حكايتي مع ملاكي دمياط 5220

[modux]

اولا السلام عليكم كلكم
عربيتي كانت ملاكي دمياط و نمرة مميزه 5220

وانتقلت للقاهرة لظروف عملي

و سكنت في مصر الجديدة من 3 سنين
و حبيت من 3 اسابيع انقل عربيتي ملاكي القاهرة

ابتدت القصة من 3 اسابيع اني نزلت المرورو هنا قالولي هات شهاده براءة زمة و احنا هنا هنخلص كل حاجة

نزلت دميا ط جبت براءة زمة اني النمرة مفيش عليها مخالفات
و جيت هنا المرور قالولي اعمل فحص بعد البهدلة قالولي لاااااا لازم شهاده بيانات بالعربية
نزلت دمياط قالولي لاااا لازم تسلم النمر و الرخصه هناا

رجعت العربية القاهرة و سبتها و رجعت بالنمر و الرخصه اجيب شهاده البيانات
و جبتها

و جيت هنا و مشيت في الاجراءات شوية لحد ما قالولي لازم مطابقة بصمة في دمياط اتشلت و اانططت يا جماعة انتوا معاكو شهاده بيانات مطابقة للعربية من ملف العربية من دميا ط بس هيهات نزلت دمياط اعمل مطابقة بصمة
في دمياط قالولي البصمة مش واضحة في ورقة الفحص !!!!!
يا جماعه و الله الرقم العيل اللي في 2 ابتدائي يعرف يقراه !!! بس دي مصر

نزلت القاهرة و طاقت بصمة و ختمتها من الظابط
و نزلت دمياط تاني لا اقصدي عاشر مرة و اخدت امضاء من المهندس انها نفس بصمة العربية اللي في الملف في دمياط
و جيت القاهرة بعد 5-6 مرات نزول دمياط و اسيب الشغل
و حلفت اني لو اضطريت ادفع 1000000 جنيه دخان بس مش نازل دمياط تاني

و دخلت المرور لقيت المهندس بيقولي مش عارف اقرا اللي كتبوه في دمياط !!!
من غير كلام روحت مطلع 20 جنيه و قوتلوه جرب تاني !!!!!!
اخيرا ختم الورقه
و طلعت ارخض لقيت بيقولوي فين بقيه الملف و هات مش عارف ايه و مش عارف ايه
المهم ماااااااشي عملا كل اللي عايزينوا بعد 100 جنيه عشرات متوزعة علي اي حد يمشك الملف عشان اخلص !!!

لحد ما الحمد لله استلمت الرخصة و النمر ملاكي القاهرة 6789ْْxx

طبعا ب 50 جنيه للراجل بتاع النمر عشان يجيب نمرة حلوة

بس لما طلعت من المرور بقيت اسب و العن في مصر و اللي عايز يعيش في مصر

[Fouad Ezz]

لقيت المهندس بيقولي مش عارف اقرا اللي كتبوه في دمياط !!!
من غير كلام روحت مطلع 20 جنيه و قوتلوه جرب تاني !!!!!!
اخيرا ختم الورقه

يا أستاذ محمد .... ما هي كانت باينه من أولها .... فتح مخك تاخد ختمك ... تتخن مخك تعمل كعب داير!!!

[modux]

للاسف كنت عايز اعملها بنزاهة بس البلد بقت صعبة اوي تمشي من غير فلوس

[HeMa_LanCeR]

انا كنت زيك بس مع خالو وكانت عربيته ملاكي قنا واتقالنا كل اللي انت قولته ده بس وحياتك ماخرجت من المرور غير وانا مركب النمر الجديده وكلفتني رشاوي 200 جنيه بالنمر علشان بتاع النمر باردو اخد 50 جنيه انت لو فتحت مخك من الاول ما كنتش شوفت دمياط اصلا

[dr_3eshoo]

ابو الزعاتير ليه كده بس
دي احلى ذكريات مع الرقم ده فاكر يا ابو الزعاتير

[modux]

