نقطة سوداء اخرى تضاف الي سجل السيراتو !!

[moh19227]

بص يا باشا أنا من ملاك الصني، وفعلا العربية ثابتة جدا وأنا عن نفسي أخدت مطب هواء بيها على سرعة عالية قبل كده وكنت أنا وأخويا بس(يعني مافيش حمولة تقريبا) والعربية نطت ونزلت تاني عادي، بس هارجع وأقولك ما حدش عارف ملابسات الحادث إيه، ماهو ممكن يكون الدركسيون لف في إيده وهو طاير مما ادى لانقلابها أو خلل ما في العفشة الله أعلم، مش معنى ده يبقى السيراتو عربية وحشة، بالعكس السيراتو ثابتة جدا... وربنا يرحم الطفلة ويصبر أهلها.. تحياتي

قدر الله وماشاء فعل وربنا يحفظلك الصني بتاعتك
بس السيراتو ناس كتير بتشتكي منها ولما نزلت الحرفيين تقريبا اكتر عربيه شفتها هناك كانت السيراتو !!

انا اعرف ان الاطفال فى السن ده لازم يتحطو على كرسى خاص بالاطفال بيتم تثبيته فى العربيه
مش دفاعا عن السيراتو
بس الطفله دى لو فى اجدع عربيه "المانى" كانت هتموت
لان مجرد الارتجاج هيموتها لان الجسم بيكون ضعيف جدا
ده بغض النظر عن السرعه و اسباب الحادث ..

يا خالد باشا تقول لمين , من النادر لما تلاقي حد بيجيب كراسي للاطفال مع ان الموضوع ده خطير جدا وكنت قريت موضوع عن ان وزن الاشخاص اثناء الحوداث بيتضاعف بطريقه مرعبه وعلي سرعات مش فاكر كام بالظبط كان وزن الشخص بيتجاوز الطن !!

وعاوز اقولك ان مطب الهواء بيختلف بردو ..
ادامى مباشره على جمصه اسكندريه الدولى bmw 530 العجل طار من على الارض تماما !!
وانا طبعا طيرت زيه :)))

530 وتاخد مطب هوا وتطير !!
يبقي اكيد كان معدي 160 او حاجه كده !!

التورشن بيم ده نظام تعليق في اغلب العربيات في مصر علي فكره يعني مش قصر علي السيراتو بس وطبعا الاحسن مالتي لينك بس بيكون في عربيات اغلي لأنه مكلف وتصليحه مقرف وفيه اجزاء كتير ...... يعني عندي في الفلونس التعليق الخلفي تورشن بيم وربنا يستر علينا جميعا

يبقي عيب عربيه ؟!!

هو مطبات الهوا عموما بتختلف من مطب للتاني وعلى حسب السرعة

وتصرف السواق مهم جدا في حالة التعرض لمطب هوا ! لو واحد لبس مطب الهوا على سرعة عالية ووهو في الهوا مسك فرامل ! لازم العربية اول ماتنزل هتحدف منه ومش هتبقى ثابتة ووارد جدا مع الفرملة الجامدة العربية تتقلب ! وارجح ان ده اللى حصل !

من وجهة نظري لما تتعرض لمطب هوا او حتى تتفاجاة بمطب قدامك ! امسك الدركسيون جامد وسيب العربية تاخد المطب وتنزل وانت ماسك الدركسيون بقوة عشان العربية ماتحدفش منك لا كدة ولا كدة واول لما تحس انها ثبتت على الارض لمس فرامل عشان تهدي سرعتك !

بالنسبة للسيراتو انا لما سوقتها فعلا حسيت انها بترفع من ورا في مطبات الهوا بطريقة غبية !

ومرة شفت سيراتو لبست مطب / سرعته كانت لا تزيد عن 60/70 كيلو بالكتير ! والعربية طااارت من فوق المطب فعلا ارتفعت من الخلف لدرجة غير عادية ! ونزلت طبعا اتهبدت هبدة السنين ! لدرجة ان العربية صعبت عليا

مع انه ماكنش ماشي بسرعة عالية عشان العربية ترفع بالطريقة دي ! يعني بالكتير اوي 60/70 !

