ضع فى سيارتك بنزين 80 وبهذه الطريقه يكون 92

[Islam_galal]

معلش نسيت اقول المهم ان طبعاً الناتج عن تجربتي لم يكن بنزين 90 او 92 بالطبع ولكنة اقل من كدة بكتير وهذة التجربة لم تسبب لي اية مشاكل مع العربية "العربية كربياتير مش injection" الملحوظة الوحيدة هي ان لما تيجي تكبس بنزين مرة واحدة مفيش حاجة بتحصل :lol: يعني مفيش استجابة خالص والموتور بيسقف بس لو التسارع بتاعك زي التسارع بتاع جدو :lol: مش هتفرق.



دي نتيجة تجربة لمرة واحدة فقط حبيت انقلها لكم للافادة.... يعني معنديش ادنى فكرة عن الاثار الناتجة عن هذة التجربة على المدى الطويل



من الاخر يعنى محدش يبطل يحط 90 او 92 ويحط علطول خليط 80-92 ويجي يحملني النتيجة الانا اصلاً مش عارفها.

السلام عليكم

شكرا أخونا العزيز نادر
جزاك الله خيرا

[Nader]

السلام عليكم

شكرا أخونا العزيز نادر
جزاك الله خيرا

جزانا الله وجزاكم انشاء الله

[Hossam_Hassan]

Thank you ya Nader for your help

[Nader]

Any time my brother

[ragea Abdoo]

هذة الحوارات تذكرنى بواقعة تمت من سنتين كنت مع واحد صحبى وكان معه سيارة الشغل وهيه عربية باچيرو Injection وكان ماشى فى وقت متأخر ولم يكن معه نقود كفاية ليضع بنزين ٩٢ فقال لى انا سوف ازود السيارة بـ ١٠ لتر بنزين ٨٠ فسألته اليس هذا يعوق المحرك عن الحركة فقال لي (وهو ليس متخصص) كان زمان بيستخدموا البنزين ٨٠ فى العربيات كلها واعتقد ان الموتور الحديث اقدر على التعامل مع البنزين ذات الكفائة المنخفضة.
وانا باحكى هذة الواقعة ولكن هذا الكلام ممكن ان يكون غير صحيح ولكن التجربة العملية التى وقعت امامى انه فعلا زود العربية بنزين ٨٠ والعربية مشيت المشوار بتعنا وهو حوالى ٥٠ كيلو ولم تصاب بشئ ممكن علشان هى مرة واحدة ولم تتكرر ولا نعرف ان كان هذا سيؤثر على الموتور على المدى البعيد
وانا رأى الشخصى اننا نجرب مرة واحدة ولكن بنسبة اقل فى الـ٨٠ واكثر فى الـ ٩٢ وبعدين نزود النشبة شوية شوية على حسب مراقبة الموترو واداء العربية فإذا لم يكن هناك ضرر نستمرفى القصة فهى اوفر

[محمد ابراهيم 1]

المشكله إن العوقب وخيمه فى حاله السيارات الإنجكشن
يعنى ممكن مش عارف حساس ايه يبوظ كارته الكومبيوتر تضرب والحاجات دى مش بالساهل
وممكن لو العربيه جديده تخرج من الضمان لأن الكتالوج بتاع العربيه بيبقى مكتوب فيه نوع البنزين المناسب للعربيه
ولا أظن إن فيه حد بينصح ببنزين 80

[Ahmed Hassan]

في حاله الباجيرو العربيه دارت لأن التانك مكانش فاضي على الآخر... لو جبت عربيه حديثه و حطيت بنزين 80 في تانك فاضي العربيه مش هاتدور لأن الكترول بيعرف نوع البنزين و في حد ادنى مسموح.

[MMamdouh]

نسبة الاوكتين بيحددها نسبة الانضغاط فى المحرك مش انها كربراتير او انجكشن و كل ما كان نسبة الانضغاط اعلى العربية حتحتاج بنزين برقم اوكتين اعلى... و لو العربية فيها تربو او سوبر شارجر بتحتاج اوتكين اعلى

البوردة و الكمبيوتر و الحساسات مش حتتاثر بنوع البنزين خالص... اللى حيتاثر هى مكونات المحرك الداخلية زى البساتم و الصبابات و وش السلندر... لو استعملت رقم اوكتين اقل من الموصى به حيحصل تسقيف و هو اشتعال مبكر للوقود و حتسبب ضرر شديد للاجزاء المذكورة

