الـشـحـاتـة بـالـتـنـظـيـف الاجــبـاري .. تـحـت شـعـار ( استحمل نزولك الشارع )

[Amr Axel]

بسم الله الرحمن الرحيم
السلام عليكم و رحمة الله و بركاته

طبعا بيبقي شئ مستفز انك تكون لسه منضف العربية و تعبان فيها حوالي 4 -5 ساعات و خاصة لو عاملها بولش و شمع و العربية كأنها لسه طالعة من المصنع

و تلاقي شخصية مش باين لها معالم جيه بالحتة الزفرة المهببة ع العربية و الازاز

كل يوم نفس الموضوع في اي مكان سواء اشارة او نادي او شارع عادي راكن فيه
لغاية ما كرهت النزول

الادهي بقي انهاردة في ميدان العباسية و انا خارج من الجامعة لقيتهم عاملين تجمع عند الاشارة 5-6 عيال يتراوح اعمارهم من 6-15 سنة واقفين و يتلموا ع العربية يخلوها مش نافعة تاني بغباوتهم و تناحتهم
تقوله لأ متنضفش ينضف بالعافية و كأنه اجباري زعقت فيهم و كنت هنزل اضربهم

و طبعا مقولكوش الكبوت و الازاز بقي عامل ازاي

و الناس كلها عمالة تزعق معاهم دول ناقص ينضفوا الموتسيكلات

مع العلم انهم ممكن يقلبوك و يجروا و مش هتعرف تجيبهم لو لياقتك البدنية لا تسمح
او مش هتسيب العربية و تنزل وراهم و يجي واحد ياخد العربية و يجري

انا عايز افهم نخلص من الشحاتين من بتوع حسنة قليلة تمنع بلاوي كتييرة
يطلعلنا شحاتين بالتنظيف الاجباري

عايزين حل يا جماعة للموضوع ده لأنه انتشر في الشوارع بشكل لا يصدق
دول تفوقوا ع السايس اللي بيقف في كل مكان

و بمناسبة السايس عايزين لهم حل دول كمان بقوا في كل مكان لدرجة اني في شارع جانبي متفرع من الشارع اللي ورا عباس العقاد الاقي واحد ناططلي برده و احلي حاجة لما يقولك تعالي تعالي ارجع ارجع
امبارح و انا في مكرم عبيد لقيت عربية جيب سايقاها واحدة عمال يقولها تعالي تعالي و انا واقف وراها و الشارع واقف و زحمة كانت هضيع العربية بالديفندرات
نزلت اقوله هو ايه اللي تعالي تعالي شايفني حتة طوبة مرمية وراها و ركبت و مشيت


و بمناسبة الشحاتين بتوع حسنة قليلة تمنع بلاوي كتييرة اكيد كلنا شوفنا الشحاتة المعتادة في كل مكان اللي لابسة نقاب عشان محدش يعرفها و تلاقي الهانم مليونيرة اساسا و مش محتاجة لكن اهو تلقيط رزق أصل الايد البطالة نجسة



عــــــــــــــايــــــــزيـــــــــــن حـــــــــــــــــل ؟؟!!

[ashouhdy]

متفتحش الشباك من الاساس ... واعمل ذيى سيبوة يليطها و ولا تعبر اللى خلفوة من الاساس

[Amr Axel]

متفتحش الشباك من الاساس ... واعمل ذيى سيبوة يليطها و ولا تعبر اللى خلفوة من الاساس

هههههههه الموضوع مش حكاية اسيبه الموضوع انك تتعب في عربية و تظبطها و يجي واحد تيت من دول يهبب الدنيا تقولي اسيبه ده انا ببقي عايز اعلقه في ميدان عام
لو العربية متربة و كده كده هغسل بكبر مع ان الحتة الزفرة ديه بتبقي غلط ع الدهان ع حد علمي
لكن العربية لسه نضيفة و ينيلها لا و الف لا

[ecybrarian]

