس باعرف اسوق شويه
سوقتها وليقيتها تمام فاشترتها

بس مبهمش في الميكانيكا خالص


عايز اعرف

هو ايه الميه اللي تتزود وامتي
وامتي اغير الزيوت وايه هي


واعمل ايه في العربيه يعني مع الاستخدام مش قصدي السواقه
لأ قصدي يعني ايه اللي اشيك عليه علي طول

ارجوكم محدش يستهون بطلبي بس انا فعلا مييييييح والله العظيم

واي نصايح للمبتدئين ارجوكم

[Zika9909]

أولاً: أهلاً و سهلاً بيك معانا هنا في المنتدى.
ثانيًا: مبروك العربية، و ربنا يرزقك خيرها و يحفظك من شرها (دعوة و إحنا صايمين أهوه).
ثالثًا: أنت كان المفروض تفحص العربية كويس قبل ماتشتريها، على الأقل تبقى عارف إللي فيها، لازم تعمل كده لو أنت في مصر، لكن واضح إن حضرتك في السعودية و العربيات هناك أغلبها سليم و إللي بتعمل حادثة بتكون اتحطمت تمامًا و مافيش أمل من إصلاحها. حصل خير.
رابعًا: الحاجات إللي المفروض تشيك عليها على طول:-
1-زيت الموتور لازم تتأكد من مستواه (مش ناقص و لا صفر) كل يوم قبل ما تشغل العربية؛ لأنه احتمال -لا قدر الله- العربية تصفي الزيت و هي راكنة و أنت مش واخد بالك، فلو شغلت العربية على كده الموتور هيتحرق خلال دقائق معدودة، لو الزيت ناقص زوده من نفس الزيت إللي حاطه في العربية (ماتخلطش نوعين مختلفين على بعض)، و بردو حاول تعرف الزيت بينقص ليه، لأن الطبيعي إن الزيت ماينقصش طول فترة عمله.
الصح إنك تقيس مستوى الزيت و العربية باردة تمامًا، و لو هتزوده بردو لازم تكون العربية باردة تمامًا.
2- مياه الردياتير كل يوم الصبح و أنت طالع تشوفها ناقصة و لا لأ، لو ناقصة تدور الموتور و بعد كده تزود مياه (خصوصًا لو كانت العربية سخنة عشان وش السلندر مايبوظش).
3- زيت الباكم (زيت الفرامل و الدبرياج) اتأكد من مستواه كل أسبوعين و تزوده من نفس نوع الزيت لو كان ناقص.
إللي أعرفه إن زيت الباكم بيمتص بخار الماء بشدة عشان كده المفروض تكشف عليه بسرعة و تزوده بسرعة (مش برعونة لكن بسرعة) عشان تحافظ عليه.
4- طفاية الحريق تكون قريبة منك عشان لو -لا قدر الله- حصل حريق في العربية تقدر تلحقه بسرعة أو لو عربية في الطريق محتاجة مساعدتك تقدر تنقذ الموقف بسرعة.
5- الإستبن (العجلة الاحتياطية) تتأكد إنها سليمة، و كمان الكوريك و المفتاح الصليبة إللي بتفك بيه مسامير العجل.
6- اتأكد إن أنت صاحي مش نايم أحسن تعمل حادثة -لا قدر الله-.

دلوقتي بالنسبة للزيت إللي موجود عندك في العربية أكيد أنت مش عارف ده زيت كام كيلو و لا محطوط في العربية بقى له قد إيه، أنا من رأيي إن لو الزيت إللي عندك لونه إسوّد يبقى أحسن لك غيره بزيت 1000 كيلو من غير ما تغير فلتر الزيت و بعد 300 أو 400 كيلو تغيره بزيت 5000 كيلو على الأقل و تغير معاه فلتر الزيت كمان، إنما لو لسه سليم خليه لحد ما يبدأ يغير لونه للأسود ساعتها تغيره بزيت 5000 كيلو على الأقل و تغير فلتر الزيت طبعًا. (كل الكلام عن الزيت ده رأيي الشخصي)

طبعًا الكشف على مياه الردياتير سهل على ما أظن.
اتبقت مشكلة واحدة و هي: إزاي هتعرف أماكن الكشف على زيت الموتور و زيت الباكم؟!
الحقيقة أنا عمري ماشوفت حوض الليجانزا و لا أعرف أماكن الكشف على زيت الموتور و زيت الباكم فين.
طب إيه الحل؟؟
عندك حل من اتنين:-
1-تشوف واحد من جيرانك أو زميل عمل يكون فاهم يوري لك أماكنهم فين.
2-أحد أعضاء المنتدى يكون معاه ليجانزا يوصف لك أماكنهم فين، فممكن تسأل في قسم دايو على إللي أنت عايزه، و ده اللينك بتاع قسم دايو

http://www.nilemotors.net/Nile/forum35/

أتمنى أكون أفدتك و لو بالقليل.

