عنيه دمعت ومنمتش من انبارح

[prosecutor]

بسم الله الرحمن الرحيم

انا عارف ان كتير من الاخوة الاعضاء هيستغربوا من عنوان الموضوع بس فعلا هى دى حالتى من انبارح فعلا :

انا بيعت انبارح عربيتى حبيبتى لانسر كريستالة ومتتخيلوش كمية الزعل والحزن عليها اد ايه حتى زوجتى زعلت عليها هو انا معرفش ليه بعتها بس هو نصيب..
هى على فكره معايا بقالها 7 شهور عمرها فيوم ما حطيتنى فى موقف محرج كانت شيلانى انا كنت جبتها ب 42 الف وصرفت عليها رخصة وطقم جنط حوالى 2000 جنيه ...
حبيتها اوى واعتزيت بيها جداا كانها ابنى مع انى كنت ماهمل فيها خاصة ان صاحبها كان برده مهمل فيها بس ده بسبب ظروف انى داخل على جواز كمان شهر ..

الراجل الى جه اشتراها انا قلتله 45 الف علشان هو يمشى ومش حابب ابيع لقيته وافق حاولت ازهق قيه واطفشه مفيش فايده لدرجة انه جالى مرتين وهو من محافظة تانية ..

المهم تحت ضغط واحد قريبى معرفته وتحت انى احتمال كبير ان شاء الله اسافر السعودية قريب وتحت الحيرة قلت موافق ازاى معرفش على الرغم ان العربية فيها شغل وانا ها احاول اوصفها وصف دقيق ومش عارف بعد الوصف ده اذا كنتم هتهنونى ولا تعزونى وتزعلوا عليه المهم هى :

عربية لانسر كريستالة موديل 99 راشة بره ماعدا السقف ... والشنب بتاع العربية راشش .. ومحتاج يتعدل لانه معوج سنة بسيطة...

العداد عامل: 285.000 الف كيلو ...

العربية اتوماتيك + زجاج كهربا +تكييف + بدون مرايات كهربا

الماتور: صوته عالى وبياكل زيت وفيه دخان ابيض بيطلع من الشكمان تقريبا الماتور مفوت ...

الفتيس : عند النقلة للغيار 3 بتكون العربية مخنوقة اوى وصوت المتور بيعلى وبتحس بالنقلة اوى...
الفتيس لما بكون ماشى على سرعة السلانسية او اجيب الفتيس على ال R بسمع صوت زنة او تكتة كان بيضايقنى جداا.. ومكنش الصوت ده موجود من الاول...

فيه تسريب فى زيت الفتيس لما بصيت على العربية من تحت + ووجود زيت على المكنة من جوان التكيهات...

استخدمت زيت شنبر مرتين ليها مع غيار الزيت ولما كنت اوقف العربية واقفل الكونتاك والمتور بيبطل كنت بسمع صوت زى رزع او هبد فى الماتور احيانا...

استهلاك بنزين عالى اوى مره حسبته لقيته 37 لتر ل 220 كيلو

العفشة تقريبا متوسطة ..

+ ان العربية محتاجه كبوت لانه بلغة الصانيعية مفتول من النص وفيه شرخين صغيرين وخبطة بسيطة زى نقرة كده هو ممكن يمشى وعلى فكره هو مش الكبوت بتاعها ده متغير بواحد من الاسمر واترش +اكصدام امامى + فانوس كامل شمال + شبكة امامبة + ان السمكرى قال انها محتاجة رفرفين لانه بيقول عليهم منفخين مش عارف بصراحة يعنى ايه بس فعلا تحس انهم فيهم حاجة غلط وكمان فيهم واحد مفارق عن الباب +اكصدام خلفى مش اصلى ومفارق وفيه شرخ...

فيهم بابين محتاجين شغل سمكره + سمكرة بسيطة غى الرفرف الخلفى والسقف مطبق حجات بسيطة بس رفضت اعمله ليحتاج يترش وهى مش ناقصة ....

التابلوه حالته كويسة +فرش العربية من جوه كان معقول بس كرسى الامامى متبهدل وباين فيه الاسفنج....

الكاسيت الاصلى + جنط مستعمل 13 حالته معقوله بس متخربش شوية + كاوتش بريدجستون حالته كويسة +بطارية جافة حالتها حلوة ....


