لو خبطك موتوسيكل صينى من غير نمر تعمل ايه

[dinow]

عشان اشفى غليلى منهم حضرتك ماتعرفش انا محروق منهم قد ايه انا مخبوط مرتين بموتوسيكلات صينى و اخر مرة خلت العربية شكلها غبى لدرجة انى كرهتها و هى لسه زيرو للاسف

[Ahmed Samy]

اخي العزيز

الساحة دي للاقتراحات فيما يخص المنتدى و خدمة الأعضاء أو الاستفسارات عن المشاركات او شؤون الأعضاء

مش مخصصة لاقتراح (بدهس) خلق الله في الشارع لأن مالهومش ديه

كلنا اتخربشنا منهم بدل المرة ألف بس مش معنى كده اني أدوسه

و على فكرة .....ليه دية في رقبتك عند اللي خلقو و خلقك

تقبل تحياتي

[dinow]

على فكره حضرتك انا اقصد ندوس الموتوسيكل مش اللى سايقه و دى مش همجية ولكن دليل على الفوضى اللى عايشين فيها و عجز القانون عن التصدى لهذه الظواهر و عن انه يجيبلك حقك

[zeyad1810]

"اللى يضايقه فيكم موتوسيكل صينى من غير نمر يدوسه لان ماحدش هايجبلك حقك و ماتخفش مالوش ديه "
طب مانت كدة هتموت اللى سايق
" انا اقصد ندوس الموتوسيكل مش اللى سايقه "
هو فى عربية تدوس موتوسيكل طب ما العربية هى اللى هتتبهدل

[Karim_Monir]

هو عشان تشفي غليلك منه تملي المنتدي هنا وتعملنا اغراق

[Karim_Monir]

ايوا كده ادينى حكايات اكتر خلى الموضوع يسخن

انت محسسني ان مفيش في المنتدي غير موضوعك النهاردة
كل مادخل قسم الاقي موضوعك في وشي
هو انت ال 14 مشاركة بتوعك عامل بيهم 14 نسخة من الموضوع
لا حول ولا قوة الا بالله

[محمد المشد]

على فكره حضرتك انا اقصد ندوس الموتوسيكل مش اللى سايقه و دى مش همجية ولكن دليل على الفوضى اللى عايشين فيها و عجز القانون عن التصدى لهذه الظواهر و عن انه يجيبلك حقك

يا اخى الفاضل 000 ما هذا الذى تطالب به ؟ حتى وان كان قصدك تدوس الموتوسيكل مش اللى سايقة ! فهذا امر عجيب وغريب ومنطق مغلوط ! كيف تستبيح لنفسك ان تطالب بأهدار اموال الاخرين بدون وجه حق لمجرد ان قام بخربشة سيارة سعادتكم ! الم تأتيك الخربشة من اى سيارة اخرى او ولد يلعب بسيارتك ؟ اعتقد ان الامر قد خانك به التفكير 00 فلا يجب عليك ان تستبيح اموال او اى ممتلكات للاخرين بدون وجه حق
وسؤال برىء 000 ماذا لو لم يعطيك الله سيارة واعطاك موتوسيكل
ارجوا مراجعة النفس

[dinow]

ارجوكم اعذرونى

اولا احب اشكر كل الاعضاء اللى اشتركوا فى الموضوع مهما كان رأيهم لان دى ساحة لحرية الرأى و كفاية انهم اهتموا و كتبوا ردود و انا احب الايجابية جدا
ثانيا انا باعتذر لادارة المنتدى على اللخبطة اللى حصلت و لاى عضو ضايقه انه يلاقى الموضوع متكرر لكن انا حبيت ادق جرس انذار للكل لان الظاهرة خطيرة و لازم الحكومة تلاقى حل لان الكل فى خطر حتى المشاة فى الشوارع دول اطفال اقل من 18 سنة بيسوقوا بمنتهى الرعونة وحتى الاكبر من 18 سنة نفس المشكلة موتوسيكل رخيص قطع غيارة ببلاش و مش مترخص يعنى بعيد عن اى مسائلة انا هاحكيلكم على حكاية حصلت لواحد صاحبى كان نفسى انه يحكيها بنفسه بس لظروف انشغاله هاحكيها انا عشان انا كنت راكب جنبه و هو سايق يعنى شاهد عيان

