استشاره لأهل الخبره .. محتار بين ال 3 عربيات دول

[KaReeM10]

دلوقتي يا جماعه انا اصلا من القاهره وبشتغل في الغردقه .. طبيعة شغلي سفر كتير ومرمطه

معايا جولف 2 موديل 84 موتور 1800 .. عايز ابيعها واجيب حاجه موديل عالي في حدود 42000 - 45000

بعد تفكير عميق .. وصلت ل4 عربيات عايز اختار احسنهم اداء واكترهم رفاهيه وتوفير (قطع غيار وبنزين)

بولو 2002
بونتو 2002
كيا سبكترا 2002
كيا ريو 2002

ممكن اسمع ارائكو ؟؟؟؟

[فادى محمد]

با45 اف تركب اوبل فيكترا ايه كامه اوتوماتيك حاله حوه قوي
انما لو عاوز اختيار من ال4 يبقي كيا سبكترا

[alaamousa]

مع احترامي ليك في اختياراتك ولكن الاربعة من وجهة نظري ولا واحدة
عندك يا باشا ب 45000 فيرنا حالة ممتازة فول اوبشن
اركب لانسر كريستالة تحفة
اركب هيونداي اكسنت موديل الفينات
اركب تويوتا ايكو موديل الفين وقطع غيارها الياريس

[koshary]

ياراجل هتنزل من جولف وتركب سبكترا ولا ريو ماتخليك فى هوندا سيفيك موديل ال تسعينات وهتلاقى حاجه ex او SI كويسة جدا وهتلاقى حاجات حلوه وعربية تستحمل السفر الكتير وثابته ثبات رهيب ومش هتعطل كل شوية وطبعا انت نازل من جولف وفاهم الليله دى كلها

[sha2e]

بما انك بتسافر كتير ومحتاج الثابت يبقى الاسبكترا
عربيه ثابته ومحترمه جدا عكس اغلب الكوري وموتورها نشيط
" الاسبكترا على فكره اثبت من اللانسر بومه بفارق ملحوظ "

عيبها قطع غيارها مش منتشره ولما تلاقيها سعات بتكون اسعارها مبالغ فيها وتقترب من اسعار الاوروبي

وعلى فكره المقارنه فيها 4 عربيات مش 3

[semi]

لو بتتكلم عن قطع غيار اسعارها كويسة ومتوافرة بشكل عبيط
يبقى الفيرنا طبعا عربية كويسة وبتاعة سفر وموتورها كويس جدا
والعفشة بتاعتها ناعمة بس مشكلتها الوحيدة معايا ان تقفيلها مصري
وضيقة وعفشتها واطية على الارض
بس عربية تحفة للسغر واقتصادية بالبنزين
ولو عايز حاجه محترمة وتسيبك من الكوري يبقى الكريستالة طبعا عربية تحفة
بس قطع الغيار مش بتوافر الفيرنا ولا باسعارها
وعندك بعد كده الاوبل معتقدش هتناسبك لان قطع غيارها غالية
ده اللي ارشحه لك وسيبك من اللي انت قولته ده
وحاجه اخيره اركب العربية اللي عجباك واللي تدخل دماغك
لان الناس هتفضل تنصحك وتقولك وفي الاخر هتجيب اللي عجبك بس

[miho.ahlawy]

الجولف2 بعشقها

[eemmoo]

انت شكلك مش عايز حاجه تقليديه ومنتشره زى الفيرنا واللانوس
بالنسبه للبولو موتورها 1000 سى سى والبونتو 1300 سى سى ومش بيركبهم غير الشباب يعنى مش هتلاقى حاجه نضيفه والاتنين قطع غيارهم غاليه
الكيا اسبكترا افضلهم

[amigooo]

لو فيها سفر ومرمطة .. يبقى فورا البيجو 405 عربية المشاويرالطوييييييييييييلة وعالية وقطع غيارها موجودة ومتوفرة .. واقرا عنها فى قسم البيجو .. وسعرها فى الرانج دة .. بس تكون سليمة .. وادعى لى .

[KaReeM10]

شكرا يا جماعه على ردودكو واهتمامكو .. واضح من كلامكو اني صعب الاقي عربيه في كفاءة الجولف2 بالسعر ده

انا قررت اصبر شويه لحد ما ربنا يسهلها و اجيب ان شاء الله جولف 4

[benmatar]

لو فيها سفر ومرمطة .. يبقى فورا البيجو 405 عربية المشاويرالطوييييييييييييلة وعالية وقطع غيارها موجودة ومتوفرة .. واقرا عنها فى قسم البيجو .. وسعرها فى الرانج دة .. بس تكون سليمة .. وادعى لى .

كلام سليم جدا جدا
لو سليمة تبقى ثابتة معاك لغاية 170كم/س وتكييفها ما شاء الله عليه، والصالون محترم وشنطة كويسة، أما قطع الغيار معمرة وسعرها متوسط بس عشان تفضل معاك تمام تحافظ على صياناتها عند فني متخصص بيجـــــو، وبالتوفيق

[SYD]

حضرتك جبت المفيد
فعلا انسب عربية بعد الجولف هي الجولف
ولكن لو عايز تحوش فلوسك في عربية عشان مايتصرفوش ممكن تجيب مؤقتاً بولو - ومش هتختلف كتير عن الجولف ولما تكمل ثمن الجولف 4 ابقي بيع البولو وهات الجولف

تحياتي