إنتو يابتوع لبنزيمة...إنتو ياخوانا يابعده

[icehearted girl]

طبعا بخصوص المهزلة اللي بتحصل اليومين دول ف حدث ولا حرج

النهاردة اضطريت اروح الفيوم وكان معايا نص التنك وقعدت اغني اروح مروحشي اروح مروحشي

فقلت اتكل علي الله

نزلت الشوارع كلها فاضيااااااااااااااااا تماما واضح ان دا كان الحل الامثل للقضاء علي الكثافة المرورية

اول موصلت المنصورية حدث ولاحرج..زحام بشع شديد جدا ف اتجاه الرماية ونا العداد عمال يقل عندي وافكر هروح شغلي بكرة ازاي

وطبعا لقيت بنزينة وطنية فلرماية زحمة جدا...اتكلت علي الله ودخلت طريق الفيوم كالتكس مكنش فيها بنزين بعدها موبيل لقيت المحطة فاضية خالص خالص دخلت وطبعا كان ورايا سرب عربيات علي امل ..وفعلا لقيت 92 قلتله فول

بعد 15 جنيه العداد فصل وصفره وبدأ من جديد... تاني مرة العداد عمل 25 ونص

جه يحاسبني بيقولي... كدا الحساب 45 جنيه

قلتله نعم؟؟؟ ليه..قالي 15 و 27 يبقي كام؟؟؟


قلتله طب بص وراك ف العددا كدا...قالي ايوا ايوا معلش 15 و 25 يبقي كام؟؟؟

قلتله اربعين...

قالي طيب و خمسة؟؟؟ يبقوا 45

هو قالي كدا وحسيت ان ملامح كل الناس اللي بكرههم اترسموا علي وشه وليلته هتبقي سودا باذن واحد أحد

قلتله 5 جنيه دي ايه؟؟؟ راح موطي صوته وموشوشني وقالي: لعلمك انا مبفولش لحد فهتدعي 5 جنيه

رحت نزلت ملعربية وعليت صوتي... قلتله مبتفولش لمين؟؟ انت جايبلي بنزين من بيتكو

راح جالي واحد تاني بيسألني في ايه... قلتله في اني عوزة الكبير فيكو هنا يا اما هبلغ عنكم بالتليفون حالا علي شغل النصب دا

قالي ايه بس..قلتله للي حصل.. قالي لعلمك احنا مبنفولش.. احنا بنحط 20 لتر بس للعربية

قلتله انا مش هرد عليك لانك مش فاهم بتقول ايه..انا اضلا حطة 22 لتر..مكنش التانك فاضي يعني

قالي طيب يبقي دي الخدمة يفندم

قلتله خدمة ف عينك.. خدمة دي انت بتقدملي خدمة _محترمة_ فانا اقرر اديلك فلوس ولا لأ

مهياش تسعيرة ولا اجباري .. ودلوقتي حالا هبلغ عنكم شغل النصب دا

قالي طب اللي انتي عوزاه..رحت مدياله 45 وقلتله تجبلي الباقي حالا لو سمحت 4 جنيه ونص

وطبعا طابور العربيات واقف بيتفرج..كنت ف نص هدومي لما خدت بالي

جابلي 4 جنيه ووقفت لما جابلي النص جنيه

وبصيت حواليا لقيت واحد واقف بعيد بيلمع الازاز رحت ندهاله وادتله الباقي ومشيت

طبعا بصتش ورايا لاني حسة انهم كانو هيولعوا فيا

فعلا الجشع دا مننا احنا

واستغلال الظروف والبلطجة بقت مننا فينا

كل واحد بيحاول يستغل ظروف الناس ضيقتهم ويعمل مصلحة

شعب.... ولا بلاش

[تامر.محمد]

لا داعي لتعميم شخص تيت على الباقي :)
و الا كان بقى كلنا فينا كل العبر بلا استثناء لأن كل عبرة موجودة في بعض الناس :)

معلش , تجربة سخيفة بس احسن اديتي له اللي فيه النصيب
خمسة جنيه في عينه

[م.احمد زكريا]

حالا حالا حالا تبلغي عن المحطة

الموضوع ده مايتسكتش عليه

ولو تقدري تعملي تليفون على راديو مصر تفضحي المحطة علني

خليهم يتربوا

[madyyuri]

احييك علي هذا الموقف

[darsh_]

برافووووو يا ريت كلنا نعمل كدة دايما لان سلبيتنا هي الي بتضيع حقوقنا دايما

[heshamzaky]

حد جرب يكلم الارقام دى و لا لا
.........

