مخالفة كافة شروط الترخيص ! مخالفة غريبة ! !

[Ahmod]

السلام عليكم ورحمة الله وبركاته

زي ماحضراتكم عارفين اني مع الاسف اتمسكت في كمين من حوالي عشرين يوم تقريبا واتعلقت وده بسبب الملزقات والاستيكرات اللى عاملها على العربية

الكمين رفض اني اشيل الفاميه والملزقات والظابط سعتها قالي انت عربيتك كلها مخالفة

سحب الرخص وكتبلي في الايصال 3 بنود

"تغيير لون - زجاج ملون حاجب للرؤية - ملصقات "

وانا والله مع الاسف وبسبب ظروف الامتحانات في الجامعة ماكنش عندي وقت اروح المرور

امتحانات عملي بعدها نظري وشفوي فمافيش وقت نهائيا

يوم السبت اللى فات كان اجازة قلت اروح اخلص موضوع الرخصة واعمل الفحص واشيل الحجات وامري لله

رحت مرور فيصل وانا بركن العربية عند المرور السايس بيقولي تمن الجراش قلتله لاء انا كدة كدة نص ساعة وهرجع اخد العربية عشان هدخلها فحص فانت عايز جراش لايه بالظبط وبعدين انا راكن في الشارع

راح قالي انت هتجدد الرخص قلتله لاء الرخص مسحوبة عشان الفاميه والملصقات وهروح ادفع المخالفات واجي ادخل العربية فحص

قالي طب ماتخليك انت في العربية وانا اخلصلك الموضوع ده كله بدل ماتتبهدل وتتعب نفسك وتقف في طوابير

قلتله هتاخد كام ؟ قالي 100 جنيه قلتله ليه ياعم مانا اعملها انا احسن

قالي هوفر عليك الطوابير والوقفة والزحمة وهنجزك في الوقت والعربية هيبقى متوصي عليها طبعا كلام مالوش اي لزمة فالاخر وطبعا لاني عارف طوابير المخالفات وبالذات مرور فيصل ممكن تفضل واقف طوابير خمس ساعات

قلتله خلاص ماشي صورتله ايصال السحب وقالي هروح اشوف المخلفات كام وارجعلك

قلتله انا وريت الايصال لواحد معرفة في المرور وقالي المخلفات دي التلت بنود دول مخالفاتهم بالظبط 56 جنيه قالي انا هتاكد واجيلك

قلتله ماشي

المهم راح وبعد فترة رجع بيقولي انت اتخانقت مع الظابط ؟

قلتله ظابط مين ؟ قالي اللى سحب منك الرخص

شديت معاه يعني

قلتله لا شديت ولا حاجة هو سحب الرخص وانا قلتله اشيلك المخلفات كلها دلوقتي وتديني الرخص قالي لاء فاخد الرخص وانا مشيت

قالي اصله كاتب فيك تقرير في المرور قلتله نعم ؟ ؟ تقرير ايه

قالي ده تقرير مش بيبقى موجود في الايصال وبيتكتب وعامل فيك تقرير هيخليك تدفع كتير وهيقرفك في الفحص

قلتله كاتب ايه

قالي كاتب انك مغيير كافة ملامح وهئية المركبة - مخالفة كافة شروط الترخيص - مخالفة فاميه واستيكرات وملصقات

قالي لو رحت بنفسك الشباك بتاع المخلفات وطلبت التقرير ده هيدهولك

قالي والحجات دي مخالفتها هتبقى 350 جنيه

قلتله ازاي يعني المفروض اني اتحاسب على المخلفات اللى مكتوبة في الايصال وبس ماليش دعوة بالتقرير ده

قالي لاء هو كاتب كدة وانت لو رحت هتتاكد بنفسك

قلتله ماشي متشكر ليك ورحت قلت اروح انا اشوف قصة المخلفات دي ايه

رحت لقيت طوابير وزحمة جدا لاني كنت رايح متاخر على الساعة 11

فقلت أأجلها يوم تاني

فانا عايز اسال حضراتكم صحيح الكلام ده ؟ هل ممكن اتخالف بمخالفة مش مكتوبة في الايصال والظابط بيكتب فيك تقرير زي ماهو عايز والكلام ده

وايه قصة مخالفة كافة شروط التراخيص دي ؟

انا اللى مكتوب عندي في الايصال "تغيير لون - فاميه - ملصقات " هل فعلا ممكن تكون مخالفتها 56 جنيه بس ؟ زي ماواحد اعرفه قالي ؟ ؟

ولو فعلا الكلام ده صحيح مش ممكن اعترض واعمل تظلم انه بيخالفني مخالفة انا ماعرفهاش ومش مكتوبة في الايصال ؟

والف شكر ليكم

[yoko]

