سيارتي العزيزة ( لولو ) كادت ان تسرق ليلة امس !!!

[Amr Axel]

بسم الله الرحمن الرحيم
السلام عليكم و رحمة الله و بركاته

العربية كانت هتتسرق امبارح الفجر لولا ستر ربنا
و لولو ده اسم الالتو حبيبتي الجديد بعد ما كان اسمها زقزوقة

البداية اني نايم و بحلم و في سابع او تاسع نومة كمان
اذ بيا اصحي مخضوض ع صوت الكلب اللي مربيه في الشارع عندي بيهوهو جامد و صوته مرعب ( و ما علينا من قصة الكلب اللي مربيه في الشارع لأنها قصة تانية لوحدها و الكلب ده ليه مواقف كتيير بستغربلها منها يلاقي قطة ميتة في وسط الطريق يروح ياخدها و يحطها في كومة رمل في الجنينة و يبصلها بحزن و يمشي و غيره من المواقف ) و بالرغم اني اثق في حاسة الكلاب الا اني كنت ضايع و البرد قايم بالواجب معايا و قولت تلاقي كلب جيه المنطقة قولت عادي اكمل نوم
و فجأة قبل ما اكمل الغطا عليا اسمع رزع في صاج العربية و الانذار اشتغل و الكلب بقي بيهوهو بغباء طبعا قمت جري و عقبال ما وصلت للبلكونة ببص جنب العربية لاقيت واحد بعيد عن العربية كام متر بيركب عجلة ( عجلة اللي بيلموا الزبالة ) و الكلب بيهوهو و يزوم جامد في اتجاه الشخص ده و راح وقف عند باب عمارة جنبي و لقيته نزل مسك زبالة الناس حاطينها و رماها تاني و ركب العجلة و مشي
هو يا جدعان فيه حد بيلم زبالة الساعة 4 الفجر و في عز الضلمة و الساقعة و انا مش عارف
و فضلت قاعد في البلكونة باصص ع العربية لغاية ما جالي برد محترم
و الكلب فضل قاعد عند العربية

و الحمد الله ان ربنا ستر

اللي كان هيقهرني في الليلة ديه بقي مش في سرقة العربية لكن عشان لسه غاسل العربية في السقعة و مظبطها يجي هو ياخدها ع الجاهز يعني و لا ايه ؟؟

لأ و الدوريات ماشية في كل مكان و لجان ع مداخل و مخارج المنطقة طول الليل و النهار
مهو حاجة من الاتنين ياما حرامية بجحين ياما حرامية اغبية
خلوا بالكم بقي من عربياتكم
و ربنا يستر ع عربيات الجميع

[koshary]

اكيد ده حرامى وحصلت عندنا مواقف كتير والكلاب انقزت الموقف والحمد لله انها جت سليمه والخبط ال ف الصاج ده حصل حاجه للعربيه ولا ايه ؟؟؟؟؟

[medododo]

الحمد لله
على قد ما بكره الكلاب بس بجد هي مفيدة في الظروف اللي البلد فيها

[أبو صلاح]

بصفتك ليك في تربية الكلاب

ينفع الواحد يبيت كلب جوه العربية بالليل ؟

علشان لو ينفع هيبقى حوار جامد

[midogeem75]

طبعا حمدا لله علي سلامه لولو...... بس خلي بالك لان فيه فعلا زبالين كتير جدا بتلم الزباله بعد الثانيه صباحا. وطبعا دي عرفتها باالصدفه وانا سهران من شهر تقريبا جوه الشقه حسيت بحركه غريبه علي السلالم بتاعت العماره وامام باب الشقه تحديدا الساعه 3 ونص صباحا ... وطبعا كنت هضربه بالنار لو كان حرامي بس طلع بتاع الزباله وسألته هو ده ميعاد تلم فيه زباله قالي يابيه كل عباس العقاد كده [قصده الشارع اللي ساكن فيه] وعموما ربنا يسترها علينا وعلي لولو .... وإنجي[ عربيتي] اليومين دول. وتحياتي

[eng.m7md.ali]

الكلب ده يستحق نوط الشجاعة .. اصرفله مكافئة يااكسل .. والحمد لله جات سليمة

[night_whisper]

الحمد لله
ربنا ستر


الكلب دة المفروض تظبطوا
أكل و شرب و دلع

[Amr Axel]

اكيد ده حرامى وحصلت عندنا مواقف كتير والكلاب انقزت الموقف والحمد لله انها جت سليمه والخبط ال ف الصاج ده حصل حاجه للعربيه ولا ايه ؟؟؟؟؟

