احكيلنا قصه حياتك مع العربيات ركبت كام عربيه

[أبو إياد]

اسف يعنى فى الكلمه بس اهو هوضح مبدا بسيط
تقدر تدى مراتك لحد
اكيد طبعا لاء
انا بقا الهوندا دى من ساعت ما حبتها
و انا بحبها اكتر من اى حد فى الدنيا
و ساعات بكلمها و ان شاء الله
هنزل موضوع هفسر فيه كل حاجه عن حبى للهوندا و كلامى معاها ^_^
هتقول عليا مجنون
انا هعمل الموضوع دلوقتى على المنتدى العام للسيارات
و ادخل اقراه
هتموت على نفسك من الضحك
انا حاسس كده انى لو اتجوزت مراتى هتقولى يا انا يا العربيه
علشان كده لحد دلوقتى مش راضى اخطب ولا اتجوز
^_^

ياباشا والله انا بهزر معاك على فكره وربنا يباركلك فيها ويكفيك شرها بس العربيات بالنسبالى مجرد وسيله ومش فارق معايا انا راكب ايه هاتصدقنى انى مره نزلت من هامر h3 وجاى بيها من التجمع للمهندسين وركبت بعدها 128 فانا ومجموعه من اصحابى واقاربى ماحدش يقدر يعرف دى عربيت مين اساسا او باسم مين . هات المفتاح , هات الرخصه , هابقى اكلمك , سلام

[ahmedeihab]

ياباشا والله انا بهزر معاك على فكره وربنا يباركلك فيها ويكفيك شرها بس العربيات بالنسبالى مجرد وسيله ومش فارق معايا انا راكب ايه هاتصدقنى انى مره نزلت من هامر h3 وجاى بيها من التجمع للمهندسين وركبت بعدها 128 فانا ومجموعه من اصحابى واقاربى ماحدش يقدر يعرف دى عربيت مين اساسا او باسم مين . هات المفتاح , هات الرخصه , هابقى اكلمك , سلام

انا نزلت الموضوع اهو
عايز رأى الناس فيه
و ياريت تنورنى يا باشا و تقولى رأيك فيه الكلام اللى مكتوب فى الموضوع
اللينك اهو

http://www.nilemotors.net/Nile/275599-a.html#post3874154890

[horas3000]

لو على الركوب انا ركبت عربيات بجد لا حصر لها طبعا مامتلكتش العربيات دى كلها بس كل عربيه منهم فضلت معايا فتره ومن افضل العربيات اللى ركبتها هى العربيات الالمانى تحديدا ال bmw
سيات
1300
125
127
128
لادا
ارجينتا
132
ريجاتا
فولكس امازون
جولف 1
بولو
كريستاله
ماكوه
بومه
شارك
سبرانزا الكبيره والصغيره 2007
سيراتو 2005 / 2010
النترا 2006/2009
نيسان صنى 2007
كورولا 2006
باسات 2007
bmw 320 موديل 81
bmw 316 موديل 94
bme 318 موديل 99
bmw 325 موديل 94 كابورليه
bmw 520 موديل 90 ( وحش)
bmw z3 موديل 94
مرسيدس e240 موديل 2005
مرسيدس s350 موديل 2004
هامر h2
هامر h3
كريزلر c300
ليبرتى 2005
كوماندر 2007
جراند 2000
دودج رام 2007
فورد اكسيبديشن
جريت وول دبل كابينه
هيونداى h1

تمام يا زعيم
مشاركتك ده كانت تنفع في الموضوع ده

http://www.nilemotors.net/Nile/100295-a.html

و فيه هتلاقوا العربيات اللي سقتها برضه و طبعا زاد عليهم لانه قديم

[m_kamal]

تماااام كده
كله بقي يقوم يعمل كووبايه شاي او ربع كيلو لب و يجي

و اودي حكايتي يا جماعه

انا حكايتي مع السيارات ابتدت من وانا عندي سنة واحدة في 83 في الكويت. وقتها ابويا (زي كل المصريين العاملين بالخليج) كان محتار بين البيجو ال 505 و المازدا ال 626. قام جاب ورقتين و كتب علي وحدة بيجو و التانية مازدا و حطهم قدامي عشان اختار و اخترت البيجو و قد كان و اشتراها ابويا و كانت اوتوماتيك و مكيفة طبعا و كانت برضة اول عربية زيرو يشتريها عشان كدة فضلت موجودة لحد ما بعناها في 2005 بعد ما نزلناها مصر سنة 86.

و لسه فاكر اول حادثه ليا و كان عندي 4 سنين و كانت بعربية والدتي المازدا ال 121 موديل 80 و كنت قاعد قدام جنبها و فرملت فجاة و انا طرت و لبست في البربريز طبعا و قتها حزام الامان و كراسي الاطفال كانوا كماليات .

خلال فترة طفولتي والدي كان شغال في مزرعة مواشي و كانت تعتبر بعيدة و مشوارها طويل عشان كدة كانت الشركة اللي ماسكة المزرعة بتديلو عربيات يستخدمها اذكر منها سوبارو بس مش فاكر اسهمها (غالبا امبريزا) و ايسوزر تروبر اول معرفتي بال 4x4 و في 89 قرر ابويا يجيب عربية لية بدل ما هو معتمد علي عربيات الشركة و جاب فولو 240 و كانت دبابة مش عربية. و في سنة 90 ابويا اترقي و اخد باجيرو موديل السنة لاستخدامة و ده انا فاكرها كويس لانها كان فيها اوبشنش كتير اعزهم علي قلبي وقتها فتحة السقف اللي كانت كبيرة جدا و ممكن اللي في الكراسي الخلفية يستمتعوا بيها و هو ده اللي كنت بعملوا انا و اخواتي باننا نقف علي الكنبة و نطلع روسنا منها. في نفس السنة حصل الغزو العراقي و كانوا العراقيين بياخدو العربيات الجيب من صحابها و عشان كده ابويا خبي العربية لحد ما صاحب الشركة طلب انو ياخدها عشان يهرب بيها عن طريق الصحرا و ادانا بدالها تويوتا كرسيدا موديل 88 و نزلنا بيها هي و الفولفو علي مصر. و في الطريق كنت راكب مع ابن عمي لانو كان لوحدو و اتعلمت السواقة من خلال النظر الية طول السكة من الكويت لحد العقبة في الاردن حيث تم نقل النساء و الاطفال عن طريق القوات المسلحة المصرية بطائرات نقل الجنود الي مطار القاهرة .