حاسس إنها إشتغاله لكن معرفش بس ممكن تروح النيابه تقوله أنا ملزم بالوصل

[Amr Axel]

انا قولتلك الموضوع هيدخله في حدود 300-500 جنيه
روح و اتأكد و سيبك من الحوار الوقفة و مش الوقفة ما كل الناس يا عم بتقف و كلنا بنقف و نخلص حاجاتنا بنفسنا و خلاص بلاش كسل و انزل بدري اعصر ع نفسك لمونه و اصحي بدري هههههههههه
و ان شاء الله ميبقاش فيه حاجة و لو لقيت الكلام ده ممكن تدخل ع نيابة المرور و تقولهم اللي حصل و يحاولوا يظبطوا الدنيا
بس لو جينا للحقيقة انت فعلا مغير في هيئة العربية بشكل مبالغ فيه شوية :)

[Ahmod]

حاسس إنها إشتغاله لكن معرفش بس ممكن تروح النيابه تقوله أنا ملزم بالوصل

والله انا حاسس بكدة يا احمد بس مافيش وقت خالص بسبب الامتحانات وانا فعلا لو طلع التقرير ده صحيح هعمل تظلم واقول اني ملتزم بالوصل

انا قولتلك الموضوع هيدخله في حدود 300-500 جنيه
روح و اتأكد و سيبك من الحوار الوقفة و مش الوقفة ما كل الناس يا عم بتقف و كلنا بنقف و نخلص حاجاتنا بنفسنا و خلاص بلاش كسل و انزل بدري اعصر ع نفسك لمونه و اصحي بدري هههههههههه
و ان شاء الله ميبقاش فيه حاجة و لو لقيت الكلام ده ممكن تدخل ع نيابة المرور و تقولهم اللي حصل و يحاولوا يظبطوا الدنيا
بس لو جينا للحقيقة انت فعلا مغير في هيئة العربية بشكل مبالغ فيه شوية :)

والله يا باشا ماقصدي مانا بقف زي ماكل الناس بتقف

الفكرة كلها اني من حوالي سنة ونص كانت الرخص اتسحبت عشان اتاخرت في تجديدها ورحت مرور فيصل ادفع المخالفة قالي لاء ادفع في بين الساريات رحت مرور بين الساريات وصلت هناك على 8.30

وقفت في طابور بتاع ساعة كدة وفي الاخر وصلت لشباك كل اللى عمله انه قالي مخالفتك 50 جنيه روح ادفعها في الخزنة

رحت في الخزنة وقفت في طابور بتاع ساعة تانية برضوا عشان ادفع

بعد مادفعت شاورلي على شباك كدة وقالي روح هناك عشان يمضيلك على الوصل

رحت وقفت في طابور تاني انيل بتاع ساعة ونص لحد مالوصل اتمضى قلت خلاص هانت

قالي لاء اقف في الشباك اللى جمبي عشان نقشرلك على الوصل وقفت في طابور نص ساعة

بعدها وبعد عدة طوابير وصلت لفوق ال 4 ساعات اخر طابور خد مني الوصل عشان يتختم

وعمال بعد مالوصولات اتختمت كلها بينادي لحد اخر ايصال قلت اكيد انا ورحت لقيته نادى على اسم تاني

قلتله وانا فين قالي بكل برود انا ماخدش منك حاجة قلتله نعم ! ! قالي مش عارف يظهر ضاع ! ! طبعا بعد ماقال الكلمة دي انا اتفتح فيه وفتحت صوتي وقعدت ازعق جيه واحد مسؤل قالي بتزعق ليه قلتله بقالي خمس ساعات طوابير وفي الاخر تقولي الوصل ضاع

راح عملي بدل فاقد

وياريت الحكاية خلصت على كدة نزلت استلم الرخص من شباك الرخص قالي لاء رخصك تستلمها من مرورك روح مرور فيصل استلمها

طلعت على مرور فيصل كانت الساعة بقت 2 الضهر علما وصلت هناك

جيت استلم قالي انت اتاخرت تعالى بكرة عشان الشباك قفل

فانا ماكنش عندي استعداد اني اقف في الطوابير والقصة دي تاني ولما لقيت حد يخلصها قلت مصلحة واهو ارحم من البهدلة

وانا كدة ولا كدة ان شاء الله هروح بنفسي اتاكد واشوف الدنيا فيها ايه وربنا يستر

وبالنسبة لتغيير هيئة العربية صدقني انا يعتبر مش عامل حاجة بالنسبة للناس اللى بتلعب في عربياتهم انزل بس شارع المرغني واتفرج

[eldell]

ازاى 3 بنود دول 56 جنيه ده انا اتسحبت الرخصه فاميه بس وروحت دفعت المخالفه كانت 110 تقريبا ياريت حضرتك فعلا تروح وتتاكد بنفسك وربنا معاك علشان بجد حاجه خنيقه جداااااااا

