سائقي النقل يقطعون طريق الاوتوستراد احتجاجا علي زيادة تعريفة مرورية (الكارتة)؟

[salah008]

الاخوة الافاضل
السلام عليكم و رحمة الله وبركاته
مش عارف ابتدي ازاي اعتقد افضل بداية هي حسبي الله و نعم الوكيل
النهارده الساعة 2 ظهرا خرجت لاحضار اولادي من مدرستهم بمنطقة المعادي عن طريق الاوتوستراد وقفت مكاني ما يزيد عن الساعة و بعد عدة محاولات و مناورات شملت السير عكس الاتجاه علي طريق الاوتوستراد اجبارا وليس اختيارا وصلت الي طريق الكورنيش و المفاجأة انه هو كمان واقف تقريبا من حلوان الساعة 3 ونص و مش عارف الاولاد اخبارهم ايه ومش عارف الطريق هيفتح امتي المهم بعد عدة اتصالات تم تحديد اقامة الاولاد بالمدرسة والظريف في الامر ان غالبية اولياء الامور وصلوا متاخرين او لسه ما وصلوش زي حالاتي ومن وصل فضل الانتظار بالمدرسة لحين انتهاء الازمة الساعة دلوقتي 7 و نص واولادي لسه داخلين البيت في حالة اعياء .
سبب الازمة سائقي النقل يقطعون طريق الاوتوستراد احتجاجا علي زيادة تعريفة مرورية (الكارتة)؟
حسبي الله ونعم الوكيل في من يوقف مصالح الناس ويعطل اعمالهم ويقطع طرقهم ايا كان مطلبه
اتمني ان يمر احدهم بوقف سيارة اسعاف تحمل مريضا في حاجة الي رعاية عاجلة ولا يستطيع الوصول الي المستشفي
او مسافر تاخر عن رحلته وما يترتب عليه
قبل الثورة كنا نلعن مواكب الرؤساء و القيادات
والان في زمن الفوضي والبلطجة علي من نصب اللعنات
متي يتعلم الشعب المصري مبدأ (حريتك تنتهي عند بداية حرية الاخر)
حسبي الله و نعم الوكيل.. حسبي الله ونعم الوكيل
اسف للاطالة
والسلام عليكم ورحمة الله وبركاته

[Omar100]

والله دى بقت قلة ادب اى حد مش عجبة حاجة
يروح يقطع الطريق ويعمل اشتباكات مع الجيش والشرطة
مش عارف الناس الى حصلها !
الناس كان عندهم كبت فبيطلعوة على البلد
حسبى الله ونعم الوكيل

[REHAN84]

قلة ادب فعلا

[mahmoud85]

دي قله ادب مسئولين
شاطرين يرفعو الكارته ومش عارفين يوفرو السولار للسواقين ؟؟ والله شفت ناس كانت بتبات قدام البنزينات عشان يمونو ويملو جركن سولار عشان يعرفو يشتغلو ويصرفو علي اولادهم

[Elawany13]

حسبى الله ونعم الوكيل

‫اعلان وزارة النقل والمواصلات لا للأعتصام و قطع الطرق‬‎ - YouTube

[Amrgamal1]

انا كنت في الزحمه دي النهارده بردو وشوفت يوم ابن لزينه كنت راجع من الجامعه في المقطم
دخلت المعادي من جوا قولت انجز وامشي كورنيش
لقيت المعادي نفسها من جوا كلها زحمه من صقر قريش لشارع النصر للعرب لحد الكورنيش كله واااقف بسبب الاوتوستراد
وكنت مطبق مش قادر اسوق والتكييف عندي مش شغال والجو صعب جدا ماصدقت دخلت بيتنا الساعه 5:30
ماقدرتش حتي اركن العربيه سيبتها تحت البيت وطلعت
منهم لله الهمج بتوع النقل دول

[Mohab555]

يعنى مش كفاية الناس الى بتموت كل يوم بسببهم على الطرق
فعلا بجاحة غير عاديه !! بس العيب على الى سبهم من غير مايضرب عليهم نار اول لما قطعوا الطريق وعطلوا مصالح الناس .. حسبى الله ونعم الوكيل

[Land_Cruiser]

سائقين النقل دول السبب فى كل الحوادث تقريبا و اليومين دول شكلهم زهقوا من الرزاله على الملاكى و بدأوا يغلسوا على بعض كمان و ربنا يتوب علينا منهم

[salah008]

