طريق العذاب ( القاهرة السويس سابقاً )

[abo_lamar]

السلام عليكم ....

يعني اسيب شغلي في مدينتي عشان اترحم من الطريق الزبالة المسمى بطرق السويس ولا اعمل ايه بالضبط ؟
انا خلاااااااااااص اتخنقت من الطريق (ده اذا كان طريق أصلا ) اللي عبارة عن مأساة مكتوبة على كل واحد شاء سوء حظة وخلاه يمشي عليه كل يوم , اولا الطريق زحمة اوي تحس انك ماشي في شوارع شبرا مش ماشي على طريق سريع , التريلات وسيارات النقل حدث ولا حرج عددها اكتر من عدد الملاكي وتبقى ماشي تلاقي زلط و طوب و رمل و سن نازلين عليك و على عربيتك إشي على البربيز الامامي وإشي على الكبوت وإشي يكسرلك الفوانيس .
نعالى بقى على المصيبة اللي بتخليني افكر جدياً اني اقعد في بيتي احسن بكرامتي , الطريق المعجزة ده بعد كمين الشردة في اتجاة القاهرة ولمسافة 3 كيلو مكتوب عليك تمشي تاتا تاتا ليه بقى ؟؟
عشان في شوية طينة بعد مركز الامداد و التموين بتاع الشرطة على جنب الطريق الشمال واخد ربع الطريق وبتجبر السيارات انها تهدي و تمشي على مهلها عشان كده بتشوف زحمة و طابور طوييييييل لغاية ماتعدي من المنطقة دي , كل ده ولا في الدماغ ولا حد فكر انه يشيل الطينة دي او يعالج المنطقة .
والنبي ابوس ايدكوا يا مسئولين ارحمونا بقى وبلاش التنبلة دي وحد يشوف المشكلة دي .

[abo_lamar]

معلش في خطأ مطبعي هههههههههه
انا كتبت كمين الشردة معلش اقصد كمين الشرطة .... دول حبايبنا وعلى عينا و راسنا .

[محمد عز]

مشكلة تخطيط من المقام الأول

لما تبنى مدينة جديدة زى القاهرة الجديدة وما تحتوى عليها من تجمعات ضخمة زى الرحاب ومدينتى والتجمع الخامس

ويكون الدخول والخروج لمدينة متوقع لها ان تصل ل 4 مليون نسمة هو طريق مصر السويس

اللى عبارة عن حارتين فى كل اتجاه

والمصيبة الكبرى ان الخروج من القاهرة الجديدة باتجاه مصر الجديدة ومدينة نصر لازم تعمل يو تيرن

بنوا المدينة وقربت تخلص ومافيش جهبز اقترح

ان الطريق مصر السويس لازم يتوسع

الحل الفورى للطريق حاليا

توسعة الطريق ليصبح 4 حارات فى كل اتجاه مع انشاء كبارى علوية عند مناطق الدخول والخروج من منطقة القاهرة الجديدة والشروق

انشاء طريق موازى لطريق القاهرة السويس مخصص للشاحنات والنقل الثقيل فقط ويمنع مرور النقل الثقيل على الطريق الاصلى

اعتماد ميزانية انشاءوتطوير الطريق من المطوريين الكبار بناء على حجم الرحلات اللى بتولدها مشاريعهم

[M.Elgergawy]

ربنا معاك وياريت الطريق كله يكون بمستوى
الطريق اللي امام مدخل مدينتي

[htkamal]

باشا مهندس انا شغال فى مدينه الشروق من 2006 وكنت مبسوط جد من الطريق لانى ساكن فى مصر الجديدة والطريق من البيت للشغل كان بياخد 35دقيقة بس للاسف من ساعة الثورة ايه اللى حصل بقى عربيات النقل اصبحت بتجرى جرى رهيب علشان مفيش ردار ولا لجان وبرضة عربيات السرفيس وكانت لما تبقى جايه من السويس وداخله على كمين الشرطه كانت بتمسك يمنيها دلوقتى ملهوش دعوة ماسك شماله ولا همه اى حد ونيجى بقى لمشكله صيانه الطريق الحته اللى عامله مشكله فى طريق العودة للقاهرة بقالها شهرين وهى قدام مخازن الشرطه وهى عبارة عن حفرة كبيرة مرمى فيها طوب دبش ومليانه ميه واللى الواحد مش فاهمه ان هى قدام مخازن الشرطه يعنى اى مسئول فيها يقدر يتابع ويكلم الحى ويشوف المشكله ويحلوها وبرضه المشكله بتاعت الميه اللى قدام ورش الشرطه اللى قبل المخازن من فتر للثانيه الماسورة تضرب وبرضه كله مكبر دماغة فى حين ان الحل بسيط وسهل الشرطه عندها عماله وعندها القدرة على استدعاء المحليات لعلاج المشكله ويريحوا الناس ويحلوا ازمه بقالها شهرين بس فين بقى المسئول اللى قادر على الاتصال كله تبع تكبير الدماغ للاسف الطريق دة كان ممتاز ايام مكان البهوات الوزراء المحبوسين كانوا بيعدوا عليه كان ايه ولاحفرة ولامطب ولا اى حاجه

[hoky]

انا برضه ساكن في مدينتي وبعاني اشد المعاناه من الطريق ده والمشكله فعلا ان الواحد مضطر ان يستخدم الطريق كل يوم تقريبا لحد ما كرهت السكن بالرغم من تميز المكان نفسه

[Kareem Fawzy]

انا فى هندسة الشروق وبعانى نفس معاناتك يومياً
ارحمونا يرحمكم ربنا

[tarek_2005]

اخر معرفتي بهذا الطريق كانت منذ 5 شهور والساعة ال 12 بليل علشان لا افقد اعصابي

[koshary]

العربيات النقل بقت مشكله جامده اليومين دول وتيجى تكلم واحد فيهم تلاقيه بيتكلم كأنو اشترى البلد لحسابو ربنا يعافينا والحكومه تبص لحال البلد بقا شويه

[Abo_Lina]

الحكومة هاتسيب الطريق و مش هاتعبر حد
لحد ما يحصل حادثة كبيرة يبقى فيها ضحايا
و بعدين يجي أهل الضحايا يحتجوا و يسدوا الطريق من الناحيتين
هنا بقى الحكومة هاتصحى من النوم و تشيل البطانية و اللحاف و تغسل وشها بشوية ميه و تبدأ تشوف المشكلة
أتمنى التحرك الحكومي يكون أسرع طبعا و لكن للأسف المسؤول المصري لا يتحرك و لا يعالج المشكلة إلا بالإجبار

[wael30003]

ربنا يسهل ومجلس الشعب الجديد يعمل حاجة ويغير المحليات كلها

[mazagngi2010]

امشوا فى اسكندريه الزراعى واحمدوا ربنا على النعمه