سواقين النقل مشكلة ملهاش حل في بلدنا ؟

[ahmedhawas]

شكرا لصاحب الموضوع .. لإن الموضوع ده مضايق المصريين كلهم.
وياريت حد يسمعنا .. عشان أنا حاسس (بل متأكد) إننا بنكلم نفسنا.
وبقالنا كتيييييييير أوي بنكلم نفسنا .. وكم حوادث النقل مهول. ومنها اللي بنشوفه على صفحات المنتدى
وأكيد في أكتر بكتير بس مبنسمعش عنه حاجة.
وياريت يكون ليهم مواعيد يمشوا فيها ، ويتعملهم تحليل بصفة دورية عشان الهباب اللي بيشموه.

للاسف واحد من أعز أصدقائى توفى من شهرين بسبب عربية نقل ... صديقى ماشى بطيء حوالى 60 على اليمين و داخل على مطب و بيهدى و كان امامه اوتوبيس بيعدى المطب فى اليمين برضو فضل يهدى وراده لحد ما وقف تقريبا (فى اليمين برضو) و الشمال كان فاضى جه واحد بنقل منه لله جاى طاير راح خبطه من الخلف و أخده هو و الاوتوبيس و فضل ماشى تقريبا 200 متر لحد ما وقف.. طبعا الراجل الله يرحمه توفى فى ساعتها و المصيبة انه كان معاه زوجته و اولاده .. هما عايشين الحمد لله لكن متبهدلين على الاخر من كسور مضاعفة لشروخ فى الجمجمة الى اخره .. ربنا يشفيهم يا رب.

طبعا الناس اللى كانت واقفة و شافت الحادثة كانوا هيموتوا السواق ده راح ابن ال.... نازل و ضارب نار فى الهواء و ساب العربية و جرى...

ربنا ينتقم منه و ان شاء الله ياخد عقابه فى الدنيا قبل الاخرة و يرحمنا من سواقين النقل كلهم...

بحاول أتخيل الموقف اللي حضرتك بتقوله ده . . حسبي الله ونعم الوكيل .. الله ينتقم منه.
- ليه نسبة كبيرة من السواقين دول من أرباب السوابق ومدمني المخدرات؟
- إزاي بيطلعوا رخص سواقة بالسهولة دي؟
- فين قانون المرور الجديد؟ ولا بس بيتشطروا على اللي مش رابط الحزام والملصقات والفاميه؟
- أنا مش حجيب سيرة التكاتك والموتوسيكلات الصيني واللي بيمشوا عكس إتجاه واللي شايلين النمر ... وماشيين وسط العربيات عادي.

أقولك يا باشا
مفيش فايدة

[me_medoo]

ليه عندي شعور ... أن حياة المواطن المصري غير مهمة عند الدولة المصرية ... هل لأننا عندنا مواطنين كتيررررررررررر ... فراح مواطن او ماتت أسرة كأننا بنقول لنفسينا ماهو في كل دقيقه بيتولد خمس أطفال جداد ... طب ما احنا نمنع الخلفة بس نحافظ علي عندنا ... لأن الانسان الواحد مصروف عليه جامد لحد ماكبر واتعلم وكون نفسو ... غير طفل لسة متولدش متصرفش عليه ولا مليم ... المشكلة ان في كوادر في البلد وعقليات جبارة هيا الي بتموت ... ومع الاسف الي بيموتها هو شخص جاهل يكاد يعرف يقرى ويكتب ... وعايش حياتو بالطول وبالعرض مع سجارة البنجو حبيبتو وشريكتو في الحياة .

وهذا الشخص الجاهل ... هو مش عارف انو بيدمر بلد ... لنو بمنتهى البساطة هو بيعمل انو بينزع الامن والاماااااااااااااان من احاسيس المواطن ... فمثلاً وانا رايح شغلي صباحاً علشان اكد على عيالي وقوتي واكل عيشي فاانا شاعر ان في يوم من الايام هيجي أجلي على أيد سواق تريلة او سواق ميكروباص ... علشان كده بودع عيالي وببوسهم وبحضنهم كل يوم قبل ما أمشي على طريق الدائري لأن يمكن مشفهمش تاني وبوصيهم على مامتهم انهم يسمعو كلامها ويخلو بالهم منهم ... واول ما اقرب على مطلع الدائري او المحور بقول اشهد أن لا أله الا الله ومحمد رسول الله ... وأقعد اقول سامحني يارب ..اللهم اني لا أسئلك رد القضاء ولكن أسئلك اللطف فيه ... وبقول يارب لو في تريلة قلبت عليا او فعصتني وانا راكب عربيتي ... يارب خلي جزء مني سليم علشان يقدرو أهلي يغسلوة ويكفنوه ، وبلاش أكون مفروم أو أكون قطع بوفتيك أو أسكلوب بانية ...