هيئة البترول : 14 ألف طن بنزين و37 ألف طن سولار لخدمة السيارات

1/13/2012 7:26 pm



أكد مصدر مسئول بهيئة البترول أنه لا زيادة فى أسعار البنزين والسولار، وأن ما يتردد من شائعات ليس لها هدف سوى بث عدم الاطمئنان فى نفوس المواطنين موضحا أن تحريك أسعار المنتجات البترولية لابد أن يصدر من مجلس الوزراء وأن هذا الموضوع لم يدخل مجرد حيز التفكير، سواء بين المسئولين فى هيئة البترول أو داخل مجلس الوزراء.

واضاف المصدر أن كميات البنزين والسولار الموزعة يومياً أكبر من معدلات الاستهلاك المطلوبة، حيث بلغ ما يتم ضخه بالسوق المحلية 51.5 ألف طن منها 14.5 ألف طن من البنزين و37 ألف طن السولار، وبرغم ذلك لوحظ فى الآونة الأخيرة الزحام والتكدس على محطات الوقود نتيجة للشائعات التى تتردد عن زيادة أسعار البنزين والسولار.

وطالب البيان أنه فى حالة وجود أى شكاوى من نقص فى كميات البنزين أو السولار فى بعض المحطات أو مخالفات فى تداول هذه المنتجات الاتصال بغرفة طوارئ الهيئة على أرقام التليفونات 27065912 – 27065913 – 27065914 على مدار الـ 24 ساعة

[heshamzaky]

أنا كلمت الرقم دة (((( 27065914 على مدار الـ 24 ساعة )))))
و بلغت بكل المحطات الى فى مدينة نصر الى مفيهاش بنزين و قالى انهم بيتصلو بالمحطات دى و بيستفسرو علشان يعرفو اذا كانت الكمية فعلا نفذت و لآ لآ
لان بعض المحطات بيطفو النور بالليل كانها محطات مهجورة زى كالتكس الى فى شارع حسن مامون مدينة نصر عند النادى الاهلى

[elmkaneeki]

راجل يا بنتى

[atefadel]

في عربية نصف نقل ماشية في شوارع عين شمس عليها شوية بلطجية
بيبعوا ال الجركن 20 لتر بنزين اة معرفش ب 40 جنية
وعجبي علي يقولك مفيش ازمة

[friendship7897]

رحت نزلت ملعربية وعليت صوتي... قلتله مبتفولش لمين؟؟ انت جايبلي بنزين من بيتكو

والله جرئية وبرافوا عليكي - بس أهم حاجة إنك فولتي - مبروك التفويلة .
وأجمل حاجة أنك بقششتي واحد تاني أدامه علشان يتأهر على البقشيش ، وأحمدي ربنا مطلعلكيش واحد يدخل في الموضوع زي التيييييت - ويحشر نفسه وينقد - لأن دا بيكون أسخف من صاحب الشأن .
بس حلوة أوي أنت جايب البنزين من بيتكو

[Samir Elshahawy]

اللي أنتي عملتيه ده الصح و ياريت الناس كلها تعمل كده

[شاهين - بنز]

.................................................. ........
.................................................. ............
ندر عليا لو طلعت من البلد دي مش حرجعها تاني حتى أما أموت حاطلب إني أدفن بره
بكرهك يامصر بجد إنتي و99% من شعبك

----------------------------------------
تم وقفك اسبوع لمخالفه القاعده 13 بتهكمك علي الشعب المصري ووصفك بما ليس فيهم
يرجي مراجعه قوانين المنتدي

9.38م
17/1/2012

م.ع.12

[yoko]

بصراحة يا ضحى عندك حق جدا انا لو مكانك كنت سمعتهم ما لذ واطاب ومش بعيد كنت أمد إيدي على حد فيهم

[friendship7897]

ندر عليا لو طلعت من البلد دي مش حرجعها تاني حتى أما أموت حاطلب إني أدفن بره
بكرهك يامصر بجد إنتي و99% من شعبك

ليه يا أخي كدة - دا أنت مليان أوي - بس مش للدرجة دي - دا اللي ملوش أهل بيشتري له أهل .
الله معك يا مصر - وربنا معاك ويهديك للصالح
منكم لله يا بتوع البنزيمة - أنتوا يا أخوانا يا بُعده يللي هتكرهوا الناس في بعضها

[elmkaneeki]

ليه يا أخي كدة - دا أنت مليان أوي - بس مش للدرجة دي - دا اللي ملوش أهل بيشتري له أهل .
الله معك يا مصر - وربنا معاك ويهديك للصالح
منكم لله يا بتوع البنزيمة - أنتوا يا أخوانا يا بُعده يللي هتكرهوا الناس في بعضها :o_stupid[1]:

بتوع البنزينة بس ؟