فعلا يا باشا زي محضرتك قولت بلاش الفرامل علشان العربيه متفقدش الثبات والتوجيه بتاعها وهوا ده اللي حصل فعلا مع صاحبي لما اتفاجا بمطب الهواء هو شال رجله بس من ع البنزين وساب العربيه تاخده براحتها

ربنا يصبر والديها

العظة من الموضوع ده عدم الاستهانة بالطريق مهما كانت عربيتك حتى لو ايه

انتا عارف ان معظم الشباب على الطرق المفتوحة بيبقو ماسكين الدريكسون بطرطير ضوافرهم طبعا ساعة القدر يعمى البصر بس خدو بالاسباب

ورده الفعل المفاجأ بعد المطب الهوا بتحدد مسار حياتك

انا شوفت قبل كده باسات 2003 او 2002 تقريبا بمطب هوا لما نزلتتقريبا فردتين قدام فرقعو والعربية طارت برا الطريق وخدت نيو اكسنت قدامها ونزلو برا الطريق فوق الخمس قلبات
فرجاء عدم الاستهانة بالقيادة مهما كانت ظروف الطريق ومهما كان نوع عربيتك

بالظبط يا احمد انا عامل الموضوع ده علشان الناس تاخد عظه وتاخد بالاسباب وخصوصا لو معاك حد في العربيه , حتي لو مش خايف علي نفسك خاف علي اللي معاك
هوا في الاول وفي الاخر نصيب بس بردو خد بالاسباب

انا مع الرأى دا الطفل مكانه ورا و يربط الحزام
معلش إستحمل إن طفلك يبقى بعيد عنك شوية و حتى هتعوده عاده كويسة و هى لبس الحزام
و لو على إنك عايز تبقى شايفهم إبقى هات المرايات بتاعت التاكسى الى فى الإزاز

كلام مظبوط 100 % بس يمكن ثقافة شعب او عدم وعي مش عارف بالظبط

[moh19227]

التويوتا تعليق متصل البورا تعليق متصل النوبيرا تعليق متصل بعض انواع الاوبل تعليق متصل ايه المشكله فيه عربيتى تعليق متصل وعمرها ماسابت الارض وطارت حتى لو على 200 --وقبل كدة طرت بابيزا من على مطب فى طريق شرم الشيخ امام un والعربيه طارت قول متر ونص وراسى خبطت فى السقف وكنت لابس حزام ونزلت وكملت عادى على سرعه 160----
السيراتو بتحب تتقلب فعلا وتعمل اكروبات

اولا ربنا يباركلك في عربيتك
ثانيا انا بسأل العيب في العربيه ولا في النظام ولا في الطرق بتاعتنا ومبتهمش اي حاجه منهم علي وجه التحديد علشان مشفتش الحادثه بعيني

ممكن اعرف يعني ايه مطب هواء

مطب هواء يعني انخفاض في مستوي الطريق فبتحس ان العربيه بتطير في المسافه دي لحد ما تلامس الارض وبيختلف ارتفاع مطبات الهواء من مكان للتاني , انا المطب اللي اخدته مع صاحبي كان قبليه منزل وبعديه الارض مرتفعه شويه ف العربيه طارت مسافة كبير -- امتار --

[moh19227]

أولا.. ربنا يرحم الطفلة أن شاء الله و يصبر أهلها

ثانيا.. لازم نستفيد كلنا من الموضوع ده و ناخذ منه عظة و عبرة :
1- الأطفال في طرق السفر يجب تثبيتهم في كراسي خاصة أو علي الاقل ربطهم بحزام الامان
2- توخي الحذر و عدم السير بسرعات زائدة خاصة في طرقنا اللي بتتغير و تتلون زي الحرباء
3- في حالة المفاجأة بمطب أي كان نوعه يجب تهدئة سرعة السيارة بأي وسيلة مناسبة قبلها بفترة كافية مع الأمساك بطارة القيادة بشكل كامل و محكم للحفاظ علي ثبات السيارة و التحكم في مسارها

