تصليح الكبالن

[AhMeD MeTwAlY]

انا اول مره اسمع عن تصليح الكبالن والي قالي ميكانيكي عندنا هنا بيقولي بيفكهم ويصلحهم الواحد بـ 40 جنيه
طبعا انا اتنين يمين بيظين واحد بتاع الفليشيا والتاني بتااع السيفيك ايه رأيكم اروح اجرب
الراجل دا عندنا في الزقازيق عند طريق هريه ؟!؟!؟

[ZOoOoMA]

كوبلن بيتصلح؟؟؟؟ ازاي بس اعرف الفكره ايه بس لاني مستغرب زي زيك
بص هقولك حاجه انت جرب على وحده و امشي بيه فتره لقته كويس يبقى اعمل التانيه
و برضو في الاول و في الاخر القرار قرارك

[AhMeD MeTwAlY]

انا هجرب في السيفيك وربنا يسترها

[almoez]

برده كذلك لسا من 3 ايام بالضبط سمعت انها بتتصلح بس مش بتتصلح بالمعني الدقيق بمعني اخر بتخليها تتطول شويه

[AhMeD MeTwAlY]

هجرب وانقل التجربه وربنا يقدم الي فيه الخير

[نينو]

ايوة الكبالن بتتصل عن طريق اللحام بيفك الكبلن و بيزود لحام في من جوة مكان رولمان البلي كدة و بعد كدة بيجلخو تاني علي الموتور و بيركب يعني عملية زي الحشو كدة بس برضو بيكون عمرو قصير

[reallistic]

أنا سمعت فعلاً عن تصليح الكبالن و أنهم بيتملوا
بس برضه سمعت ان الحكاية دي مش بتعيش و الله أعلم !

[mazagngi2010]

بتمد عمرالكوبلن شويه ويتهيالى فاكس وهتروحله تانى بمصنعيه جديده فعلى ايه ده كله هات جديد ولا استيراد وركبهم مره واحده واشترى دماغك

[yaserbasha2000]

فعلا بيتعمل ملو باللحام مكان النتؤات في مجاري رمان البلي بس نتيجه اختلاف المواد بين الجسم الاصلي للكوبلن و ماده اللحام النتؤات دي بترجع تاني بسرعه

فالافضل علشان المصنعيات و العطله انك تشتري جديد حتي لو فئه متوسطه يعني مش لازم الاصلي

[فادى محمد]

ماده الملو(اللحام) اضعف كتير من الماده الاصليه ,البلي هياكلها بسرعه
احيانا بيحطوا مع الشحم ماده(القار) علشان تكتم الصوت بتاع الطقطقه
يعني الكوبلن يبقي بياكل بعضه وماتسمعش حاجه عنه وده خطر طبعا
هات راس كوبلن جديد ووفر حتي وقتك ومصنعيه الفك والتركيب

[mohammedabdallh]

بلاش
انا جربتها كذا مره موضوع فكسان هو عباره بيفك الكوبلن ويزود شحم ويشوف البلى والحاجات الى جوه
بس طبعا اى كلام
انا فى سنه غيرت 3 كبالن
بس كانوا فى البيجو 504 كبالن خلفيه ومع اى امركه تلاقى الكوبلن سقط منك وشكلك وحششششششششششش
ههههه

[hosar]

انا زمان صلحت كوبلين لبيجو 305 و أستمر معايا 3 سنيين زى الفل
بس الرك على الصنايعى إلى بيصلحهم دول ليهم ناس متخصصين

[AhMeD MeTwAlY]

اذن وبناء عليه
هنجيب كبالن جديده وبلاش الاستيراد مش بضمنه

[أحمد كمال]

بالظبط الاستيراد ما ينفعش في نواقل الحركة ابدا

[أبو صلاح]

عن تجربة

اياك وتصليح الكوبلن هيكلفك في حدود 100ج
صلحتهم قبل كده بعد التركيب فك واحد وانا ماشي على الصحرواي - غلطة صنايعي وقت التركيب
مقعدوش معايا اكتر من شهر ونص وتسمع احلى طرقعة

في الاخر رحت جيبت الصيني قعدوا معايا سنة وغيرتهم بصيني برضه
سعر الصيني 150 ج (كده غالي على فكرة بسبب ان عربيتي ريو) لكن مثلا بالنسبة لفرنا كانت ب 80 ج جديد صيني وده احسن الف مرة من تصليح وعك