[eng.m7md.ali]

كلام فارغ
اعمل حاجتك بنفسك والا هيطلع عليك مصلحة حلوة

[SYD]

احساسي بيقولي انه بيشتغلك
في حاجة اسمها كاتب فيك تقرير ؟؟؟ هو انت موظف زميله هيكتب فيك تقرير ؟؟؟؟

اساسا تلاقي المخالفات 150 ولا 200 وهو عايز يشتغلك كمان في المخالفات

انا كان عندي مخالفة ب75 جنيه (دوران في الممنوع) اخويا بعت واحد لقيتها بقدرة قادر 150 وخد هو 50 يعني دفعت 200 جنيه علي مخالفة ب75 جنيه

روح بنفسك وانشاء الله هتلاقي كل مخالفة ب50 ولا ب55 جنيه يعني اجمالي 150 او 175 بالكتير

والله المستعان
،
،

[Ahmod]

ازاى 3 بنود دول 56 جنيه ده انا اتسحبت الرخصه فاميه بس وروحت دفعت المخالفه كانت 110 تقريبا ياريت حضرتك فعلا تروح وتتاكد بنفسك وربنا معاك علشان بجد حاجه خنيقه جداااااااا

هو انا استغربت فعلا ازاي 56 جنيه !

بس معروف ان مخالفة الفاميه 30 جنيه انت ازاي دفعت 110 ؟ ؟

كلام فارغ
اعمل حاجتك بنفسك والا هيطلع عليك مصلحة حلوة

احساسي بيقولي انه بيشتغلك
في حاجة اسمها كاتب فيك تقرير ؟؟؟ هو انت موظف زميله هيكتب فيك تقرير ؟؟؟؟

اساسا تلاقي المخالفات 150 ولا 200 وهو عايز يشتغلك كمان في المخالفات

انا كان عندي مخالفة ب75 جنيه (دوران في الممنوع) اخويا بعت واحد لقيتها بقدرة قادر 150 وخد هو 50 يعني دفعت 200 جنيه علي مخالفة ب75 جنيه

روح بنفسك وإن شاء الله هتلاقي كل مخالفة ب50 ولا ب55 جنيه يعني اجمالي 150 او 175 بالكتير

والله المستعان
،
،

والله المشكلة كلها في الامتحانات والزنقة ربنا يسهل هروح يوم الخميس ان شاء الله وهقولكم عملت ايه

بس االلى فمهمته من كلامك ان مافيش حاجة اسمها تقرير

[nice_bird]

حصل معايا حوار شبه دا بس كانت زفة ايام العربية القديمة لقيت مكتوب فيا تقرير السير في موكب بدون تصريح وتركيب افراد علي جوانب السيارة وتعريض حياة الاخرين للخطر وتعطيل مرور وقصيدة كدا مش فاكرها ودفعت 625 ج فيها

[eng.m7md.ali]

الكلام ده حصل قدامي اخر مرة روحت المرور علشان اجدد
واحد واقف معايا في الطابور بيقول ان فيه واحد من برة المرور كان عايز يخلصلو تجديد الرخصة
الراجل قالو ماشي وهياخد 200 جنيه
بس شوية وبعد ماجبله المخالفات طلع عليه 600 جنيه مخالفات
رجع البيت وبعدها بكام يوم جيه تاني علشان يشوف المخالفات تاني لقى مش عليه اي مخالفة
يعني لو كان سمع كلام النصاب كان زمانه متخيط في 800 جنيه ( 600 مخالفات + 200 حلاوة )

علشان كدة اعمل حاجتك بنفسك احسن .. على فكرة انا خلصت تجديد الرخصة في 4 ايام منهم 3 ايام علشان اجيب المخالفات بس

[أبو صلاح]

بلاش التعامل مع غير موظفين الشباك

مرور السلام رغم ان فيه يفط كتير جدا تحذيرية الا انه على طول مصايب ونصب من الناس دي ومجرد ما يمسك منك الفلوس بيختفي ولا هتعرف تجيبه اصلا

[Land_Cruiser]

كلام فارغ
اعمل حاجتك بنفسك والا هيطلع عليك مصلحة حلوة

[ahmed_gamal777]

بص بنفسك احسن عشان انا كنت هتخيط قبل كدة فى رمضان فى 650 جنية
وجبت صاحب العربية وعملت خناقة وطلعت فستك مفيش عليها حتى جنية مخالفة
نفسك نفسك ثم بنفسك

[A_H_M_A_D]

خلي بالك دول نصابين , أنا كنت هاقع مع واحد منهم زمان لما كنت تبع مرور السلام قاللي عليك مخالفات ب 150 جنيه و طلع معنديش حاجه خالص