حصل معايا موقف في منتهي القرف ... ياريت كل الناس تاخد بالها

[fanky_fanky]

انا كنت ساكن في امبابة .. وكنت عامل رخصتي الخاصة علي مرور العجوزة .. تمام كده مفيش مشكلة
المهم ربنا كرمني وعزلت ورحت المقطم وفضلت فترة طويلة عنواني في البطاقة علي امبابة ولما البطاقة انتهت رحت عملت تجديد ليها علي عنوان المقطم ... كل ده ورخصة القيادة بتاعتي مفيهاش مشكلة والعنوان اللي فيها القديم بتاع امبابة...

من حوالي شهر ونص ضاعت محفظتي وبالتالي رحت عملت محضرين واحد بالرخصة وواحد بالبطاقة
ولما عملت البطاقة الجديدة وجيت اعمل الرخصة اكتشفت المفاجأة السخيفة جداً

طلعولي شهادة بيانات زي بتاعة العربية بس ببيانتي انا علشان اروح بيها من مرور العجوزة لمرور المقطم .. وكتبولي فيها الاتي :

يراعي تطبيق المادة 38 من قانون المرور .. ولما سألت علي المادة 38 من قانون المرور .. طلعت مصيبة سودا ....... انه اللي بيغير عنوانة في البطاقة لازم يخطر المرور في خلال 30 يوم من تغيير محل اقامته .. لو معملش اخطار للمرور وعدي علي تاريخ صدور البطاقة اكتر من 30 يوم .. تعتبر رخصة القيادة في حكم الملغية .. وبالتالي انا كده هروح مرور المقطم واختبر من أول وجديد وكأني عمري ما كان معايا رخصة

هو انا كان يعني المفروض اني ابقي عارف المادة 38 من قانون المرور دي منين ؟؟ ومين اصلا بيهتم انه يعرف مادة زي دي .. ربنا ينتقم منهم وحسبي الله ونعم الوكيل

[mr_sameh]

الجهل بالقانون لايعفي من المسئوليه

[fanky_fanky]

الجهل بالقانون لايعفي من المسئوليه

ياسيدي الفاضل انا عارف ان الجهل بالقانون لا يعفي من المسئولية وهو انت شايفني بقول اني مش هقوم بالمسئولية ... بس هو من وجهة نطري قانون قاصر .. يعني انا لو مكانتش محفظتي ضاعت وكنت فضلت ماشي بالرخصة القديمة .. مكانتش هتتلغي وكنت هفضل ماشي بيها .. هما معندهمش سيستم يقولهم ان العنوان اتغير .. يعني لولا البطاقة والمحفظة ضاعوا مكانش كل ده حصل ... علماً بأن رخصتي كانت هتنتهي في 2019 يعني كمان 7 سنين

[احمد المصرى]

منتهى التخلف وقانون عقيم بصراحه

[fanky_fanky]

منتهى التخلف وقانون عقيم بصراحه

وكأن اللي بيسوق في منطقة ميعرفش يسوق في التانية ... حاجة بجد مقرفة .. وتخلي الناس تتحايل وتجيب وسايط

يعني انا مثلا كنت ناوي اني مش هدفع رشاوي في مرور او هجيب وسايط لأي حاجة .. ولما عملوا معايا كده حاسس اني مخنوق جداً .. بس بردو هلتزم بالقانون علشان محسش اني بعمل حاجة غلط

[MOK3336]

بيجوا علي الهايفة و يتصدروا عادي يعني ده الطبيعي في مصر

[jackson_75]

شكراً على الأفادة ومعلش نصيبك كده تتعب شوية ,, كله بيعدي وماتزعلش

[fanky_fanky]

بيجوا علي الهايفة و يتصدروا عادي يعني ده الطبيعي في مصر

القوانين بتاعتنا محتاجة تتشال وتتراجع ويتحط غيرها من اوي وجديد فعلا

[fanky_fanky]

شكراً على الأفادة ومعلش نصيبك كده تتعب شوية ,, كله بيعدي وماتزعلش

الحمد لله علي كل شيء وقدر الله وما شاء فعل

هو فعلا نصيب بس انا قلت اعمل الموضوع علشان لو حد غير عنوانة يعمل الحكاية بتاعة المرور بدل ما لاقدر الله تضيع الرخصة او تنتهي وييجي يجددها ويتصدم بالموضوع ده

[horas3000]

طب ينفع تطلع بطاقة علي عنوانك القديم
اعتقد اجراءات البطاقة اسهل من حوار الاختبار
و لا انت بعد اللي كتبوه في شهادة البيانات تبقي لبست ؟؟؟

[fanky_fanky]

طب ينفع تطلع بطاقة علي عنوانك القديم
اعتقد اجراءات البطاقة اسهل من حوار الاختبار
و لا انت بعد اللي كتبوه في شهادة البيانات تبقي لبست ؟؟؟

مينفعش اعمل بطاقة علي عنواني القديم .. لان مبقاش في حاجة باسمي في العنوان ده .. وللأسف تقريباً كده بعد اللي كتبوه في شهادة البيانات انا كده لبست ... انا مشكلتي مش في السواقة ....... انا مشكلتي في الأشااااااارااااات ........ بجد انا هتجنن مش عارف لو رحت اعمل الرخصة وسقطت ايه اللي ممكن يحصل
ده انا ان شاء الله هجيب العربية خلال يومين تلاتة .. والع بقي في نفسي ولا اعمل ايه

[AhmedTareq]

طلع بطاقة بدل فاقد علي العنوان القديم وبعدين طلع رخصة بدل فاقد

[mohammedabdallh]

المشكله بقى لما تيجى تمتحن
تسقط

هو الواحد بقى المفروض يدرس قانون بقى

[fanky_fanky]

المشكله بقى لما تيجى تمتحن
تسقط

هو الواحد بقى المفروض يدرس قانون بقى

ماهي دي المصيبة اي امتحن الاقي نفسي سقط لاي سبب خارج عن الارادة .. واتنيل استني بقي لحد ما امتحن تاني
طب ده يرضي مين بس ... انا بجد هتجنن ومش عارف اعمل ايه وخصوصا اني مش هينفع اغير العنوان في البطاقة تاني

[Kareem Fawzy]

انا كنت فاكر انك لما بتجدد لتختبر من اول وجديد شكرًا علي النصيحه