نصيحة بخصوص التموين من محطات البنزين

[romieh]

السلام عليكم ورحمة الله وبركاته

من قيمة أسبوع او 10 ايام كنت رايح مشوار انا ووالدى ووالدتى

المهم كان البنزين قرب يخلص معايا فقولت اشوف اقرب محطة ادخل امون منها (انا عادة بمون 80)

دخلت محطة بنزين مصر فى شارع بورسعيد اللى عند مكاوى ومونت منها

لاحظت ان العداد بتاع طرمبة البنزين ماشى بطئ جدا بس ما أخدتش فى بالى

طبعا خلصت ومشيت ورحت وصلت الناس اللى معايا وانا راجع ابتدت معاناتى

العربية عمالة تقطع تقطيع شديييييييد (وانا كنت ساعتها على كوبرى اكتوبر)

روحت وركنت العربية وماحطتش فى دماغى

اليوم اللى بعديها سافرت بالعربية ومقلوكوش على اللى عملته فيا العربية

لما وصلت قولت يمكن كان البنزين مغشوش او حاجة (وانا مش فى دماغى خالص موضوع ان الطرمبة كانت شغالة ببطئ)

وانا راجع قولت امون تانى، مونت تانى مع انى كان معايا ازيد من نص التنك

طبعا برضه نفس الشقلباظات بتاعة العربية

المهم فى الاخر افتكرت موضوع الطرمبة وعرفت ان تنك المحطة كان بيفضى وبكده هو حطلى كل وساخة التنك بتاع المحطة مع البنزين

طبعا مونت بعديها بتاع 5 - 6 مرات 92 وغيرت فلتر البنزين والعربية زى ما هيا

هى بدأت تتحسن شوية دلوقتى بس برضه فيها تقطيع

ماحدش يقولى نضف التنك علشان انا تنك عربيتى جوا الشنطة ومالهوش طبة من تحت

وفكه ده فيلم لوحده

انا ان شاء الله هجيب منظف الكربراتير اللى بيتحط مع البنزين بنضفلى دورة البنزين بالكامل

بس حد يقولى اسم منظف كويس واشتريه منين وبكام

الخلاصة : لما تدخل تمون من أى محطة بنزين راقب عداد الطرمبة، لو لقيته ماشى ببطئ افصل المسدس بسرعة وماتكملش تموين

لو حتى هتمونها 95 هيكون ارحم من العذاب اللى انا شوفته

[aymn2003]

شكرا على النصيحة وربنا يسترها

[amdd]

سؤال
هو انت بتمون وانت مدور العربية ولا طافيها ؟؟

[koshary]

شكرا عالنصيحة ياباشا وربنا يسترها على عربياتنا بس فعلا نصيحة حلوه اول مره اخد بالى من حاجة زى كدا

[mem]

تسلم اخى على النصيحة

[Ahmed_Ramadan]

سؤال
هو انت بتمون وانت مدور العربية ولا طافيها ؟؟

هى تفرق ؟؟

[AhMeD MeTwAlY]

المفروض ان العربيه تكون مطفية لان كان معانا سيات كان باب التنك مش بيتفتح غير لما تشيل المفتاح من الكونتاك
شكرا علي النصيحه الغاليه دي
بس اخبار البنزين ايه انا مفولتش من زمان بعيد حوالي شهرين

[M.Elgergawy]

شكرا على النصيحة
وفعلا لازم وانت بتمون لازم المحرك يكون مطفي
ودي بتعملها البنزينات النظيفة زي امارات مصر
عمره ما يمون غير والموتور مبطل

[khaabas]

بس افرض عداد طرمبة البنزيد ديجتال موش ارقام ههههههههه
شكرا على النصيحة الغالية

[romieh]

يا جماعة انا هنا بتكلم عن عداد طرمبة البنزين بتاعة المحطة مش العربية (اللى بيكون فيه المسدس)

