شاكة في حد اعرفه انه سارق عربية

[نور القمر]

شوفت عربية نيسان سودا موديل قديم شوية يمكن تسعينات من غير نمر راكنة في شارع
سألت الولاد اصحاب ولادي بتاع مين
قالولي بتاع اخوعمو فلان جارهم والشخص ده انا اعرفه وكان مرة حكالي ان اخوه تاجر سيارات واتسرق منه عربيتين الفترة اللي فاتت
وانا تلقائي لما عرفت انها تبعه بصيت فوق على شباكه
الرجل كان واقف في الشباك ولاحظ اني بشاور على العربية ولقيته بيبص لي شذرا
حاولت اصور العربية بس للاسف الموبايل كان بايظ وقتها بس هحاول اروح تاني واصورها
انا دلوقت مش عارفة اتصرف ازاي
لو عربيته فعلا او عربية اخوه ايه اللي يخليها من غير نمر ويركنها عند اخوه ليه
ولو نمرها مسروقة ليه مطلعش نمر غيرها
وليه الرجل كان متضايق اوي كدة لما حس ان العربية لفتت نظري
انا حيرانة وشاكة فيه ومش عارفة اتصرف ازاي
فكرت ابلغ قولت الشرطة مش هاتهتم ولو اهتمت انا مش عايزة اظهر في الصورة ومش ضامنة يخفوا شخصية المبلغ ولو اخفوها مهو اكيد هايشك فيا وممكن بعد ده كله تطلع بتاعتهم وانا موقفي هيكون وحش
المهم دلوني اعمل ايه حيرانة

[SAMEH_FOUAD]

احسن حاجة تعمليها عشان بس الاول تبعدى عن نفسك المشاكل تقولى مثلا انك عايزة تعرفى العربية دية للبيع ولا لأ او حاجة زى كدة كأنك هتشتريها مثلا لو ليكوا كلام مع الراجل دة . ودة عشان تأمنى نفسك انت الاول طالما شافك مهتمة بأمر العربية

بالنسبة بقى لموقف العربية لو فيها اى علامة مميزة من جوة خبطة اى حاجة احفظى مكانها واى حاجة تانية تفرقها عن مثيلاتها , واعتقد ان اللون الاسود فى النيسان صنى الموديل دة اصلا قليل فاكيد هتتعرف لو صاحبها بيدخل المنتدى

بس اهم ماتجيبيش لنفسك المشاكل واستبعدى الشرطة دلوقتى لانها ممكن تكون بتاعتة وساعتها هتحصل مشاكل كبيرة انتى فى غنى عنها

[alaa7sh]

هو اللي مسروق منك صني والا اكسيل ؟

[A.Saad]

لو هتبلغى لا تسألى ولا تبينى نفسك ولا تهتمى بيها
علشان ميكونش فيكى شك
ممكن تبتعتى جواب من مجهول لادارة مكافحة السيارات فى المديرية
وابعتيه من بريد برة الهرم

[kar!m]

بيتهيألى ما دام تاجر سيارات يبقى عادى .. شارى عربية و سلم النمر بتاعتها .. و مستنى ياخد نمر تانية.

تجار كتير بيكون معاهم عربيات من غير نمر.

بس أنا شايف انك تبلغى برضه .. ممكن يكون ربنا جعلك سبب ان ربنا يرد العربية لصاحبها .. لو تعرفى أى حد يعرف ضابط فى القسم يروح يقول له.

[mohammedabdallh]

Sherlock Holmes

لو بلغتى اكيد هيبقى شكل وحش
خلى حد تانى يروح يبلغ الشرطه
ومتساليشتانى عن العربيه
ولو كان تاجر عربيات اكيد اكيد مسلم النمر نص التجار بيعملوا كدا
ابن عمى ماشى من غير نمر بقاله 3 اشهر تقريبا ولا حياة لمن تنادى وبيسافر بيها على طول

[ramyhekal]

ببساطه من غير ما القلق يظهر
لو سمحت العربيه دى للبيع لان عربيتى اتسرقت وعايزين عربيه تانيه ممكن دى تبقى مناسبه لنا
هايبان من رده ومن نظرته خصوصا اول ما يسمع كلمة عربيتى اتسرقت دى