[romioromio]

الف الف شكلر ليك بجد يا استاذ زيكا

انا طبعا مفهمتش اي حاحجه من اللي انت قلتها

بس عموما انا كتبت كل النقط في ورقه
وفعلا حخلي جاري بكره يوريني مكان الحجات ده
وحساله علي مكانهم

يعني انت كده رايك ان
ازود ميه باستمرار نقول كل يوم يعني لازم افول مكان الميه ده ببلاش مش مشكله هههههههه

ثانيا اغير زيت الماتور والدبرياج والفرامل كل فتره

ولتكن شهر مثلا
علما اني جايبها تقضية مشاوير جوه البلد بس الشغل وبس حاليا يعني مش سفر ولا شئ

[romioromio]

ويا ريت لو تنصحني بايه تاني


انا واحد قاللي غير سير الكاتينه وكل السيور والفلاتر كلها وحاجات كده
هل ضروري

علما ان السياره حالتها نظيفه ال حد ما
وصاحبها كان مظبطها جديد

[Zika9909]

آسف على التأخير في الرد

الف الف شكلر ليك بجد يا استاذ زيكا

انا طبعا مفهمتش اي حاحجه من اللي انت قلتها
يا نهار أبيض.

بس عموما انا كتبت كل النقط في ورقه
وفعلا حخلي جاري بكره يوريني مكان الحجات ده
وحساله علي مكانهم
بالضبط كده.

يعني انت كده رايك ان
ازود ميه باستمرار نقول كل يوم يعني لازم افول مكان الميه ده ببلاش مش مشكله هههههههه

ثانيا اغير زيت الماتور والدبرياج والفرامل كل فتره

ولتكن شهر مثلا
زيت الموتور مختلف عن زيت الفرامل و الدبرياج في الأنواع و طريقة الكشف عليهم، أنا بصراحة ماغيرتش زيت الباكم (زيت الفرامل و الدبرياج) فأنا هكلمك عن زيت الموتور بس.
زيت الموتور بتحدد جودته من عدد الكيلومترات إللي المفروض العربية تقطعها و هو لسه شغال و محافظ على خصائصه، يعني في زيت 1000 كيلو و ده بيحافظ على خصائصه مسافة 1000 كيلو متر تقطعها السيارة بعد كده بيكون غير صالح للاستخدام و لازم يتغير و إلا الموتور هيتلف أسرع، لو قولنا زيت 3000 كيلو يبقى ده معناه إن الزيت ده المفروض يحافظ على خصائصه مسافة 3000 كيلو متر تقطعها السيارة بعد كده لأ، طب مثلاً لو أنا حاطط في العربية زيت 5000 كيلو المفروض أغيره بعد 4000 أو 4500 كيلو متر و هيكون ساعتها لون الزيت تحول للأسود و بدأ بفقد خصائصه بالفعل.
لازم تغير فلتر الزيت و أنت بتغير الزيت؛ لأن فلتر الزيت بيبقى شايل جواه شوائب كتير و حرام تحط زيت جديد و نضيف على فلتر مستهلك.
يعني تغيير زيت كل شهر حرام حرام حرام، تغيير الزيت مرتبط بالمسافة إللي العربية بتقطعها سواء خلصتهم في شهر أو في سنة مش مهم.
لو الزيت نقص (و ده صعب) بيبقى في شوية زيت باقيين في جركن الزيت إللي أنت حطيته في العربية بتزود بيه الزيت إللي في العربية، و بردو ليه مكان بتزود منه، و لازم تكون العربية باردة تمامًا.
طبعًا أنت مش إللي يتغير زيت الموتور، أنت بتروح بنزينة و يكون معاك فلتر زيت جديد بتاع العربية و تشتري الزيت (و ليكن 5000 كيلو) هو هيفضي زيت العربية من تحت الموتور و تديله الفلتر يغيره و بعد كده يصب الزيت إللي أنت اشتريته في الموتور من فوق، المكان إللي بيصب فيه الزيت هو ده إللي أنت بتزود منه زيت الموتور لما ينقص، لما بيصب الزيت بيتبقى شوية في الجركن بتاخدهم معاك و تزود بيهم الزيت لما ينقص.

علما اني جايبها تقضية مشاوير جوه البلد بس الشغل وبس حاليا يعني مش سفر ولا شئ
لما تتعود على العربية مش هتقدر تستغنى عنها.