بعد الغزو سنة 91 رجعنا الكويت بالفولفو اما الكريسيدا بعناها في مصر و سنة 92 و بعد ما الاحوال اتظبطت قرر ابويا انو حان وقت و داع الفولفو و بدلها ببيجو 405 و كانت فاضية و مانويل علي اساس انو ينزلها مصر و في نفس السنة جبنا لوالدتي نيسان جلوريا و دي كانت موديل 89 لكن كان فيها تكنلوجيا عالية جدا و ده كان اكبر مسبب للمشاكل فيها. و في سنة 95 و بعد ما عرف ابويا انو غلط انو جاب البيجو فاضية و لان تكيفها كان علي قدو قرر انو يغير و كان برضوا محتار بين المرسيدس ال C180 او الباجيرو و كان راي انا و اخواتي انها مش عايزة تفكير اكيد الباجيرو (كنت لسه عيل اهبل) و ده طبعا بسبب الذكريات الجميلة مع سابقتها و بعد الاستخارة جبنا الباجيرو و بعدها بسنة جبنا جالانت لوالدتي بدل النيسان و في سنة 98 سبت الكلام ده كلة و نزلت مصر لدراستي الجامعية و ده فصل جديد

طبعا اللي فات ده كلة ميعتبرش احتكاك حقيقي بالعربيات حيث اني ماكنتش بسوق اي حاجة منهم (الا الباجيرو و الجالانت في وقت لاحق) لكن انا كنت متابع عالم العربيات و كنت بشتري مجلات بانتظام و بقرا كاتلوجات العربيات اللي عندنا من الجلدة للجلدة و عارف كل اوبشن فيهم و طبعا كل ويك اند باخد الجردل و الفوط و بنظفهم من جوة و ده كانت متعة ليا

بعد ما نزلت مصر و لما طلعت الرخصة (المصرية و الكويتية) سنة 2001 ابويا طلعلي البيجو ال 505 (فاكرينها) عشان استخدمها و طبعا العربية مركونة من 86 و مبتتحركش الا شهر كل سنة. طبعا ده كان له تاثير كبيييييير علي العربية و يا ما عملت فيا مواقف بايخة و غيرت فيها حاجات كتير اهمهم الجير كلة لان التروس اتاكتلت بعيد عنكم لكن اكبر مميزاتها ان صاجها كان حديد و متورها كان جامد 2000 سي سي بقي و كانت حلوة و مريحة علي الطريق. طبعا انا ما كانش ليا في الجري ساعتها فمحصلش و جربت الثبات بتاعها فوق ال 120 . طبعا في الاجازات لما كنت بنزل الكويت جاتلي الفرصة اني اسوق الباجيرو و الجالانت و طبعا الفرق بينهم و بين البيجو كان فرق السما من الارض خصوصا الجالانت لانها كانت في نفس فئة البيجو و نفس سعة الموتور لكن فرق النعومة و الراحة و الاوبشن حاجة تانية

و في 2002 و انا فرحان بالبيجو و بفر فيها في شوارع المحروسة و صلني خبر من الكويت زلزل كياني. و صلني ان والدي جاب اودي A6 طبعا انا اول ما سمعت كدة بقيت اعد الساعات عشان انزل الكويت و اسوقها و طبعا اول مانزلت الكويت تقريبا قضيت اول ليلة ليا فيها. ده كانت اول عربية الماني احتك بيها عن قرب و كانت اختراع و سواقتعا كانت متعة خصوصا مع الستريبترونيك و سحبها كان جبار رغم انها كانت 2400 سي سي بس ده غير الفخامة و التقفيل الرائع و لكم ان تتخيلوا لقائي مع البيجو لما رجعت مصر. في صيف نفس السنة ابويا خد البيجو في مشوار و لما رجع راح راميلي المفتاح و قالي خد الكراكة بتاعتك دي و شوفلي عربية حلوة عشان يجيبها طبعا انا كنت هطير من الفرح لان العربية الجديدة اكيد هتبقي تحت ايدي. بعد مسح شامل للسوق وقتها و قع اختياري علي الكرولا لانها كانت افضل ما في فئتها و توكلنا علي الله و جيبناها و يشاء القدر اني اعمل بيها حادثة في اول اسبوع و ده اللي خليها تتركن و اخاف و اكش منها و مقربلهاش و خلتني مع البيجو الاصيلة و المدرعة....

في 2003 ربنا كرم اختي و قبلت في جامعة الكويت و طبعا احتاجت عربية و حيث ان الباجيرو كانت لا تستخدم اخدتها والدتي و ادت الجالانت لاختي. و لان الباجيرو كانت تعتبر نص نقل بالنسبة للجالانت والدتي محبتهاش و تم استبدالها بباجيرو الجديدة اللي بقت انعم و اكتر تحضرا من الموديل اللي كان معانا و عجبت والدتي و طبعا جربتها في اجازتي و صعقت لمدي التغيير اللي حصل بين المودلين لان الجديدة كانت انعم بكتير و سواقتها اسهل.