طبعا اللي حصل مانقدرش نصنفه علي أنه عيب في العربية لأننا ماشوفناش و مانعرفش ايه ملابسات الحادث و ممكن يكون خطأ من اللي سايق

+11111111111 كلام مظبوط وياريت نلتزم

مش برضه ده المقصود بالتورشان بيم؟؟ اللي بيسموه دنجل


طب انا باشوف عندي فالسويفت وفاللانسر انها على مقصات من ورا... ده اسمه ايه؟؟
وهل ده كده نظام احسن؟؟

هوا ده تقريبا التورشن بيم بس بالنسبه لسؤال حضرتك ممكن الاخوة هنا يفيدوك

مش فاهم اية علاقة الحادثة بالعربية خصوصاً انك مش عارف اي حاجة من اللي حصلت غير ان العربية اخدت مطب هوا... ؟

اولا هدي نفسك يا باشا
ثانيا انا فعلا معرفش اي حاجه عن الحادثه غير ان العربيه اخدت مطب هوا
ثالثا انا متهمتش العربيه انها هي السبب ولو حضرتك قريت الموضوع كويس هتعرف ان انا بسأل السبب ايه او فين بالظبط ؟!
رابعا العربيه بتتحمل نصيب كبير في اغلب الحوادث يعني لو العربيه اللي اخدت مطب الهواء دي كانت bmw 7 series او lamborghini aventador او ferrari enzo مثلا كانت النتيجه هتبقي واحده والعربيه هتتقلب حوالي 4 او 5 مرات !!
طب ننزل شويه لو كانت باسات مثلا كانت بردو النتيجه واحده ؟!
طب ننزل كمان لو كانت سيفيك ؟!!
ياباشا انا مش قصدي ان اقلل من العربيه او اشهر بيها بس انا عاوز اعرف هي العربيه فعلا واحشه ولا الظروف هي اللي ساعدت ان الحادثه تحصل ؟

ربنا يصبر اهلها

امين يارب

[minicooper20]

انا واخد مطب هوا على الدائرى على 210 تقؤيبا و كنت هتقلب لانى لمست فرمل و انا نازل لاكن العربيه لمت نفسيها لوحدها
ربنا يرحم البنت و فداه العربيه
و الله انا صعبان عليا جدا خساره الاولاد بيتكون كبيررررررررررره اوى

[Egyzizo]

أنا سقت فى حياتى حوالى 400 ألف كيلو وماقبلنيش حاجة اسمها مطب هوا .. العيب فيا واللا ايه؟

[medo111]

المشكله الاساسيه في الفرامل لو دوست عليها في لحظه معينه وانت ماشي سرعه كبيره لازم هيحصل حاجه بس محدش عارف ظروف الحادثه وربنا يصبرهم

أنا سقت فى حياتى حوالى 400 ألف كيلو وماقبلنيش حاجة اسمها مطب هوا .. العيب فيا واللا ايه؟

ما انت لو بتسوق في مصر يبقي اكيد قابلتو

[mody100]

