كيفيه استخراج رخصه خاصه عن طريق مدرسه المرور

[bHa2]

1.تروح وحده المرور التابعه لمحل سكنك

2.هتروح علي شباك مدرسه المرور وتدفع 220 جنيه و تقدم صوره البطاقه و 2 صوره شخصيه

3.هتتسجل ع قائمه انتظار وتاخد تاريخ تيجي فيه تاني

4.بعد حوالي ثلاث شهور تقريباً بيجي معاد الذهاب الي المرور مجدداً
5.تاخد رقم عريف الشرطه اللي هيعلمك و تكلمه

6.في دفتر حضور 11 حصه بتحضرهم وبعد كده بتاخد ميعاد امتحان

7.بتروح تمتحن قياده فقط "دي ميزه الممدرسه مفيهاش اشارات و كمبيوتر"

8.تاني يوم بتروح تقدم الورق اللي هو
"كشف طبي نظر و باطنه بدون تواريخ و عليهم رقم قيد الطبيب - عدد 2 صوره بطاقه - عدد 3 صور شخصيه - نموزج 256 - ملف رخصه خاصه
- ايصال كمبيوتر - حافظه توريد (هنرجعلها تاني) "
لشباك الرخصه الخاصه

هيكتبولك ف حافظه التوريد 33 جنيه و يقلولك هات ملف و نموزج 256 هتروح تقف ع الخزينه

وتدفع 40 جنيه و ترجع تاني للشباك بالورق كله "اللي هتكون مازلت محتفظ بيه" و تقدمه للشباك
وهتستني تتصور و مبروك الرخصه
*التكاليف بالتفصيل

1.مصاريف التقديم 220 جنيه
2.شهادتين باطنه و نظر 25 جنيه
3.ايصال كمبيوتر 15 جنيه
4.حافظه توريد 1 جنيه
5.ضريبه مكتوبه ف حافظه التوريد 33 جنيه
6.نموزج 256 عليه طوابع شرطه ب 7 جنيه

انا للاسف مقدرتش اسرد الموضوع بشكل كامل عشان عندي امتحانات " دعواتكم :) "
بس اتمني ان حد يستفيد من المعلومات دي
واللي القاء في تجربه شراء السياره ان شاء الله :)

[Totexxxxx]

انا كنت طلعنها مع مدرسه المرور الي في بين السرايات بس امتحنت الاشارات والكومبيوتر عادي بس الكلام ده 2008 هب دلوقتي اتغيرت؟

[bHa2]

انا كنت طلعنها مع مدرسه المرور الي في بين السرايات بس امتحنت الاشارات والكومبيوتر عادي بس الكلام ده 2008 هب دلوقتي اتغيرت؟

ممكن تكون اتغيرت
عشان انا اساساً داخل مدرسه عشان ابعد عن الاشارات
علماً بأني مرور شبرا :)

[EL Tanna]

طيب والـ 11 حصه دول بيبقوا فى مده اد ايه؟؟
و كمان فى مواعيد بتختار بينها؟؟ولا هما الى بيحددو كل حاجه

[MohammedAladel]

مع اختلاف بسيط فى الأسعار من محافظة لمحافظة نظرا لاختلاف درجة الحرارة

[bHa2]

طيب والـ 11 حصه دول بيبقوا فى مده اد ايه؟؟
و كمان فى مواعيد بتختار بينها؟؟ولا هما الى بيحددو كل حاجه

هما مش 11 اوي يعني رسيوا ف الاخر ع 6 حصص :D
بيبقوا كل يوم الصبح و علي عربيه المرور "كانت نص نقل"
ومفيش مواعيد بس ممكن انت تنسق مع العريف و اهو كله بحسابه

مع اختلاف بسيط فى الأسعار من محافظة لمحافظة نظرا لاختلاف درجة الحرارة

اه فعلاً بتفرق من محافظه للتانيه

---
عاوز اوضح بس ان اللي عندهم دا مش تعليم
هو بس بيعرفوك ازاي تتحرك بالعربيه
وتدخل و تخرج بين الاقماع "دخلت البروفه يومين ورا بعض لحد ما بقيت عفريت :D "
و فالاخر رحت لقيت الظابط مديق الاقماع ع الاخر وبصراحه الامتحان ليه رهبه كده ف سقط الاسبوع اللي فات
وجيت تاني امبارح و نجحت الحمد لله و اتصورت و اخدت الرخصه النهارده