في 2004 ابتدت البيحو تقل باصلها معايا و قعدت عن الميكانيكي اكتر ما قعدت معايا فقرر ابويا انه كتر خيرها علي كده و بعتها و لسة فاكر تاثر والدي و احنا بنسلمها. و انا استلمت الكرولا و حاربت خوفي و قلقي منها. وفي نقس السنة فوجئت باني والدي قرر ينزل الباجيرو مصر و يجمركها و قد كان. الكرولا طبعا مش محتاجة راي فيها الكل عارفها عربية محترمة جدا جدا و تكيفها خارق و كنت مبسوط اني احسنت الاختار و جبناها و يعيبها انها كانت 1300 سي سي بس فمكنش في فرصه اظهر طيش الشباب بيها ههههه

و في اول اجازة بعد الموضوع ده كنت متشوق عشان اعرف العربية اللي جت بعد الباجيرو و لقيت السيتروين C5 موجودة. الاختار ده كان مفاجاة خصوصا ان الفرنساوي مش منتشر و لا محبوب في الخليج بالاضافة ان العربية شكلها ما كانش عاطفي مع انها كانت مليانة اوبشنز و سواقتها مريحة للغاية و ده اللي كان عاجب والدتي جدا لكن انا كانت الاودي هي رقم واحد. و بما ان الجالانت كانت برضة شبة انتهت علي يد اختي كان ليا مشاركة في تبديلها باللانسر البومة و اللي كانت لسة نازله و كانت عاجباني و طبعا عجبت اختي.

في 2005 و انا في مصر برضوا و صلني خبر اشد صعقا من خبر الاودي الا و هو ان الاودي ابويا رجعها للشركة و جاب بي ام 730li و ده كانت بتشجيع من زميل لية لبناني في الشركة اشترك معاة و جابوا عربيتين زي بعض. طبعا انا كنت عايز اخد اول طيارة نازلة الكويت و حيث اني كنت مش هانزل في الاجازة لان ده كانت سنة التخرج اتقهرت اكتر. المهم اتخرجت من الجامعة و حيث اني كنت هرجع الكويت قررنا نبيع الكرولا لان ركن و تخزين عربيتين كتير و مالوش لزمة. و لما وصلت الكويت كان لي لقاء مطول مع البي ام و قعدت اشتكشف فيها و في ال iDrive فترة طويلة و طبعا السواقة و الفخامة دي عايزة موضوع لوحدة.

ابتدت رحلتي مع الوظيفة و طبعا احتجت لعربية و ابتديت ادور و اجمع معلومات عن العربيات المتاحة في السوق لكن والدي كان ليه راي تاني. شركتة كانت عملت شغل مع توكيل كرايسلر و بدل الفلوس خدوا 10 عربيات كرايسلر كونكورد كانت واحدة منهم من نصيبي و حيث ان الدفع كان بيتم لشركة والدي ما كانش قي فوايد و لا ضمانات و لا كفيل و لا حاجة من الكلام ده و وقفت عليا ب 5000 دينار بعد تخفيض 300 دينار عشان والدي.

الكونكورد ده كانت حكاية كانت طويـــــــــــــــــلة و المساحات الزجاجية فية قليلة و واطية فالقعدة فيها كانت كانك قاعد في غواصة و مبيبانش الا راسك بس. طبعا ده كان اختلاف جذري بينها و بين الكرولا اللي كنت متعود عليها و كنت ببقي مدايق من سواقتها. الحاجة التانية المتور كان 2700 سي سي و ده كان قليل اوي علي العربية لان وزنها تقييييل و طبعا السحب كان ضايع و اللي زاد و غطي ان السرعة القصوي محددة علي 180 بس و ده بالنسبة لشاب شيئ يدعو الي الكئابة. المهم قررت بعد مناوشات و مشاورات مع ابويا ان اروح التوكيل و ابدلها بحاجة تانية و حيث ان توكيل كرايسلر كان هو نفسة توكيل ميتسوبيشي و قع اختياري علي باجيرو البابين لكن تاتي الرياح بما لا تشتهي السفن تم تثمين الكونكورد و كانت عاملة 3000 كم بس ب 2500 دينار يعني نص التمن . و بعد الصدمة دي ققرت اخليها و اتعود عليها بدل ما اخسر فيها كل ده و فعلا قعدت معايا 3 سنين و بعتهافي 2008 ب 2750 دينار لاني سبت الشغل و نزلت مصر اكمل دراستي.

في هذه الاثناء كانت اختي التانيه دخلت الجامعه و طبعا زي اللي قبلها استولت علي الستريون من والدتي و تم شراء نيسان مورانو لوالدتي و دي تعتبر اول معرفتي بفئه الكروس اوفر لانها علي الرغم من علوها عن الارض لمن سواقتها تعتبر زي السيدان لكن بصراحه مش قادر اتقبل الفتيس ال CVT لانه بيقتل الشعور بالتسارع و التقلات لكنها عربيه محترمه جدا و durable جدا.

و خلال نفس الفتره ده و زي ما انتم عارفين سواقه البنات و الستات الستروين كانت انتهت في خلال سنتين من تولي اختي لقيادتها و طبعا لما حان اوان التغيير تدخلت انا و لان اختي كانت عايزه حاجه عاليه زي والدتي وقع اختياري علي الميتسوبيشي اوتلاندر و طبعا ال V6 ههههه و هي عربيه محترمه جدا جدا و سواقنها سهله و ممتعه و خصوصا انك جواها كانك سايق و قاعد في لانسر شارك لانها مشتركه معاها في الطبلون و يمكن ده عيب العربيه الوحيد

في خلال كل اللي فات ده كان في عربية مسيطرة تماما علي تفكيري و بتلوح كل ما اشوفها و كل ما اكون جنب توكيلها لازم ادخل اتفرج عليها و اقعد فيها و هي الفولكس الطوارق و عقدت العزم اني في يوم من الايام و لو ربنا وفقني لازم اجيب العربية دي و زاد هوسي و اعجابي بيها لما نزلوا القيس لفت منها.