حصلت معايا مرة فى راس السنة اللى فاتت كنت سهران مع صحابى فى العجمى و راجع بليل على حوالى الساعة 2 و معايا اتنين صحابى و انا كنت راجع من على الدولى و بجرى تقريبا كنت 160 ايام لما كان معايا الدايو الرايسر و قافل الازاز و مشغل الكاسيت و الدنيا زى الفل و فجاة لقيت نفسى لبست فى السقف و العربية طارت بمعنى الكلمة اترفعت من على الارض بجد لدرجة انى قمت من على الكرسى و لبست فى السقف بس ساعتها كل اللى عملته و اللى جى فى دماغى ساعتها انى حتى لما العربية طارت كل اللى عملته مسكت الطارة جامد بايدى الاتنين عشان لما العربية تنزل تانى متحدفش و طبعا مدستش فرامل نهائى و لا حتى تهدية بالعكس اول لما نزلت فضلت دايس بنزين عادى لانى عارف طالما العربية فى خط مستقيم حتى لو طارت و انت ماسك الطارة كويس فى العدل عمرها ما حتلعب الا بقى لو الطريق مش مظبوط عجلة ضربت حاجة فى العفشة باظت و عموما هو كله قدر بتاع ربنا
و ربنا يستر طريقنا جميعا .........
و ربنا يرحم الطفلة و يصبر اهلها يارب

[Elawany13]

أنا سقت فى حياتى حوالى 400 ألف كيلو وماقبلنيش حاجة اسمها مطب هوا .. العيب فيا واللا ايه؟

عارف لما تكون طالع كوبرى بسرعه وبعدين تنزل من عليه ... أو العكس تحس ان العربية عاوزه تطير وتلاقى قلبك هيفط من مكانه وكل اللى معاك فى العربية بيشهقوا كده ... اعتقد ان هوه ده مطب الهواء
بس طبعا مش هتطير بالعربية الا لو كانت سرعتك عالية قوووووووووى
انما الملتزمين بالسرعه القانونية مش هيحسوا بيه قوى

على فكرة مرة واحد زميلى طار بالفيرنا فى مطب هواء ودماغه اترزعت فى سقف العربية ونزل اتهبد فى الأرض وكمل طريقه عادى

أعتقد انه مش عيب عربية بقدر ما هو تهور وسرعه زائده على طرق مش مستحملة أصلاً ولا تناسب هذه السرعه
يارب الناس تتعظ
وربنا يرحم الطفلة ويصبر أهلها

[eyadmorsy]

التوريشن بيم مفيد فى توازن العربية خصوصا فى الملفات والمنحنيات كما قرأت .. وعن رايى الشخصى فى مطب الهواء اذا حسيت بيه تهدى بالفرامل قبليه واما تنزل سيب العربية بدون فرامل واما تثبت دوس فرامل اتهدىء السرعة

[حماده المصري]

مهو احنا اتكلمنا مليون مره في الموضوع ده خصوصا موضوع التورشن بيم والاكسات والقصه دي

كيا وهيونداي عندها عيب تصنيع ده انا متاكد منه مليون في الميا

لان انا شوفت كل التورشن بيم بتاع كل العربيات الصني والكورولا الجديده والقديمه والنيو اكسنت والسيراتو

اماكن وضع المساعدين والسوست وحجمهم غريب اوي بصراحه محطوطين في اعلى مكان ممكن يتحطوا في تحت الشنطه ده في النيو اكسنت بس في النيو اكسنت مش جايين بميل جايين ب زاويه راسيه على الارض علطول

في السيراتو محطوطين في بس ميل غريب جدا مش عارف ليه


بالنسبه للكورولا ف ال 2009 وحش ثبات انا قريت موضوع الحادثه بتاعتها بس انا مقتنع انها سوء تصرف او في الاول وفي الاخر قصاء وقدر انا سوقت الكورولا كانت ممتاززه جدا جدا جدا لحد 160 لدرجه انها غيرت فكرتي اي حد كان معاه 160 كنت بنصحه بالاوكتافيا دلوقتي بنصح ب الكورولا لان اخيرا تويوتا جمعت بين الثبات الجيد لحد 160 وبين العفشه الممتازه في النعوميه بصراحه


الصني برضو اماكن المساعدين والسوست كويسه جدا لانها محطوه في اقرب مكان من الشنطه من تحت للارض


انا صديق ليا معاه سيراتو اتقلب بيها واخد فلوسه من التامين وجاب سيراتو تاني ورجع برضو عمل بيها حادثه تانيه

