تعمل ايه لو لقيت عيش محطوط على عربيتك ؟

[abo_lamar]

السلام عليكم يا شباب
وكل عام و انتم بخير .....

أتخيلوا معايا الموقف ده وعايز اعرف حتعملوا ايه ؟
حضرتك عسلت عربيتك غسلة محترمة وراكنها جنب بيتك اللي يشاء سوء حظك انه يكون جنب فرن بلدي , وتيجي الصبح عشان تروح شغلك وتركب عربيتك النظيفة اللي بتلمع وتلاقي المنظر ده ......

بجد حاجة تقرف وده بيدل على غباء من العالم اللي بتستعبط وبتهوي العيش على عربيات الناس وطظ في العربية و صاحب العربية اياكش يولع والبس بقى يا صاحب العربية في الاضرار اللي حتلاقيها من بهتان البوية و خشونة السطح .
نفسي نبقى محترمين و متحضرين بقى بلاش همجية .

[amado318]

ايه يا صديقى انا ساكن فى شارع دمشق جنب الفرن البلدى بحط العربيه مخصوص جنب الفرن علشان الناس تبرد عليها العيش صقف وشنطه وكبوت وزجاج يا راجل عزل احسن او كبر مخك

[amado318]

والله احيانا بدور العربيه وامشى بالعيش فوقها ههههههههههه والناس تجرى ورايا تلمه من على الارض

[abo_lamar]

والله احيانا بدور العربيه وامشى بالعيش فوقها ههههههههههه والناس تجرى ورايا تلمه من على الارض

والله فكرة جامدة

[al_manara]

طيب وتعمل اية اما عمارة جنبك فيها شقة بتتشطب ويكوبوا المعجون علي عربيتك ؟
طيب وتعمل اية وانت راكن وتنزل تلاقيها مخبوطة ؟
طيب وتعمل اية وتكون راكن وتسمع صوت الانذار بتاع العربية اشتغل تنزل تلاقي واحد رمة خشبة علي العربية وطبق الرفرف من فوق ؟
طيب وتعمل اية وانت راكن تحت الشغل بتاعك وبتوع الحي يطلع في دماغهم يدهنوا فوانيس الشارع وعربيتك تنزل تلاقي بقي لونها فضي سقف وكبوت وشنطة .

وتعمل اية .....
وتعمل اية......

دة جزء من الي حصلي .

يبقي العيش زي الفل والي يحط العيش علي العربية هانزل واشكرة كمان

[eng.m7md.ali]

انا شخصياً لو حصل معايا هروح اجيب طبق فول وبجنيه طعمية واخلص على العيش ده :)

[Eng_hatemfathy]

طب انت زعلان -طب تعمل ايه لما حد يهوى العيش على عربيتك ولما تكلمه يقولك ايه ومحدش عنده عربيه غيرك ولما واحده ست تحط اكياس لحمة الصدقة وطبعا الحاجات التانيه وبلاش اقول ايه علشان محدش يرجع على عربيتك وتنادى عليها تقولك دى شنطه خفيفه
وتعمل ايه لما مرات البواب وصاحباتها يفسحوا ولادهم من غير داخلى على عربية حضرتك بدل الملاهى وطبعا الواد يجيب العربيه من سقفها مرورا بالزحليقه اللهيا الزجاج لحد الكبوت وانت سامع طقطقة الصاج وقلبك بيطقطق معاه ويا سلام لو الولد حب بفرد ظهره على السقف
وتعمل ايه لما تسمع دربكه وطقطقه صاج وتبص تلاقى الكلاب عامله وليمه على السقف وبيتخانقوا على العضم-ومش معقول تعمل عقلك بعقل كلب
وتعمل ايه لما تنزل تلاقى اربع بغال قصدى شباب قاعدين على الشنطه وحاطين رجليهم حبه على الاكصدام وحبه برده على الشنطه علشان يسند على الزجاج وهما نازلين يجبولك الشنطه بكباسين الجنز والعربيه لسه مكملتش شهر
للاسف بلد غريبه غاب عنها مفهوم حرمة اموال الغير والملكيات الخاصه والعامه ولم يعد هناك اى اكتراث بعقوبه افساد مال الاخر او حتى استخدام ملكيته بغير اذن ووالله انى لانظر الى نفسى وانا استحرم وضع الموبيل او المصحف على سيارة الاخرين اثناء ربط الحذاء بعد الصلاه والى ما يفعله الناس بسيارتى واتعجب واقول لعله بما كنت افعله فى الماضى لسيارات الاخرين ونسأل الله المغفره والمعافاة