الحمد لله خلصت الكورس اللي في مصر و سافرت امريكا عشان امتحن و لما رجعت الكويت و اشتغلت تاني ربنا كرمني و نويت علي الطوارق و طبعا ده بدعم والدي بحكم معرفتة لناس في التوكيل. وفي احدي سفرياتي لامريكا فوجئت لما رجعت انه بيقولي عربيتك الجديدة جاهزة و روح قابل شخص معين عشان استلمها. روحت و الفرحة مش سايعاني و قابلت الراجل و خدني و دخلنا توكيل البورش اللي هو برضوا نفس وكيل الفولكس و لقيتو بيفرجني علي الكايين و بيسالني علي راي. انا طبعا اتفلسفت و قولتلوا ان هي و الطوارق واحد و انهم مشروع مشترك و القصة اللي انتم عارفينها قعد يقنعني ان دي بورش و ان العربيتين غير بعض و انا اعافر و مستغبية و بقول في بالي هو جايبني يزلني و يعيارني و لا اية.
و فجاة لقيتو بيقولي مبروك دي عربيتك انا اقنعت و الدك و خلصت في الكايين و بسعر ميفرقش كتير عن الطوارق. انا كل اللي طلع عليا ابتسامة بلهاء و مستني بتوع الكاميرا الخفية او اديني عقلك يطلعولي و لما لقيت الموضوع بجد تنحت و جالي سهم الله لدرجة الراجل فطس من الضحك و كلم ابويا عشان يجي يلحقني. استلمت العربية و انا مش في وعي و سقتها للبيت و انا مرعوب و مش مصدق نفسي و سيبتها مركونة يومين علي ما فقت و ابتديت اسوقها و اتعود عليها.

و من هنا بقي تبتدي فتره حبي و عشقي و هيامي بالكايين و الدخول في عالم بورش و ده عايز 5 مواضيع اقعد احكي فيهم عنها لكن اهو راحت لصاحب نصيبها و هتفضل العربيه ده اعز واحده في قلبي و ان شاء الله ان شاء الله ربنا يقدرني و اقدر اجيب واحده تانيه

في هذه الاثناء بقي تم بيع البي ام دبليو بتاعت والدي لانها دخلت في الفتره اللي اجزائها ابتدت تحتاح صيانه او تغيير و طبعا ده كان مكلف جدا فوالدي قرر انه كفايه عليها كده و تم شراء مرسيدس S350 موديل 2009 و طبعا كانت ب Kit AMG و ده كان مغير شكل العربيه تماما بالاضافه الي بعض المواصفات الاضافيه و من الاخر العربيه دي عربيه ملوكي و انا شخصيا كنت مسميها بساط الريح لانك جواها معزول تماما عن العالم الخارجي و لا بتحس بدوشه و لا بطريق و لا يحزنون و في 2011 تم بيعها لان والدي قرر انه يعود لمصر و برضه فراقها كان صعب

طبعا قرار العوده لمصر ده و في الظروف اللي البلد فيها كان قرار صعب جدا و طبعا الاصعب منه نجيب ايه في مصر و ده بقي قصه تانيه و عايزه موضوع لواحده و لما نشوف انطباعكم عن قصتي دي نبقي نكملها باذن الله

ههههههههههه تمام يا باشا

بس فيه حاجتين انت ماحكيتهومليش قبل كدة ...

حكاية اختيارك للبيجو و انت عندك سنة و حكاية الحادثة :)

و احب اقول للشباب انى عشت مع حورس باشا فترة الكايين إس و المرسيدس ال s350 و المورانو و الاوتلاندر ...

و اخر موقف جامد حصل لنا مع بعض بالكايين اس .. واكتر واحد معلم فى دماغى (لأن المواقف كتير )
كان على شارع الخليج فى الكويت .. فيه (كمارو) اتجنن و كان بيشد معانا و احنا مشغلين مزيكا سريعة و بنسمعها على السماعات البوز و ايييييه و كنا سابقينه بحاجة بسيطة اثناء الشد(طبعا الكمارو موتوره اضعف لكن حجم ووزن العربيتين و كمان الايرو دايناميكس كانوا عاملين شغل لصالحه) المهم ... اذا بالطريق ينحنى و الكمارو طبعا بدا يهدى لأنه يا هيطير يا هيلبس ... طبعا الكايين ملهاش دعوة و كملنا و خدنا المنحنى ده على 190 او 200 و انا طبعا قاعد فى كرسى الراكب الامامى حاسس بجد انى جسمى فى حتة و روحى فى حتة تانية (زى احساس لعبة الصاروخ بتاعت الملاهى) و فجأة لقيت نفسى بقول لشريف فرمللللللللللللللللللل يلا فرملللللللللللللللل ... علشان حضراتكم كان فيه لجنة بعد الملف على طول و العربيات واقفة طابور و بيشوفوا الرخص ... و طبعا هو ماكدبش خبر ... فرمللللللللل
و اللى يضايق بقى ان العربية وقفت تماما قبل اللجنة بمسافة كويسة جدا (من سرعة 200 على منحنى) و لا زحفت و لا مالت و لا الهواااا

بسسسسس

فعلا يا جماعة العربية دى محترمة جدا جدا جدا جدا للصبح ... و اكيد عرفتو حورس باشا عاوز خمس صفحات عشان يوصفها ليه .... يلا ربنا يبارك للى خدها

و صباحكو زى الفل

[horas3000]

ههههههههههه تمام يا باشا

بس فيه حاجتين انت ماحكيتهومليش قبل كدة ...

حكاية اختيارك للبيجو و انت عندك سنة و حكاية الحادثة :)

و احب اقول للشباب انى عشت مع حورس باشا فترة الكايين إس و المرسيدس ال s350 و المورانو و الاوتلاندر ...

و اخر موقف جامد حصل لنا مع بعض بالكايين اس .. واكتر واحد معلم فى دماغى (لأن المواقف كتير )
كان على شارع الخليج فى الكويت .. فيه (كمارو) اتجنن و كان بيشد معانا و احنا مشغلين مزيكا سريعة و بنسمعها على السماعات البوز و ايييييه و كنا سابقينه بحاجة بسيطة اثناء الشد(طبعا الكمارو موتوره اضعف لكن حجم ووزن العربيتين و كمان الايرو دايناميكس كانوا عاملين شغل لصالحه) المهم ... اذا بالطريق ينحنى و الكمارو طبعا بدا يهدى لأنه يا هيطير يا هيلبس ... طبعا الكايين ملهاش دعوة و كملنا و خدنا المنحنى ده على 190 او 200 و انا طبعا قاعد فى كرسى الراكب الامامى حاسس بجد انى جسمى فى حتة و روحى فى حتة تانية (زى احساس لعبة الصاروخ بتاعت الملاهى) و فجأة لقيت نفسى بقول لشريف فرمللللللللللللللللللل يلا فرملللللللللللللللل ... علشان حضراتكم كان فيه لجنة بعد الملف على طول و العربيات واقفة طابور و بيشوفوا الرخص ... و طبعا هو ماكدبش خبر ... فرمللللللللل
و اللى يضايق بقى ان العربية وقفت تماما قبل اللجنة بمسافة كويسة جدا (من سرعة 200 على منحنى) و لا زحفت و لا مالت و لا الهواااا