فياريت على المسئولين لو مش مشكلة خلو التريلات تمشي على الشمال ومش مشكلة احنا نمشي على اليمين ... بس ميبقوش ماشين شمال ويمين كده وانتا تدخل غرز بينهم .

مرات بقول هما ليه ميعملوش كوبري للملاكي فوق الدائري يعني دائري فوق الدائري خاص بالملاكي .

حتى طريق مصر اسكندرية الصحراوي من نحية ميدان الرماية لغاية المحور طريق ديق وحرتين بقالو سنين وسنين وهو على الوضع ده طيب فيها ايه لو وسعوه شوية وسفلتوة ... حرام واللهي حرام ده الاسفلت أشتكى وبقى مكلكع في الارض كده من كتر ما أجيال عدت عليه وتلاقي على يمينك في صحرة ورملة في النص ألله طيب ماتوسعو على الناس ألاهي ربنا يوسع عليكم ... ده حتى عند منطقت الفلل والقصور والكمباوندات في مسافة 2.5 من شمال ويمين الطريق رمل ما تضموها للشارع وصغرو الرصيف شوية ... ولا اله الا الله .

[SYD]

يا جماعة كفااااااااااااااااااااية بقي
حوادث كلها بسبب النقل

لااااااااااااااااااااااااااااااااااااااااااااااااا زم يبقي في حل

هيجي يوم مش هيبقي في ولا عربية فمصر غير العربيات النقل
لما يخلصوا علي كل الملاكي

http://www.nilemotors.net/nile/277075-a.html#post3874169940

http://www.nilemotors.net/nile/278306-a.html#post3874185373

دة دوول كدة مسح زور من اول صفحتين في المنتدي
يعني لو دعبست هجيبلك ولا 98 موضوع كلهم حوادث للعربيات النقل

انا شخصيا كنت عملت موضوع عن حادثة لعربية نقل خابطة نص نقل

http://www.nilemotors.net/nile/271957-a.html#post3874113118

يا جماعة شوفولنا حلول
انا كل يوم وانا مروح من اكتوبر بشوف حوادث علي طريق اكتوبر وطريق الفيوم وكلها طبعا نقل

والله المستعان
،
،

خد عندك دي كمان

وسلامي وتحياتي لسواقين النقل الله يورينا فيهم يوم اسود

والله المستعان
،
،

[SYD]

يا جماعة الموضوع ذاد عن حده اوووووووووي

مش معقولة نبقي اكبر تجمع للسيارات في مصر ومش عارفين نلاقي حلول
وواقفين حاطين ايدينا علي خدنا
العربيات النقل زودتها عن اللزوم بكتير اوي
احنا هنا لازم يبقي لينا رأي مسموع
احنا نزيد عن ال100,000 مشترك
لو شوفنا عدد المشاهدات لموضوع كريم بتاع تنبيه اداري هتلاقيهم دلوقتي 19397 مشاهدة
يعني لو بنفس المنطق وعمل استطلاع رأي بس المرادي ملزم بالرد وجمع في خلال شهر 20.000 صوت بقرار معين اكيد لازم يتاخد بيه
احنا شريحة عشوائية كبيرة من المجتمع بجميع طوائفه

انا كنت اقترحت قبل كدة فكرة مشابهة للأقتراح بتاع التحقيق بس الموضوع مالقاش صدي مش عارف ليه
بس انا هفضل احط لينكاته لحد لما فمرة حد يرد عليه

http://www.nilemotors.net/nile/228101-a.html#post3873599044

اتمني حد يشوفه
واتمني ان حد يسمع صوتنا

والله المستعان
،
،

دي كانت مشاركة ليا في موضوع مشابه
واللينك الي فيها لموضوع كنت عملته للتحقيق في اسباب الحوادث للحد منها ولتفادي وقوع حادث مشابه

المشكلة ان كل حوادث النقل متشابهة
تقرا في الجرنان بيقولك

بسبب سرعة السائق الجنونية اختلت عجلة القيادة مما تسبب انحراف للسيارة فدهست العديد من سيارات المواطنين مما اسفر عن مصرع 88 شخص واصابة أخرين

كلهم بنفس السيناريو
1- سرعة
2- جنونية
3- اختلال
4- انحراف
5- موت
6- اصابة

حراااااااااااااااااااااااااااااااااااااااااااااااا ااااااااااااااااااااااااااااااااااااااااااااام

[SYD]

خد عندك دي كمان

وسلامي وتحياتي لسواقين النقل الله يورينا فيهم يوم اسود

والله المستعان
،
،

معلش انا أسف نسيت احط اللينك

خد عندك دي كمان

http://www.nilemotors.net/Nile/278436-a.html#post3874186962

وسلامي وتحياتي لسواقين النقل الله يورينا فيهم يوم اسود

والله المستعان
،
،

[Elawany13]