ههههه فكرتني بصبحي funnyMickey..صبحي دا زميلنا في المنتدى بس استاذ في الكتابة الساخرة..انت كمان استاذ قي الكتابة الساخرة على الرغم من سواد الموضوع...انا بجد مش عارف اقول لك ايه؟؟ انا بقيت باشتري اي حاجة من إللي بيبيعوا في الاشارات واقول لنفسي احسن ما يشحتوا..لأ ولسة لما الصيف يهل علينا الشحاتة والغتاتة وسرقة العلامات هاتزيد اضعاف..ربنا يستر

[ashouhdy]

ماهو مش حتنزل بمستواك لدرجة انك تمسك فى خناق واحد بلطجى بفوطة زفرة

اقولك

خليها وسخة وكبر دماغك هههههههههه

[AirForces]

انا مرة ركنت العربية مفيش خمس دقايق لقيت عيلين من دول بفوطة زفرة مليانة جاز وخدلى العربية كلها جيت شوفت الفاجعة الأزاز ما بقتش شايف منه لمتر قدامى والدهان كله جير ودول واقفنلى عاوزين فلوس بقا .. طلعت وانا مش شايف اى حاجة لحد ما بعدت عنهم ونزلت غسيل فى العربية من اولها لأخرها .. بجد حاجة مستفزة ربنا يرحمنا

[BLOODY_STONE]

انا بفتح الازاز لما يقرب من العربية اللي قدامي او جنبي (الضحية) و لما يقرب عليا اقوله ايااااااااااااااك تلمس العربية ... و اديله بصه مقرفة كده ....

لسه يوم الخميس اللي فات واحد بقى موضة جديدة لقيته معاه جردل مية بصابون و مساحة ... و جاي جري عالازاز .. ببساطة قمت مشغل المساحات و مغرقه ميه و نزلت زعيق فيه معرفتش امسك اعصابي ..

[saadelden]

انا مابقيتش اغسل العربيه و اهتم بيها من برا بسبب وجع الدماغ دا
دلوقتي الي ينطلي بفوطه زفره اقوله ماتمسحهاش و لو مسحها بمشي و مابديلوش حاجه

و بمناسبة الشحاتين بتوع حسنة قليلة تمنع بلاوي كتييرة اكيد كلنا شوفنا الشحاتة المعتادة في كل مكان اللي لابسة نقاب عشان محدش يعرفها و تلاقي الهانم مليونيرة اساسا و مش محتاجة لكن اهو تلقيط رزق أصل الايد البطالة نجسة

فكرتني بشحاته في المترو كنت بشوفها كل يوم علي مر 4 سنين
بقالي سنتين مابركبش المترو و جيت ركبته من يومين لقيتها لسه بتشحت بردو !!

و الله الناس دي ماعندهاش ريحه الدم

[msa142]

موضوع جه فى وقته بصراحة يا جدعان الى يمشى معاهم بمثل ( ناس تخاف متختشيش) ميتعبش فى البلد دى. يعنى انا من كام يوم جه واد من اياهم معداش 16 سنه ولسه بيلمس العربية رحت مديله كلاكس فى وشه بصلى شاورتله بقرف ميمسحش,من غير مافتح ازاز واترجى فى سعادته مش عايز غسيل انهارده, لو انتا جيت تركن فى حته وجالك سايس وعايز تمشيه بالزوق ممكن تعمل نفسك بتتكلم فى الموبايل وبطل الماتور عشان يمل ويمشى, بس استناه لما يتلهى فى عربية حد تانى واركن عربيتك وانزل

[prisoner]