بسسسسس

فعلا يا جماعة العربية دى محترمة جدا جدا جدا جدا للصبح ... و اكيد عرفتو حورس باشا عاوز خمس صفحات عشان يوصفها ليه .... يلا ربنا يبارك للى خدها

و صباحكو زى الفل

منور يا باشا
و اديك عرفت اه اني ليا في العربيات من وانا باخد الرضعه ههههه

و تصدق و تامن بالله انا كمان الموقف ده مش قادر انساه ابدا
خصوصا اننا توجناه بالصور اياها (يبقي ابعتهملي تاني عشان طاروا من عندي)
كان نفسي اولع بيها الطرق المصريه ههههههه بس النصيب بقي
ايييييه يلا ذكريااااات بقي

[omaroof]

1-عربية الشعب لادا ودى انا اتعلمت عليها كانت بتاعه ابو صاحبى الانتيخ ههههههههههه
2- بى ام 535 وكانت حدوته موديل 90 فيها كل الاوبشن اللى تتخيله قعدت سنه وبعتها لانها كانت حوت بنزين
3- كيا كرالوس 2000 ودى اشتريتها وقعدت معايا سنه وعربيه ممتازه فى الثبات لانها قاعده على الارض تحسها زى البطه وبعتها عشان البرومه بدأت تمسك فى الابواب من تحت
4- لانسر بومه 2001 ودى قعدت معايا 5 سنين حبتها اوى بس عيبها كانت جير عادى و1300 سى سى
5- كامرى 99 ودى قعدت معايا سنه وبصراحه ممتازه وكلها اوبشن بس بتستهلك بنزين شويه زياده
6- كرولا 2010 الحمد لله اول عربيه زيرو ليا ماشاء الله ممتازه
7- ماروتى للمدام زيرو وبعناها عشان عاوزه اتوماتيك
8- كيا بيكانتو 2006 بسم الله ماشاء الله ممتازه

[m_kamal]

منور يا باشا
و اديك عرفت اه اني ليا في العربيات من وانا باخد الرضعه ههههه

و تصدق و تامن بالله انا كمان الموقف ده مش قادر انساه ابدا
خصوصا اننا توجناه بالصور اياها (يبقي ابعتهملي تاني عشان طاروا من عندي)
كان نفسي اولع بيها الطرق المصريه ههههههه بس النصيب بقي
ايييييه يلا ذكريااااات بقي

ده نورك يا برنجى :)

العربيات دى فى الدم و الشريان ... بحبها اكتر من نيللى و شريهان :)

و ياعم هى الطرق المصرية تستحمل الكلام ده برده ... الباجيرو زى الفل يا عم الحج

و هبعتك الصور واتس اب يا نجم ....

[mostafa53]

السلام عليكم ورحمة الله وبركاته
أنا أكبر منكم غالبا بكتير وعلى مدى حوالى 25 سنة جربت كام عربية إن شاء الله أرجع لكم قريب عشان اقعد أكتب براحتى

[horas3000]

ده نورك يا برنجى :)

العربيات دى فى الدم و الشريان ... بحبها اكتر من نيللى و شريهان :)

و ياعم هى الطرق المصرية تستحمل الكلام ده برده ... الباجيرو زى الفل يا عم الحج

و هبعتك الصور واتس اب يا نجم ....

تسلم يا باشا
و الصور وصلت

و يا باشا المواقف اللي الواحد بيشوفها هنا مش هيطلعك منها الا عربيه زي الكايين
تسارع خاطف قبل ما اللي جنبك يكسر عليك
و فرامل اصلي توقفك وقت الجد
و شكرا

[mostafa53]

السلام عليكم ورحمة الله وبركاته
التجارب اللى قريتها فى الموضوع معظمها يعقد واحد زييى. أنا من صغرى شخص تقليدى ومحافظ ودايما أمشى فى السليم. عشان كده تبديل العربيات ماكانش بالسرعة اللى انتوا ياشباب بتحكوا عنها. عموما أنا حا ستغل الموضوع الشيق ده علشان نطلع فى الآخر بدروس وفوائد ممكن تفيد اللى حايقروه.
أنا اشتغلت فى السعودية كطبيب لفترات متقطعة بداية من سنة 1985.
فى مصر: كانت معايا أولا نصر 128 موديل 87 وبعتها سنة 2007 يعنى قضت 20 سنة معايا. كانت بنت حلال وشعبيتها الجارفة كان سببها الأول سهولة إصلاحها وقطع غيارها الرخيصة للغاية بالإضافة لإنها مناسبة لشوارعنا الضيقة والسيئة. إشتريتها ب6ألاف وبعتها ب18 ألف لأنى حافظت عليها وكانت حالتها ممتازة. أذكر إن عربية كان واحد سكران سايقها دخل فيها وعجنها وهرب بعربيته وتقريبا كده غيرت كمية حاجات غير السمكرة طبعا والدوكو حاجات وقتها لو فى أى ماركة زى الكورولا أو البيجو كانت كلفتنى فوق ال10 ألاف وقتها. إتكلفت أقل من 1500 بس.
سنة 1991 إشتريت بيجو 405 gl من السعودية ونزلتها مصر سنة 1993 وهى معايا لغاية دلوقت إنما بإذن الله حابيعها خلال أيام. العربية دى من أحسن إنتاجات البيجو وناس كتير بتنصحنى إنى ماابيعهاش لكن الحقيقة أنا خايف من المشاكل الكتير اللى ابتدت تزيد مع قدم السيارة. قطع غيارها طبعا غالية وورش قليلة اللى بتعرف تصلحها خصوصا إن فيها أشياء (لأنها خليجية) مش موجودة فى مصر. العربية ثابتة جدا وقوية وبودى جامد وشكلها حلو وواسعة يعنى خمسة يركبوها مرتاحين جدا. أعطالها قليلة وأهم عيوبها تكييف ضعيف وقطع غيار غالية شوية وصنايعية قليلين يفهموا فيها.

