استفسار خاص بالجمارك

[إسلام شاهين]

طبعا إنتوا عارفين أسعار العربيات هنا في قطر عامله إزاي .
المهم أنا بقارن بقالي فترة ما بين المستعمل والجديد وعايز مشورة ونصيحه منكم للتالي :-
فكرت الأول في الكامري المستعمله من موديل 2000 ل 2005 هما شكلين مختلفين بس بصراحه أحسن من بعض وسعرهم معقول بيبدأ من 20 ألف إلى 30 ألف ريال قطري .

ثانيا جاتلي فكره إني ليه ما أجيبش عربية جديدة صغيرة للمدام منها هتنفعني هنا ومنها أنزل بيها بعد لما يشاء ربنا وتبقى بتاعتها ففكرت في كذا نوع منهم :-

1- السريون وهنا عاملة بالضبط 38 ألف زيرو فل أوبشن أوتوماتيك
2- الماتريكس (مع إني ما بحبهاش وحاسس إنها هتبقى كبيره على المدام ) هنا ب 41 ألف ريال كاملة أوتوماتيك
3- الأكسنت ب 37 ألف ريال كاملة أوتوماتيك
4- الجيتز ب 33 ألف ريال كاملة أوتوماتيك

طيب دلوقتي أجيب الزيرو ولا المستعمل ؟ وجمرك الاثنين هيبقى عامل إزاي ؟
ولا أخليني في الجديد لأني سمعت بما إني هكون المالك الأول فمن حقي أنزلها مصر في أي وقت ومع مرور كل سنة بتنزل 5% من جمركها ؟ فمدى صحة هذا الكلام ولو نزلت بواحده فيهم هتكون أوفر من مصر بالجمرك ولا إيه بالضبط ؟

شكر وآسف على الإطالة ؟

[memo_hefnawy]

إسلام باشا صباح الفل يا زعيم :) يارب تكون بخير إن شاء الله

شوف المستعمل مش هاتقدر تنزله جمارك إلا لو القانون إتغير

لازم تكون الماللك الأول و إشتريت فى نفس سنة الموديل يعنى لو قدامك حتى عربية 2007 زيرو ماتنفعش

ترشيحى للعربية الزيرو = سيريون بلا منافس و لو عايز توفر جمرك و بنزين هات ال 1300 كامله سحبها فل أوى على حجمها و إنت بطولك هاتركبها مرتاح أوى أنا سوقتها و عربية تمام ماشاء الله

[إسلام شاهين]

صباح الجمال يا محمود

يعني أفهم من كده إن المستعمل مستحيل ينزل مصر صح ؟

طيب إنت دلوقتي رشحت السريون طيب هي بكام في مصر ولو نزلت بيها إيه نظام جمركها وإيه موضوع الخصم 5% على كل سنة ده ؟ وكده هتبقى أحسن من مصر ولا هي هي ؟

[memo_hefnawy]

لو نزلت بيها فى نفس السنه مش هاتفرق معاك حاجة

لكن لو نزلت بعد سنتين مثلا بيها هاتحس بفرق حلو أنا مش فاكر كام بس تقريبا أول سنة إستعمال 10% و بعدين 5% على كل سنه

سعرها كام دلوقت مش متأكد بس أكيد محمد شهبور يقدر يفيدك أكثر منى

نسبة الجمارك و الضرايب على بعض مش متأكد أوى بس تقريبا 45% - الإستهلاك حسب السنين

إللى هايفرق معاك الأوبشنز على ما أفتكر

ممكن تعمل فكره صايعه يكون واحد حبيبك مصرى معاه عربية موديل 2003 و طالع و عايز يبيع (المهم أقل من 1800 سى سى عشان الدبح) و ينزلها بإسمه و إنت تشيل يبقى خدمك بس دى صعبه حد يعملها

[M.Moustafa]

استاذ اسلام يمكن اقدر افيدك شوية في موضوعك ده لاني كنت عايش في السعودية ولسه مجمرك عربيتي من اقل من شهر، العربية لازم تكون انت المالك الاول ليها في نفس سنة الشراء وده بيثبت عن طريق الفاتورة وعن طريق شهادة بيان تسجيل من المرور ومن الافضل اول ما تشتري توثق الفاتورة في القنصلية المصرية والغرفة التجارية ووزارة الخارجية عندك اما بالنسبة للخصم فهو بينزل 10% اول سنة وبعد كده 5% عن كل سنة بحد اقصى 50% ولو عندك اي استفسار تاني انا جاهز

[hero]

اسلام باشا..
جمرك العربية السيروين الـ 1300 مش هايعدي الـ 43 الف جنية بدون خصم علي الاستعمال..