انا مش فاهم الناس ليه مش مقتنه ان السيراتو فيها حاجه غلط فعلا زي ما النيو اكسنت فيها حاجه غلط

وبعدينر في اعضاء تقولك خدت مطب وطارت والعربيه ثابته جدا ايه يا جماعه هو في كده هو في عربيه ثابته جدا تاخد مطب هو تطير ده النوبير عمرها ما عملتها اساسا

هي العرييات دي تصميمها انها بتترفع شويه على مطبات الهوا ف لو اتافور عليها في السرعه هتطير ودي مش من علامات الثبات انها لما تطير تنزل تكمل دي من علامات الستر والحمد والشكر لله

انا كان معايا نيو اكسنت ف النترا 2005 ف صني 2006 وفي النص كده دخلت لانوس لمده شهرين

الالنترا العربيه الوحيده اللي لايمكن تطير على اي مطب هو ومره كنت في الصحرواي على 180 والفوارق الي بين الحتت الي مش متزبطه والحتت الي متزبطه في الطريق بتبقى عامله زي مطبات الهوا وبتبقى خطيره جدا جدا جدا الي سافر على الطريق ده كتير وهو بيتصلح يعرف خطوره الي عملوه انا سافرت بالنيو اكسنت وبالالنترا
كنت بالاكسنت اشوف الطريق النضيف بيخلص اهدي وانزل ل 90 لاني عارف اني هلاقي جبل قصادي

بالالنترا والمصحف 180 ولا الهوا كانها نقره عاديه وكان بيجري معايا عريبات كتير اوي كلهم بيهدا خوف وانا كنت بكمل عادي جدا طبعا انا كلاميع لى النتلرا 2005

[amdd]

أنا سقت فى حياتى حوالى 400 ألف كيلو وماقبلنيش حاجة اسمها مطب هوا .. العيب فيا واللا ايه؟

ياباشا ممكن ال400الف كم يكونوا فى طرق انت حافظها كويس بمطباتها ونقرها كمان اكيد حضرتك بتسوق بسرعات منخفضه مش عالية

[Elawany13]

من سنة بالظبط الأستاذ شريف منير كتب عن حادثه بسبب مطب هواء
بالعملاق الأمانى
BMW
هذا هوه رابط الموضوع ده

http://www.nilemotors.net/Nile/215438-a.html






المشكلة ياجماعه مش مشكلة عربية قد ما هيه مشكلة اساءة استخدام العربية
إحنا اللى بنحول النعمة إلى نقمة
[img2]http://img546.imageshack.us/img546/7641/81ad1.jpg[/img2]
بدل ما تكون وسيلة لإسعادك وإسعاد أسرتك وقضاء حوائجك
اتحولت إلى آلة لقتل نفسك وغيرك
بسبب الطيش والتهور والرعونة

[Formulator]

ربنا يرحم الطفلة, و يصبر والديها, ويجازيهم عنها خير isA
بس فـ السفر والسرعات العالية: الأطفال اللى عمرها شهور دى.. لاااااااااازم الكرسى الـIsofix ويتثبت كويس فـ الكنبة اللى ورا بالأحزمة, والطفل يتثبت فـ الكرسى.

لو طفل من سنة لسنتين: بتاخده على حجرك, وتربطه معاك بالحزام بتاعك.. ويفضل أصلا تقعد بيه ورا, أو تقعده لوحده ورا وتثبته بالحزام لو أكبر سيكا.
دى أساسيات..؟!!

بالنسبة لمطبات الهواء:
- المفروض ان العربية ماتطيرش من عـ الأرض؟؟!!! يعنى أيه الـ4 عجلات يفقدوا التماسك؟؟
- ولو طارت.. المفروض أول ماتنزل تكلبش فـ الأرض تانى (لو انت ماعملتش حاجة غلط, زى انك تدوس فرامل)..!!

