لقدر الله والكاوتش انفجر هتعمل ايه؟؟

[AhMeD MeTwAlY]

ازيكم يا جماعه يا رب تكونو باكمل الصحه والعافيه
انا النهارده كنت بتمشي علي رجلي وخطر في بالي الموضوع ده وحسيت انه مهم لكل واحد فينا
لقدر الله انت ماشي بعربيه علي سرعه 140 وده المتوسط بين كل الناس الي بتكون مسافره والكاوتش انفجر هتعمل ايه
حالة الكاوتش المنفجر امامي يمين او شمال وكذلك الخلفي يمين او شمال
حصلت معا واحد صحبي وكان لسه مركب كاوتش جديد اشغل شاقه بس مش فاكر النوع
وهو ماشي 140 الكاوتش الامامي يمين طلع علي سن طوبه او ظلطه وانفجر كل الي حصل مسك في الدركسيون كويس وفصل العربيه لحد لما سرعتها انخفضة ونزل غيرها
لو انت مكانه هتعمل ايه؟؟
عن نفسي عربيتي بثق فيها جدا يعني لو انفجرو الاربعه او حتي حصل اي حاجه عندي امل ان هكون سليم(الفليشيا)

[Mostafa.Mahran]

محدش يقدر يقول هيعمل ايه كل واحد و نصيبه و الى ربنا هيلهمه بيه

[moh19227]

هتحاول تهدي العربيه علي قد متقدر من غير استخدام الفرامل - غيار عكسي -
هتاخد جنب الطريق
لو ماشي جوا مدينة هتحاول تحتك بالرصيف علشان تققل سرعتك
الكلام اللي فوق هوا الكلام النظري اما العملي كل واحد ونصيبه ومتعرفش انت ممكن تعمل ايه ساعتها

[bido600]

دي تعود علي اللي سايق ومقدرش اقولك الظبط
لاني لو مخضوض اكيد مش هيجي في بالي اي حاجة غير الفرامل وتحصل المصيبة الكبري
لو متيقظ وهادي هخلي العربية تهدي وانا مكلبش في الدريكسيون
ويا رب ميوريش لاي حد انفجار الكوتش دا خالص وخصوصا الامامي

[Ahmod]

والله بص الظروف اللى زي كدة دي ردة الفعل بتكون تلقائية منك

انت ممكن دلوقتي تقول مش هدوس فرامل وهمسك الدركسيون كويس وهحاول اركز

بس لو تعرضت للموقف لا سمح الله --- بعد الشر يعني

ممكن مع الربكة تلاقي نفسك اتصرفت غلط !

انا من فترة بعد ايام المطرة كنت ماشي حوالي 120-130

وباخد غرزة من اليمين لقيت قدامي بركة مية واخدة الحارة اليمين كلها وعلى امتداد حارتين قدام

كل اللى عملته سبت البنزين وركزت اني مادستش فرامل ولا احاول اتفاداها ومسكت الدركسيون جامد بحيث امشي في خط مستقيم

وعدت على خير الحمد لله

[hosar]

انا مرة حصلت معايا و انا راجع من مطروح بالليل و داخل على كمين ( الحمام ) و كان تحت منحدر فوجئت بالعجلة اليمين الامامية انفجرت .... و طبعا يا أقف بالفرامل يا أشيل الكمين ...
بس الظابط شال الساتر بسرعة و عدانى و يادوب وقفت بعد الكمين ب 50 متر تقريبا و عدت سليمة

[hosar]

و طبعا ستر ربنا قبل أى حاجة

[fouaa]

بالنسبالى الموضوع مختلف لما العجله بتفرقع على اى سرعه عادى جدا بفضل ماشى عليها لحد ماقف وطبعا كالعاده بنزل ملقيش العجله خالص بلاقى الجنط الغلبان وانا من ساعت مجبت العربيه حققت رقم قياسى فالموضوع ده لانى العجل فرقع منى خمس مرات وكل مره بغير العجله خالص لانى مبقفش الا عند بتاع الكاوتش وببعت اجيب من البيت عجله غيرها ودى تعتبر ميزه جامده جدا فالبيتلز

[ahma8]

لسه حالصة لعربية نص نقل قدامى على الطريق و كانت محملة نابيب بتوجااز من النوع الطويل
بس الواد معلم العربية عومت منه بس عرف يمسك نفسه قبل ما يخبط فى الطبان

ربنا يستهرا علينا كلنا آمين يا رب

[Kareem Fawzy]

تصرفى هيكون عمرى ما هدوس فرامل وهثبت الطاره بس الله اعلم ساعت القدر هيحصل اية
ساعت القدر يعمى البصر

[me_medoo]

انا كنت دايما بنصح الناس ان لو حصل معاهم كده ما يضغطوش نهائي على الفرامل ، لكن ساعة ماحصلي الموقف ده ، أول حاجه عملتها مسكت فرامل هههههههههههههههههههه من الخضة .