طبعا فاكر يا عشماوي

بس حكم القوي بقي


بس ابعد يا بتاع دمياط هههههههههههههههه

[أبومعاذ]

فعلا المرور دا اكتر مكان مش بيمشي غير بالرشاوي إلا من رحم الله و حسبنا الله و نعم الوكيل
بس انا عملت حركة ظريفة في المهندس في مرور الاميرية من كام يوم ونا بنقل من مرور الجيزة للقاهرة برضو
اول يوم رحت اعمل فحص قاللي لازم خد بصمة العربية ونا باخد البصمة بتاع البصمة قاللي الراجل دا اخره عشان يمشيلك الموضوع 20 ج قلتله ربنا يسهل و سكت المهم اخدنا البصمة و رحت للمهندس قالي لازم تطابقها في مرور الدقي قلتله وماله
رحت تاني يوم مرور الدقي و طابقت البصمة و رجعت للمهندس و حطيت في ايدي 20 ج ونا بكلمه قام ماسك كل الورق وختمه و مضى عليه من غير حتى ما يبص على العربية قمت واخد الورق و حطيت العشرين جنيه في جيبي تاني و قلتله شكرا يا هندسة و مشيت اصل بصراحة حرام كدا الناس دي بقت بتتعامل مع الناس عيني عينك و بمنتهى قلة الادب ولما يلاقي قدامه شخص عايز يمشي صح من غير رشاوي يقوم يعذبه
انا شفت النترا زي الجديدة و حالتها ما شاء الله تحفة و البيه المهندس قالهم غيرو الشكمان الشكمان دا بايظ

[dr_3eshoo]

طبعا فاكر يا عشماوي

بس حكم القوي بقي


بس ابعد يا بتاع دمياط هههههههههههههههه

ده كمان انسلخ من جنسيته الدمياطيه يقام عليه الحد

[Ahmed Samy]

احنا كنا من يومين بنرخص عربية جديدة و بننقلها نمر القديمة و بنسجل القديمة باسم واحد تاني (ههه 3في 1 )

طبعا أختصارا للوقت و المجهود

جبنا (مخلصاتي) من المرور و اديناه 300 جنيه و مفاتيح العربيتين و بطايقنا و الرخص

و في 3 ساعات فقط لاغير روحنا خدنا العربيات (مضينا بس في الشهر العقاري)

تحيا ج.ع.ع بتاعة توت
(ولو اني مش فاهم يعني ايه ..بس تحيا و خلاص) :)

[modux]

" جبنا (مخلصاتي) من المرور و اديناه 300 جنيه و مفاتيح العربيتين و بطايقنا و الرخص "

كان لازم اعمل كده اصلا !!!! من الاول



"ده كمان انسلخ من جنسيته الدمياطيه يقام عليه الحد"
لا يا احمد
i m proud to be from there
بس اللي زي الناس ميتعبش


محمد عيسى باشا اللي عملتو ده صح صح

بس يارتني كنت عرفت اصلا اقتلو !!!!

[hazem_khidr]

الف مبروك و ربنا يجعلها اخر زياره.
بصراحه ما شوفتش مرور مضبوط زي مرور المحله
لا رشاوي ولا وجع دماغ
1+1= 2
معاك ورقك بتخلص و عمره ما يشحططك و عمري ما شوفت لا مهندس و لا موظف بيقبض
دي بتبقي عيبه حتي لما مهندس ياخد 20 جنيه و كلام فاضي من دا.
حسبي الله و نعم الوكيل

[modux]

حازم ده انا كان نفسي اخلصها لوحدي

اقسم بالله والدي قعد يقولي خد عمك معاك او يبعتلك حد معاك ( عمي لواء اركان حرب في الجيش )
و ماشاء الله علي العيله اللي فاضلها جوز عساكر و تعلن الحرب !!!! هههه

بس كنت عايز اخلص لوحدي !!!
و يافرحه والدي لما عرف اني دفعت 400-500 عشان اخلص !!!

