مشروع .... تاكسي ؟

[Mandible]

السلام عليكم اعضاء المنتدى الكرام ..

في الفترة الاخيرة بدأت افكر في مشروع يساعد على سد متطلبات المعيشة الزائدة باستمرار بالاضافة الى توصيل اخي الصغير الى المدرسة يوميا خصوصا و انا مشغول دائما في كليتي و الوالد في عمله .. فاقترح والدي شراء سيارة تاكسي و توظيف سائق عليها و ببعض الحسابات الصغيرة تبين ان الموضوع مربح الى حد ما .. ليس بالقدر الكبير و لكنه على الاقل سيحقق الهدف الثاني من الفكرة .. و طبعا قبل البدء في التنفيذ كان لزاما غلي ان استخير الله اولا و من ثم اعضاء المنتدى الغاليين .. و اليكم بعض الاسئلة المحورية
1- ما هي افضل سيارة تصلح كتاكسي ؟ اقترح والدي " لادا " بسبب رخص سعرها و انتشار قطع غيارها
2- ما هي خطوات تحويل السيارة الى تاكسي ؟ ام تشترى جاهزة كتاكسي ؟
3- ما هو نظام المحاسبة بيني و بين السائق في المرتب اذا فرضنا وجود سائق امين ؟ وكم يكون مرتبه تقريبا ؟
4- كيفية جعل السائق مسؤول قانونا عن اي شئ يحدث للسيارة ؟
5- هل شرط تحويل السيارة الى غاز ؟ و ماهي خطوات تحويلها ؟
6- هناك بعض الاعلانات التي تعلن على جسد السيارة في مقابل مادي بالشهر .. كيف و من اين نأتي بهذه الاعلانات ؟
عذرا للاطالة و لكني " اتعشم" فيكم الخير .. و اذا كان هناك بعض الامور المخفية التي غابت عني ارجو توضيحها و شكرا

[Sehsss]

أفضل سيارة تاكسي حاليا b y d واللادا المصري سيئة جدا

[Mandible]

أفضل سيارة تاكسي حاليا b y d واللادا المصري سيئة جدا

شكرا لرد حضرتك .. انا قلت للوالد نفس الكلام برده :)

يا ترى سعرها كام حاليا ؟

[Sehsss]

شكرا لرد حضرتك .. انا قلت للوالد نفس الكلام برده :)

يا ترى سعرها كام حاليا ؟

آخر مرة سألت من 3 شهور كانت الفول أوبشن بـ73 ألف ، والأوتو فاتحة سقف 86

[rockana9112007]

متابع معاكم بأهتمام

ومعلوماتى المتواضعة عن الموضوع
ان العقدة فى النمر او الترخيص لان لايوجد ترخيص لتاكسى جديد فى القاهرة الكبرى وكل الجديد هو عملية احلال سيارات تاكسى قديمة بأخرى جديدة
وفى ناس بتبيع النمر او بتبيع سيارات تاكسى قديمة بأسعار مبالغ فيها بسبب النمر او الترخيص
وفى ناس ومعارض بتبيع سيارات تاكسى جديدة بالنمر والترخيص بأسعار خيالية وسمعت ان التاكسى الفيرنا بيتباع فى معارض ب 120 الف جنية كاش تخيل

[abu_soheib]

-فعلا الفيرنا تاكسي أبيض بـ120 ألف.
-نظام المحاسبة وردية تقريبا ثمان ساعات حسب الاتفاق على المبلغ و ياخدها مفولة و يرجعها مفولة و مغسولة.
-يعني بتبقى معروفة الوردية بكام بس أنا مش متأكد دلوقتي هسألك إن شاء الله.
-المسؤلية أدبية و في الغالب كلها على المالك علشان كده لازم يكون السائق ثقة يحاسب ضميره مخافة الله.
-ليس شرطا طبعا موضوع الغاز بس أوفر من ناحية البنزين و أزمات البنزين و بيتم نقدا أو بالتقسيط من البنزينات اللي بتوفره مباشرة.
نظام الاعلانات كان للسيارات اللي معملها احلال مساهمة في ثمن السيارة الجديدة و فشلت الفكرة فلا توجد الأن.
يعني في الغالب علشان المشروع ينجح لازم صاحبه هو اللي يديره على الأقل يتحمل ورديه و بالتوفيق إن شاء الله...

[rockana9112007]

طب لو حضرتك تعرف فكرة عن نظام التقسيط يبقى ازاى ياريت تفيدنا

[SYD]

-فعلا الفيرنا تاكسي أبيض بـ120 ألف.
-نظام المحاسبة وردية تقريبا ثمان ساعات حسب الاتفاق على المبلغ و ياخدها مفولة و يرجعها مفولة و مغسولة.
-يعني بتبقى معروفة الوردية بكام بس أنا مش متأكد دلوقتي هسألك إن شاء الله.
-المسؤلية أدبية و في الغالب كلها على المالك علشان كده لازم يكون السائق ثقة يحاسب ضميره مخافة الله.
-ليس شرطا طبعا موضوع الغاز بس أوفر من ناحية البنزين و أزمات البنزين و بيتم نقدا أو بالتقسيط من البنزينات اللي بتوفره مباشرة.
نظام الاعلانات كان للسيارات اللي معملها احلال مساهمة في ثمن السيارة الجديدة و فشلت الفكرة فلا توجد الأن.
يعني في الغالب علشان المشروع ينجح لازم صاحبه هو اللي يديره على الأقل يتحمل ورديه و بالتوفيق إن شاء الله...

