إستشارة قانونية في عربية متباعة بتوكيل

[Hussein_Emara]

السلام عليكم

عندي مشكلة يا ريت حد من الزملاء يساعدني فيها, انا كنت بعت عربيتي من سنتين تقريبا بتوكيل لواحد, الراجل توفاه ربنا من سنة و ابنه كلمني و طلب مني اني اعمله توكيل باسمه لأن التوكيل كده باظ! قلتله حضرتك العربية بتاعتكم, اعملوا اعلام وراثة قالي انه مش عايز يدخل جده معاه في العربية لأن هو الي دفع تمنها, انا اديته الطرشه طبعا و قلتله حرام و ماليش دعوة. الكلام كان من سنة.

المهم من قيمة شهرين تقريبا استلمني تاني, و المرة دي خلى اعمامه يلموني انهم عملوا اعلام وراثه و نسيوا يضيفوا العربية و عايزيني برده اعملهم توكيل جديد عشان الرخصة قربت تخلص, عيدتلهم نفس الاسطوانة و مع تعريف لطيف الاستاذ كان عايزني اعمله إيه من سنه. و بعد خناقة محترمة ي التليفون, حلوا عني.

انهارده جالي محضر على البيت من المحكمة بيطالبني باني اروح معاهم الشهر العقاري عشان اعملهم توكيل جديد, و الحاجة ماستلمتش الانذار.

دلوقتي انا موقفي القانوني إيه بالظبط, انا مش فاهم على اي اساس اتعمل المحضر ده و إيه التصرف الصح.

افيدوني افادكم الله.

[elpasha1]

متابع باهتمام

[M.Elgergawy]

حاجه تحير يا باشا وربنا معاك
وبعدين المفروض يروحوا بإعلام الوراثة الشهر العقاري وينقلوا ملكيه العربية بإسمهم كلهم ولا ايه

[Hussein_Emara]

حاجه تحير يا باشا وربنا معاك
وبعدين المفروض يروحوا بإعلام الوراثة الشهر العقاري وينقلوا ملكيه العربية بإسمهم كلهم ولا ايه

والله يا محمد بيه قولتلهم كده في التليفون و مرضيوش, انا مصدر قلقي ان كلامهم فارغ و مع ذلك طلعلي انذار من المحكمة.

[abdoumahros]

اعتقد انها اشتغاله

السلام عليكم
للاسف انا مهندس موش محامي لكن اعتقد انه محضر مزيف لان المحضر بيكون معاه استدعاء للمحكمه موش للشهر العقاري! وموش جهه تنفيذ
طبعا انا زي ماقلت لك انا موش محامي لكن الشئ الاكيد انك ماعملتش حاجه تخاف منها وياريت تكون محتفظ بعقد البيع الابتدائي معاك وصوره من التوكيل وعموما استشاره لمحامي ب 50 جنيه وتريح نفسك

[ahmedsrs]

السلام عليكم
للاسف انا مهندس موش محامي لكن اعتقد انه محضر مزيف لان المحضر بيكون معاه استدعاء للمحكمه موش للشهر العقاري! وموش جهه تنفيذ
طبعا انا زي ماقلت لك انا موش محامي لكن الشئ الاكيد انك ماعملتش حاجه تخاف منها وياريت تكون محتفظ بعقد البيع الابتدائي معاك وصوره من التوكيل وعموما استشاره لمحامي ب 50 جنيه وتريح نفسك

كلام سليم ممكن تحلق لهم

[eldell]

الى اعرفه ان المفروض لو الى كلمك ده ابنه محدش يدخل معاهم فى الورث وبعدين هو المفروض يعمل اعلان الوراثه ويدخل العربيه والى هو بيقوله ده انت ملكش دعوه بيه خالص انت بعتها خلاص والمفروض حضرتك متعملوش حاجه علشان انت لو عملت كده هتشيل ذنب الناس الى داخله فى الورث لو ليه اخوات تقبل مرورى

[Amr Axel]

انا مازلت طالب بمرحلة الليسانس بكلية الحقوق لكن هفيدك باللي اعرفه
اولا اللي هم بيعملوه ده غلط و يعتبر تزوير و ضد الشريعة فالمفروض بيعملوا اعلام وراثة و بينقلوا الملكية يعني ملكش دعوة بالقصة ديه و لا تدخل فيها
و عشان تبقي عارف مش معني ان فيه ولد يبقي الجد مياخدش ع ما اتذكر ان في الموارث طالما فيه فرع وارث ذكر و الجد موجود يبقي الجد ليه نصيب السدس من الميراث

و مفيش حاجة اسمها محضر يجي ياخدك للشهر العقاري لأن المحضر بيجي يعلمك ان فيه مثلا قضية مرفوعة عليك في المحكمة و تحضر الجلسة بتاريخ كذا او انذار بالحجز و خلافه هي ديه وظيفته ياخد الورق من المحكمة و العنوان و الاسم و يروح يسلملك الاعلام و تمضي و يمشي و يرجع يبلغ في المحكمة انك استلمت و بقيت من اللحظة ديه مسئول عن الحضور او عدم الحضور للجلسة او لو لا قدر الله هيتم الحجز عليك في اي شئ
انما ياخدك يوديك للشهر العقاري اهي ديه اعتبرها نكتة لأني اول مرة اسمع عنها
فالمفترض حاجة من الاتنين

يا اما تروح الشهر العقاري و تقولهم ان الناس دول معملوش اعلام وراثة و عايزينك تزور و تعملهم توكيل بتاريخ قديم و الاحتمال الوارد انهم يقولوك اعمل بلاغ في القسم او ع حسب التصرف اللي بيعملوه

