كام واحد حصله كدة في عربيته بعد ما حط صورها عالمنتدي ؟

[Eng.Geo]

بغض النظر عن الكلام عن الحسد والكلام ده
حطيت صورة العربية اللي فاتت حصل مصايب الدنيا بعدها بكام يوم لغاية ما بيعتها
كاوتش فرق ( كان تيوبلس ) وانا علي سرعة كبيرة وكنت هتقلب
في نفس الأسبوع ... فرامل العجلة اللي قدام يمين بسس قفشت .. مش هوصف اللي حصل
التكييف باظ بتاع 6 مرات
مرة مروحة تكييف
مرة شحن
مرة شحن تاني
زرار ال ac
الزرار اللي بيقلب الهوا جوة العربية ... مبقتش تخرج هوا غير من التابلوه فوق
أخيرا ... الكومبريسور طااار
العربية ده بعد ما بيعتها عملتلها حلقات من كتر الحاجات الغريبة اللي حصلتلها
واللي انا كتبته فوق ده عينة صغيرة من اللي حصل

العربية اللي معايا دلوقتي
طقم صبابات طار عشان بلية الكاتينة أتكسرت
ده مبدأيا وكفاية كدة

حد يبخر المنتدي الليه يكرمكوا

[me_medoo]

هههههههههههه ... حاسس بيك .
انا حصلي مرتين ، مرة كنت منزل موضوع أسمو طريقة تنظيف الفرش البيج ... وقلت اكمل الموضوع بما انو لاقا أقبال جماهيري وحط باقي الصور طريقة التنضيف قبل وبعد .

ومفيش كام يوم قامت عاصفة من العفرة بتاعت الايام الي فاتت ولقيت الشجرة قامت دييييييييييب فوق سقف العربية فطسيتها ... جبت خمس رجالة في المنطقة وبيحاولوا بس يرفعو الشجرة من فوق السقف علشان اعرف أطلع عربيتي من تحتها . بس سبحان الله ان الخسائر تكاد لا تذكر غير عوجة في القايم .


المرة التانية عملت تقرير عن هونداي rb أشتريتها ومفيش تاني يوم ولا تالت يوم بصيت لقيت حرامي كسر الشباك على المدام بتاع لعربية وسرق شنطتها ووقعنا في قلق ومشاكل تانية . وبرضو كتبت عنهم تقرير .رغم ان كتير من الشباب نصحوني متحطش صور ... بس سبحان الله لمن الواحد ميسمعش الكلام ... وتحياتي .

[Ahmed R08]

انا حصلى نفس اللى بتقولوه دا بالظبط مع اختلاف الحوادث اللى بتحصل

[nonetta]

انا اول ما جبت عربيتي كنت عاوزة احط صورة ليها
بس في ناس حذرتني بسبب نفس الموضوع انه اتكرر مع اعضاء كتير
معلش اصل العين فلقت الحجر

[ACC.Eslam Arif]

انا ضد عرض عربيات الاعضاء ع النت او اى انجازات جامدة عملها
واكتر من عضو حط صور عربيته ويرجع يشتكى من موقف غريبة حصلتله
وربنا يكفينا شر الحسد والحاسد

[mshmshm3]

و المشكلة الاكبر في ناس بتحسد من غير ما تقصد

[shaddadfalcon1]

انا بقي مش في العربيه خالص لكن في حياتي الخاصه والحمد لله علي كل شيء :)

وفاكر برضه عضو معانا اسمه ahmod تقريبا معاه يارس وكان مظبطها وحاطط صورها ومفيش اسبوع وكل يوم والتتاني يعمل موضوع ان العربيه اتخبطت

[lanos2004]

ههههههههههههههه
انا بعد فديو من زيرو الى 180
كنت هتحشر تحت نقل
موبينه---وصبابات
هههههههههههههه
دة انا معايا فيديو من زيرو الى 210 وخايف احطه
ههههههههههههههههه
بخور هندى للمنتدى

[me_medoo]

