ماطلع المرور زى ماهو اهو

[dolly13]

النهاردة رحت مع زوجى العزيز نرخص الستروين البعكوكة
انا اول مرة ادخل مرور مصر الجديدة وبعد اللى شفته هناك باحمد ربنا انى تبع مرور الوايلى
طبعا هناك المرور دورين والمسؤول عن تحديد الورق فى الدور التانى وطبعا بيطلب كل ورقة لوحدها عشان يتاكد ان المواطن هايطلع وينزل اكبر عدد ممكن من السلالم. مش مشكلة كلها رياضة والسلالم كلها فوايد برده
نيجى بقى عند الفحص ولنا هنا وقفة
المهندس بيطلب الفلوس قبل مايمد ايده فى حاجة وطبعا الفنى شرحه . يعنى الوضع زى ماهو بالظبط لا جنيه زاد ولا جنيه قل
المهم لما لقينا اننا هانتاخر على ميعاد خروج الولاد من المدرسة قلنا نشهل شوية بقى وطبعا كلمنا واسطة لكن متاخر شوية
و مع وجود الواسطة الوضع مختلف تماما يعنى المشواير بقدرة قادر بتقل والورق بيجى لوحده والدنيا بتبقى وردى
ضربنا نفسنا بال............ اننا ماعملناش كدة من بدرى كنا خلصناها وخلصنا
ربنا يكرم بكرة ونكمل الباقى وناخد الرخصة ونخلص بس ادعولنا ربنا يكرمنا
لكن خلاصة القول ان كل شئ كما هو بالظبط

[sv065]

لا حول ولا قوة إلا بالله

اللهم أصلح حالنا ولا تؤاخذنا بما فعل السفهاء منا

[mo3tazanas]

لا يغير اللة ما بقوم حتى يغيروا ما بانفسهم

[تامر.محمد]

و هو ايه اللي اتغير اصلا ؟

يا اخ يا كريم يا من تستشهد بآية من القرآن

قل لي لما تبقى انت انسان كويس ده هايغير مهندس و فني المرور ازاي

لو تعرف يبقى انت في السليم
لو ما تعرفش تبقى فاهم الآية غلط !

[rompo10]

دا الطبيعي من بنك مصر

[No Comment]

حضرتك مرور مصر الجديدة ده مرور ترفيهى ... مقارنتاً بمرور زى السلام مثلاً .

[beshomilan]

هو الناس مستنيه تغيير فى البلد؟؟ماخربت خلاص

[yoko]

بابا كان لسه إمبارح في السحله دي وكمان نقل العربيه من مرور مصر الجديده لمرور النزهة (أنضف مرور شوفته في مصر والعربيه التانيه تبعة)
قعد في المرور عشان الحوار ده فوق ال 6 ساعات

[Land_Cruiser]

مش عارف، انا كان عندى مشاوير فى مرور الدراسه و المعادى و الدنيا كانت كويسه ومحدش خد منى ولا مليم بصراحه و الموظفين كانوا محترمين جداً . يمكن الموضوع حسب المنطقه و لا ايه

[مواطن مصرى]

كويس ان الدنيا زى ما هيه و لا جنيه زاد و لا جنيه قل عندكم فى مرور مصر الجديده ... تعالى عندنا مرور فيصل و انتى تشوفى العجب لان الاسعار زادت بعد الثورة و كل ثوره و حضرتك طيبه

الحمد الله انك خلصتى على خير

[momen_ivf]