موضوع خلط البنزين ببعضة مش مقتنع بيه اوى و مش ناوى اجربة

MMamdouh

[ahmed1981]

الحقيقة أن موضوع الرقم الأكتيني أو الأوكتاني للبنزين يفرق من عربية لعربية تانية
وهو يعتمد على خاصية في المحرك إسمها نسبة الإنضغاط وهي تقريباً من 7 إلى 12 في السيارات البنزين عموماً

كلما زادت نسبة الإنضغاط تحتاج إلى بنزين ذو رقم أوكتاني أعلى
يعني ال 128 موتورها قديم وبالتالي نسبة أنضغاطه منخفضه يبقى تحطله أقل رقم بنزين يعني 80 أو 90
ولو حطيتله أعلى من كده يبقى رمي فلوس في الهواء بدون مبالغة

لو رحنا للمرسيدس الحديثة مثلا أو الbmw االحديثة أو كل عربية من مستواهم في هندسة المحركات االحديثة مثلا المفروض هنشوف في كتلوج العربية مكتوب نحط بنزين رقم كام لكن لو مش مكتوب من الطبيعي تحط أعلى رقم بنزين لأن مواتير العربيات ده متقدم ونسبة أنضغاطه عالية ومصمم للبنزين ال 95 مثلا أو 92 على الأقل لكن لو حطيتلها بنزين 80 وإسترخصت تبقى بتدمر ماتور عربيتك بدون مبالغة

إذن الواحد لو عربيته حديثة يرجع للكاتلوج ويشوف البنزين المناسب للمحرك كام أو يسأل التوكيل أو يدور على سايت العربية على النت ويشوف بنزين كام

أما لو عربية موديل قديم من 95 وإنت نازل أو عربية جديدة لكنها راكبلها موتور تصميم لم يتغير من زمن زي اللادا 2107 أو ال128 وأمثالهم يبقى تحط بنزين 80 أو 90 ومتزودش عن كده عشان مترميش الفلوس

أخيراً فيه معلومة أو إشاعة غلط أن البنزين ال 80 مضر بالبيئة أكتر من اللي أغلى منه ده كلام فارغ وكذب
لإن البنزين كله حاليا خالي من الرصاص ومركباته واحدة مع إختلاف نسب المركبات في كل نوع

ومحدش قال إن الموتور هيتحرق أو هينفجر لو محطيتش الرقم الأوكتيني الموصى بيه (80 90 92 95)
اللي هيحصل هو قلة في الأداء أو تصفيق في الموتور
حتى لو خلطت الأنواع لو المتوسط في النهاية محصلش الموصى بيه هيحدث الآثار السابق ذكرها
التصفيق بيضر الموتور على المدى الطويل

ولكن يوجد حل جيد لطالبي التوفير وعايزين يحطوا بنزين 80 مثلا
الحل إنك توطي كهربة العربية وتجربها لحد لما التصفيق (التسقيف) يروح مع السحب
والحل ده أنا مجربه مع المواتير الكربراتير فقط مجربتوش مع الإنجكشن
طبعا الحل ده هيقلل من كفائة العربية وسحبها بنسبة بسيطة لكن مقبولة في سبيل التوفير
مثلا أنا بحط في ال 128 بنزين 80 والجولف كنت بحط فيها 92 لكن بعد كده هحط فيها 80 وهوطي الكهربا
لزوم التوفير :)
هذا والله أعلم

[MMamdouh]

فى اللانوس بيبقى فيه زى jumper مع الكنترول بيحدد رقم الاوكتين اللى العربية تمشى بيه فا واضع ان حسب الjumper الكونترول بيعدل توقيت الشرارة عشان التسقيف و كدة

MMamdouh

[abo3bdolrahman]