بعد ما بعتها بسئل علشان اشترى عربية كريستالة لاقيت 3 عربيات:

1_ لونها كحلى مش بحب اللون ده بصراحة راشة بره مانوال 48 الف
2-واحدة نبيتى راشة بره بدون طقم جنط اول كلمة 52 ممكن تنزل ل 50 ومكملتش كلام معاه وهى على مانوال برضه ..
3- واحدة لونها ابيض راشة بره بس هو بيقول لا والرخص منتهية ب 55 الف اتوماتيك دى ..

'طبعا رجعت مضايق اكتر بس يلا ربنا يبارك للى اشتراها ويبارك ليه ادعولى ...
ولو حد من الاخوة الاعضاء قدامه حاجة كويسة ياريت يقول ...

على فكرة محتاج اوى مشاركتكم

[Nistelrooy]

لو علمتم الغيب لاخترتم الواقع

يا راجل بركه انك بعتها هههههههه ,, بهزر وان شاء الله تلاقي حاجة احسن منها :)

بالتوفيق

[hugan]

معلش خيرها في غيرها
لكن كل اللي فيها وزعلان عليها

[egyptiandiver]

يا رجل بلا وش! اديك خلصت منها و من إلي فيها، عربية عملة بتاع 300,000 كم و موديل أديم بألو 13 سنة بيدحر في شوارع المحروسة و ركبت العربية 7 شهور و خدت فلوس كمان... الحمدلله بدل ما كنت تلبس في موتور ولا فتيس ولا بتاع. بكرا ربنا يكرمك و تروح الخليج و تجيب تويوتا كامري ولا حاجة و ربنا يوسع علينا و عليك. و د رائي مفيش فايدة على أي حل من البكاء على اللبن المسكوب و إنظر ذي ما عم قذافي بيأول إلى الامام ... إلى الامام... ثورة! ثورة! أحمد سامي

[Eng.Geo]

الحمد لله
علي الحالة اللي بتقول عليها ده .. العربية ده في الضياع ... وشوية كمان كانت هتصرف جامد جدا
انت بعتها بسعر ممتااااز

[magyver]

كويس انك بعتهاا
انا لو باخد العربية دة مش هاخدها ب40 الف جنية
بس اللي خدها دة اكيد تاجر صح

[minicooper20]

انتا ربنا بيحبك و فلوسك حلال
اشكر ربنا انك بعتها و كسبت فيها

[walidzakzok]

بصراحة اللي اشترى العربية هو اللي مفروض يعيط

[medoghaly]

انت كدة استريحت منها كان شوية و هتبهدلك مصاريف و ربنا يكرمك بواحدة احسن منها

[mohkhattab]

الحمد لله على كل حال
ربنا يعوضك باللى احسن منها .

[Mohamed_Hegazy]

سيبك من الفكر القديم - وفكر فى عربيه اقل بس تكون احدث وغير مهانه بالشكل ده - لو هيه دى الميزانيه فقط

[SAMEH_FOUAD]

معلش هو حضرتك بتعيط لية انت المفروض تستريح وبعدين العربية اصلا مقعدتش معاك سنة عشان تتعلق بيها

دة غير انك كنت مهملها فاكيد ماكنتش بتحبها

عموما الحمد لله انك خلصت منها العربية دية اقدر اقولك حاجة واحدة ان اللى اشتراها دة كسبان مش خسران وانت اللى خسران

لانك لو كنت جيبت محرك بفتيس بعفشة كان تمنة لا يتعدى ال4000 جنية وتظبيط الفرش والدهان الخارجى كان هيعمل 2500 جنية وهترجعها جديدة وتبيعها بالسعر اللى انت لاقيتة برة

عموما حصل خير وان شاء الله ربنا يعوض عليك باحسن منها

[medododo]

يا غالي ده انت ربنا بيحبك
انك خلصت منها

[HeMa_LanCeR]

اومال انا بقي لما بعتها اعمل ايه
وعلي فكره انا اباعت غصب عني مش بمزاجي
يعني صحيت من النوم علي المكتب عند الحاج لقيت المشتري بيكتب العقد :)
والحمد لله كل اللي كان فيها مستر الدبرياج محتاج انه يتغير :)

[omrkhaled]

الله يكون فى عون الى اشتراها
وانت مبروك عليك وتجيب احسن وربنا يبارك