انا روحت يوم السبت اللي فات انقل ملكية و افحص و ارخص في مرور مصر الجديدة وعلشان اخلص بسرعة كنت من اوائل الناس وصحيت الساعة 7 وكنت في المرور8 صباحا وانا الحمد لله حافظ الخطوات وجبت الورق في السريع و ركنت في مكان الفحص واخذت البصمة وطبعا كان لازم ياخذ فلوس علشان يجيلي ويطلع البصمة عدل وبعد كدة طلعت علي المهندس واستغفر الله علية علامات غضب الله من كتر الرشاوي اللي بياخدها المهم اديتة الورق علشان يخلصة من غير ما ادفعلة فلوس فقال لي روح بقي الدور التاني في المرور علي الشمال اعملي استعلام عن العربية لتكون مسروقة فقلت لة يعني كل العربيات بتعمل معاها كدة قال لي لا مش شرط علي حسب وسؤالي دة لاني كان في واحد جمبي بينقل ملكية من مرور الغربية وخلص ورقة من غير استعلام ولا غيرة ولما اقلت لة كدة قال انا بقولك روح اعمل استعلام من قسم الحاسب الالي بدل ما ابعتك المرور اللي جاية منة العربية تعمل مطابقة بصمة , المهم طلعت قسم الحاسب ومكنش فية غيري بيستعلم وقالوا ليا في الحاسب الشبكة واقعة اصبر لحد ما ترجع طيب اية اللي وقع الشبكة واحنا لسة الصبح بدري ومفيش ضغط شغل ولا حاجة ,, المهم استنيت حوالي ساعة الا ربع لحد ما الشبكة رجعت وعملت الاستعلام وختمتها من رئيس الوحدة ولقيت واحد تاني جمبي طالع بيعمل استعلام عن عربية افيو فسالتة هو انت عملت استعلام لية هو انت مدتهوش فلوس ذي ولا اية قال لي انا اديتة عشرة جنية واخدها ومعجبتوش وقال لي اطلع استعلام في الحاسب الالي
المهم نزلت للمهندس تاني بعد ماخلصت الاستعلام ومضي علي الورق وطلعت كملت باقي الخطوات في المرور والحمد لله كنت واخد الرخصة ولكن لاسف الرخصة طالعة لمدة 3 شهور بس لحين ما ياتي الملف بتاعي من المرور التابع لة العربية وكنت ماشي الساعة 12 ظهرا بفضل الله وانا ماشي كان بدا المرور يزدحم بشكل غير طبيعي والكمبيوتر عطل والناس بقت بتزعق وتتخانق وانا قلت الحمد لله اني خلصت

المرور دة اكتر مشوار ثقيل علي قلبي في المشاوير الحكومية

[dolly13]

انا الحمد لله تبع مرور الوايلى اللى فى العباسية وهناك الدنيا مختلفة خالص والاجراءات بسرعة وماحدش مد ايده لما رحت بعد الثورة اجدد
المهم انا رايحة بكرة اجدد رخصة الفيرنا من هناك ربنا يكرمنى ويطلع الموضوع زى ماهو بدون مشاكل
لكن بجد سلوكيات الناس بقت اسوا بعد الثورة وكأن الناس كانت محبوسة وخرجت من الحبس كله بيعجن فى الشوارع بشكل مستفز وادى كمان المرور الناس بتعجن فيه عادى جدا
ربنا معانا كلنا لحد الدنيا ماتتعدل تانى بينا وبالمسؤلين عنا

[hugan]

حضرتك مرور مصر الجديدة ده مرور ترفيهى ... مقارنتاً بمرور زى السلام مثلاً .

مفيش حد يعرف جميل امه غير لما يشوف مرات ابوه
حلو المثل ده
مرور السلام ابشع اداره مرور علي مستوي العالم
مرور مصر الجديده بالنسبه لمرور السلام
زي جولف القطاميه والخصوص

[No Comment]

بابا كان لسه إمبارح في السحله دي وكمان نقل العربيه من مرور مصر الجديده لمرور النزهة (أنضف مرور شوفته في مصر والعربيه التانيه تبعة)
قعد في المرور عشان الحوار ده فوق ال 6 ساعات

افضل مرور فى مصر اتعاملت معاه كان مرور القوات المسلحة ... ولولا ان العربية اتدمرت مكنتش سيبته ابداً :) .

مفيش حد يعرف جميل امه غير لما يشوف مرات ابوه
حلو المثل ده
مرور السلام ابشع اداره مرور علي مستوي العالم
مرور مصر الجديده بالنسبه لمرور السلام
زي جولف القطاميه والخصوص

هههههههههههههههههههه ... الزميل مرور السلام برضوا مش كدة ...؟

[hugan]

هههههههههههههههههههه ... الزميل مرور السلام برضوا مش كدة ...؟ [/QUOTE]

السلام طبعا
لكن غيرت عنواني في البطاقه واصبحت مرور الاميريه
كرهوني في العربيه واليوم اللي فكرت اشتري في عربيه
لكن هاضطر ان ارجع لعنواني الاصلي
وارجع مرور السلام تاني