الموضوع ده جيد و كنت عاوز أجربه من زمان و بالمناسبة احد زملائنا معاه ماتريكس 2005 مانيوال 1600 حقن إلكترونى طبعا و كان جاى للميناء فى شرق التفريعة عن طريق سيناء و قبل الميناء بحوالى 40 كم لقى البنزين خلص راح للبنزينة الوحيدة اللى فى المكان ده ما كانش فيها إلا بنزين 80 قال أحط 10 لتر يوصلونى للميناء و بعدين أبقى أتصرف بعدها و بدأ يتحرك بالعربية ما لقاش أى حاجة غير طبيعية و لا تسقيف ولا حاجة كل اللى لاحظه إن السحب قل شوية و من ساعتها و هو بيحط بنزين 80 فقط بدون إضافات ولا أى حاجة حصلت للعربية و بالمناسبة هو مهندس ميكانيكا و بيعمل ماجيستير فى محركات الإحتراق الداخلى فعمل أبحاث فى الموضوع ده و بحث كثير على النت و كانت المفجأة ليه و لينا كلنا إن محرك الماتريكس ينفع تحطله من أول بنزين 80 و إنت طالع و العربية هاتعدل التوقيت بتاع الإشعل لوحدها و إن نسبة الإنضغاط 10 ممكن ينفع معاها بنزين 80 و دى كانت تجربة فى نفس الموضوع حابيت أنقلهالكم للإفادة.
و الموضوع ده بقاله معاه حوالى 4 شهور بس ما اعرفش لسه بيحط 80 و لا لأ لأنى خارج مصر دلوقتى.
:lol: 8) :lol:

[طارق ابراهيم]

على فكرة ياجماعة انا خريج علوم وأعرف معلومات بسيطة قوي عن موضوع البنزين ده بس يمكن تفيد والله أعلم .
هو بغض النظر عن دقة المناقشة في المواتير والحجات ديه كنت بس عاوز اقول ان البنزين ال90 زي ال80 زي 92 ةوغيره وغيره
هو هو نفس المادة أصلا لكن كل ما في الأمر انهم بيحاولو يزودوا جزيئات تركب عليه بترتيب معين عشان يعلي حرارة احتراقه وكده لكن نظريا مفيش فرق في أي خواص فيزيائية لسائل البنزين نفسه يعني الكلام عن ترسيبات وأخطار على الموتور ده رقم الاوكتين في حد زاته برئ منه براءة الذئب من دم ابن يعقوب .ولما البنزين يتخلط ببعضه بيأثر فقط في درجة الغليان والتجمد والخواص ديه بس
يعني من الآخر بيأثر فقط على الباور بتاع العربية وهيا ماشية ويزول السبب بزوال المسبب يعني لمجرد انه يرجع تاني بنزين عالي الوكتتين يرجع الأداء والباور زي ماكان على سابق عهده.
وزي مابقول الكلام ده كله نظريا ً فقط من واقع دراستي في الكيمياء والفيزياء اللهم الا ان يكون هناك اختلاف في جودة التصنيع والتنقية لأن معلوم جدا ان عندنا في بلدنا مفيش حتة الإتقان فممكن تكون شركة التكرير مبتهتمش بفصل البنزين ال80 عن المكونات الخارجية اهتمام كبير نظرا ًلأنه رخيص الثمن وبيستخدموه الناس البسطاء .
وكمان مننساش إن فيه سيارات كتير بتستخدم ال80 اوكتين بالرغم من إن مواتيرها نضيفة جدا زي ما مذكور في اللينك السابق السيارة الماتريكس وكمان على حسب علمي ان الجيب شيروكي بتستخدم 80 ومعرفش هيا حقن ولا كربراتير وهيا موديل 2007 يعني أكيد مش بيرسب ولا حاجة من ديه يا جماعهومننساش كمان ان فيه مواتير غاليه جدا لسيلارات فارهة وبتشتغل ديزل يعني كان زمانها اتفرتكت .
والله أعلم

[Nader]

بص كلامك دة جزء منة مظبوط زي ما انت قولت كلة نفس البنزين بس الفرق في المواد البتتضاف لترفع رقم الاكتان، بس فرق الاكتان دة فرق جوهري لانك لو حطيت بنزين اوكتان قليل لعربية حديثة ودة سبب "يسقيف" في الموتور مع الوقت هيقصف عمر الموتور .

[أبو_حمزة]

يا اخوانااااااااا
هو فين ال80 أصلا
انا بقالى اكتر من سنة ما شوفتش بنزينة فيها 80
حتى بنزينات مصر و التعاون

[PAYOO]

أنا عاوز أقول لكم أن المانيوال الخاص بالعربيه الماتريكس مكتوب فيه البنزين الموصى به هو بنزين 80!!!!!!!!!!

لكن فعلا الواحد مافكرش يحط 80 ده ولا مره لانه قليل جدا جدا وبدل ما الواحد بيحط 90 بحط 92 عشان الفرق بينه بين الـ90 بسيط جدا في الفلوس

على أي حال أنا هابقى أجرب الموضوع ده وقول لكم على النتيجه