فى السعودية: ده إن شاء الله حاكتبه بكره لأنى داخل أجهز نفسى للنوم, وبعد سيارات السعودية سأحاول استخلاص دروس وتقديم نصائح بناء على التجارب

[mostafa53]

السلام عليكم ورحمة الله وبركاته
التجارب اللى قريتها فى الموضوع معظمها يعقد واحد زييى. أنا من صغرى شخص تقليدى ومحافظ ودايما أمشى فى السليم. عشان كده تبديل العربيات ماكانش بالسرعة اللى انتوا ياشباب بتحكوا عنها. عموما أنا حا ستغل الموضوع الشيق ده علشان نطلع فى الآخر بدروس وفوائد ممكن تفيد اللى حايقروه.
أنا اشتغلت فى السعودية كطبيب لفترات متقطعة بداية من سنة 1985.
فى مصر: كانت معايا أولا نصر 128 موديل 87 وبعتها سنة 2007 يعنى قضت 20 سنة معايا. كانت بنت حلال وشعبيتها الجارفة كان سببها الأول سهولة إصلاحها وقطع غيارها الرخيصة للغاية بالإضافة لإنها مناسبة لشوارعنا الضيقة والسيئة. إشتريتها ب6ألاف وبعتها ب18 ألف لأنى حافظت عليها وكانت حالتها ممتازة. أذكر إن عربية كان واحد سكران سايقها دخل فيها وعجنها وهرب بعربيته وتقريبا كده غيرت كمية حاجات غير السمكرة طبعا والدوكو حاجات وقتها لو فى أى ماركة زى الكورولا أو البيجو كانت كلفتنى فوق ال10 ألاف وقتها. إتكلفت أقل من 1500 بس.
سنة 1991 إشتريت بيجو 405 gl من السعودية ونزلتها مصر سنة 1993 وهى معايا لغاية دلوقت إنما بإذن الله حابيعها خلال أيام. العربية دى من أحسن إنتاجات البيجو وناس كتير بتنصحنى إنى ماابيعهاش لكن الحقيقة أنا خايف من المشاكل الكتير اللى ابتدت تزيد مع قدم السيارة. قطع غيارها طبعا غالية وورش قليلة اللى بتعرف تصلحها خصوصا إن فيها أشياء (لأنها خليجية) مش موجودة فى مصر. العربية ثابتة جدا وقوية وبودى جامد وشكلها حلو وواسعة يعنى خمسة يركبوها مرتاحين جدا. أعطالها قليلة وأهم عيوبها تكييف ضعيف وقطع غيار غالية شوية وصنايعية قليلين يفهموا فيها.

فى السعودية: ده إن شاء الله حاكتبه بكره لأنى داخل أجهز نفسى للنوم, وبعد سيارات السعودية سأحاول استخلاص دروس وتقديم نصائح بناء على التجارب

السلام عليكم ورحمة الله وبركاته
إيه الموضوع اللى نام ده هيا الناس خايفة تحكى لا تتحسد والا إيه؟ عموما: ماعلينا, نرجع لموضوعنا.

فى السعودية: سنة 1986 إشتريت مازدا 929 موديل 1980 الجبارة. وحش كاسر وأوعى وشك. رغم إنى كنت جديد فى السواقة وغشيم إنما ما كنتش باخاف وانا سايقها. عيبها الأساسى إن قطع غيارها كانت غالية شوية ولما جيت أبيها تمنها نقص كتير.
سنة 1988 اشتريت تويوتا كريسيدا dx موديل 1981 وعرفت ليه التويوتا لها شعبية عالية هناك. تكييف مالوش حل ونعومة وسلاسة فى القيادة واعتمادية (يعنى كل فين وفين لما تحتاج تصليح أو قطع غيار) , ولما بعتها الناس كانت بتتخانق مع بعضها عشان ياخدوها منى وماخسرتش فيها حاجة.
سنة 1991 إشتريت البيجو على الزيرو عشان أنزلها مصر لأنى كنت ناوى أرجع نهائى
سنة 1997 رجعت السعودية واستلفت سيارة إبن خالتى الهيونداى اكسيل لعدة أسابيع لكنها ماريحتنيش لا فى السواقة ولا فى العفشة لكن مشيت حالى بيها وطبعا كنت ممنون جدا لقريبى لأنه نادر إن حد يسلف سيارته لحد المدة دى كلها. كان واضح وقتها إن الكورى لا يضاهى اليابانى أبدا لكن فرق السعر كان كبير.
رجعت مصر بعد سنة واحدة ومارجعتش السعودية تانى إلا سنة 2007. إشتريت كورولا موديل 2003 1800 سى سى وكانت كالجديدة عاملة 60 ألف بس. قعدت معايا حوالى 7 شهور ولا احتجت فيها إلا لغيار الزيت وكانت بتشم البنزين بس وتجرى وعملت بيها مشاوير كتير ومسافات طويلة على سرعات لغاية 140 كم/س ودى أقصى حاجة عندى. ناعمة ومريحة واعتمادية وتكييف معقول وثابتة إلى حد كبير وبعتها بسهولة ورجعت مصر. نسيت أقول إنى قبلها أجرت أفيو أكتر من شهر كانت عاملة برضه 60 ألف وماتعبتش فيها لكن طبعا الكورولا أكبر حجما وأثبت بكتير فوق ال90 كم/س وأنعم فى السواقة.
سنة 2009 ركبت كورولا 1998 بتاعة الشغل لمدة 10 شهور. مش بطالة لكنها أقل فى المستوى من ال2003 خاصة إنها كانت 1300 سى سى يعنى كانت ضعيفة ومش بنفس الثبات وش مريحة كفاية فى القعدة. أجرت هيونداى إلنترا عدة أيام موديل 2008 عجبتنى وكانت واسعة وناعمة وأجرت نيسان تيدا برضه عدة أيام لكن حسيت الإلنترا أثبت على السرعات العالية وأريح فى القعدة.
رجعت السعودية سنة 2010 واشتريت فولفو إس 70 2500 سى سى موديل 1999 وكانت عاملة 300 ألف كيلو. إشتريتها لأسباب إنسانية صعب أشرحها رغم إنى عارف إن الفولفو فى السعودية مشكلة. قعدت معايا سنة تعذيب طبعا كانت مستهلكة واحتاجت كل شوية صيانة وقطع غيار ومافيش توكيل والورشة الوحيدة فى البلد اللى كنت فيها اشتغلتنى بالقوى وقطع غيار بتتشرى من البحرين والكويت والقطع الغير مستعملة بأرقام فلكية ولما بعتها خسرت كتير ومع ذلك كنت مبسوط لأنى ارتحت منها, ورغم كل ده إلا إنها كسيارة مافيش شك قوية جدا وشيك ومريحة.
من سنة اشتريت كابريس إس إل 5700 سى سى (بسم الله ماشاء الله) موديل 2002. طبعا قوية جدا ومريحة جدا من الداخل وناس كتير تعرف تصلحها وأكيد اعتمادية. كانت عاملة 160 الف كيلو. قطع غيارها غالية إنما متوفرة, وهى فى رأييى مش عربية مدن, تنفع أكتر فى السفر مسافات طويلة. ربنا إن شاء الله يباركلى فيها وتكمل معايا من غير مشاكل كبيرة. طبعا استهلاك البنزين عالى جدا يعنى لو برة السعودية تبقى بلاعة فلوس.