حسبى الله ونعم الوكيل

‫اعلان وزارة النقل والمواصلات لا للأعتصام و قطع الطرق‬‎ - youtube

شكرا جزيلا علي الاعلان
اعتقد ان كل العالم شافته قبل كده
هو ده اللي بيحصل في حال قطع الطرق وخاصة الاسعاف
بحكم عملي كطبيب بقيت اكره الخروج مع سيارة الاسعاف بالحالات الحرجة لاني ممكن اقف بسبب اعتصام لساعات ووالمفروض ان في السيارة مريض لا يحتمل الانتظار و الثانية تفرق معاه ومعاي
ناهيك عن الاشغال المعطلة و الامتحانات اللي ممكن تروح وغيره او زي اللي حصل النهاردة اطفال في الابتدائي اهاليهم مش عارف توصلهم بعد ميعاد المدرسة حتي السابعة مساء
ملحوظة اخيرة :كم الحوادث البسيطة اللي شفتة النهاردة علي الاوتوستراد غير عادي وكم المشاجرات ايضا بسبب اولوية المرور لان معظم الناس سارت عكس الاتجاه
مرة اخري حسبي الله ونعم الوكيل

[salah008]

دي قله ادب مسئولين
شاطرين يرفعو الكارته ومش عارفين يوفرو السولار للسواقين ؟؟ والله شفت ناس كانت بتبات قدام البنزينات عشان يمونو ويملو جركن سولار عشان يعرفو يشتغلو ويصرفو علي اولادهم

اخي الفاضل
مع ان ده مش مجاله بس زي ماحضرتك شفت الطوابير في انتظار السولار و البنزين انا كمان شفت عربيت نقل و ميكروباص واقفة في الطوابير بيفضوا الوقود من تانك العربية في جراكن (جراكن مش جركن واحد) طيب لما انت معاك وقود واقف ليه في الطابور يقولك النهاردة فيه بكرة يمكن ما فيش
بالذمة دي عقلية
برده من كام شهر ايام ازمة البنزين المفتعلة (واؤكد المفتعلة) وقفت في طابور بنزين وشاهدت العجب كله بيفول التانك و ارقام مستفزة 7 لتر 9 لتر و سواق تاكسي فول 4 لتر ونص
ولما جه دوري حسيت ان اللي وراي عاوز يتخانق معاي اصلي فولت 41 لتر
يبقي مين اللي بيخلق الازمات
رايي المتواضع المواطن
وبعدين ما هو مقابل الوقوف في الطوابير رفع بعضهم الاجرة للضعف
تفتكر هيرجعها كما كانت بعد انتهاء الازمة
لا اظن
هو ده نموذج المواطن المصري اصبح الكل يستغل الاخربرضاه او غصبا عنه(بالفهلوة قديما و البلطجة حاليا)
اسف للاطالة ودمت بود

[_hema]

اخى الكريم


لقد كنت فى هذه المعمعه اليوم


الدائرى واقف من القطاميه
الاتوتستراد واقف من بعد مزلقان الدويقه
وبالتبعيه صلاح سالم

انا مبئتش عارف اهرب اروح فين

مشوار ساعه بالكتير من مدينه نصر ياخد اربع ساعات

حسبى الله ونعم الوكيل

فى كل واحد يعطل مصالح الناس

فى كل واحد يقطع طريق عشان يحقق مصلحه شخصيه

فى كل واحد لايتقى الله فيما يعمل

اللهم انى فوضت أمرى لصاحب الأمر هو حسبى ونعم الوكيل

[S O P H O S]

سبحان الله

[dr.hazem]

بجد حسبي الله ونعم الوكيل في كل واحد بيستحل اوقات الناس

فكرتوني من جمعتين
صليت الجمعه وجاي بدري الجامع وكنت في مشوار فجيت بعربيتي
المهم الخطيب ده بحب اصلي عنده بس الخطبه طولت جدا جدا والراجل مخلص 1 وربع ياجدعان وانا عندي موعد بعد الصلاه فتخيلو التأخير
خرجت خير اللهم اجعله خير واحد راكن ورايا صف تاني قلت معلش جه متأخر وبيلحق الصلاه
ببص عالعربية رافع الهاند
قعدت مستنيه بره تلت ساعه يا اخوان تلت ساعه مستنيه واعصابي اتحرقت عشان الموعد اللي انا متأخر عليه اصلا
بقوله يعني حضرتك حبيت تركن صف تاني انا مش هعترض الشارع بتاعنا كلنا بس يعني ترفع الهاند وتتأخر كل ده اعتقد ان ده مش من حقك

طبعا هو مش هيقولك انا آسف ولا اي حتى تعبير انه حقك عليا ولا انه غلطان.....