[mazher_m]

مبروك الرخصه عقبال التجديد بعد 10 سنين ان شاء الله

[bHa2]

مبروك الرخصه عقبال التجديد بعد 10 سنين ان شاء الله

ربنا يبارك ف حضرتك يا فندم :)
ان شاء الله :)

[EL Tanna]

طيب ممكن اعرف بيعلموك ايه فى ال6 ايام دى؟؟يعنى لو واحد مبيعرفش يسوق هيتعلم فعلا؟؟
و لما جيت تطلع الرخصه دفعت اى حاجه للى هناك ؟؟
معلش اخر سؤال هوا بيبقى الصبح على الساعه كام يعنى؟

[M.belal]

مبروك ع الرخصه يا ريس
كنت عايز اعرف هل فعلا انت استفدت من الكورس ده
وتانى حاجة هو الحضور مهم ولا فاكس لانى قدمت ومرحتش انا مرور شبرا بردو

[MohammedAladel]

فعلا بيدربك ازاى تعدى الأقماع على مسافات واسعة وبتبقى خايف جدا وقت الاختبار ولكن عديت من أول مرة لأن الأقماع كانت واسعة تعدى سكانيا :)

[bHa2]

طيب ممكن اعرف بيعلموك ايه فى ال6 ايام دى؟؟يعنى لو واحد مبيعرفش يسوق هيتعلم فعلا؟؟
و لما جيت تطلع الرخصه دفعت اى حاجه للى هناك ؟؟
معلش اخر سؤال هوا بيبقى الصبح على الساعه كام يعنى؟

*بتتعلم فقط ازاي تتخرك بالعربيه من الثبات من غير ما تبطل و ازاي تقف من غير ما تبطل
وكمان بتتعلم ف مكان فاضي طبعاً مبتتجرئش ع الشارع عشان مفيش ححواليك عربيات يعني
*دفعت لامين الشرطه اللي كان راكب جنبي 10 جنيه و سابني ابص ورايا
ومخلنيش اخرج بره الاقماع قدام
سهل العمليه شويه
*الساعه 8 صباحاً ياريس اسئل براحتك اي سؤال انا تحت امرك ان شاء الله :)

مبروك ع الرخصه يا ريس
كنت عايز اعرف هل فعلا انت استفدت من الكورس ده
وتانى حاجة هو الحضور مهم ولا فاكس لانى قدمت ومرحتش انا مرور شبرا بردو

الله يبارك فيك :)
استفدت حاجه واحده كانت عملالي ازمه
انا مكنش بسوق يعتبر
كانت كل ازمتي تظبيط الدبرياج مع البنزين و تبطيل العربيه وانا بقف عشان بنسي ادوس دبرياج
ودول عشان رحت كذا يوم ورا بعض والراجل كان علي طول يقولي" اقف - اتحرك - اقف -اتحرك" وهكذا
هو المفروض في غياب
بس انت ممكن اما تاخد رقم العريف و تكلمه تقوله انا بعرف اسوق
هيقولك طب نتقابل يوم كذا هتقابله و تغمزه بحاجه وتتفق معاه ع معاد الاختبار ع تليفون تتابع يعني

فعلا بيدربك ازاى تعدى الأقماع على مسافات واسعة وبتبقى خايف جدا وقت الاختبار ولكن عديت من أول مرة لأن الأقماع كانت واسعة تعدى سكانيا :)

لا احنا ف الاختبار كان مديقها جداً
ف التعليم كنت بدخل و بخرج بسرعه معقوله
ف الاختبار اول مره عملت كده ملحقتش الم نفسي و ووقعت قمع
تاني مره بقيت ماشي بسرعه السلحفاه xD

[fvks]

السلام عليكم

هو سؤال مستفز هو ازاي اطلع رخصة بدل فاقد؟
ولكم جزيل الشكر
انا معايا رقم الرخصة
وشكرا

[bHa2]

هو سؤال مستفز هو ازاي اطلع رخصة بدل فاقد؟
ولكم جزيل الشكر
انا معايا رقم الرخصة
وشكرا

حضرتك بتروح تعمل محضر ف المكان اللي ضاعت فيه الرخصه "محضر فقد"
دا اهم حاجه بعد كده بصراحه مقدرش افيدك
بس اعتقد انك بتروح شباك الرخصه الخاصه و تعرف ايه التفاصيل :)

[Sehsss]

شكرا جزيلا