قالي ما انا قلتلك !!!! خد عمك او يبعتلك حد

[hazem_khidr]

يا محمد اللي ليه ضهر ما بينضربش علي بطنه.
ليك قريب ضابط
يعني بمكالمه لاي حد معرفه حيسهلك كل شئ .

[transporter1000]

يا سيدى الفاضل حضرتك غلطان من الاول لان احنا هنا فى مصر نش فى اليابان
يعنى كان لازم تفتح جيوبك من الاول وتصرف اقد تمن العربية شاى

[vw3]

محمد انت بتحكي قصة حياتي مع عربيتي اللي أشترتها من ناس تبع مرور السلام و انا ساكن في الهرم :)
انا فضلت أرخص فيها من 12-2007 حتى 5-2008 و الرخصة تنتهي 9-2008 :)
و على فكرة انا اعتقد انها حظوظ و بس لأني رحت للمخلصاتي و رفض أصلاً انه يخلصلي عربيتي تخيلوا ؟!! هههههههههههه
فأعتمدت على نفسي و أي موظف ببقى داخل عليه أحضر الـ 20 جنيه المتينة على طول عشان أقصر على نفسي و كل الاجرآت اللي أتطلبت منك أتطلبت مني بااحرف بالاضافة إلى "ايه ده انت ساكن في الهرم ؟ طب أستنى نروح مع بعض " مع أني مش راجع على البيت !!! بس حاضر بأبتسامة عريضة و انا بجز على سناني و كان كل يوم أروح فيه المرور كنت أرجع أحسب الرشاوي اللي دفعتها عشان ورقي السليم يمشي كنت بلاقي حوالي 100 جنيه كل مرة في حوالي 10 مرات والله بدون مبالغة يعني 1000 جنيه + 1000 جنيه مخالفات من أصل 3000 منهم 3 مخالفات في يوم واحد سحب رخص :) ...3 رخص يتسحبوا و في يوم واحد ؟!!...طب رخصة السواقة و رخصة اعربية و التالتة ده رخصة أيه و في نفس اليوم يعني انا ماشي بقتل الناس في الشارع !!! انزل بقى روح الادارة المركزية شيلها من هناك و استنى للساعة 4 العصر لغاية وكيل النيابة ما يمضي لا تتشال لا لأ !!...المهم 2000 جنيه مخالفات و رشاوي و انا لسة ماعملتش حاجة في ترخيص عربية هيونداي 1300 :)
انا واحد من الناس اللي بيحبوا مصر زي ناس كتير قوي مصر جميلة بس اللي بيحصل ده و الشوارع و الضرايب و المعيشة و التعليم و المرتبات يخلوا الواحد مش شايف ميزة واحدة في العيشة هنا خصوصاً لما تعرف ان صحبك اللي عايش في دبي دفع فلوس العربية و المعرض قاللوا تعالى بعد 3 أيام خد رخصة العربية راح في اليوم التالت لقى الرخصة في انتظارة و انا بحكي الحكاية ده لواحد صحبي تاني عايش في دبي لاقيته أستغرب جداً و قال " ليه ؟ ده بيطلعوا هالك في نفس اليوم انت بتاخد العربية بالرخصة !! " الرخصة انتهت و راح يجددها بيقوللي انا كنت فاكر الدنيا زي مصر... رحت من الساعة 9 و لعبتلي 10 ضغط قبل ما اروح عشان اعرف أدي كتف و أستحمل الضرب و الزحمة...قاللي رحت لاقيت 12 شباك عليهم حوالي 4 بس واقفين و الباقي فاضي وكراسي بقى عشان الناس تجلس "مش فاهم ناس مين ماهوا ماقيش حد بيجلس كله بيخلص على طول!!" المهم...أخدت رقم "زي البنوك عندنا" و لسة بجلس لاقيت الدور جه عليا مالحأتش أجلس المهم يا جماعة كان خارج من المرور بعد ما فحص و معاه الرخصة بعد 20-30 دقيقة...لو ده اداء الخدمات للناس اللي بتدفع ضرايب يبقى هتلاقي زحمة ليه ؟!