مع حضرتك ولكن في نقطة بس عايز اوضحها

موضوع الغاز شرط اساسي وليس اختياري
اي تاكسي ابيض لازم يبقي غاز واساسا حضرتك بتشتريها بالغاز

واحسن الحلول انكوا تكتبوا مع بعض عقد وكأن السيارة بالأيجار ووصل وكل الطرق التأمينية لضمان حقك

والله المستعان
،
،

[مواطن مصرى]

1- ما هي افضل سيارة تصلح كتاكسي ؟ اقترح والدي " لادا " بسبب رخص سعرها و انتشار قطع غيارها
2- ما هي خطوات تحويل السيارة الى تاكسي ؟ ام تشترى جاهزة كتاكسي ؟
3- ما هو نظام المحاسبة بيني و بين السائق في المرتب اذا فرضنا وجود سائق امين ؟ وكم يكون مرتبه تقريبا ؟
4- كيفية جعل السائق مسؤول قانونا عن اي شئ يحدث للسيارة ؟
5- هل شرط تحويل السيارة الى غاز ؟ و ماهي خطوات تحويلها ؟
6- هناك بعض الاعلانات التي تعلن على جسد السيارة في مقابل مادي بالشهر .. كيف و من اين نأتي بهذه الاعلانات ؟
عذرا للاطالة و لكني " اتعشم" فيكم الخير .. و اذا كان هناك بعض الامور المخفية التي غابت عني ارجو توضيحها و شكرا

1- لو تاكسى ابيض ممكن لانوس او byd ... اللادا المصرى مش كويسه و لازم التاكسى الابيض يبقى تقفيل محلى فبالتالى اللادا الروسى متنفعش بس خد بالك ان فارق السعر بين اللادا المصرى و اللانوس و byd ممكن يوصل 26 الف جنيه (72 الف مقابل 46 الف جنيه للادا بدون تكييف و باور)

2- للاسف الشديد تراخيص السيارات التاكسى موقوفه فى القاهره الكبرى و الحل الوحيد هو انك تشترى نمر اجره من معرض او سمسار او سواق او تشترى تاكسى قديم و تخرده انت او تفك منه النمر و تبيع التاكسى القديم كملاكى (سعر النمر من 35 الف و طالع و بتوصل الى 50 الف جنيه احياناً ) و فيه معارض بتعمل حاجه حلوه بتشترى النمر و تركبها على عربيات زيرو و يأمن عليها و تحولها غاز كمان و بتخلص هى كل الاجراءات و يبقى التاكسى جاهز للاستخدام مقابل بس كده هيوصل تمن التاكسى الى 120 الف جنيه (70 ثمن العربيه + 40 ثمن النمر + 5 تحويل الغاز + مكسب المعرض من سمسره النمر و انهاء الاجراءات)

3- السائق ملوش مرتب له ورديه 8 ساعات بيستلم العربيه متفوله و يرجعها متفوله .. الورديه من 50 الى 80 جنيه حسب الاتفاق او حسب انه يرجعلك مبلغ ثابت و الباقى ليه (زى الميكروباص)

4- السائق بيمضى على وصل امانه او شيك بثمن العربيه وبيبقى مسئول عن اى حاجه بتحصل

5- مش شرط تحويل السياره غاز هو بيبقى للتوفير فقط و بينى و بينك بالنسبه للتاكسى الغاز احسن

6- الاعلانات دى كانت ضمن عرض احلال التاكسى اللى كان عامله يوسف بطرس غالى وزير ماليه مبارك (الله لا يرجع ايامه) كنوع من تعويض اصحاب التاكسات القديمه (اللى اخدها منهم بخمسه و عشره الاف جنيه و اداهم عربيات جديده قسط الواحده اكثر من الف جنيه) و الموضوع وقف خالص دلوقتى

لو بتفكر فى الموضوع اهم حاجه السواق اللى هيركب التاكسى مش العربيه او مصاريفها لان فيه سواق حرامى و فيه سواق كل يوم يعمل مشكله و فيه سواق ياخد العربيه و يعمل حادثه و يهرب و فيه سواق يقول العربيه اتسرقت منى و هو متفق مع ناس ياخدوها و هلم جرا و

ربنا يوفقك و يهديك للخير و ييسر لك الامر ان شاء الله

[Kareem Fawzy]

اهم حاجة لازم السواق تكون بتثق فيه ثقة كبيرة علشان المشروع ينجح لان ممكن لو السواق مش محترم
مش بس يسرق الايراد
دة ممكن كمان يقولك العربية اتسرقت منى ويبقى هو متفق مع الحرامية اصلاً
بالتوفيق

[MEKAWY2000]

السيارهpyd غاليه جدا مقارنه بالسياره النيسان واحتكار قطع الغيار وقله خبره الوكيل ودى عن تجربه مش اى كلام اما الادا المصرى فالى سوء سمعتها شركه الامل

[Mandible]

أنا متشكر جدا لردودكم الثمينة يا جماعة و اللي استفدت منها كتير اوي .. بس هو مفيش أمل في ترخيص دلوقتي خالص ؟ يعني لازم اشتري بالاسعار الوهمية دي ( 120 الف للفيرنا ؟؟؟ )

[SERAGBASHA]

طب والفلوس يا باشا بتدفعها في المعرض قبل ما تعمل عقد مسجل ولا امته بالظبط
وايه هي الاوراق اللي لازم استلمها مع العربيه وانا بستلم التاكسى