الكاوتش البريدجستون اتقطع و هو لسه جديد .. اعمل ايه ؟

[nightmare_9595]

السلام عكيلم ... ازيكم يا شباب . داوقتي انا ركببت جنط 17 في عربيتي ,, و رحت ركبت كاوتش من عند موزع لبردجستون الي هو الفردوس الي في شارع احمد سعيد و ده عشان لما انا رحت للتوكيل في عمارات العبور قالي المقاس ده خلصان من عندي و بعتني للفردوس ده .. مقاس الفرده 215\45 17
و الفرده ب 880 جنيه ... و امبارح ماشي و قمت لابس حفره في طريق النصر (بالجنب اليمين)..اقل من 10 ثواني و لاقيت العجله هووووب نامت . . الكلام ده كان الساعه 2 بليل امبارح , رحت مركب الاستبن و روحت .. انهارده الصبح بقي رحت عشان اركب الجنط تاني و انفخه الراجل قالي دي مقطوعه !!!!
قلتله ازاااي ؟؟ قالي في قطع كده في الشفه الي بتكون جوه الجنط !! و حجمها بتاع 3 سم .. و عشان كان عندي ظروف كده ماعرفتش اروح , فا ان شاء الله هروح للتوكيل بكره الصبح ... بس يا شباب هو كده مش المفروض يكون عيب صناعه و اغيره تحت الضمان ؟؟ و خصوصا انه يادوب عامل 3 شهور و انا اصلا مش بطلع بالعربيه كتير .. اعمل معاهم ايه بقي ؟؟ انا دمي محرووق . و خصوصا ان الفرده ب حوالي 900 جنيه .. فا حرام يعني . و بعدين هو في كاوتش بريدجستون يلبس بلاعه يطلع مقطوع ؟؟ و القطع من حته جوه الجنط اصلا ؟؟ و بعجين ده بريدجستون يعني مش حاجه صيني !!!
لما العجله نامت في ساعتها كده انا رحت راجع باصص في الحفره دي قلت يمكن في حته قزاز كانت موجوده ,, بس مالقبتش اي حاجه . الحفره فاضيه و مافبهاش اي حاجه ...

و ليه العجله اليمين الي ورا محصلهاش حاجه ؟؟ ليه اللي قدام هي بس ؟؟


دلوقتي اعمل ايه ؟؟ اروحلهم التوكيل في صلاح سالم ؟؟ ولا اروح للموزع ؟؟ ا

انا اسف طولت عليكم بس عشان دمي محروق جدا و الله .

[Land_Cruiser]

هى دى مشكله جنط ١٧ مع الاسف :( الافضل تروح للى اشتريت منه و معاك فاتوره الشراء و تقوله ده عيب صناعه و الكاوتش لسه جديد و ربنا يسهل و يرضى يغيرهولك خاصه ان مفيش مسمار و لا قطعه زجاج هى اللى بوظته علشان ميقولش ده سوء استخدام و لو مرضاش اطلب تقابل المدير بس لو عايز نصيحتى بلاش جنط ١٧ ده علشان فى معظم العربيات اللى راكب فيها عامل مشاكل و بيعمل بلالين لانه مش مناسب خالص للطرق المليانه حفر و مطبات و حاول ترجع لمقاس الجنط الاصلى علشان تريح دماغك لان الموضوع ده ممكن يتكرر حتى لما تغير الكاوتش

[HASSAN SERRY]

و اللهى اكيد الكاوتش ال 17 اسرع كاوتش يبوظ و يعمل بلالين بس بردوا هوه مش يتقطع بالطريقة اللى انت بتقول عليها او بالسرعة ديه , انا معايا 17 بردوا و اكيد لبست بيه حاجات كتيره فى الطريق بس لحد دلوقتى كويس الحمد لله بقالوا معايا 7 شهور
هوه بس محتاج سواقه معينه مش أكتر
و عموما ارجع للموزع و قولوا على الحصل انت عندك حلين يا تروح تحور انه عمل كده لوحدوا و تشوف هيقولوا ايه , يا تقول الصراحة و مظنش انك هتطلع بحاجة بس هتريح ضميرك
بس هوه ال 17 مقرف كده و مقرف فى سواقته اكيد انت عارف كده من قبل ما كنت تجيبه
بس متزعلش و فداك الكاوتش كله يمكن الفرده ديه كانت فعلا مش مضبوطه و كويس انها باظت كده احسن ما تكون بتجرى على سرعة عاليه و تقوم مفرقعه . الحمد لله بجد على كده

