اتنصب عليا فى الزيت و انا بغيره

[mohd7380]

ارجو من اخواني الاعزاء جدا فى المنتدى الاستفادة من هذه القصة عسى ان لا يقع احد غيري في هذا الموقف ,
رحت النهاردة اغير زيت فى بورسعيد عند واحد كدة معرفوش بس هو محل تغيير زيوت و فى حرفيين الزهور فى بورسعيد المهم دار الحوار كالتالي :
انا : سلام عليكو عندك شل اصفر ؟
هو : طبعا ياباشا كل الحضرتك عايزه موجود
انا : طيب عايز اغير الزيت من غير الفلتر لوسمحت
هو : من عيني ياباشا اتفضل استريح
وقام جابلي كرسي و نزل تحت العربية و حل الطبة و قام و دخل جوة قعد مع زمايله فى المحل (هما 3) , المهم ادور بعيني على شل اصفر مفيش خالص فى المحل غير التعاون و الوطنية و شوية ماركات غريبة كدة .
خلو بالكوا بقة من الجاي ____________ 10 دقائق مستنين الزيت ينزل مافيش كلام خالص لاقيت واحد من جوه بيقولي هي العربية دي نوعها اية و هي بتفرق اية عن الجولف و فتح معايا حوار فى ثانية فى نفس الوقت كان الواد البيغير الزيت طلع من جوة المحل بجركن الزيت (المفروض انه جديد) خدت بالي و هو طالع و رايح على العربية و عيني عليه و جويا حاجة غريبة مش مرتاح قفل الطبة و التاني شغال اسئلة مابيفصلش وانا عمال ارد المهم و الله سرحت مع الواد البيسال دة تقريبا 10 ثواني و يمكن اقل رحت للعربية لاقيت الواد فضى الزيت فى عشر ثواني تقريبا المهم قلتله العلبة ماكنتش متبرشمة و انت لحقت تفتحها و تفضيها دة انت لسة واصل للموتور دلوقت و شوفوا الرعب الواد بقى فيه
المهم دار حوار طويل بيني و بينهم وعلينا صوتنا على ان الزيت التحط فى العربية مش شل و ان العلبة دي كان فيها نوع تاني و اقسم بالله ماكانوا عارفين يردوا عليا و لا يقنعوني و العلبة فعلا ماكنتش متبرشمة و كان فيها نوع تاني
المهم برجاء عدم ترك السيارة مع اي حد مش ثقة و ربنا يستر مايكون حطلي زيت جاز و الله المستعان

[mido51eg]

تخليه يفرغ الزيت اللي حطه تاني لأنك متعرفش هو حط زيت ايه ولا اذا كان الزيت مستعمل قبل كده ولا حاجة!

[prisoner]

طيب سبحان الله مانت متاكد انو اصلا معندوش انت ممكن تقفله المحل كان ممكن تروح تعملها محضر او تقوله مش هادفعلك فلوسك ادفعهالك فى القسم قولوا يفضى الزيت اللى حاطوا وحاول تقاوح معاهم ده حقك

[mohd7380]

الزيت طالع فى المقاس جديد بس الشك انه مش شل و انا قلتله وريني اذا كان عنك زيت شل فى المحل قالي دة كان اخر واحد هو زيت جديد بس مش شل

[Akram]

أفضل حاجة تغيير الزيت في بنزينة ,

متخليش الزيت ده فترة كبيرة و يا ريت تغيره .
.

[mesaharaty]

غيره بسرعة
وبعدين تانى مرة حضرتك اشترى الزيت بنفسك من البنزينة شل ثم توجه به إلى التغيير ولا تعطى الأمان لأى حد

[graffittiii]

ماورهمش غير النصب ع الناس ...

عاوزين يبيعو اللي عندهم وخلاص باعتبار أن الناس دي بتفكر من منطلق أن كله زي بعضة والعربيات بتمشي باي حاجة وخلاص وأن أنواع الزيوت دي مجرد أسماء مافيش فرق بينهم وبتوع الملاكي مش عارفين حاجة .... منتهي الجهل ...

[kisho55555]

معلش ولا يهمك يا باشا .... الواحد مش عارف يروح من الناس دى فين ... بس بقوا موجودين فى كل حتة ..

المهم ... فضى الزيت ده كانك بتغيير عادى ومعاه الفلتر كمان .... واشترى شل الاصفر اللى حضرتك متعود عليه وحطه وشوفه كمان ...

[falcon191]

احساس مش حلو إن أي حاجة الواحد عاوز يعملها إن عينك لازم تكون في وسط راسك لأن اللي قدامك هيحاول يستغلك ويغشك. لو عاوز تشتري حاجة ،أكيد البائع هيسرقك وفي نفس الوقت البضاعة مغشوشة.
ربنا يرحمنا من الغش ده

[Abo_Lina]

ماعليش ماتضاقش نفسك و حاول تبقى تروح لحد مشهور و معروف


سؤال خارج الموضوع يا شباب هو صح إنك تغير زيت بس من غير فلتر ? يعني مش مفروض نغير الفلتر مع كل غيار زيت و لا عادي

[mohd7380]

الف شكر يارجالة على اهتمامكوا انا نزلت الزيت و غيرته و غيرت الفلتر و بالنسبة للزميل البيسأل عن تغيير الفلتر مع كل غيارة زيت اكيد دة هايبقى احسن بكتير بس هي نسبية من واحد للتاني و من عربية للتانية لو تقدر تغيره كل مرة يبقى احسنلك بس امشي عليه كتيير شوية بقة اهو تحلل ثمنه

بالتوفيق لكل رجالة المنتدى

[Hany A Fattah]

قدر الله وماشاء فعل
بس حاول تغير الزيت ده فى اقرب وقت

[shaddadfalcon1]

يعني المهم عملت ايه معاهم؟
انا دايما بشتري الزيت بنفسي او بينزله ويفتحه قدامي لما كنت بستعمل موبيل وباخد الباقي

[agwaa]

حسبنا الله ونعم الوكيل
البلد دي ربنا موش هيرضى عنها طول ما غالبية الناس فيها لا تتقي الله .. والله ولا 100 ثورة هتنفع معاها
نصيحة نزل الزيت دة فوراً وغير الفلتر كمان لو عربيتك تعز عليك

[SaberMan]

حسبنا الله ونعم الوكيل
البلد دي ربنا موش هيرضى عنها طول ما غالبية الناس فيها لا تتقي الله .. والله ولا 100 ثورة هتنفع معاها
نصيحة نزل الزيت دة فوراً وغير الفلتر كمان لو عربيتك تعز عليك

1111111

حضرتك جبت المفيد محتاجين ثورة تانيه ثورة أخلاق