حاجة فى غايو الاستفزاز فعلا وبتعرض ليهم دايما والادهى بقى لما تكون عايز تركن وهما حاطيين حجارة فى شارع عمومى مثلا ويقولك 3 جنيه بارك انا بقى بيركبنى العصبى واقعد ابص حوالية واساله مش ده شارع حكومة 3 جنيه ايه بقى ومرة كنت فى رمضان وزعلت جدا لانه استفزنى وجايللى وانا ماشى وخلاص طلعت ال ايه بيطلعنى وزعل انى طنشته وشفته فى المرايا عمل حركة مش تمام نزلت ولا اعرف جبته ازاى والناس من حواليا بتشيلنى من عليه وكنت بتكلم فى التليفون معرفش بقى فين واول مرة فى حياتى اسيب العربية دايرة وانزل منها كان ممكن تتقلب فى الزحمة بس من حظى الكويس انه كان معايا صاحبى واستغرب من موقفى خصوصا ان احنا فى نهار رمضان بس حسسنى انى دوست على رقبته وانى مفترى والكلام المحفوظ ده بصراحة انا قعدت فترة قاعدلهم وفترة اطنش واديهم علشان مش كل شوية اهاتى مع حد ده حتى فى انظف البنزينات تلاقى واحد نط والياه سبقته على الازاز وبعد كده يسالك امسح والا لا مش عارف ايه الفهلوة اللى بقينا فيها ياترى ده ذكاء زايد والا كارثة احنا فيها ربنا يلطف بينا اللهم امين تحياتى

[tarek_2005]

موضوع جه فى وقته بصراحة يا جدعان الى يمشى معاهم بمثل ( ناس تخاف متختشيش) ميتعبش فى البلد دى. يعنى انا من كام يوم جه واد من اياهم معداش 16 سنه ولسه بيلمس العربية رحت مديله كلاكس فى وشه بصلى شاورتله بقرف ميمسحش,من غير مافتح ازاز واترجى فى سعادته مش عايز غسيل انهارده, لو انتا جيت تركن فى حته وجالك سايس وعايز تمشيه بالزوق ممكن تعمل نفسك بتتكلم فى الموبايل وبطل الماتور عشان يمل ويمشى, بس استناه لما يتلهى فى عربية حد تانى واركن عربيتك وانزل

اعتقد دا تصرف خاطئ لانك بتتقي شره بجوز الجنيهات الي بتدهوله بدل ماترجع تلاقي العربية بها حكة او خربوش او فانوس مكسور وساعتها لو نفضته مش هتعرف تتطلع منه ربع ثمن الاصلاح

[ahmedaglan]

الفترة الجاية ان شاء الله هتبقي احسن ومش هنشوف العيال الي بيسرحوهم العالم بنت التييييييييت الي نفسي اشوف واحد منهم

[ahmedsrs]

بكل بساطة ممكن يجرحلك العربية او يخبط الزجاج بحتة طوبة وانت الخسران والحل بسيط جدا خلى معاك فى العربية شوية اربع اول مالحبيب يقرب افتح القزاز وشاورله بالمعلوم وياريت تعمل انه وقع من ايدك هيوطى يجيبه ويبعد عنك او عربية تشيله وتخلصنا من قرفه

[el_nahal2004]

بكل بساطة ممكن يجرحلك العربية او يخبط الزجاج بحتة طوبة وانت الخسران والحل بسيط جدا خلى معاك فى العربية شوية اربع اول مالحبيب يقرب افتح القزاز وشاورله بالمعلوم وياريت تعمل انه وقع من ايدك هيوطى يجيبه ويبعد عنك او عربية تشيله وتخلصنا من قرفه

بالفعل حصل مع اخويا كسروله فانوس وخربشوله العربية بمسمار تقريبا مع انو ادالو بس تقريبا كان ربع جنيه تقريبا استقلوا الفلوس كمان لما رجع لقة العربية كدة
حسبى الله ونعم الوكيل فيهم

وانا فعلا بالنسبالى بحاول اخلى معايا انصاص او اربع فكة بدهلهم وللاسف مبلحقش ااقولهم متنضفوش

[Ashraf_Ashraf]

انا بفتح الازاز لما يقرب من العربية اللي قدامي او جنبي (الضحية) و لما يقرب عليا اقوله ايااااااااااااااك تلمس العربية ... و اديله بصه مقرفة كده ....

انا عملت زيك كده فى اشاره فى الزمالك البنت اللى هتنضف راحت تفه على الازاز الامامى وطلعت تجرى وشوف بقى القرف كله فى تنظيف الازاز من اللى عليه