[minicooper20]

فيداك بس الامل ضعيف

[msafa]

متأكد ان الهوا كان مظبوط؟ تقريبا لما الفردة بتبقى ناقصة هوا بتبقى بتتأثر اكتر بالحفر و الازاز المكسر

[maskeen]

انا حصل معايا نفس الكلام بالظبط بس كاوتش كومهو بسبب حفره بشعه قبل الكيلو 4ونص
الحق ييقال ان ده مش عيب كاوتش لان المطب كان مرعب وفيه سن حديد من تحت والحمد لله ان العربيه ماتقلبتش بيا.
فعلا كاوتش 17 حساس للمطبات ولازم تبقى حريص جدا...لو ماعرفتش تاخد منه خصم على الكاوتش الجديد ماتزعلش واستعوض ربنا زى ما انا عملت واهو درس للحرص

[M.Nabeeh]

ربنا يعوض عليك

[M.Elgergawy]

مركز الفردوس ناس في غاية الاحترام الحاج وإبنه كامبه ناس ذوق جدا وانا مجربهم في كذا حاجة بس الصراحة اعتقد ان اللي حصل دا طبعا هو سوء في ارضية الطريق وبالتالي هو مالوش ذنب انه يغيرها عموما حضرتك تحاول معاهم ولو هما يقدروا يعملوا حاجة مش هيتأخروا عنك

[elmkaneeki]

عيب الجنط
الكاوتش اتدبس ودة مش عيب صناعة
دة عيب الجنط الكبير

[Youssef.Awad]

هى دى مشكله جنط ١٧ مع الاسف :( الافضل تروح للى اشتريت منه و معاك فاتوره الشراء و تقوله ده عيب صناعه و الكاوتش لسه جديد و ربنا يسهل و يرضى يغيرهولك خاصه ان مفيش مسمار و لا قطعه زجاج هى اللى بوظته علشان ميقولش ده سوء استخدام و لو مرضاش اطلب تقابل المدير بس لو عايز نصيحتى بلاش جنط ١٧ ده علشان فى معظم العربيات اللى راكب فيها عامل مشاكل و بيعمل بلالين لانه مش مناسب خالص للطرق المليانه حفر و مطبات و حاول ترجع لمقاس الجنط الاصلى علشان تريح دماغك لان الموضوع ده ممكن يتكرر حتى لما تغير الكاوتش

هو فعلا كده .. والاكيد ان الطرق هى اللى ما تستاهلش انك تشترى لا المقاس ده ولا الماركة دى .. ربنا يعوض عليك
وانا مقدر شعورك لأنى مريت بيه لما غيرت كاوتش عربيتى لكونتنينتال فرنساوى الفردة عاملة 500ج وماشى بيهم بعد 5 ايام بس على الزراعى بعد طوخ والاقيلك حاجة فى وسط الطريق وانا داخل ملف على سرعة 100 كم جاى افاديها الاقيلك واحد طاير من يمينى والفاصل الخرسانى شمالى حاولت بقدر الامكان انى اخدها فى النصف جت فى شفة العجلات اليمين وقطعتهم الاتنين فى ثوانى وكان موقف سيىء جدااااااا لأنى كنت مسافر ومعايا مراتى وشنط كتير واضطريت انى اكلم واحد صاحبى يجيلى وخد الفردتين مرة واحدة واحدة بايظة خالص والتانية بالعافية ركبلها شانبر عشان ترجعنى البيت مع الاستبن ولما رجعت من السفر اشتريت جوز جداد تانيين ب1000ج
يلا ربنا يعوض عليك وعلينا

[ahmad--ezzat]

يا جماعه نصيحه
حطوا نيتروجين وسيبكو من الهواء
النيتروجين بيقلل الصدمات كتير وافضل خصوصا فى الجنوط الكبيره

وبالنسبه لصاحب الموضوع
شوف تاريخ انتاج الكاوتش ايه !! لان ممكن يكون منتهى الصلاحيه او ما شابه ذلك

[Elawany13]

ياساتر يارب
900 جنيه الفردة !!!
وجنط 17 (واضح من الردود انه مقاس متعب وغير مناسب )
ياجماعه مش كل حاجه بتتعمل فى أوروبا والخليج تنفع عندنا فى مصر
فيه حاجات كتير بنعملها فى نفسنا وبنعذب نفسنا بيها
وللأسف متنفعش مع ظروفنا فى مصر خالص
ومتنفعش مع الطرق الجميلة بتاعتنا