بس على فكرة اانا مشفتش الكلام الي بيحصل ده غير في مصـر ... الحسد في مصر عندنا هنا ســــــــــــــــروا باتع ... والعين توصلك لو انتا فين ... انا كنت بستغرب ان في ناس بتسافر تعمل عمرة او تحج من غير مايقولوا لحد ... فسئلت ايه السبب ؟
قالي المره الاولانية رحت عملت عمرة وبلغت الحبايب مكملتش نوبيع وعيت وسخنت وجالي اسهال ورجعوني .
المره الي بعدها وانا في جدة كمان مش عارف حصل ايه .
دلوقتي بقيت استعين بقضاء حوائجي بالكتمان ... ومبقلش لحد .

[kar!m]

ملاحظة قوية جدا و الكلام ده صحيح تماما وأن متابعه على المنتدى و كنت هعمل بيه موضوع فعلا باقتباسات من الناس اللى بتعمل مواضيع عن عربياتها و بعدها بمفيش اسبوع تلاقى موضوع تانى عن حادثه أو مشكلة كبيرة فى العربية.

زميلنا عمرو فى منتدى الأوبل كان عامل موضوع انه جاب 200 كم بعربيته وكان مصور العداد و بعدها بأسبوع تقريبا عمل موضوع تانى عن حادثه جامده عربيته اتبهدلت فيها.

أحمد لما عمل موضوع عن الجنوط اللى جابها لعربيتة الياريس و بعدها بأقل من أسبوع عربيه نقل خبطت له الجنب الشمال على الدائرى.

زميلنا ماجد كان عامل موضوع عن تركيب فوج لايت لهوندا سيتى .. و بعدها بأقل من 10 أيام عربيته اتخبطت قدامى قدام القرية الذكية.

و غيرهم كتير .. و خلى بالك انك بتلاقى مثلا 1000 مشاهدة للموضوع .. متعرفش مين اللى بيشوف

الحل ببساطه:

الصحيح من السنة أن يبرك الإنسان – أي يدعو بالبركة - إذا رأى ما يعجبه ، وخاف على صاحبه من العين .
قال رسول الله صلى الله عليه وسلم " إذا رأى أحدكم من نفسه أو ماله أو من أخيه ما يعجبه فليدع له بالبركة فٍان العين حق " .
رواه ابن السني في " عمل اليوم والليلة " ص 168 والحاكم 4 / 216 وصححه الألباني في " الكلم الطيب " 243 .



وعن أبي أمامة بن سهل بن حنيف قال : مر عامر بن ربيعة بسهل بن حنيف وهو يغتسل فقال: لم أر كاليوم ولا جلد مخبأة ، فما لبث أن لُبِط به فأتي به النبي صلى الله عليه وسلم فقيل له : أدرك سهلاً صريعاً قال : مَن تتهمون به ؟ قالوا : عامر بن ربيعة ، قال : علام يقتل أحدكم أخاه ؟! إذا رأى أحدكم من أخيه ما يعجبه فليدع له بالبركة ، ثم دعا بماء فأمر عامراً أن يتوضأ فيغسل وجهه ويديه إلى المرفقين وركبتيه وداخلة إزاره ، وأمره أن يصب عليه . رواه ابن ماجه 3509 وأحمد 15550 ومالك 1747.

يعنى المفروض الناس لما تلاقى حد عمل حاجه كويسه يقول له .. "ربنا يبارك لك" أو "اللهم بارك"

و ربنا يسترها معانا جميعا

[Mzeid]

أنا ضد عرض الصور هنا فعلا

ربنا يحفظلنا عربياتنا جميعا

[maruti]

بس على فكرة اانا مشفتش الكلام الي بيحصل ده غير في مصـر ... الحسد في مصر عندنا هنا ســــــــــــــــروا باتع ... والعين توصلك لو انتا فين ... انا كنت بستغرب ان في ناس بتسافر تعمل عمرة او تحج من غير مايقولوا لحد ... فسئلت ايه السبب ؟
قالي المره الاولانية رحت عملت عمرة وبلغت الحبايب مكملتش نوبيع وعيت وسخنت وجالي اسهال ورجعوني .
المره الي بعدها وانا في جدة كمان مش عارف حصل ايه .
دلوقتي بقيت استعين بقضاء حوائجي بالكتمان ... ومبقلش لحد .

