المشاركة الأصلية كتبت بواسطة tutankhamoun
مشاهدة المشاركة
بالنسبة بقى لموضوع العربيات الكوري
أنا غير متفق عليه بالمرة .
أولا
الكوري فيه منه الدايو اللانوس ........ و الفيرنا ........ و دول عربيات متوسطة و أسعار قطع غيار شعبية (و أنا شايفهم عربيات ممتازة للي يفهم العربية -- مش يشتريها و فاكرها فيراري )
والله المفروض الواحد مايشتريش العربيات دي لعدة اسباب
الدايو سر نجاحها انها ضمن مجموعة او عائلة GM وبالتالي هي بتاخد من اوبل (اوروبي) وتحط في الدايو (كوري) ودة عموما كان زمان - زاد الطين بلة انها بقت تجميع مصري
نفس الشئ في الفيرنا - تجميع مصري - وحتي الي مش تجميع مصري زي الماتريكس تلاقي الوكيل بيطلبها بمواصفات معينة - مواصفات مصري
تعال شوف العربيات المواصفات الأوروبي تلاقي فيها ايرباج وفرامل abs واحزمة امان خلفية وانوار شبورة ومواصفات تانية كتير اوي مش بتنزل عندنا
وتعال قارن اللانوس والفيرنا (عائلية صغيرة) بالعربيات الأوروبي نفس الفئة والسعة اللترية
انسب عربية في الفئة دي مش هقولك رينو لوجان 1600 لا الرينو كليو 1400 سي سي
ايهما تفضل ؟؟؟ الفيرنا ولا الكليو ؟؟؟؟
انا معاك ان قطع الغيار غالية شوية في الفرنساوي بس مقابل العمر الأفتراضي والنعومة والثبات والأمان
و في أيضا الألنترا و السيراتو ....... و دي عربيات فوق المتوسط في الفئة و أنا شايفهم عربيات ممتازة و كل حاجة لها مميزات و عيوب .
انا شايف ان الألنترا والسيراتو والكروز عربيات اوك ماشي الحال شوية ولكن بردو لا تقارن بالأوروبي الي في نفس مستواهم
يعني هما في فئة العائلية المتوسطة ذات السعة اللترية بين 1600 - 2000
يجي معاهم فولكس جيتا - بي ام الفئة الثالثة - رينو ميجان وفلوانس - بيجو 406 او 407 - اودي A4 - سيات ليون - اوكتافيا - فيات تمبرا - اوبل فيكترا - الخ....
بردو لما تقارن مش هتلاقي اوجه مقارنة اساسا
يعني لا يمكن تقارن سيراتو ب الجيتا
او الالنترا ب 316
و فيه العربيات العالية في الفئة زي العربية الهيونداي اللي جمهعا غبور و مش فاكر أسمها و كانت 2000 و 2400 سي سي
و دول أعلى شوية في الفئة ...
تعال قارن الهيونداي سوناتا قصدك ؟؟؟ ذات السعة اللترية 2000 وكمان في منها 3000
ومعاها الدايو ليجانزا 2000
والكيا اوبتيما 2000 و 2400
هتقارنها بأيه في الأوروبي
فولكس باسات - اودي a6 و a8 - مرسيدس E- بي ام الفئة الخامسة
المشكلة أن الخدعة بتيجي في موضوع قطع الغيار أنها رخيصة
مع أن قطع الغيار الأصلية مش رخيصة تماما خالص
هي بس الدايو و الفيرنا عاملين سمعة حلوة لأسعار قطع الغيار للكوري .
أؤيدك في هذا الرأي
طيب الناس قالت أوروبي
ما هو برضه ما ينفعش نعمم كل الأوروبي و يبقى في سلة واحدة
زي البولو مثلا ما هي أوروبي و لكن الألنترا أحسن منها مليون مرة كعربية و كسعر و كموتور و قطع غيار هو حضرتك بتقارن ايه بأيه ؟؟؟؟
قارن البولو 1000 بال i10 في نفس الفئة
و البونتو مثلا
طيب دول من فئة أصغر ... لو أتكلمنا على فئات أكبر زي الألنترا في المقاس معانا عربيات زي الفيات اللينيا .... الألنترا أحسن منها (أنا بتكلم على اللينيا العادية اللي من غير توربو ) ده مثال بس .
مينفعش نعمم الكلام
أنا شايف أن العربيات الكوري أغلبها يتميز بالنعومة في الركوب ......... و ضياع الثبات .
و ده حاجة على حساب حاجة و محدش ييجي يقولي ده عيب
لأن ممكن ببساطة واحدة تاني بيدور على الثبات و مش بيدور على النعومة و بالتالي الكوري أغلبه مش هايكون متوافق معاه .
الفيات عربيات أوروبي و من شركة من أعرق شركات العالم و أوروبا و مع ذلك بتعمل بلاوي
عربيات بتسخن ......... أو حساسة زيادة للسخونة ..... و قطع غيار عمرها مش كبير قوي مقارنة مع ألمانيا مثلا
هو حضرتك بتتكلم عن ال125 ؟؟ ولا 124 ؟؟؟؟
كانت فين هيونداي لما عملوا فيات 100 ولا 128 ولا كيا انا معاك الدايو قديمة
و كمان فرنسا و عربياتها اللي بتكح تراب لو شمت ريحة التراب و تلاقي الحساسات بتاعتها ضربت و العربية حلفت مين يمين أنها مش هاتدور .
كلامي مش تعميم
و لكن مقصدي
أن أحنا بنعمم الكلام و خلاص ........... و اللي يتطبق على شئ نعممه و نطبقه على كافة الأشياء من نفس النوع .
و ياريت نبقى 1÷ 100 ........... من كوريا الجنوبية .
موضوع الأمان
عربيات هيونداي أصبحت من أعلى العربيات امانا في العالم و بتأخد 5 نجوم في أختبارات أمريكا و أوروبا على سرعة 64 كم - س
محدش بقى يعملي حادثة على سرعة 180 و ييجي يقولي العربية مش أمان
أنا شايف بعيني على الدائري حادثة لعربية بي أم دبليو و العربية أتفعصت بمعنى الكلمة أتفعصت .
و دوروا على حوادث الأوتوبان في المانيا و أتفرجوا على علب السردين الألماني في الحوادث .
و برضه مش معنى كلامي أن الألماني أي كلام بل بالعكس الألماني خصوصا بي أم و مرسيدس و أودي و الفئات العليا من فولكس بيحاولوا يعملوا عربيات متينة و قوية و تقلل الخسائر في الحوادث
و هو ده اللي هيونداي بتعمله برضه مع أختلاف المدارس .
مشكلتنا التوكيل اللي بينفض العربية من وسائل الأمان و بيضع عليها سعر عالي .
و أنا غير موافق بالمرة على أسعار العربيات في السوق المصري خصوصا العربيات اللي سوقها ماشي و فيها أستغلال من الوكلاء


Comment