سؤال الى الخبراء وارجو الرد

[sameh_master00]

مقارنة بين السيارات الاتية من حيث المميزات والعيوب من جميع الجوانب بغض النظر عن اعادة البيع
فيات 124 نورمال واسبيشيال ولادا 1200 و 1500
فيات 132 ولادا 2105
لادا سمارا و اسكودا فيفوريت
وعاوز خلاصة وترتيب افضل السيارات دى ورينج الاسعار
وارجو عدم تدخل الفقهاء عشان بصراحة انا شفت مقارنات كتير هبل فى هبل كلام وعكسه ناس تقول حلوة وناس تقول وحشة حتى لو على ميزة حلوة فى العربية ناس بتقول عليها عيب وممكن واحد يتكلم فى عربية يطلعها حلوة ووحشة فى النفس الوقت ازاى؟ متفهمش

[sameh_master00]

ياريت اللى يرد يكون جرب ويحكى تجربته - انا زهقت من 127 و ال 128 عربيات ضعيفة فى كل حاجة عاوز اجيب حاجة وانساها بقى عشان تقعد معايا 5 سنين ع الاقل مع العلم انى الطرق عندى فيها مطبات وكسور كتييييييييييييييرة وتجيب الشلل وياريت لوحد عنده اقتراح لعربية تانية غير دول يقول ويتكلم عن تجربته - اختيارى للعربيات دى على اساس رينج امكانياتى المادية( اقل من 20 الف )

[Sehsss]

أولا.. الموضوع ده مكانه قسم المقارنات، ثانيا.. انت تاني مشاركة ليك في المنتدى وداخل تتريق على الناس وتقول فقهاء، ومقارنات هبل في هبل، إيه ده

[sameh_master00]

الموضوع ده مش اختصاص بتوع الصنى وال 5000 مشاركة

[Sehsss]

الموضوع ده مش اختصاص بتوع الصنى وال 5000 مشاركة

عندك حق فعلا.. الصني وملاكها أكبر من الموضوع

[semi]

اي عربية لازم يكون لها عيوب طبعا او عدم وجود ميزة موجودة بعربية تانية ده يعتبر عيب برضه
فأنا شايف بالنهاية العربيات تتساوي في التقييم النهائي طالما بنفس السعر
لكن عموما مقدرش افتيلك في العربيات اللي قولت عليها دي بالتفصيل
لكن انصحك بكيا برايد هي ب30 الف بس عربية محترمة فعلا
اشتريها بقلب جامد

[kaza]

والله العربيات دي في زمانها تعتبر اساطيرمن ناحية القوة والاداء بس بمرور السنين وطرق مصر الجميلة ماعتقدتش انك ممكن تلاقي عربية من دول حالتها سليمة والشاسية سليم واكيد الصداء لعب دورة تمام بالاضافة لفتي الصنايعية وتعريض الشاسيهات للاجهادات الحرارية تنيجة القص واللحام وبالتالي ضعفها
اقترح عليك اي حاجة جديدة مثلا لادا 2105 جديدة موديل حديث وكيلومتراج قليل والاهم شاسية سليم او اي عربية تانية المهم الحالة وطبقا لما متوافر معاك وباأكد علي الحالة بتاعة البودي والشاسية
وبعدين خلي باللك محدش في مصر بيبيع عربيتة الا لما كل وشرب عليها تمام وبيبقي عايز يبيعها باغلي سعر ممكن رغم انه طلع عين ابوها

[S O P H O S]

لا حول ولا قوة الا بالله ...

[exact]

بما انك مش عاوز فقهاء (سواء ناس بتفهم او فتايين ولو انهم مش موجودين هنا) مش هارد على حضرتك

[sameh_master00]

شكر

اشكر كل الناس الى قامو بالرد ع الموضوع - اقصد بكلمة الفقهاء الناس اللى بتفتى وخلاص من غير تجربه - واعتذر عن اى اساءة صدرت

[alaamousa]

عندك حق فعلا.. الصني وملاكها أكبر من الموضوع

حبيبي يا سحس معلش ماتزعلش الراجل عضو جديد وميعرفش وضع المنتدى بتاعنا ولا الناس اللي فيه ومدى احترامهم وميعرفش واحد زيك على قديمه في الصني
بس الراجل لما يشارك معانا ويعرفنا الموضع ان شاء الله يختلف ولا ايه
واحشني يا باشا

[alaamousa]

بما انك مش عاوز فقهاء (سواء ناس بتفهم او فتايين ولو انهم مش موجودين هنا) مش هارد على حضرتك

معلش يا باشا عايزين نرحب بالراجل ده عضو جديد في اسرتنا والراجل اعتذر
ان شاء الله مافيش اي مقابلة جدية ولا ايه على مستوى المنتدى كله

[alaamousa]

اشكر كل الناس الى قامو بالرد ع الموضوع - اقصد بكلمة الفقهاء الناس اللى بتفتى وخلاص من غير تجربه - واعتذر عن اى اساءة صدرت

اعتذار حضرتك مقبوووول وبعدين يا استاذ سامح براحة شوية علينا
انت شوفت الراجل بيرد عليك بيقولك مش هرد على حضرتك
احنا هنا مش مجرد اعضاء موقع سيارات الاغلبية هنا تعرف بعضها واتقابله كتيير مع
بعض ويشرفنا انك تكون واحد مننا

[HAITHAM1985]

أنا شايف إن الوضع السياسى مأثر علينا كلنا بما فيهم أنا حاسس إن أنا مش مظبوط عصبى على طول وبدون سبب ......... بس مبحاولش أزعل حد منى ............ الدخلة بتاعة الأخ ما كانتش موفقة بالقدر الكافى بس نلتمسله العذر وكلنا إخوة فى الله ......... وعفا الله عما سلف

وأنا كمستخدم سابق للــ 131 أقدر أقول إنها عربية ذات إعتمادية عالية وصيانة سهلة ومعروفة من الفنيين والصنايعية بس بشرط الإهتمام بيها وعدم إهمالها

الــ 132 قوية فعلا ........ بس سفاحة بنزين لإنها 2000 cc

الــ 124 واللادا تتشاركان فى مشاكل البيض والعفشة لكن حمالين أسية

الملخص : ترشيحى هيكون للــ 131 بشرط إنها تكون جيدة وفى رينج إمكاناتك

تحيـــــــــاتى وبالتوفيق

[_hema]

والله العربيات دي في زمانها تعتبر اساطيرمن ناحية القوة والاداء بس بمرور السنين وطرق مصر الجميلة ماعتقدتش انك ممكن تلاقي عربية من دول حالتها سليمة والشاسية سليم واكيد الصداء لعب دورة تمام بالاضافة لفتي الصنايعية وتعريض الشاسيهات للاجهادات الحرارية تنيجة القص واللحام وبالتالي ضعفها
اقترح عليك اي حاجة جديدة مثلا لادا 2105 جديدة موديل حديث وكيلومتراج قليل والاهم شاسية سليم او اي عربية تانية المهم الحالة وطبقا لما متوافر معاك وباأكد علي الحالة بتاعة البودي والشاسية
وبعدين خلي باللك محدش في مصر بيبيع عربيتة الا لما كل وشرب عليها تمام وبيبقي عايز يبيعها باغلي سعر ممكن رغم انه طلع عين ابوها