ياما تروح القسم اللي انت تبعه و تقولهم اللي حصل كذا كذا و يتعمل بلاغ عشان تبقي في السليم

[أبو صلاح]

هو ياباشا انت مش بعت ليه العربية بعقد بيع ابتدائي ؟

يعني الاقرب انهم لو كلموك وانت رفضت وده حقك طبعا يرفعوا عليك قضية صحة توقيع ثم قضية صحة بيع ونفاذ

مش ياطلبوك بتوكيل جديد

انت عارف انك ليك الحق حاليا انك تتهمهم بسرقة العربية وتستردها
اعتقد انت ممكن تهددهم علشان يشيلوك من دماغهم

[houras1010]

خلى بالك ان الموضوع ممكن يكون ملوش دعوه بإعلام وراثه وتكون حكايه وخلاص ممكن يكون التوكيل مش لاقيينه او العربيه وراها مشكله

[A.Saad]

انت لو مش عامل عقد ابتدائى كلمة واحدة تتقال اخبطوا دماغكم لان بوفاة وكيلك الى هو ابو الواد الامور ده يبقى التوكيل انتهى قانونا لكن لو عامل عقد يبقى اتباعت ليهم وهما اللى ينقلوا ملكية على فكرة حتى لو جالك امين شرطة او ابراهيم شرطة مترحش معاه الا لو معاه امر ضبط واحضار من النيابة اللى فيها محل اقامتك ومدته سارية لكن استدعاء لقسم او نيابة مش شرط اجبارى تروح ويفضل مترحش وتبعت محامى علشان محدش يقرفك لاى سبب او يقولك تباب للعرض على التيابى

[احمد المصرى]

العربيه كدا ممكن تكون عامله مشكله لان نيتهم مش سليمه اطلاقا ولو انت عملت توكيل جديد يبق العربيه كانت بتاعتك مده السنه ال انت بعتها فيها وثانيا ممكن يقولك انت بايع العربيه مرتين يعنى فى كل الاحوال غلط عليك لو الناس دى عملت مشكله تانى اعملهم محضر فى القسم علشان تريح بالك من المشكله دى خالص

[Hussein_Emara]

الف شكر لحضراتكم على الاهتمام, بعد مشورتكم و مشورة المعارف, انا حعتبر الكلام ده كأنه محصلش و مش حروح استلم الانذار, و لو الناس دي ظهرت تاني حيبقى قدامي حل من اتنين, يا اما اروح اثبت الكلام في محضر في القسم او لو كلموني استخدم تهديد انهم يرجعوا العربية بدل ما اتهمهم بسرقتها, يمكن التهديد ده يخليهم يراجعوا نفسهم.

الله يرحمه الحاج الي اشترى مني العربية كان راجل محترم.

[Hussein_Emara]

اخر الاخبار, البيه عملي محضر في القسم اني رافض اني اسجل العربية باسمه و جالي استدعاء على القسم بخصوص المحضر ده

رُحت القسم اشوف فيه إيه, لقيته عاملي محضر اداري ان رافض اتعاون مع الورثة في نقل ملكية العربية بشكل ودي, قعدت مع امين الشرطة الي ماسك المحاضر هناك, كان راجل كبير في السن, بيقولي ليه كده, حكيتله الحكاية كلها, و الحركات الي الولد عملها, قالي انت عملت طيب انك مسمعتش كلامه, و ثبت الكلام ده ف المحضر الي هو عملهولي.
الامين قالي اني ممكن اعمل توكيل بالبيع للورثه نتيجة سقوط التوكيل بوفاة الاب, و ده مفيهوش ضرر عليا, و قالي ممكن تسأل الموظف في الشهر العقاري عشان لبقى مطمئن, و بكده تبقى مطمن ان الولد متكتف و ميعملش حركات نص كم في اهلة و ابقى رضيت ضميري.

انا مش عايز من الناس دي حاجة لا ابيض و لا اسود, كل الي عايزه انهم يحلوا عن دماغي, إيه رأي حضارتكم, اكمل كده صح ولا فيه حاجة غلط؟

[Amr Axel]

اخر الاخبار, البيه عملي محضر في القسم اني رافض اني اسجل العربية باسمه و جالي استدعاء على القسم بخصوص المحضر ده

رُحت القسم اشوف فيه إيه, لقيته عاملي محضر اداري ان رافض اتعاون مع الورثة في نقل ملكية العربية بشكل ودي, قعدت مع امين الشرطة الي ماسك المحاضر هناك, كان راجل كبير في السن, بيقولي ليه كده, حكيتله الحكاية كلها, و الحركات الي الولد عملها, قالي انت عملت طيب انك مسمعتش كلامه, و ثبت الكلام ده ف المحضر الي هو عملهولي.
الامين قالي اني ممكن اعمل توكيل بالبيع للورثه نتيجة سقوط التوكيل بوفاة الاب, و ده مفيهوش ضرر عليا, و قالي ممكن تسأل الموظف في الشهر العقاري عشان لبقى مطمئن, و بكده تبقى مطمن ان الولد متكتف و ميعملش حركات نص كم في اهلة و ابقى رضيت ضميري.

انا مش عايز من الناس دي حاجة لا ابيض و لا اسود, كل الي عايزه انهم يحلوا عن دماغي, إيه رأي حضارتكم, اكمل كده صح ولا فيه حاجة غلط؟

زي مقولتلك محضر و كده تمام تروح بقي للشهر العقاري و تفهم و تحكي اللي حصل بس بدون ذكر بيانات احكي اللي حصل و شوف الرد و الاجراءات لأنهم برده ادري بشغلهم

بالتوفيق ان شاء الله