أنا رديت عليك باللون الأزرق.
في حاجة كمان هي زيت الفتيس، الحقيقة أنا ماعنديش فكرة بيتغير كل كام كيلومتر لكن أنت ممكن لما تيجي تغير زيت الموتور تخليه يبص لك على زيت الفتيس و هل محتاج يتزود أو يتغير.

[Zika9909]

ويا ريت لو تنصحني بايه تاني


انا واحد قاللي غير سير الكاتينه وكل السيور والفلاتر كلها وحاجات كده
هل ضروري

علما ان السياره حالتها نظيفه ال حد ما
وصاحبها كان مظبطها جديد

أهم حاجة تغيرها سير الكاتينة لأنه لو اتقطع هتسمع صوت فرقعة جامدة كأن قنبلة انفجرت و العربية هتقف في ساعتها و يستحسن ماتحاولش تدورها.
أنا مش عايز أخوض في تفاصيل الكوارث إللي بتحصل للموتور لما سير الكاتينة بيتقطع، لكن يستحسن تغيره، و المفروض إن كتالوج العربية يكون مكتوب فيه معاد تغيير سير الكاتينة بعد كام كيلومتر لكن على الأقل سير الكاتينة بيقعد 50000 كيلومتر.
بقية السيور و الفلاتر مافيش داعي تغيرها طالما شغالين كويس و مافيش خطورة منهم زي سير الكاتينة.
ممكن بردو تكشف على فرامل العربية و تكشف عليها عند واحد بتاع ضبط زوايا و اتزان و وديها عند ميكانيكي جايز تكون محتاجة حاجة.

يبقى كده أنت المفروض تعمل الآتي:
1- تغير سير كاتينة (و أظن بتغير معاه بلية شداد الكاتينة)
2- تكشف على الفرامل.
3- تعمل ضبط زوايا و اتزان.
4- تغير زيت الموتور و فلتر الزيت طبعًا.

[romioromio]

الف شكر يا باشا

واسف تعبتك معايا

بس انا والله فعلا مكنتش فاهم اللي انته بتقوله
انا والله ابيض خااالص
بس كان نفسي اشتري عربيه وواحد عارفه مسافر بلده كان بستعملها خفافي ....وتوكلت علي ربنا ولا فحص ولا بتاع رغم ان السعوديه فيها فحص كمبيوتر واشتغالات والله اشترتها علي الواقف كده
سقتها شويه رحت البيت بيها جبيت الفلوس وخلصت

المهم هو ايه الباكم ده اصلا
ثانيا ايه هو فلتر البنزين
يعني حاجه كده زي المصفاه اللي بنصب منها الشاي وبعدين نغسلها ونشيلها
ولا بتركب برده في العربيه

مستغربش من اسالتي بس زي ما قلتلك
اول مره اتعامل مع السيارات علي الاطلاق

وبالنسبه للكاتينه
انا كده كده حروح بيها لواح يشدهالي كده ويظبط ان شاء الله بس ورقها يخلص

الف الف شكر ورمضان كريم عليك

[A.Saad]

مبروك العربية
زيت الباكم هو زيت موجود فى خزنة فى الكبوت ونازل منه مواسير للعجل
وظيفته اما تدوس فرامل يخللى الفرامل تفرمل

زيت الباكم بيتغير كل سنتين لانه بيمتص رطوبة
متخليهوش ييجى على الدهان بتاع العربية لانه بيبوظه
ولو جه عليه
تغسل فورا بالمياة
زيت الباكم نوعين dot3
dot4 وده الافضل للعربيات الحديثة
ولو قدرت ترجع للوكالة عندك او للكتالوج تشوف النوع المنصوح بيه يكون افضل

وشوف المواضيع دى علشان تبتدى تاخد فكرة عن السيارات

http://www.nilemotors.net/Nile/21954-a.html

http://www.nilemotors.net/Nile/35542-a.html

http://www.nilemotors.net/Nile/30806-a.html

http://www.nilemotors.net/Nile/212212-a.html

وياريت تروح القسم التعليمى
تاخد مواضيعه موضوع موضوع
من القديم للجديد

[romioromio]

الله يخليك ويكرمك
والف شكر علي ردك

انت بتقول يتغير بعد سنتين
لكن زيزو بيقول شهر طتير جدا جدا عليهم

كمان هي مية الردياتير اي ميه والسلام صح

[Zika9909]

الف شكر يا باشا

واسف تعبتك معايا
مافيش تعب و لا حاجة.