(الحكاية الاولى)
انا و صاحبى كنا رايحين مشوار و صاحبى سايق و ماشى فى سوق خضار تخيل السرعة اكيد لن تزيد عن 20كم/س و فجأة لاقينا موتوسيكل جاى قصادنا وش فى وش طاير ماشى بسرعة جنونية تخيل فى وسط سوق طبعا صاحبى وقف مكانه و قعدنا نتفرج ايه اللى هايحصل جه الاخ بتاع الموتوسيكل ياخد غرزة عشان يتفادانا قام متزحلق فى مية كانت على الاسفلت و لاقيناه جاى علينا نايم بالموتوسيكل و اصتدام جامد جدا من تحت العربية صوت رهيب كل ده واحنا بنتفرج و مالناش اى دور طبعا نزلنا لاقينا الاتى الاخ اللى سايق طار الناحية التانية لانه واضح انه نط قبل الخبطة يعنى شكله متعود على كده طبعا الموتوسيكل دمر وش السيارة تماما سيارة سبيرانزا 1600 و الخسائر كالاتى الكبوت اتقوس الشبكة و الاكصدام اتكسروا و طبعا الرادياتير و المروحة و الرفرفين اتطبقوا كل ده فى ثانية و العربية واقفة ماكانتش ماشية حتى , طبعا الموتوسيكل انتهى تماما طبعا الناس اتلمت و اتضح ان ماحدش شاف حاجة الا بعد الحادثة ما حصلت و ناس تقول هو اللى غلطان و ناس تقول حرام عليكوا دهستوا الراجل يعنى احنا اللى مفتريين و ماشيين ندوس فى خلق الله المهم قاموا الناس و خدينوا و جاريين بيه على المستشفى و ناس تقول بلغوا البوليس و ماحدش يحرك حاجه و ناس تقول حصل خير و كل واحد يروح لحاله المهم انا قلت لصاحبى احنا نخلى الشرطة تعاين و ناخد حقنا طالما احنا مش غلطنين خاصة انى لاقيت الموتوسيكل من غير نمر و بعدين لاقيت ان مافيش معانا شهود و ماحدش شاف حاجه و ان الموقف مش فى صالحنا و ممكن صاحبى يلبس قضية لو الواد جرى له حاجة قمت قلت لصاحبى تعالى بقى نلم الدور و نمشى بدل ما نورط نفسنا المهم الناس قالولنا مفيش داعى للمشاكل و روحوا اطمنوا عليه فى المستشفى و خلاص , روحنا المستشفى لاقينا زحمة و كل قرايبه جم و قاعدين يزعقوا و يدعوا على صاحبى و لاقينا شباب كده شكلهم ما يطمنش اتلموا حوالين العربية و قالوا دى مش هاتتحرك من هنا و طبعا مش عايز اقول انهم قلبوا العربية بعد كده و احنا جوه المستشفى انا هاكتفى دلوقتى لحد كده عشان ظروف شغلى و هاكمل باليل ان شاء الله اذا رجعت من الشغل باسلامة منغير ماموتوسيكل يخبطنى

[Xpert]

يعيش العبيات ام اكصدام حديد (نيكل)!

[dinow]

حديد ولا صفيح اهو المكتوب مكتوب

[dinow]

الجزء الثانى من الحكاية الاولى

طبعا دخلنا المستشغى لاقينا الاخ كويس و ما جرى لوش حاجة المهم جه امين شرطة عشان يفتح محضر و ياخد اقواله المهم اهله قلو ادبهم و قعدوا يزعقوا بصراحة امين الشرطة طلع جدع قالهم ابنكوا لا معاه بطاقة ولارخصة و الموتوسيكل من غير نمر و احنا متبلغ عندنا عن موتوسيكل مسروق بنفس المواصفات انا هاحط على ابنكم حراسه عشان يتعرض على النيابة الصبح طبعا الناس لما سمعوا الكلام ده اتقلبوا تماما للنقيض و بقوا يدوروا علينا عشان نلم الدور المهم خلص الموضوع على ان الواد كان ماشى على رجليه فى حته ضلمه و خبطته عربية نص نقل من غير نمر و جريت و ماشفش حاجه و طبعا الواد اخد مصارف المستشفى و تصليح الموتوسيكل من صاحبى و انتهى الموضوع على كده طبعا صاحبى راح التوكيا عشان يصلح عربيته عشان هى متأمن عليها طبعا عملو مقايسة لاقوها تتكلف 6000 جنيه و شركة التأمين رفضت تدفع طبعا عشان مفيش محضر بالحادثة طبعا صاحبى صلح على حسابه و لاحول ولا قوة الا بالله

[SEATLOVER]

حاجة واحدة بس محيرانى
مين الشخصية اللى قيمت الموضوع دة بخمس نجوم
وهو يحمل عنوان فية استباحة ارواح للبشر ؟؟؟ !!!!!!!!!!

[dinow]

يا جماعة انا عارف ان العنوان مش حلو بس انا حبيت اختار عنوان يشد الانتباه لانى شايف ان الموضوع مهم و على العموم انا ماعنديش مانع اغيره ياريت لو حد من الادارة يساعدنى اغيره ازاى ممكن نخليه مثلا (لو خبطك موتوسيكل صينى من غير نمر تعمل ايه)

---------------------------------
تم تغيير العنوان

مشرف القسم العـــــــــام

[dinow]

شكرا جزيلا لمشرف القسم العام

[Chicco]

بغض النظر عن محتوي الموضوع ده و عن التجارب اللي حصلت لكل واحد بيسوق مع عشوائيات شوارع المحروسة ....هو إيه اللي بيحصل في البلد ده و هل خلاص شريعة الغاب بقيت هي المسيطرة تماما
و كمان إيه حكاية أمين الشرطة ده اللي بيخلص المحضر زاي ما هو عايز ....هو فيه إيه !!!!!!!!!!!!!!!!!!!!!