تقييمك الشخصي لأوتوماك 2008

[MoToRiZeR]

يا ريت الناس اللي راحت المعرض تقولنا رأيها في المعرض بالتفصيل في الموضوع ده
و بدون صور أو استفسار عن العربيات ..just opinions

و يا ريت التقييم يغطي

- مستوي التنظيم و النظام العام بالمعرض
- أهم الإيجابيات
- السلبيات اللي شفتها
- أفضل جناح زرته في المعرض
- السيارة التي تري انها نجمة المعرض
- ما تحب ان تراه العام القادم
- تقييمك العام للمعرض كام من عشرة

[MoToRiZeR]

- مستوي التنظيم و النظام العام بالمعرض انا شايف انه كان كويس .. و المسارات من قاعة لقاعة كانت واضحة .. و الباص اللي بينقل الناس من مكان لمكان بدل ما يسيبوهم لحال سبيلهم .. و كان فيه أمن كتير

- أهم الإيجابيات : الواحد شاف عربيات عمره ما كان يتخيل يشوفها ادامه في مصر و يفتحها و يركبها .. زي طبعا nissan GTR و المرسيدس SL و ال X6 .. و المازيراتي و البنتلي و و .. اقول ايه ولا إيه

المعرض تحس انه نضيف اوي و مصروف عليه و اشبه بالمعارض العالمية اللي بنشوفها في البرامج و المجلات

معظم التوكيلات كانت متواجدة و الغيابات تنحصر في سيات و بيجو و ميتسوبيشي و سيتروين و بروتون و مازدا

كان فيه توازن بين نسبة العربيات اللي للفرجة فقط و العربيات اللي ممكن الواحد يشتريها

- السلبيات اللي شفتها : بعض العارضات ( اللي كانوا حلوين اوي ) مكنوش ملمين بالعربيات اوي و ميعرفوش حاجات كتير عنها مع ان قابلت منهم اللي تحس انها كل يوم بتنزل تحت العربية

معرفش حد شاف ده ولا لأ .. بس حصل خناقة في جناح بي ام دابيو بين بعض الزوار و الأمن لأن الامن قفل في وشهم الباب و قالهم الجناح مقفول نص ساعة بدون ابداء اسباب و بتكشيرة متكلفة فا الناس هبت فيه

- أفضل جناح زرته في المعرض

فيراري !! و يكفي انه موجود !!! مش بعيد السنة الجاية نلاقي بوجاتي فيرون ولا حاجة

- السيارة التي تري انها نجمة المعرض : GTR و بس

- ما تحب ان تراه العام القادم : تغطية أكتر للكماليات بحيث ان يبقي ممكن اشتري حاجة من المعرض و يكون عليها عروض زي الاكسسوارات و الحليات و ادوات التنظيف ذات الماركات المحترمة .. مزيداّ من السيارات اللي تعقد

- تقييمك العام للمعرض كام من عشرة : 8 و نص من عشرة

تعليق اخير .. السيارة دي اول ما شفتها افتكرت عصابة القناع الاسود

[PRO-DRIVE]

تعليق اخير .. السيارة دي اول ما شفتها افتكرت عصابة القناع الاسود

لوووووووووووووووول فكرتني ببوكيمون ههههههههه


اروح بكرا و حرجع اقول رأيي

[ows212]

تعليق اخير .. السيارة دي اول ما شفتها افتكرت عصابة القناع الاسود

هى ناقصة خطين سود بس وتبقى من العصابة

[ASD peugeot]

مين يعرف اسعار التزاكر دي تالت مره اسأل هو سر ولاا ايه؟؟؟؟؟؟؟؟؟

[ahmad7610]

25 جنيه ....
-
المعرض تحفة ..
-
لكن يعيبه ان القاعات كانت منفصلة عن بعض واللى يخرج من قاعة
الصينى حيفضل يسأل لحد ما يعرف ان باقى المعرض لازم تطلع السلم وتعديله
-
غير كده النظام كان جميل والتكييف عدل الجو ..
-
اللى لفت نظرى ان التوكيلات الصينى جايبه عارضات جميلة قوى:) خاصة جيلى :) ولا ايه؟!!؟!؟
ده انا حتى ما اخدتش بالى من العربيات :)
-
وكالعادة معظمهم مش عارفين معلومات كافيه
-
المعرض زى المعرض اللى فات فى التنظيم لكن العربيات اكتر بكتير
-
نجمة المعرض بالنسبة للسوق المصرى كانت فى رأيى Fiat Bravo
و التحفة كانت Nissan GTR وكمان Continental من بنتلى
-
أفضل جناح أبهرنى كان Mercedess وبعديه قاعة BMW وبريليانس
أسوأ جناح كان Xplosion :( -
-

[Abo_Lina]

اكيد حاجة جميلة ان يبقى فيه معارض زي دي في مصر..بس ايه الهدف منها اذا كان اغلب العربيات دي هانشوفها في الشارع مرة كل 5 سنين..يعني في الخليج المعارض موجودة و الناس بتشتري و العملية التسويقية ماشية تمام لأن فيه عقلانية في التسعير..يعني ماينفعش ال H3 في دبي ب 130 الف درهم و في مصر ب 850 الف جنيه و ال X6 ب 2 مليون و الهبل ده..لازم حكومتنا الرشيدة تعيد التفكير في سياستها ال جمركية و برضه هما كاسبانين لو اتباع 10 هامر بسعر معقول بدل واحدة بسعر اهبل..
المعرض في حد ذاته جميل بس عامل زي واحد راح فتح معرض زهور في الصومال

[ASD peugeot]

المعرض في حد ذاته جميل بس عامل زي واحد راح فتح معرض زهور في الصومال

جميل جدا تعبير حضرتك بس احنا كده اتقدمنا بقينا نشوف العربيات دي في مصر علي الطبيعه ربنا يسهل قدام و نشوفهم في شوارع المحروسه