بس انا والله فعلا مكنتش فاهم اللي انته بتقوله
انا والله ابيض خااالص
بس كان نفسي اشتري عربيه وواحد عارفه مسافر بلده كان بستعملها خفافي ....وتوكلت علي ربنا ولا فحص ولا بتاع رغم ان السعوديه فيها فحص كمبيوتر واشتغالات والله اشترتها علي الواقف كده
سقتها شويه رحت البيت بيها جبيت الفلوس وخلصت
طالما أنت عارف صاحبها يبقى أكيد العربية كويسة، و حتى لو فيها بعض العيوب مش مشكلة طالما أنت بتتعلم منها.

المهم هو ايه الباكم ده اصلا
ثانيا ايه هو فلتر البنزين
يعني حاجه كده زي المصفاه اللي بنصب منها الشاي وبعدين نغسلها ونشيلها
ولا بتركب برده في العربيه

مستغربش من اسالتي بس زي ما قلتلك
اول مره اتعامل مع السيارات علي الاطلاق

وبالنسبه للكاتينه
انا كده كده حروح بيها لواحد يشدهالي كده ويظبط ان شاء الله بس ورقها يخلص

الف الف شكر ورمضان كريم عليك
العفو، أنا كنت زيك في يوم من الأيام و اتعلمت كتير من المنتدى، و مع ذلك لسه في حاجات كتير مش عارفها.
رمضان كريم على الأمة الإسلامية كلها.

الباكم ده اسم زيت "الفرامل و الدبرياج" في مصر، يعني لما أحب أشتري زيت "فرامل و دبرياج" بقول لصاحب المحل "أنا عايز زيت باكم"..
فلتر البنزين بيفضل راكب في العربية لحد ما يجيب آخره (زي فلتر المياه في الحنفية)، وظيفة إنه ينقي البنزين من الشوائب، في السعودية أكيد البنزين نضيف عشان كده فلتر البنزين أكيد بيعيش في السعودية أكتر من مصر، و لو عايز تغيره بتشتري واحد و تخلي الميكانيكي يغيره (أنت ممكن تغيره لوحدك بس مافيش داعي للمخاطرة دلوقتي).

[Zika9909]

الله يخليك ويكرمك
والف شكر علي ردك

انت بتقول يتغير بعد سنتين
لكن زيزو بيقول شهر طتير جدا جدا عليهم

كمان هي مية الردياتير اي ميه والسلام صح

لأ أنا بقول شهر قليل جدًا جدًا جدًا عليهم.

بالنسبة لمياه الردياتير يستحسن تكون المياه الخضراء، المياه العادية بتسبب صدأ في دورة التبريد، و عندكو في السعودية المياه الجوفية مليانة أملاح و دي هتعمل انسداد في دورة التبريد، إلا لو أنت عايز تحط لها مياه معدنية (بهزر).

[Zika9909]

مبروك العربية
زيت الباكم هو زيت موجود فى خزنة فى الكبوت ونازل منه مواسير للعجل
وظيفته اما تدوس فرامل يخللى الفرامل تفرمل

زيت الباكم بيتغير كل سنتين لانه بيمتص رطوبة
متخليهوش ييجى على الدهان بتاع العربية لانه بيبوظه
ولو جه عليه
تغسل فورا بالمياة
زيت الباكم نوعين dot3
dot4 وده الافضل للعربيات الحديثة
ولو قدرت ترجع للوكالة عندك او للكتالوج تشوف النوع المنصوح بيه يكون افضل

وشوف المواضيع دى علشان تبتدى تاخد فكرة عن السيارات

http://www.nilemotors.net/Nile/21954-a.html

http://www.nilemotors.net/Nile/35542-a.html

http://www.nilemotors.net/Nile/30806-a.html

http://www.nilemotors.net/Nile/212212-a.html

وياريت تروح القسم التعليمى
تاخد مواضيعه موضوع موضوع
من القديم للجديد

[A.Saad]

[romioromio]

لأ أنا بقول شهر قليل جدًا جدًا جدًا عليهم.

بالنسبة لمياه الردياتير يستحسن تكون المياه الخضراء، المياه العادية بتسبب صدأ في دورة التبريد، و عندكو في السعودية المياه الجوفية مليانة أملاح و دي هتعمل انسداد في دورة التبريد، إلا لو أنت عايز تحط لها مياه معدنية (بهزر).

هو فعلا في السعوديه المياه كلها املاح

بس ايه المياه الخضرا ده برده من البنزينه بشتريها

ما العلم ان اعتقد ان السيارات الخليجي مواصفاتها مختلفه شويه عن السيارات المصري
كمان البنزين هنا اقل شئ 91 او 92 باين