عاجلجدا جدا :ارجو الدخول ,مشكلة في ورق العربية

[hamadaalo2002]

لو تكرمتم يا شباب
محتاج مشورتكم لاني قلقان جدااااااا
اشتريت عربية لادا 2105 موديل 1995
العربية تسلسلها كالاتي
1 رخصة العربية
2توكيل رقم 1
3توكيل رقم 2
4عقد ابتدائي للتاجر اللي اشتريت منة من صاحب التوكيل رقم 2
5عقد ابتدائي باسمي بمبلغ 23 الف جنية وفاضل لة 2 الف والمفروض صاحب التوكيل رقم 2 حيعمل لي انا التوكيل
وطبعا الرخصة مش معايا دلوقت مع الراجل بتاع التوكيل
دلوقت الواضح ان في مشكلة بين اللي انا اشتريت منة واللي قبله علي فلوس بينهم

ومعطلين التوكيل

انا اعمل اية ؟
موقفني القانوني؟
هناك شرط جزائي 1000 جنية علي من يغير رائية ويريد فسخ العقد

[banboty]

خلى التاجر يرجع لك فلوسك لغاية اما يحلوا المشكلة بينهم
واذا محصلش ..... و غالبا مش هيحصل
لانه هيقعد يماطل معاك , بكرة يا استاذ , طب بعده
تقوم انت تطلب منه ميعاد محدد لتسليم الورق ..

و في نفس الوقت تهدده بالذهاب الى اقرب نقطة شرطة و تشتكيه بالعقد الابتدائي

بس انت غلطان برضوا , علشان مشفتش صاحب التوكيل التاني و اتعرفت عليه من البداية , لان الراجل ده يعتبر صاحب العربية و في ايده كل حاجة ..

[hamadaalo2002]

الراجل يا جماعة معندوش مانع يديني الفلوس
بس كل اللي شاف العربية قالي تستاهل ال 25 واكتر كمان
طبعا انا جديد الخبرة ولكن اخي سهت عنة تلك النقطة
اية الحل؟
منتظر ردود عمالقة المنتدي

[banboty]

و ايه اللى يضمن لك فلوسك !!

يعنى احتمال خسارة المبلغ كله

و لا الالفين جنيه الفرق اللى بتقول عليه ....تزغللك ...

[hamadaalo2002]

يعني انت عاوزني اعمل اية يا باشا ؟

[banboty]

يا معلم

خد فلوسك الاول ... اضمن


و المثل بيقول
ابنى يبفي في حضنى

ليه اروح ادور عليه

[hamadaalo2002]

طيب انا صرفت علي العربية 250 جنية ؟
اية الحل؟
وانا موقفي ضعيف اوي كدة؟

[ابوشريف]

طيب انا صرفت علي العربية 250 جنية ؟
اية الحل؟
وانا موقفي ضعيف اوي كدة؟

بناقص ال 250 جنيه دى

واسترد فلوسك بدل ما تفضل فى قلق على الاقل تريح بالك وكأنك أتاجرت العربيه بال 250 جنيه

[ابوشريف]

أصلا المفروض متشتريش عربيه فيها اكثر من توكيل واحد

والاضمن من صاحبها الاصلى

[ابوشريف]

وبعدين ازاى عربيه مرت على كل التجار دى ( توكيلين وعقد ابتدائى ) ولسه فيها مكسب 2000 جنيه أنا أشك الصراحه

[MohabSaeed]

فعلا الاضمن... استرداد الفلوس .
مافيش حاجة اسمها عربيه لقطه . زى مالقتها حتلاقى غيرها ويمكن احسن .
اساسا صاحب العربية " الى معاه التوكيل رقم 2 "... ممكن يروح يبلغ ان العربيه اتسرقت منه . لان العقد الابتدائى .... مايملكش التاجر العربيه ... ولا يملكهالك .

وغلط جدا انك تشترى عربيه من تاجر... وهو اساسا ممعاهوش توكيل ... ومجرد عقد ابتدائى .

" بس لو الزوق مانفعش مع التاجر استخدم معاه الاسلوب التانى "
وقوله ياتخلص المشكله فورا .. ياترجعلى الفلوس وفوقيهم ال 250 جنيه كمان .

[hamadaalo2002]

يا باشا صاحب التوكيل عامل عقد ابتدائي للتاجر وكمان عاطي لية الرخصة بالاضافة ان العربية معانا
وكمان التاجر دة سمعتة حلوة ومسموع انة رجل محترم
وبيقولي معلش يومين ويكون التوكيل معاايا

[hamadaalo2002]

ردود يا رجالة

[Ahmed Samy]

ماهو النصباية لازم تكون طعمها حلو (عربية لقطة - سعر رخيص- سمعة حلوة)
اومال الناس بتقع ازاي

خد فلوسك يا ابن النااااااااااااااس و احمد ربنا
و الله بعد كده العربية فضلت و بقى معاك ورق سليم 200% ابقى كمل

و من رايي فكك

[nasr-eldeen]

يا باشا صاحب التوكيل عامل عقد ابتدائي للتاجر وكمان عاطي لية الرخصة بالاضافة ان العربية معانا
وكمان التاجر دة سمعتة حلوة ومسموع انة رجل محترم
وبيقولي معلش يومين ويكون التوكيل معاايا

لو فيه توكيل 2 مع التاجر اللي باع لك يعني ( وكيل وكيل ) ومعه رخصة السيارة ايه المانع انه يبيع لك .هناك احتمالين
1 - الرخصة غير سارية
وفي الحالة دي يستطيع أن يذهب الى المرور ويستخرج شهادة بيانات للشهر العقاري ويعملك توكيل ( والافضل تسجيل مباشر ) .
2 - وكيل الوكيل ليس له الحق في توكيل الغير (بيكون مذكور هذا الشرط في التوكيل اللي معاه ).
وفي الحالة دي إما يكون البيع مباشر أو تأخذ توكيل مباشر من موكله ومعتقدش ان ده ينطبق على حالتك .
هناك شيء غامض :
لو هذا التاجر معاه توكيل (صحيييييييييييييييييييييييييييييح ) والرخصة والسيارة
لا يوجد مانع من أنه يبيع لك لأن التوكيلات التي يكون بها مصلحة للطرفين غير قابلة للإلغاء إلا بحضور الطرفين ( مثال ذلك السيارات ) ومحدش بيعمل توكيل أو بيسجل سيارة إلا بعد حصوله على مستحقاته .
فلو التاجر معه التوكيل والرخصة والسيارة ممكن يسجلك أفضل أو يعملك توكيل أضعف ( ليها ديول ) وتستلم سيارتك .
وهناك نص قانوني ( الحيازة في المنقول سند الملكية ).
ولو مش واثق منه 10000000000% خد فلوسك وربك يعوضك عنها خير منها
وتأكد ماأخطأك لم يكن ليصيبك .......... وما أصابك لم يكن ليخطأك