دوسة الفرامل بتخلى العجلتين اللى قدام يمسكوا فـ الأرض (طبيعى عشان هما اللى بيعملوا Landing الأول)...
فـ الكارثة بتيجى من ان العجلتين اللى ورا بيبقوا لسه طايرين وماتماسكوش فـ الأرض..؟؟!!!
فـ بيحصل Oversteer بالضبط زى الـSnap-Oversteer وللأسف بيخلى العربية تـSpin حوالين نفسها.. أى حركة دركسيون غلط... بتتقلب.
الصح انك أول ماتنزل عـ الأرض تكمل بنزين, عشان تحافظ على الـTraction بتاع العربية..
العجلتين اللى قدام يجروا العجلتين اللى ورا معاهم على نفس الـTrack, ومايحصلش Ovesteer أو Spinــات.

[Formulator]

جزئية السيراتو عفشتها فيها مشكلة ولا لأ.. اتناقشت 100 ألف مرة فـ المنتدى,
أنا رأيى ان كل العربيات اللى بالـSetup ده (تصميم التورشن عند هيونداى-كيا, مش نظام تعليق الـTorsion-beam نفسه) فيها كارثة مش مشكلة بس..!!
يعنى: سيراتو-النترا 2012 (نفس الشاسيه)-سول-أكسنتrb (الشاسيه الأصغر)...وكده, يمكن الوحيدة اللى فلتت هى الكارينز عشان ملتى-لينك.

وبالدليل والورقة والقلم والصور (والتجربة) سواء فحصنا العربيات من تحت.. أو تجربة سواقة:
(تانى عشان اللى معرفش يعرف, واللى عارف يفتكر).. هههههههههههههه

قولنا كل الأوروبى (والهوندا فقط من اليابانى).. بتعتمد الـSetup بتاع الـEurope's Best Handling GTi's,
دون الدخول فـ تفاصيل كتير, الـSetup ده بيدى هاندلينج وثبات + تحكم فـ النعومة والراحة بتغيير السوست..

1- الـSetup الأوروبى: (رينو-بيجو-فيات-ستروين-أوبل-VW-فورد) بعضهم بيطبقه فـ B, C والبعض الآخر بيطبقه فـ B-Segment بس.

الرينو-ميجانIII




الفيات برافوII



بصوا يا أساتذة على مكان (وضعية) السوتة على الدنجل/القنطرة.. ومكان المساعدين.
السوستة للداخل, المساعد للخارج... Ok
فيه كمان Stabilizer/Anti-Roll bar ماشى جوا القنطرة كدا..
بعض الشركات بتغير فـ تصميم ووضعية البار ده.. لمزيد من الثبات, زى الأوبل/فوكسهول فـ الأسترا J/والانسجنيا.. الأسترا H/الفكترا C عادى زى الرينو والفيات والبيجو.




ده اسمه Watt's Link أو Z-Link, لكن يظل التعليق Torsion-beam بالـSetup الأوروبى زى الكتاب ما بيقول.

2- الهوندا فقط من اليابانى:
وبقول الهوندا فقط لأن التويوتا والنيسان ليهم Setup مختلف عن الأوروبى.. فـ تصميم الـTorsion/Twist-Axle نفسه؟؟

برضه دى عفشة الـEuro Civic Hatchback (أيوه السيفيك هاتش بتنزل أوروبا تورشن-بيم, مش زى السيدان عندنا):




للتوضيح أكثر فـ الهوندا.. دى عفشة الـCR-Z اللى المفروض انها أحد أفضل سيارات هوندا فـ الهاندلينج والثبات:




أفتكر كده بقت واضحة جدا, كل العربيات اللى فاتت دى.. ولا كلمة فـ الثبات؟؟!!!

نشوف السيراتو بقى:


طبعا نفضوا للبار الأبيض بتاع Ultra-Racing ده, اعتبره مش موجود (أو موجود عند عادل وجدى ومابيعملش حاجة)؟!! ههههههههههه

أيــــــــــــه ده؟؟؟!!