ممكن تعرف الجمرك كام من الموقع دة....وممكن تراجع الجمارك من موقع الاهرام ...ملحق السيارات...

http://wowegyptcars.com/index.php?option=com_content&task=view&id=18&Itemid=32

[إسلام شاهين]

المشكلة إن السريون هنا مافيهاش غير موديل واحد 1500 كاملة أوتوماتيك ؟ فديه يبقى إيه نظامها ؟ أكيد هتبقى أغلى من 1300 ، وسعر ال 1500 في مصر كام يا ترى ؟

[M.Moustafa]

سعر السيريون 1500 اتوماتيك في مصر 91 الف جنيه وفي كل الاحوال انك تشتري عربية من بره مصر هتبقى ارخصلك من مصر وخصوصا في المواصفات الخليجي انا معايا ميجان موديل 2006 فول اوبشن دفعت عليها 39 الف جنيه نصيحتي ليك تشتري عربية من عندك وعلى فكرة انت مضيق خياراتك في حاجات قليلة لانك ممكن تشوف الكليو او تشوف الفابيا الشكل القديم معظم العربيات الياباني جمركها غالي وعشان كده سعرها بيبقى عالي لكن السكودا تشيكي وفي اتفاقية بين مصر والتشيك فجمركها قليل والرينو تقفيل تركي وبرضه جمركها قليل وفي الاخر الاختيار ليك

[Karim_Monir]

مانصحكش باي كوري هناك
خليك فعلا في حاجة ياباني بقي
والسريون اختيار ممتاز فعلا وال 1500 اتوماتيك رائعة
وتقضي بيها نت ويوم ما تنزل تجيبها معاك
بس لوركبتها مش هاتعرف تركب الانسر ال 1300 تاني
صباحك فل يا سالام
عملت ايه في ال 960 جبتة ولا لاء

[إسلام شاهين]

صباح الفل يا كريم

والله هي السريون عجباني لأنها مناسبة جدا للمدام ونظام القسط هنا مرييييييييييح جدااااااااا بس الناس هنا بتقولك سريون إيه مش هتستحمل الجو هنا مع إني شايف إن فيه ناس كثير راكباها .

بما إنك دخلت بقه في الموضوع أنا شفت النهارده تويوتا كورلا أول مرة أشوفها لأن فيها مرايات بإشارات وحساسات ركن كل ده أصلي والكاسيت من جوه نفس هيكل بتاعك بس مختلف الشكل تماما أشيك بكثير ومكتوب عليها من بره إكسيكيوسف يعني إيه بقه الموديل ده وإيه نظامه واختلافه عن اللي عندنا لأني أول مرة أشوفه ؟

بالنسبة للسوني إريكسون أنا صرفت نظر عنه لأني مستني النوكيا ال N96 هينزل هنا كمان أسبوع وعاملينه دعهايه جامده والجهاز فعلا تحفه ، مش عايز حته معايا ؟

[أبو عبدالله]

1- السريون وهنا عاملة بالضبط 38 ألف زيرو فل أوبشن أوتوماتيك
2- الماتريكس (مع إني ما بحبهاش وحاسس إنها هتبقى كبيره على المدام ) هنا ب 41 ألف ريال كاملة أوتوماتيك
3- الأكسنت ب 37 ألف ريال كاملة أوتوماتيك
4- الجيتز ب 33 ألف ريال كاملة أوتوماتيك

يا ربي
حد يقول الكلام ده للي كانوا بيقولوا ن السيريون غاليه

سعرها اقل من الماتريكس
واعلى من الاكسنت بألف ريال فقط

وهيا 1500 سي سي كمان وفول اوبشن


انا انصحك بيها يا اسلام والله بجد هتعجبك وهتريحك جامد

وعلى فكره يا محمود هو جربها مني وساقها وعارف

اي استفسار تاني مفيش مشكله

[M.Moustafa]

استاذ اسلام انا عايز اكد عليك حاجة مهمة اتاكد لو هتاخد العربية قسط ان العربية تكون باسمك لان برنت المرور لو طلع باسم تاني غير اسمك مش هينفع تجمرك العربية

[rafeee2]

معظم العربيات الياباني جمركها غالي وعشان كده سعرها بيبقى عالي لكن السكودا تشيكي وفي اتفاقية بين مصر والتشيك فجمركها قليل والرينو تقفيل تركي وبرضه جمركها قليل

هو الجمارك حسب بلد التقفيل ولا بلد الماركة؟؟

[rafeee2]

وفي كل الاحوال انك تشتري عربية من بره مصر هتبقى ارخصلك من مصر وخصوصا في المواصفات الخليجي

لأ خد بالك أوقات مش بتوفر
عشان فيه توكيلات بتستهبل و تعلى أسعار العربيات جداً
عايز أقولك مثلاً الماتيريا هنا ب 4000 دينار كويتى، يعنى 80000 جنيه، و احسب انت الجمرك
أى عربية قبل ما تجيبها اعرف ثمنها فى مصر الأول

[اسلام المصرى]

بسم الله الرحمن الرحيم
أذيك يا سولوم؟ عاش من شافك :) , بالتوفيق ان شاء الله. طمنا عليك , أخبار الحياة و الشغل أيه معاك؟