بس انا عاوز أقول كلمتين ... نصيحة لوجه الله ... البلد دي مش بتاعت سرعة أبداً أبداً أبداً حتى لو الطريق فاضي ... الا ماتلاقي واحد حمار يقولك طيب ماهو الطريق فاضي خليني اخش عكس ههههههههههههههههههه وتيجي حضرتك وتقوم ضارب فيه ولا بس فيه .

وحتى لو كانت عربيتك زيرو وحديثة وكوتشاتك كويسين هتلاقي الي جمبك أو الي قدامك كوتشاتو متنيلين ... وتبقى جي تعدي من جمبو وبالصدقة كوتشاتو تفرقع يقوم يفقد السيطرة ويلبس فيك ... وطبعاً بعد الشر عليكم ربنا يحميكو لشبابكو ولأهليكو ولمراتتكم وعيالكم .

ده غير أقفاص المنجا والاوطة والبرتقان واليوستفندي ... محدش يقول ده حتت قفص هخبطو ويطير ... لأن ساعتها بيبقى القفص عبارة عن حجر كبيررررررررر ممكن يقلبك ... ومن كتر العربيات الي هتدوس على الاوووطة أو الطماطم بتخليها صلصة على الاسفلت ويزحلق أم العربيات الي هتعدي عليها ... ده غير مرات تبقى عاوز تعدي وتطلع من العربية الي قدامك تلاقي واحد عبقري عربيتو عطلانة وواقف في أقصى شمال الشارع ده أذا مكنش واقف بيصلح عربيتو في نص أم الشارع الهاي واي السريع وكأنو واقف وراكن قدام بيتهم وقاعد عمال بيصلحها . وطبعاً تكون جي بتجري ومش واخد بالك أن في كام عبقري كده مكسل انو يركن عربيتو على جنب وساعتهاااااااااااااا زغرطي يأ أم أحمد وعليه العوض ومنو العوض ... وممكن الي واقف في نص الشارع ده بيصلح عربيتو يضربك ويقولك انتا الي خبطني وانتا الي جي بتجري ... وينسى أساساً أن ده مش مكان وقفه أساساً . هههههههههههههه وعجبي . وربنا يستر طريقكم يارب .

[Youssef.Awad]

انا كنت دايما بنصح الناس ان لو حصل معاهم كده ما يضغطوش نهائي على الفرامل ، لكن ساعة ماحصلي الموقف ده ، أول حاجه عملتها مسكت فرامل هههههههههههههههههههه من الخضة .


بس انا عاوز أقول كلمتين ... نصيحة لوجه الله ... البلد دي مش بتاعت سرعة أبداً أبداً أبداً حتى لو الطريق فاضي ... الا ماتلاقي واحد حمار يقولك طيب ماهو الطريق فاضي خليني اخش عكس ههههههههههههههههههه وتيجي حضرتك وتقوم ضارب فيه ولا بس فيه .

وحتى لو كانت عربيتك زيرو وحديثة وكوتشاتك كويسين هتلاقي الي جمبك أو الي قدامك كوتشاتو متنيلين ... وتبقى جي تعدي من جمبو وبالصدقة كوتشاتو تفرقع يقوم يفقد السيطرة ويلبس فيك ... وطبعاً بعد الشر عليكم ربنا يحميكو لشبابكو ولأهليكو ولمراتتكم وعيالكم .

ده غير أقفاص المنجا والاوطة والبرتقان واليوستفندي ... محدش يقول ده حتت قفص هخبطو ويطير ... لأن ساعتها بيبقى القفص عبارة عن حجر كبيررررررررر ممكن يقلبك ... ومن كتر العربيات الي هتدوس على الاوووطة أو الطماطم بتخليها صلصة على الاسفلت ويزحلق أم العربيات الي هتعدي عليها ... ده غير مرات تبقى عاوز تعدي وتطلع من العربية الي قدامك تلاقي واحد عبقري عربيتو عطلانة وواقف في أقصى شمال الشارع ده أذا مكنش واقف بيصلح عربيتو في نص أم الشارع الهاي واي السريع وكأنو واقف وراكن قدام بيتهم وقاعد عمال بيصلحها . وطبعاً تكون جي بتجري ومش واخد بالك أن في كام عبقري كده مكسل انو يركن عربيتو على جنب وساعتهاااااااااااااا زغرطي يأ أم أحمد وعليه العوض ومنو العوض ... وممكن الي واقف في نص الشارع ده بيصلح عربيتو يضربك ويقولك انتا الي خبطني وانتا الي جي بتجري ... وينسى أساساً أن ده مش مكان وقفه أساساً . هههههههههههههه وعجبي . وربنا يستر طريقكم يارب .