الخلاصة والفوائد: ده إن شاء الله أكتبه فى وقت قريب لما أفضى تانى

[minicooper20]

حكيتى مع الزمان هههههههههههههههه
انا اتعلمت السولقه على عربيه شاهين و كانت والدتى عندجها عربيه تريوس موديل حاجه و 90 العربيه دى انا حطمتها بعد كده ركبت الجوليت لحد منجحت فى الثانويه العامه و الحاج قالى عربيتك عندى
نزلت لقيت عربيه مينى كوبر موديل 2006 عمله حوالى 80 الف كيلو لونهها احمر فى ابيض
كان هيغمى عليا من الفرحه
كانت حديث الشارع كولو معنها كانت العاديه مش ال s بس متفهمش كل الناس كانت باصلها
و بعد ثلاث اسابييع عملت بيها حادثه توتال لوس و لما جيه لبويا يطلعنى منها قالوله البقاء لله
لما طلعت لقونى لسه عايش من فرحتو اغمى عليه
الغربيه دى ادشملت من بره لكن الكابينه كنت زى مهى سبحان الله ربنا يرحمها
بعد كده ركبت الباراتى شهر لحد موقعت فى الجيتا حبيبت قلبى اشترتها عامله 15 الف كيلو قعدت معيا لحد 160 الف كيلو فى 3 سنين و نص و بعتها لازمه ماليه ربنا ميوريكو
كانت فى الفتره دى امى معاها سيراتو و الحاج جاب البى ام و باع الباسات
مردتش ابوظ فرحتو بالبى ام و بعت عربيتى و عربيت امى كانت سراتو كسر زيرو والله
و ركبت الكتكوته براتى 2006 عمله 170 الف كيلو بس اسد مشاء الله و بركب ال بى ام مع الحاج
بالنسبه للعربيات الركبتها فى حياتى كتيرررررررررررررررر اوى منها
فرنا 1600
لانوس
نوبيرا
اوكتافيا فنتزيا و a5
بى ام 750 /530/525/330/523/116 عار على بى ام / m3 امتع عربيه ركبتها فى حياتى بتجيب من فصر لى 200 فى كلام فاضى ههههههههههه
سيراتو عاديه و كوبيه
ميجان 2 تحفه
ماذدا 3 بحبها جدااااااااا
جولف 3 و 6
لادا بيتاعت انتيمى
و المرسيدس الوحيده الركبنها s350 اكنى سايق سريرى
مرسيدس مو ديل حاجه و 60 بيتاعت صديقى عربيه كلاسك ملهاش مثيل
اكسيل تاكسى
تويتا مكروباص ساقف عالى
شيفورليه الجامبو
اسكانيا جرار و بمقطوره
كلارك شوكه
و كساحه عليها بلدوزر امتع مره ركبت فيها عربيه فى حياتى وااااااااااااااااااااااااو
و ده الفكرو و الله علشان مطولش عليكو

[mostafa53]

السلام عليكم ورحمة الله وبركاته
إستجابة أعضاء المنتدى للموضوع ده كانت ضعيفة جدا رغم إنه فى رأييى موضوع شيق وله فوائد كتيرة, وهو بيرد على كتير من التساؤلات اللى بتيجى فى القسم العام وفى المقارنات وفى أقسام ماركات السيارات. السبب فى عدم الإقبال على الموضوع هو إن كتير من أعضاء المنتدى استعملوا عدد قليل من السيارات واتكسفوا يحكوا لأن أول ناس اشتركت حكت عن تجارب مع عدد هائل وماركات تعقد من السيارات.
فى الحقيقة أنا شايف إنه اللى حايحكى عن تجاربه مع صنف واحد أو صنفين ويستخلص دروس ونتائج من تجاربه حايكون أفيد كتير من اللى حايحكى لمجرد المنظرة. وأنا شخصيا بعد ما حكيت على تجاربى فى مداخلتين فاتوا حاحاول إن شاء الله بعد شوية أقدم بعض الدروس والعبر بناء على التجارب دى.