طبعا انا بكون طافى العربية ساعة ما اكون بمون

بس افرض عداد طرمبة البنزيد ديجتال موش ارقام ههههههههه
شكرا على النصيحة الغالية

انا بتكلم عن سرعة العداد سواء كان ارقام او ديجيتال

يعنى لو المفروض ان الطرمبة سرعتها بتكون لتر كل اربع ثوانى - لو حضرتك لاحظت انها بتعمل لتر كل 10 ثوانى يبقى كده سرعتها بطيئة وده اللى انا بتكلم عنه

[amdd]

يا جماعة انا هنا بتكلم عن عداد طرمبة البنزين بتاعة المحطة مش العربية (اللى بيكون فيه المسدس)

طبعا انا بكون طافى العربية ساعة ما اكون بمون



انا بتكلم عن سرعة العداد سواء كان ارقام او ديجيتال

يعنى لو المفروض ان الطرمبة سرعتها بتكون لتر كل اربع ثوانى - لو حضرتك لاحظت انها بتعمل لتر كل 10 ثوانى يبقى كده سرعتها بطيئة وده اللى انا بتكلم عنه

اشكرك يا غالى انت كده وضحت المقصود بالظبط وهو عداد المحطة لانى كنت فاكرك بتتكلم عن عداد العربية
لازم تكون العربية مطفيه والواحد بيمون طبعا

[essam2z2]

شكرا على النصيحة ده انا اول مرة اخد باى من الموضوع ده

[Ahmed_Ramadan]

شكرا على النصيحة
وفعلا لازم وانت بتمون لازم المحرك يكون مطفي
ودي بتعملها البنزينات النظيفة زي امارات مصر
عمره ما يمون غير والموتور مبطل

أنا عارف ان العربية لازم تكون مقفولة ساعة اما بتمون للأمان ....انا بسأل هل ليها سبب تانى ؟؟

[Ahmed Amin]

من أعتقادي أن الوساخة مهما كانت مش هتخلي العداد يقرأ براحة لأن العوامة بتترفع مع المنسوب اللي داخل التنك من البنزين سواء فيه وساخة مع البزين او سوايل تانية ولا مفيش.

وبالنسبة لموضوع التانك بتاعك عشان موضوع التقطيع دا, مادام مش هتعرف تنزل التانك فيه حل ممكن تعمله أنك تروح لميكانيكي انت تعرفه وهتقله عايز افضي التانك وتاخد معاك جراكن نضيفة علي قد البنزين اللي جواها
هيحط لك خرتوم ويشفط ببقه او باي حاجة هتلاقي البنزين كله طالع من التنك
اخر 10 لتر دخلهم وطلعهم مرتين عشان لما بتصبهم تاني في التانك بيحرط الوساخة او الترسبات اللي في قعر التانك وبتطلع لك لما بيشفط تاني.

تسيب البنزين اللي انتا طلعته بره اما يصفي خالص وتحط النضيف منه أو تروح تفول العربية
عشان تبقي ريحة بالك أكتر.
لو فضلت القراية وحشة يبقي الطرمبة عندك بدأت تتعب أو الفلتر اللي جواها اتوسخ من الشوائب, بس الفلتر مالوش علاقة برضه بالقراية.

[Ahmed Amin]

وبالمناسبة العربية وهيا بتفول لازم تبقي مطفية
عشان لو سيبتها دايرة هيحصل هيجان في التانك لأن ضغط مسدس البنزين هيخلي كل الرواسب اللي في قعر التانك تلف التنك كله وبالتالي هتدخل جوا الطرمبة مع دورات العربية لانها هتكون بتسحب بنزين في الوقت دا.
ودا مع الوقت هيبهدلك الفلتر الداخلي وهيسده ويبقي حمل علي موتور الطرمبة أنو يشفط من فلتر كلة وساخه وهتلاقي سحب ضعيف, يا أما الوساخة دي هتروح علي الموتور.

فالازم ويفضل ان العربية تكون مطفية وهيا بتتفول.