والله يا ميدو والمشكلة ان ممكن واحد حالو يكون احسن منك ويبصلك ويحسدك
ليا واحد صاحبي معاة لانسر بومة اوتو يعني كويسة وانا معايا ماروتي يعني في فرق شاسع مابين الاتنين انا قولت ادلع العربية شوية جبتلها سمعات وجي ام هوا شفهم الي ايوا بقا يا عم عدة الصوت بعدها بشوية طقم السمعات ضرب وانا كنت هفرقع
ومرا تانية اول ما اشتلمت العربية لسا زيرو ومعلقتش نمر قولت انزل اخود لفا بيها واحد شفني بصلي بصة عمري مهنساها وقالي تعالى وصلني البيت قولتلو مينفعش اخرج برا المنطقة علشان لسا مرخستش ومشيت
مفيش مشيت شوية والعربية وقفت واجي ادور العربية مفيش يهديكي يرضيكي يا ستي دا انتي لسا جديدة مفيش تخيل بقا احساسي كان عامل الزاي روحت جيت ميكابيكي وبص عليها وجة يدور مش راضيا تدور برضو وبص عليها قالي غريبة العربية مفيهاش حاااجة ههههههه
بعد شوية بيدور تاني اشتغلت وكان مفيش حاجة

[me_medoo]

مرة فتحت مكتب خاص ليا في المعادي وعملت حبت ديكورات فيه بحكم شغلي المهم جه ابن عمتي يزورني في المكتب ومجرد ما دخل باب المكتب يدوبك بشغل الابليكات الي في الحيطة بصيت لقيت النجف بوووووووووم و فيش الكهربا فرقعت وطلعت شياط
وفعلا مكملش المكتب سنة نجاح ورجعت لقيتو فحمة مولعة بسبب ماس كهربائي لسلك التكيف في رمضان البهوان راحو يفطرو ونسيو مكيف شغال فعرفت ان المكتب خلاص. بخخخخخ بسبب العين

[Medicalist]

انا يا باشا العربيه الاولانيه التانيه الحمد لله مش بحطها خالص
انا بترعب من الموضوع جداا و اى حد بيصور عربيته وبيحطها بنصحه يشيلها
المهم فيه حاجه تانيه غريبه بتحصل معايا وهى انه انا لما بنوى او بفكر انى ابيع العربيه بتتخبط وطبعا العادى بعد ما بغسلها كل مره لازم يحصل حاجه

[Medicalist]

اه فكرتونى باخر واكتر مره العربيه اتخبطت منى وانا مدايق
داخل المستشفى وعايز اركن لقيت اتنين عينيهم على العربيه وانا ببصلهم يا جدعان خلاص بقى مفيش فايده مش منزلين عينهم على العربيه برجع وبركن ومعايا حساسات ورا والرجاله لسه بتبص واذ فجأه طخ كان التلتوار الى ورايا جاى بجمب وانا شايفه وحافظه المره دى ما انساهاش
ويوم ما عملت الحادثه الكبيره كنت راجع من الشغل و مسافر تانى المهم ركنت العربيه دقيقه ادام البيت وكنا فى رمضان لقيت واحده معديه بتقول لعمى حسبى الله ونعم الوكيل فيه هو كمان عينه صعبه اوى بتقول الله عربيه الدكتور محمد حلوه اوى دى لانسر باين دى معديه ال 100 الف جنيه وانا سامعها قلت يا ساتر يارب وهى العربيه الانترا طلعت على الطريق و عملت حادثه فى الجون غيرت اكصدام ورفرف وحاجات فى العفشه المهم صرفت 13 الف جنيه وقتها
حسبى الله ونعم الوكيل فى كل حاسد