بكل بجاحه يقول... ده انا بقالي 5 دقايق ثم انت مين يعني عشان تبقى مستعجل؟
بالذمه ده اقوله ايه وراجل قد ابويا والواحد ماسك نفسه خارجين من جامع
قلتله حضرتك انا اعرف اللي غلطان بيقول انا آسف انما بجاحه مش عايز وياريت متقللش احترامك لنفسك لان انا مدي حق انك راجل كبير وقدام جامع
قام بيقول ايه... تعالا خدني قلمين احسن
قلتله دنتا غاوي بقا
عموما انت راجل كبير وصدقني لو كنت شب كنت وريتك شغلك
راح قال جيل بايظ وجيل مش عارف ايه وراح شاتم وشاتم الثورة ووووو
ههههههههههههههههههه
قلتله تصدق بالله
انا ميشرفنيش اعرف واحد من جيلك بشكلك واسلوبك ده وانجز خلصني كفايه المعاد اللي ضيعته علينا
لقيت الناس جتلي وبيقولولي حقك علينا وبتاع ركبت عربيتي والحمد لله مشي اخيرا
لقيت واحد سمعته بيقول انت مش محترم ده راجل قد ابوك...
فتحت شباكي وقلتله ببساطه شديده
اللي مش محترم ده انت لانك جبان وبتقول الكلام ده وانا ماشي وهديك معلومه اتعلمها من اللي اصغر منك وحطها حلقه فودنك
هل كون الواحد اكبر عمرا ده يديله الحق انه يغلط؟؟؟
قال وانت وراك ايه ده النهارده الجمعه
قلتله لو انت وقتك ببلاش انا وقتي يا اخي بفلوس ومش شغلك انا ورايا ايه
ومشيت وطبعا راح عليا المشوار والحمد لله على كل حال

الشاهد ان للاسف الناس دي بتعمل الغلط وبتدي نفسها مبررات وممكن كمان يطلعك انت الغلطان
في حين ان لو كل واحد احترم حرية الآخر مكناش هنشوف اللي بيحصل ده

يارب يخلصنا من الهم ده قريب ...

آسف صدعتكو

تحياتي

[moh19227]

والله دى بقت قلة ادب اى حد مش عجبة حاجة
يروح يقطع الطريق ويعمل اشتباكات مع الجيش والشرطة
مش عارف الناس الى حصلها !
الناس كان عندهم كبت فبيطلعوة على البلد
حسبى الله ونعم الوكيل

+1111111111111111

[Elawany13]

أهالي السلوم يحرقون مبنى المخابرات الحربية.. ويرفضون دفن جثث أبنائهم إلا بعد حضور المشير

أهالي السلوم يحرقون مبنى المخابرات الحربية.. ويرفضون دفن جثث أبنائهم إلا بعد حضور المشير : انتقال كل من خير الله الزعيري عضو مجلس الشعب وعصام إسماعيل عبد العال وفرج حسين العوامي وعبد الكريم قاسم أعضاء مجس الشورى عن الحزب، إلي مدينة السلوم للتفاوض مع الأهالي وإيجاد حلول للخروج من الأزمة.

علي جانب آخر تقرر نقل أربعة من المصابين إلي مستشفي مرسي مطروح العام لتلقي العلاج بينما خرج أربعة مصابون آخرون من مستشفي السلوم المركزي، ولا يوجد إحصاء قيقة عن الخسائر فى صفوف قوات الجيش.

كان ما يقرب من مائتين من أهالي السلوم قاموا بقطع الطريق الدولي من صباح اليوم أسفل هضبة السلوم اعتراضاً على فرض رسوم إضافية علي سيارات النصف نقل التي تقوم بنقل البضائع إلي 600 جنية بدلاً من 450 جنية حتى أمس، وهو ما دفع قوات الجيش إلي التدخل وفتح الطريق بالقوة بعض رفض المعتصمين، إعادة فتح الطريق أمام حركة النقل الدولية، مما أدي إلي مقتل اثنين من الأهالي وإصابة ثمانية آخرين.

[img3]http://a5.sphotos.ak.fbcdn.net/hphotos-ak-ash3/575659_330416873678882_188332797887291_833337_3938 06726_n.jpg[/img3]