[agwaa]

وهو ماشي 140 الكاوتش الامامي يمين طلع علي سن طوبه او ظلطه وانفجر كل الي حصل مسك في الدركسيون كويس وفصل العربيه لحد لما سرعتها انخفضة ونزل غيرها
لو انت مكانه هتعمل ايه؟؟

السلام عليكم جميعاً ...
طبعاً هعمل نفس إللي عمله فيما عدا إنه فصل العربية دة كدة خطر جداً
بص يا باشا :
الموقف دة لما يحدث ( % 50 ) بيعتمد على سرعة بديهتك ودة الإنسان بيكتسبه من كتر التجارب وقدرته على إكتساب المهارات من كل تجربة بتحصل ليه ( ودة بيختلف من شخص لآخر )
ال ( % 50 ) التانية بيعتمد على رحمة ربنا في تهيئة الظروف المحيطة بالمكان إللي بيحدث فيه الموقف دة

مثلاً :
_ إللي إنفجر الكاوتش الأمامي ( موش فارقة يمين أو شمال ) ولا الكاوتش الخلفي ( برضه يمين أو شمال موش فارقة ) الفارق الكاوتش الأمامي بتكون المشكلة أكبر لأن الدركسيون بيكون أثقل والتحكم فيه أصعب

_ الإنفجار حدث في بقعة زيت مثلاً ( كارثة ) أو في ظروف أمطار ( كارثة مع السرعة العالية )

_ حالة الطريق أسفلت أو رملي أو خشن ... إلخ

_ وجود شخص زي ضابط الكمين سريع البديهة والمتعاون زي ما حصل مع أخونا الكريم

_ وجود رصيف ممكن تستفيد بيه لتقليل السرعة بالإحتكاك به في المدن ( وطبعاً بتعمل إحتكاك بالعجلة إللي في الجهة اللأخرى للإنفجار والموازية لها - يعني لو إنفجرت الفردة الأمامية شمال تعمل إحتكاك بالأمامية يمين والعكس )

وهكذا ... دي أمثلة من تدخل ربنا سبحانه ( وليس تدخل القدر كما يقال )

حصلت معا واحد صحبي وكان لسه مركب كاوتش جديد اشغل شاقه بس مش فاكر النوع
وهو ماشي 140 الكاوتش الامامي يمين طلع علي سن طوبه او ظلطه وانفجر

طبعاً صاحبك هنا تقع علية جزء كبير من المشكلة ...
وهو أنه أكيد إختار نوع الكاوتش الخطأ للظروف إللي كان فيها ( سرعات عالية - الأحمال بالسيارة - نوع الطريق ... إلخ )

عن نفسي عربيتي بثق فيها جدا يعني لو انفجرو الاربعه او حتي حصل اي حاجه عندي امل ان هكون سليم(الفليشيا)

نصيحة ما تطمنش قوي كدة على العربية ( مع إحترامي الشديد جداً لفليشيتك ) فالقدر مالوش كبير ( لا تقولي فيليشيا ولا هامر )


وتقبلوا مروري و تحياتي

[egyptiandiver]

سرعة 140 + إنفجار = انك واللي معاك تتشهدو ! أول حاجة شيل رجلك من على البنزين تاني حاجة امسك الدركسيون باحكام, تلاتة شعر فرامل و إدي الجير الاقل و أكيد شغل الرباعي، و أولاً و أخيراً متمشيش أساساً كدة إنت فاكر نفسك في سويسرا اللي الحارة اللي الإتجاه الواحد فيها على الاتوستراد 8 حارات منهم حارة للسرعات إلي فوق 200 كم في الساعة، هناك الاسعاف طائر علشان الانسان هناك غالي! هنا لما تعمل حادثة عقبال لما الاسعاف تتحرك و تجيلك تكون إتشليت أو مت و لا جتلك عاهة مستديمة ! و مين هيصرف على علاجك و يصرف على أسرتك و عليك? التأمين الصحي ولا التأمينات الاجتماعية؟ ماهو طبعاً المعاش مهيقلش عن 10,000 جنيه مش كدة؟ ربنا يسترها علينا جميعاً.

[Land_Cruiser]

محدش يقدر يقول هيعمل ايه كل واحد و نصيبه و الى ربنا هيلهمه بيه