الحمد الله لفيت حوالين العربية الصبح ملقتش اي حاجة لأني مش عارف الخبط جيه فيه

الحمد لله
على قد ما بكره الكلاب بس بجد هي مفيدة في الظروف اللي البلد فيها

فعلا و ديه من ضمن المهام ربنا خلقها عشان تقوم بيها و هي الحراسة و الأعمال المفيدة
و ملناش دعوة باللي بياخدوها منظره

بصفتك ليك في تربية الكلاب

ينفع الواحد يبيت كلب جوه العربية بالليل ؟

علشان لو ينفع هيبقى حوار جامد

للأسف مينفعش لأن الكلب و هو نايم بليل لازم يعمل حمام ع الاقل مرة - مرتين وسط نومه يعني العربية هتبقي متبهدلة و ده اقل واجب :) غير ان ممكن الصالون و الفرش يتقطع و يتكحت من ضوافره

[Amr Axel]

طبعا حمدا لله علي سلامه لولو...... بس خلي بالك لان فيه فعلا زبالين كتير جدا بتلم الزباله بعد الثانيه صباحا. وطبعا دي عرفتها باالصدفه وانا سهران من شهر تقريبا جوه الشقه حسيت بحركه غريبه علي السلالم بتاعت العماره وامام باب الشقه تحديدا الساعه 3 ونص صباحا ... وطبعا كنت هضربه بالنار لو كان حرامي بس طلع بتاع الزباله وسألته هو ده ميعاد تلم فيه زباله قالي يابيه كل عباس العقاد كده [قصده الشارع اللي ساكن فيه] وعموما ربنا يسترها علينا وعلي لولو .... وإنجي[ عربيتي] اليومين دول. وتحياتي

مهو ده اللي يأكدلي اكتر انها مجرد حجة لأكتر من سبب لو اتمسك يقول انا بتاع زبالة
السبب التاني و الادهي ان محدش هنا بيتفق مع بتوع زبالة شركة النظافة هي اللي بتنضف كل يوم الصبح انا من سكان القاهرة الجديدة :)
السبب التالت ان صندوق الزبالة مجاش ناحيته و لا دخل اي عمارة تانية لأن اغلب الابواب مقفولة , هو ركب العجلة و خلع ع كده
و ربنا يستر ع لولو و انجي و فتكات و نعمات كمان ههههههههه

[el_nahal2004]

ربنا يسترها والله
الواحد بيبقى نايم بليل وهو قلقان
بالذات فى كام عربية اتسرقوا بالمقطم من فترة صغيرة

[Amr Axel]

الكلب ده يستحق نوط الشجاعة .. اصرفله مكافئة يااكسل .. والحمد لله جات سليمة

متقلقش الكلب ده انا مدلعه اخر دلع من يوم ما لقيته في الباركينج كان لسه عمره حوالي شهرين و عامله بيت كمان من افرع شجر :)

الحمد لله
ربنا ستر


الكلب دة المفروض تظبطوا
أكل و شرب و دلع

هههههههههه يا باشا و الله مظبطه من غير حاجة و ساعات بتقاسم معاه بسكوت الشاي كمان هههههه

[max_ziro]

مرة حصل معايا نفس الموقف و بردو الكلاب بتاعتى صحتنى من النوم و قعدت تهوهو
و طلع فى الاخر واحد مجنون جة عمل بىبى على العربية و رفع المساحة و حط فيها كياس زبالة من الشراع و قعد يحط على العربية تراب و مشى
و بعدها بكام يوم لقيت المجنون دة ماشى فى الشارع عريان بلبوص خالص و بيعمل حجات مش تمام و بيضايق الناس الى ماشية روحت منزل الكلاب علية قعد يجرى و الكلاب وراة لحد ما اختفوا الكلاب رجعت و الراجل اختفى للابد
سمعت بعد كدة انو عمل نفس الكلام فى منطقة تانية و المرة دى البنى ادميين هم الى ظبطوة

[Elawany13]

الحمد لله ان ربنا ستر

المشكلة مش انك لسه غسلها وبس

ده انت لسه جايبلها منظف انجكشن

وحاطط زيت فيسكو

ياعنى لما يسرقها هياخدها على المفتاح

مش هيتعب فى حاجه خالص

[ahhazem]

الحمد الله لفيت حوالين العربية الصبح ملقتش اي حاجة لأني مش عارف الخبط جيه فيه

هههههه
اسأل الكلب



حمد الله علي السلامه وجت سليمه الحمد لله

[Donzi]

الف حمدالله على سلامة لولو و الحمد لله ان الغسلة مارحتش عالفاضي

بس مش من العدل انك ماتذكرش اسم الكلب بطل القصة