[amado318]

الى عايش فى مصر يستحمل

[amado318]

انا شخصياً لو حصل معايا هروح اجيب طبق فول وبجنيه طعمية واخلص على العيش ده :)

يا عم دة عيش بخمس قروش الكلب يقرف ياكله وكله رمل وتراب والخبازين الى بيعملوة مش بيستحموا بس الناس غلابه بتيجى من كل مكان علشان تشتريه انا عمرى ما جبت منه مع ان صاحب الفرن--اى خدمه يا بيه اعملك عيش مخصوص اقله باكل مكرونه ورز وانا بشترى الرغيف والله بنص جنيه من فرن ألى علشان النضافه والعامل الى بيعبى العيش لابس كيس فى اديه اصل انا بقرف

[eng.m7md.ali]

يا عم دة عيش بخمس قروش الكلب يقرف ياكله وكله رمل وتراب والخبازين الى بيعملوة مش بيستحموا بس الناس غلابه بتيجى من كل مكان علشان تشتريه انا عمرى ما جبت منه مع ان صاحب الفرن--اى خدمه يا بيه اعملك عيش مخصوص اقله باكل مكرونه ورز وانا بشترى الرغيف والله بنص جنيه من فرن ألى علشان النضافه والعامل الى بيعبى العيش لابس كيس فى اديه اصل انا بقرف

ايه الكلام الغريب ده؟؟
كلب ايه اللي يقرف مش كدة .. انا بحب العيش ده اوي خصوصا مع الفول :)

[amado318]

يا عم ممكن يكون الفرن الى عندك نضيف الفرن الى جنب البيت بشع بشع بشع ما انا باكل العيش الاسمر فى مطاعم عادى بس الفرن الى جنب البيت بشع بشع

[eng.m7md.ali]

تصدق انا جوعت ؟؟ هقوم اكل بقى واجيلك :)))

[amado318]

اعذرنى انا بتكلم عن حاله خاصه وفرن معين وبعدين انا كمان عاوز افطر ابعت سندوتش ولا حتت لقمه

[zocor742]

كأنكم بتحكوا اللى بيحصل لما مش بلاقى مكان واركن جنب الفرن
المشكلة مش فحاجة غير ان العيش وهو سخن لما بيتفرد على الكبوت ولا الشنطة الردة بتلزق بغباء ومبتطلعش غير بالغسيل وارخم حاجة لما تكون العربية لسة مغسولة

[sha2e]

انا شايف ان الموضوع مش مستاهل كل ده
ايه المشكله ان ناس "غلابة" يبردو العيش الى بياكلوه على عربيتي او عربيتك خمس دقايق
مهما كان العيش الى حضرتك مستاء منه ده نعمه والناس دى بتاكله بحصوه وزلطه وبلاويه وبيقفوا طوابير عشان يحصلو عليه لانهم ميقدروش يشترو عيش نظيف صالح للاستهلاك الادمي
المفروض اننا نحس بالناس دي ونشكر ربنا انه رزقنا عيشه كريمه

انا ممكن اتفق مع بعض الاخوه الى بيتكلمو على تجاوزات المهملين زي الى يسيل بويه على عربية واقفه او يرمي عليها حاجه دي تصرفات تستاهل العقاب ولو فيه عدل كان المفروض صاحب العربيه ياخد تمن تصلحها من المتسبب فى كده

لكن ان ناس غلابه يحطوا شوية عيش على عربيه لمدة دقيقتين او تلاته اعتبره ثواب
ولو الموضوع ده مضايق حضرتك ممكن تحط على العربيه غطاء او تركنها بعد الفرن بشوية

وبرضو مننساش ان حضرتك الى راكن عربيتك فى الشارع

تحياتي