[خالد]

موقف محير فعلاً !!
رأيي أنك تستنى شوية لغاية لما هو يطمن من ناحيتك أنك لم تشكى فيه!!
وراقبيه هو هيتصرف أزاى !! غالباً لو مسروقة تانى يوم على طول هيشيلها من مكانها ويوديها حتة تانية !!
وممكن حضرتك تصوريها برضه وتنزلى الصورة على النت بس تصوريها من غير مايشوفك منعاً للمشاكل !!
أعتقد الشرطة مش هتعمل حاجة وموقفك هيكون وحش وهتبقى فى عداوة جامدة جداً جداً !

[Karim_Monir]

معلش يا نور طب انا عندي موقف مشابة
عندنا واحد في الشارع عنده مرض السرقة
ودايما بيسرق غطيان العربيات والطاسات واتمسك واتفضح كذا مرة وبقي معروف رغم انه بيشتغل مهندس ديكور وزوجتة مربية فاضلة
انا عارف انه في ضائقة مالية
بعد الثورة لقيتة جايب ماتريكس الشكل اللي بينزل برة غير الشكل بتاعنا وم غير نمر
وبعد فترة طويلة كام شهر لقيتة مركبلها نمر
وانا شاكك اكتر من 70 % انها يا مسروقة من ليبيا يا كانت نمر افارج واتسرقت
ويمكن النمر كمان مسروقة ولبسها عالعربية
وبرضه حاسس اني كاتم حق ومش عارف اعمل ايه

[mado83]

بلاغ من مجهول بيقول ان فى عربيه نوعها كذا واقفه فى الحته كذا شكلها كده مسروقه
ياريت حد ياجماعه يامحترمين يابتوع الشرطه تروحو تشوفو ايه القصه
وانا نفسى اعرف حاجه مهمه
هو مافيش حد هنا فى المنتدى ظابط شرطه
ولا عضو هنا يكون ظابط شرطه ويعمل هو القصه دى
خدمه للمصلحه والصالح والدين
وليس خدمه للمنتدى ولا اى من هذا القبيل

[nonetta]

الحلين المطروحين كويسين اوي يا نور
الاولاني انك تعرضي عليه انك تشتريها
التاني ان لو في حد يعرف حد من الشرطة يبلغه يروحوا يتحروا عنها
بس بسرعة قبل ما يصرفها
ولو عاوزة تبلغي او تصوري بلاش انتي حد غيرك يعمل كدة
عشان العين عليكي وما تتإذين انتي ولا اسرتك بعد الشر عليكو

[نور القمر]

مكنتش اعرف معلومة ان التاجر بيسلم نمر
هو الرجل منعرفش عنه حاجة وحشة ابدا وموضوع النمر بس اللي اثار شكوكي
خلاص بلاغ من مجهول مش هيضره لو عربيته سليمة وفي نفس الوقت ضميري يرتاح

@alaa7sh
المسروق مني اكسيل

[elbeheri]

ياسلام لو الناس كلها تبقى ايجابية زى حضرتك !
كنا هنبقا افضل شعب فى الدنيا كلها

[MOSHAKS]

خلى زوج حضرتك يكلم الراجل انه عايز عربية للمدام لان عربيتها اتسرق وكانت شافت النيسان وقالت كويسة وعالية شوية وبتستحمل هى للبيع وانت ايه رايك فى النيسان وكده جر كلام وتبئا بعدتى الشبهة عنك وبكده هيعرف انتى كنتى بتبصى على العربية علشان معجبة بيها وهيبان من رده لزوج حضرتك اذا كانت العربية تمام ولا فيها لعب وعادى خلاص وحبايب بردوا

[ashouhdy]

راجل مسروق من اخوة عربيتين وهو تاجر وراكن عربية من غير نمر تحت بيتة لحد مايركبلها نمر أكيد حيبقى متشعبط من البلكونة يانور ومراقبها لتتسرق ذى اخوة

انتى تقلقى لو معروف انة سمعة سيئة