[mostafa53]

السلام عليكم ورحمة الله وبركاته
دروس وعبر:
1- "الغالى تمنه فيه", "هين قرشك ولا تهين نفسك". دى أمثال لازم نفتكرها كويس سواء واحنا بنشترى أو بنصلح عربيات. وده طبعا فى حدود إمكانيات كل واحد مننا. يعنى مثلا لو معاك عربية ومحتاج تصلحها ماتروحش للواد بلية عشان أرخص: لأ روح التوكيل أو مركز معتمد للماركة بتاعتك حتى لو حاتتكلف أكتر. ماتشتريش قطع غيار مقلدة عشان أرخص كتير لأن ده ممكن يكلفك أكتر بعد كده ويعمل لك مشاكل أكتر. لو عاجباك عربية وتقدر على تمنها زيرو ماتدورش على المستعمل منها عشان أرخص كتير لأن ده ممكن يتعبك كتير وتصرف عليه أكتر بكتير من اللى وفرته بالإضافة إلى وجع الدماغ والتعطيل لأنك أساسا اشتريت العربية عشان ترتاح.
2- "اللى يسأل مايتوهش". سواء فى الجديد أو المستعمل: ماتشتريش على المنظر والدعاية, خصوصا لو انت مش خبير. إسأل الناس اللى ساقوا كتير والمتخصصين وحتى أصحاب السيارات المشابهة. لما تروح تشترى ماتروحش لوحدك خد حد بيفهم معاك. إسأل على كل حاجة فى السيارة قبل ماتطلع فلوسك (خصوصا لو مستعملة).
3- لو تقدر تجيب جديد ولو كان حتى من فئة أقل أحسن بكتير ماتشترى مستعمل من فئة أعلى. ممكن مع كل الاحتياطات قبل الشراء تطلع لك حاجات مستخبية تنكد عليك وتعمل لك مشاكل كتير. أنا لما اشتريت البيجو ناس كتير عارضتنى وقالت إنى ممكن أشترى مرسيدس مستعمل بنفس الفلوس وده زى الجنيه الذهب (حسب تعبيرهم), وبعد كده بمده هما نفسهم اللى وافقونى على اختيارى.
4- حافظ على عربيتك....حافظ على عربيتك.....حافظ على عربيتك
ماتبهدلهاش. غيار الزيت وملاحظة المية ومواعيد الصيانة والاستعمال النضيف والبنزين المناسب...إلخ. عاملها كأنها حاتعيش معاك باقى عمرك كله. بلاش التفحيط والسرعات العالية جدا وشغل الأراجوزات: ده إسمه سفه وربنا حايحاسبنا عليه لأنه تفريط فى النعمة. ده غير مخاطره وأضراره. فيه شباب كتير اليومين دول بيموتوا بسبب رعونتهم فى القيادة وشفت شباب أصبحوا معاقين بسبب ده.
5- لو مضطر تشترى مستعمل دور على الأحدث نسبيا. لو كورى يستحسن يكون عامل أقل من 60 ألف كيلو, ولو يابانى يستحسن أقل من 100 ألف كيلو ولو أوروبى يستحسن أقل من 150 ألف

[ahmedeihab]

السلام عليكم ورحمة الله وبركاته
دروس وعبر:
1- "الغالى تمنه فيه", "هين قرشك ولا تهين نفسك". دى أمثال لازم نفتكرها كويس سواء واحنا بنشترى أو بنصلح عربيات. وده طبعا فى حدود إمكانيات كل واحد مننا. يعنى مثلا لو معاك عربية ومحتاج تصلحها ماتروحش للواد بلية عشان أرخص: لأ روح التوكيل أو مركز معتمد للماركة بتاعتك حتى لو حاتتكلف أكتر. ماتشتريش قطع غيار مقلدة عشان أرخص كتير لأن ده ممكن يكلفك أكتر بعد كده ويعمل لك مشاكل أكتر. لو عاجباك عربية وتقدر على تمنها زيرو ماتدورش على المستعمل منها عشان أرخص كتير لأن ده ممكن يتعبك كتير وتصرف عليه أكتر بكتير من اللى وفرته بالإضافة إلى وجع الدماغ والتعطيل لأنك أساسا اشتريت العربية عشان ترتاح.
2- "اللى يسأل مايتوهش". سواء فى الجديد أو المستعمل: ماتشتريش على المنظر والدعاية, خصوصا لو انت مش خبير. إسأل الناس اللى ساقوا كتير والمتخصصين وحتى أصحاب السيارات المشابهة. لما تروح تشترى ماتروحش لوحدك خد حد بيفهم معاك. إسأل على كل حاجة فى السيارة قبل ماتطلع فلوسك (خصوصا لو مستعملة).
3- لو تقدر تجيب جديد ولو كان حتى من فئة أقل أحسن بكتير ماتشترى مستعمل من فئة أعلى. ممكن مع كل الاحتياطات قبل الشراء تطلع لك حاجات مستخبية تنكد عليك وتعمل لك مشاكل كتير. أنا لما اشتريت البيجو ناس كتير عارضتنى وقالت إنى ممكن أشترى مرسيدس مستعمل بنفس الفلوس وده زى الجنيه الذهب (حسب تعبيرهم), وبعد كده بمده هما نفسهم اللى وافقونى على اختيارى.
4- حافظ على عربيتك....حافظ على عربيتك.....حافظ على عربيتك
ماتبهدلهاش. غيار الزيت وملاحظة المية ومواعيد الصيانة والاستعمال النضيف والبنزين المناسب...إلخ. عاملها كأنها حاتعيش معاك باقى عمرك كله. بلاش التفحيط والسرعات العالية جدا وشغل الأراجوزات: ده إسمه سفه وربنا حايحاسبنا عليه لأنه تفريط فى النعمة. ده غير مخاطره وأضراره. فيه شباب كتير اليومين دول بيموتوا بسبب رعونتهم فى القيادة وشفت شباب أصبحوا معاقين بسبب ده.
5- لو مضطر تشترى مستعمل دور على الأحدث نسبيا. لو كورى يستحسن يكون عامل أقل من 60 ألف كيلو, ولو يابانى يستحسن أقل من 100 ألف كيلو ولو أوروبى يستحسن أقل من 150 ألف

احسنت القول يا درش
^_^