عامر يتراجع عن قرار فصل 132 سائقا .. ويرفض عودة متعاطي المخدرات

الثلاثاء, 20 مارس 2012

طارق عامر
اموال الغد - كتب – عبد الحليم الجندي :
تراجع طارق عامر رئيس البنك الاهلى اليوم عن قراره بفصل 132 سائقاً من السائقين البالغ عددهم 150 لتظاهرهم ومحاولتهم تعطيل سير العمل، وتقديم مطالب غير منطقية تتمثل في مساواتهم بالمصرفيين، على الرغم من وصول مرتبات كل منهم إلى نحو خمسة آلاف جنيه شهرياً وفقا للبنك .

وعلمت "أموال الغد " من مصادر مطلعة داخل البنك ان القرار لم يشمل نحو 18 سائقا ثبت تعاطيهم لمواد مخدرة اثناء توقيع الكشف الطبي الدوري عليهم .

اشارت المصادر الى تهديد السائقين بالدخول فى اعتصام مفتوح امام المقر الرئيسى للبنك فى حالة عدم التراجع فى قرار فصلهم والاستجابة لمطالبهم التى وصفوها بالمشروعة مما دفع البنك للتراجع عن قرار فصلهم .

واضافت المصادر الى تقدم نحو 15 سائق بتسجيل محضر اثبات حالة بقسم بولاق ابو العلا لفصلهم الذى وصفوه بالمتعسق ومنعهم من مزاولة اعمالهم .

ارجعوا قرار فصلهم إلى تنظيمهم وقفات احتجاجية متكررة منذ بداية مارس للمطالبة بالمساواة في نسبة الحافز التي حصل عليها المصرفيون بواقع 15%، فيما لم يحصلوا سوى على 5% فقط على حد قولهم.

وكان البنك الاهلي قرر بداية الاسبوع الحالي فصل رئيس السائقين و150 سائقاً لتظاهرهم ومحاولتهم تعطيل سير العمل، وإحالة رئيس قسم السائقين إلى النيابة العامة للتحقيق معه فى مخالفاته القانونية .

واوضح البنك فى بيان له أن قرار الفصل، والذى اتخذه، جاء من أجل الحفاظ على أكبر مؤسسة مصرفية فى مصر من الانفلات الوظيفى، وتطهيرها من ذوى الأخلاق السيئة الذين يسيئون إلى الجهاز المصرفى بصفة عامة.

[me_medoo]

واللهي عال ... حتى الحشاشين بيطلبو بعلاوة وزياده ومساوتهم مع الموظفين المحترمين ... هههههههههههه طيب مايطلبو يصروفلهم بدل ... زي بدل سكن بدل موصلات بدل كيف او بدل غرزة او تحشيش ..ماهو لازم السواقين يتكيفو ... ويعمرو الطاسة علشان يعرفو يشتغلو بنفس ... او المفروض يتصرف لهم كل شهر علاوة تربتين حشيش ... او علبة ترامدول لكل سواق علشان يستكيف وهو سايق .

[the lawyer]

فيه موقف حصلي من حوالي شهرين وانا ماشي على الطريق الزراعي بعد بنها في اتجاه طوخ كان فيه حادثة وماشي على سرعة لا تتعدي 10كم / ساعة المهم تريلا عايز تعدي مني وانا عمال اشاورله علشان افهمه اني مش حيعرف يعدي لأني المسافة بيني وبين العربية الللي جنبي ضيقة ، راح خبطلي الرفرف الخلفي بإكصدامه ، ولما نزلت ااتكلم معاه لاقيته بيقولي وانا اعملك ايه مش شايف العربيات اللي تحت
نفس الموقف اتكرر معايا بحذافيره قبل قلما بهدي علشان المطبات وماشي علي الأول لقيته تريل داخلة عليا ومنور 20 لمبة مبقتش شايف ايه اللي جاي ورايا مسمعتش غير صوت خبط ورا لقيته داخل بالإكصدام بتاعه في الرفرف والباب وقالي نفس الكلمة الخالدة انا مشوفتش العربية اصلي انا فوق

[ashrafwolf]

معلومه علي الطاير
95% من سواقينا الحاصلين علي رخصه درجه أولي بيسقطوا في امتحان الرخصه لما يسافروا علشان يشتغلوا في الخليج
انا شغال مع اكتر من 70 سائق نقل و تريلا
و الحق يقال قله منهم يستاهلوا الحرق شايف العربيه الملاكي علي انها مطب

[حماده المصري]

انا لسه سواق نقل مدمرلي عربيتي وخسرت فيها نص سعرها