ربنا يعوض عليك

ربنا يخليلى جنط 13 الحديد الأصلى بتاع الشاهين
ويخليلى كاوتش ماكسيس أبو 230 جنيه
بلبس كتير فى نقر وبلاليع وكل حاجه
بقاله معايا سنة عمرة ما عمل معايا أى موقف أو حتى اتخرم
الحمد لله والشكر لله
يارب ديمها نعمه وإحفظها من الزوال

[ahmad--ezzat]

ياساتر يارب
900 جنيه الفردة !!!
وجنط 17 (واضح من الردود انه مقاس متعب وغير مناسب )
ياجماعه مش كل حاجه بتتعمل فى أوروبا والخليج تنفع عندنا فى مصر
فيه حاجات كتير بنعملها فى نفسنا وبنعذب نفسنا بيها
وللأسف متنفعش مع ظروفنا فى مصر خالص
ومتنفعش مع الطرق الجميلة بتاعتنا

ربنا يعوض عليك

ربنا يخليلى جنط 13 الحديد الأصلى بتاع الشاهين
ويخليلى كاوتش ماكسيس أبو 230 جنيه
بلبس كتير فى نقر وبلاليع وكل حاجه
بقاله معايا سنة عمرة ما عمل معايا أى موقف أو حتى اتخرم
الحمد لله والشكر لله
يارب ديمها نعمه وإحفظها من الزوال

ايه بعم انت داخل تذل الراجل
كل حاجه ليها عيوب ومميزات لو ركبت 17 هتعرف يعنى ايه ثبات دة غير الشكل بس العمليه عايزه حرص شويه
انا مركب 16 والحياه فل وكان عندى 14 قبل كده
ال 16 افضل بكل المقاييس بس تختلف من شخص للتانى

[Elawany13]

ايه بعم انت داخل تذل الراجل
كل حاجه ليها عيوب ومميزات لو ركبت 17 هتعرف يعنى ايه ثبات دة غير الشكل بس العمليه عايزه حرص شويه
انا مركب 16 والحياه فل وكان عندى 14 قبل كده
ال 16 افضل بكل المقاييس بس تختلف من شخص للتانى

السلام عليكم ورحمة الله وبركاته
أعوذ بالله .... لا ذل ولا حاجه !!! ..بس كل اللى أقصده زى ما قال أخونا
Y2Y1500

والاكيد ان الطرق هى اللى ما تستاهلش انك تشترى لا المقاس ده ولا الماركة دى .. ربنا يعوض عليك

إحنا فى دولة من دول العالم الثالث (ويمكن العاشر) ظروف هذه البلد إجتماعيا وسياسيا وإقتصادياً فى منتهى الصعوبة ... مش فى أوربا ولا فى الخليج !!!

ورغم هذه الظروف الصعبة اللى بنشتكى كلنا منها بنصرف مليارات على
كماليات سيارات وعلى الموبايلات وحتى نتائج السنة الجديدة
وبنصرف مليارات على قزقزة اللب والسودانى !!

الثبات الخرافى على السرعات العالية اللى حضرتك بتقول عليه
مش محتاجينها ولا تتناسب اطلاقا مع شوارع وطرق المحروسة

أنا أقصد النصيحة لنفسى أولا و لأخى صاحب الموضوع ثم لجميع اخوانى وأحبائى فى المنتدى
مفيش داعى نصرف فلوس على كماليات احنا فعلا مش محتاجينها ولا هنستفاد منها ...
بالعكس هتضرنا أكثر ما هتنفعنا !!!!

ولو صرفنا الفلوس ديه فى أوجهة الخير وللفقراء والمساكين واللى مش لاقى ياكل واللى مش لايقى يتجوز .... الخ هيكون أفضل لينا فى الدنيا والآخرة

هتلاقى ربنا مباركلك فى حياتك وفى فلوسك وفى صحتك وفى عربيتك أى كان نوعها ولو حتى كانت قديمة ومهكعه

تذكر ان الإسلام نهى عن الإسراف فى المباح والحلال
وتذكر ان ربنا هيسألك يوم القيامة عن مالك من أين إكتسبته وفيما أنفقته

وعلى عموم كل واحد حر ... يارب يكون كلامى خفيف عليكم ... ومحدش يزعل منى ... والسلام عليكم ورحمة الله وبركاته

[ahmad--ezzat]

بهزر يا اخى :)