ايه اللى خلى المساعد يدخل لجوه أوى كده؟؟
وليه السوستة هى اللى برا؟؟ أيه أصلا السوستة الغريبة دى؟؟ (و مكان تثبيتها فـ فردة الشاسيه)!!!

وليه أصلا زاوية ميل المساعد لجوه جسم العربية؟؟؟!! المفروض يبقى مايل لبره (زى الميجانII مثلا)؟؟؟!!!
البار اللى ماشى جوا القنطرة.. ليه متثبت فيها بلحامات؟؟!! ليه مش Sliding على Bushes؟؟!!!
مين الغبى اللى عمل الـBull Sh*t ده؟؟!!!!!!

طبعا الكلام ينطبق بالمللى على الألنترا الجديدة, مع فرق ان السوست انعم سيكا.. (اللى ركب وجرب هيعرف الفروق البسيطة دى) لكن الثبات نفس الـSh*t

فـ الآخر ده رأيى (و رأى ناس كتييييييير) من Enthusiasm لـ ميكانيكية لحد مهندسين فـ توكيلات..
والكلام مدعوم بالصور وتجارب السواقة, اللى عنده حاجة غير كده يقولهالنا..
بس ياريت محدش يدخل يقولى احتقار الصناعة الكورى, وهيونداى-كيا مش عاف أيه؟؟!!!
طب ومصر فين وكوريا فين.. والكلام ده.

أنا ياعم مستهلك.. بس بفهم فـ الحاجة اللى بشتريها, وعارف أيه المضروب من الأصلى..

أنا مقولتش حاجة مش فيهم, هما لسه بيتعلموا صناعة عربيات.. (بس عشان بدأوا بـMentality غلط.. هيفضلوا أغبياء).
وبيطلعوا شغل Below Bar, وده مش فـ العربيات بس.. ده فـ كل الـMachines عموما..!! واللى دخل مصانع كبيرة هيعرف مين رقم 1, 2 و3.. ومين رقم 20, كـ أداء وجودة صنعة وProductivity مش كـ رقم مبيعات.

[SYD]

اولا ربنا يرحم الطفلة ويصبر اهلها ويجازيهم خير عنها ويجعلها شفيعا لهم يوم القيامة

ثانيا
بصراحة السيراتو من اكتر العربيات الي عليها علامات استفهام والناس بتطلع فيها عيوب اكثر ما بتتكلم عن المميزات

عربيات كيا كانت عادية زيها زي اي عربية كوري تانية
باعت كتير من البرايد والسيفيا
نزلت الاسبكترا ومن وجهة نظري كانت ناجحة جدا رغم ان مبيعاتها قليلة مقارنة بالسيفيا والبرايد
اول لما نزلت في 2005 كانت نازلة تحل محل السيفيا والسبكترا وكانت عادية جدا جدا بردو زيها زي اي عربية كوري
لما نزل الجيل التاني منها (الشكل المنتشر جدا) ماعرفش ايه الي حصل للناس
تهافتت عليها بشكل غير عادي لدرجة خلت الناس ماتستناش لما تشوفها عملت ايه مع الناس الي اشتروها
وجايين النهاردة يقيموها ويكتشفوا عيوبها

عموما

شكرا علي التحذير

ثالثا
بالنسبة لمطبات الهواء
المفروض العربية ماتطيرش من علي المطب حتي لو علي سرعة
كل ماهونالك المساعدين بتفتح للأخر وبعد المطب بترجع تتقفل للأخر وبالكتير العربية لو اكصدامتها واطية او فيها عتب بتحك - ليس اكثر
ودة السبب انها لما بتعمل كدة انك بتحس ان روحك اتخطفت زي بالظبط لما تركب اسانسير وينزل بيك من دور عالي بسرعة كبيرة
بتحس نفس الأحساس

بيتدخل في الموضوع دة حاجات كتير كلها تابعة لتصميم الشاسيه وتصميم العفشة ووزن العربية