نفسي الاقي صرفه في المخالفات_نصيحه اوعوا تثقوا في حد

[حماده المصري]

دلوقتي باختصار انا اشتريت عربيه صني

من راجل كبير محامي قرا معايا فاتحه واتفقنا اني انا الي هجيبله المخالفات عشان راجل كبير ومش فاضي ووراه شغل ناس والكلام ده وقعد يقولي يبني انت زي ابني واي حاجه في المخالفات اانا هدفعها

المهم روحت عملت المخالفات طلعت الصدمه 4 الف جنيه وانا طبعا مديله فلوسه كلها

عرف هو ينزلها بقت الفين المهم قعدت فتره يماطل لحد ما جبت اخري منه لقيته بيديني الف جنيه وقالي انت تتحمل الالف التانيه طب انا مالي ياعم فين كلامنا وفين الفاتحه لا حياه لمن تنادي

هو قالي الحل الوحيد انه يرفع قضيه وطبعا ده هياخد وقت كبير والعربيه رخصتها مفيهاش غير اسبوع وده طبعا مستحيل

المهم الحوار خلص اني قولتله يعني انت كده راضي ربنا قالي يعني اعمل ايه قولتله ولا حاجه حسبي الله ونعم الوكيل فيك ومشيت


انا نفسي الاقي حل للموضوع ده مش عارف كلمت كزا ضابط قالولي لازم قضيه وفي وكلاء نيابه قالولي بمزاج وكيل النيابه وفي ناس تانيه قالتلي مفيهاش غير القضيه وانا طبعا معايا توكيل مش عقد مسجل تقريبا مليش حق اني ارفع قضيه

وكمان في ناس قالتلي لو معاك عقد مسجل مفيش وشهاده زمه مفيش مشكله انا ممكن اعمل عقد مسجل بس مفيش شهاده زمه انا مش عارف اعمل ايه ولا ايه الحل

[حماده المصري]

والله العظيم فعلا الناس بقت حاجه اعوذ بالله الراجل كبير ومتدين وقاري فاتحه وربنا شاهد وكل ده قصاد الف جنيه راح وايه راجل مقتدر ومعاه كزا عربيه ماديا مستريح

المشكله الوحيده فيا اني طيب والله العظيم ده الي مكرهني في نفسي ومكرهني في البلد مهو الواحد لو كان عربجي كان عرف ياخد حقه تالت ومتلت بس هقول ايه انا من ساعه ما مشييت بتحسبن فيه حسبي الله ونعم الوكيل يارب جبلي حقي دنيا واخره

لسه والله واحد صحبي ضابط حكيلي بيقولي واقف على كمين وقف ميكروباس اول ما السواق فتح القزاز ريحه البانجو
فايحه في وشه قالوا ايه ده بانجو السواق راح مطلع المصحف وحالفله انه ولا يعرفه ولا بيشربه وراح مفتح وراح مطلع كميه وراح حابسه

[FunnyMickey]

انا المالك القديم جابلي شهاده براءه ذمه ان مفيش مخالفات وبعد سنه لقيت مخالفات قديمه 330 جنيه
راح وكيل النيابه قاللي اعمل حاجه اسمها مالك قديم
وعملتها ورايح انهارده قاللي حيشيلوا المخالفات دي

متعمل كده انتا كمان

[Elawany13]

لا حول ولا قوة إلا بالله

[corsair]

استعوض ربنا يا استاذ حماده مفيش مفر لانك كدا كدا هتدفعها ولازم تلحق تدفعها قبل الاسبوع ده ما يخلص علشان متدخلش في موال شهادة البيانات وقرفها وربنا يعوضك خير ودي تعلمك ان مفيش حاجه اسمها طيب ومش طيب الحق حبيب الله زي مانتا خدت فلوسك كلها كاش تديني كل حاجه في العربية من الالف للياء ده لو اخوك في الزمن ده تبقيله فلوس لحد ما يجبلك شهادة المخلفات

[M.Elgergawy]

انا المالك القديم جابلي شهاده براءه ذمه ان مفيش مخالفات وبعد سنه لقيت مخالفات قديمه 330 جنيه
راح وكيل النيابه قاللي اعمل حاجه اسمها مالك قديم
وعملتها ورايح انهارده قاللي حيشيلوا المخالفات دي

متعمل كده انتا كمان

ماهو من الاول مخدتش منه براءة الزمة
وكمان معاه توكيل مش عقد مسجل

لصاحب الموضوع لو كان معاك عقد مسجل كانت فعلا المخالفات دي كلها كان هو شالها غصب عنه
بس احيانا في وكلاء نيابة بيعتمدوا بالتوكيل ويشوف تاريخ التوكيل لو المخالفات
قبل تاريخ التوكيل هيشيلها للمالك القديم جرب ومش هتخسر حاجة

[beshomilan]

ربنا يعينك..بس ثق ان ان ابخل ناس هما اغنى ناس..بس على مين..ربنا اقوى من الكل
بس انا عايز اقول ان المخالفات بتنزل متأخره جدااااا بتنزل بعد المخالفة بأكتر من 8 شهور
انا كان عندى مخالفة فى 1/5/2011 ورحت اشوف مخالفاتى فى شهر 12/2011 وطلعت شهاده براءة زمة انى 0 مخالفات فقلت يمكن الظابط شالها ولا حاجة بعد كده
لقيتها نزلتلى من شهر واحد بس يعنى 2/2012 يعنى بعد المخالفة ب 10 شهور
يعنى لو كنت بعت العربيه شهر 12 كان صاحبها الجديد لبس مخالفاتى ومعاه اصلا شهاده براءة ذمة منى انى 0 مخالفات

[ali_333]

ربنا يعوضك

انت برضه غلطان في حد يثق في محامي اغلبية المحامين

انت ممكن تعمل اتصال تليفوني واحد تقوله حولعلك في عربيتك في اي وقت حتلاقيه خاف واداك فلوسك

[lanos2004]

احمد ربنا انه اداك الف جنيه دة محامى يا عم -يعنى ياكل مال اليتيم ويحلى بالمساكين

[SASA3]

ربنا يستر الواحد جايب العربيه من اكتر من سنه و لسه مراحش شاف لو فيه مخالفات ولا لا على العربيه :(:(


بس انا اعرف ان فيه طريقه بتخلى المخالفات بتروح للمالك القديم بس هى ايه بالضبط ش متأكد الصراحة

[BMW30]

مالهم المحامين ياعم والله مش كلهم زي ما انتوا فاهمين ههههههههههههههههههههه بس ياباشا ربنا يعوض عليك وهو ربنا مش هيسيبه

[S O P H O S]

كله عند ربنا
سلف ودين

[Kareem Fawzy]

ربنا يعوض عليك
استعوض ربنا فى الفلوس وسيب حقك عند ربنا
وهو هيعوضك من وسعه ان شاء الله

[Land_Cruiser]

حسبى الله و نعم الوكيل . قلها و ثق ان ربنا هيجيبلك حقك ان شاء الله

[Dr.A.Nabil]

انت اللي غلطان
كان لازم يجيبلك شهادة براءة الذمه