موقف عجيب جدا من ظابط مرور

[Evo]

النهارده دخلت عباس العقاد ودخلت بنزينة مصر حطيت بنزين و بعدين عملت كام حاجه على نفس الإتجاه وبعدين لفيت من عند اللفه اللي جنب جاد بعد مالفيت لقيت ظابط الونش بينادي علي وكان راكن بدون لجنه ركنت ونزلتله وقلتله خير .. ؟

قاللي معاك رخص ؟!!

اديتهاله قاللي في مخالفه 1200 جنيه سير عكسي !!

قلتله إيه ؟ فين ده ؟

قال لي أنا شايفك من شوية طالع عكسي من السنهوري !!!!

قلتله إنت متأكد أنا أصلا أول مرة اجي الجنب ده النهارده وكنت على الناحيه التانيه بجيب حاجات وأحط بنزين

قاللي لأ أنا متأكد... بي ام لونها كذا ونمرها كذا واللي جواها لابس لون كذا !!!!!

وأنا أصلا واقف مستنيك !!

قلتله '' يا حلاوه'' واقف مستنيني في آخر الشارع واش عرفك إني هاجي هنا أصلا ما فيه كذا لفة قبل دي !

قال لي يعني أنا كداب نعمل محضر ولا هتعمل إيه ؟ وراح منادي عسكري وبيسأله قدامي كان ماشي عكسي ده يابني ولا لأ ؟! الواد ضحك بخبث وقاله آه يا باشا كان ماشي عكسي !!!!!!!!


قلتلهم أنتم هتجنوني ؟عكسي إيه أنا مدخلتش شوارع جانبية أساسا ! ولانه ظابط أنا في البداية ماشكيتش لكن مع الهبل اللي بيحصل قدامي شكيت إن فيه لعبه في الموضوع قلت وهتكتب إيه في المحضر مسكته ماشي صح واتهمته انه ماشي عكسي ؟
مفيش اثبات حاله أساسا والعسكري شهادته ملهاش لازمه ...

و رحت قافش عليه وقلتله اللي بتقول عليه ده محصلش ومعنديش غير كده ورحت قالب وشي ومتنرفز
لقيته لم الموضوع بسرعة غريبه متوقعتهاش بصراحه وقال لي خلاص متمشيش عكسي تاني علشان مخالفتها كبيره و بيديني الرخص

بصتله باستعجاب كده وضحكت ضحكه سمعت عباس كله هاهاهاها...

الله أعلم فيه إيه لكن الموضوع مش طبيعي نهائي !

[beshomilan]

غالبا عشان انت راكب بى ام فحب يطلع منك مصلحه فقالك على اكبر مخالفه اللى هى عكس وب 1200 عشان انت طبعا بالنسباله غنى والفلوس بترميها يمين وشمال وممكن تديله 200 او اكتر فى الخباثه عشان يلغى الغرامه وكل ده فى اعتقاده
بس انت اتعاملت صح ومسكتش على حقك
فى غيرك هيدفع عشان يمشى اموره

[wael61]

الموضوع ببساطة انه كان نفسة يشرب شاى بس انت قلبتها بن

[ahmedeihab]

طمعان فى فطار ولا اى قرشنات فى جيبه يا عم ايفو

^_^

[Ahmed_selmy]

ناس معندهاش ضمير ولا شرف
حسبى الله ونعم الوكيل

[sakr_skoda]

ظابط على الزمن اللى فات........*

[Kefo_Honda]

أنا لو منك اسمعه صوت وحش قبل الضحكة , حصلت معايا قبل كده كنت راكن في مكان فاضي وقاعد في العربية ,الباشا نزل من البوكس وطلب بطاقتي اديتهله شافها , بعدين طلب رخصتي ورخصة العربية قمت شادد البطاقة من ايده وافلت العربية ونزلتله قلتله ملكش رخص وسبته ومشيت , ده بيبقى واحد عايز يطلع من أي مصلحة من أي زبون أو واحدة ست أو راجل طيب مايعرفش حاجة

[حماده المصري]

انت برنس بس هو فعلا كان لازم يسمع صوت مش حلو الاول

[ahmedhilmy]

تمام اوي تصرفك ده

[Land_Cruiser]

ده احتمال يكون واحد من معدومى الضمير و طبعا كان عايز فلوس من حضرتك و ظريفه اوى حكايه العسكرى اللى شغال شاهد ده. هى محكمه و بيجيبوا فيها شهود ؟ تلاقى لما حضرتك عليت صوتك خاف يتفضح و الناس لما تسمعك. بتزعق ما هتصدق تتلم عليه و ممكن يتضرب او انه مش مسئول عن المنطقه دى اصلا و احتمال تانى انه ما يكونش ضابط اصلا و يكون نصاب و سهل انه يجيب زى ضابط وونش كمان الواحد ما بقاش يستغرب من اى حاجه و خاصه لأنه عمل الحركه الغريبه دى الله اعلم و شكرًا للتنبيه

[hossam_elwani]

عايز يشرب شاى بلياسمين ههههههههه

[Ashraf_Ibrahim]

المهم بقا ميسجلهالكش عكس الاتجاه اصلا !
ومتلاقيهاش في المخالفات وانت بتجدد الرخصة !
البلد بقت خربانة في المرور بطريقة مستفزة !

[حماده المصري]

ده احتمال يكون واحد من معدومى الضمير و طبعا كان عايز فلوس من حضرتك و ظريفه اوى حكايه العسكرى اللى شغال شاهد ده. هى محكمه و بيجيبوا فيها شهود ؟ تلاقى لما حضرتك عليت صوتك خاف يتفضح و الناس لما تسمعك. بتزعق ما هتصدق تتلم عليه و ممكن يتضرب او انه مش مسئول عن المنطقه دى اصلا و احتمال تانى انه ما يكونش ضابط اصلا و يكون نصاب و سهل انه يجيب زى ضابط وونش كمان الواحد ما بقاش يستغرب من اى حاجه و خاصه لأنه عمل الحركه الغريبه دى الله اعلم و شكرًا للتنبيه

اصل صعب اوي ضابط بجد يعمل كده هو ممكن يصطادك عادي بس مش هيتبلى عليك للدرجه دي

ممكن يبقى نصاب ومممكن يبقى امين شرطه اترقى وده برضو احتمال كبير

انا مره اديت ضابط 20 جنيه في شارع فيصل وكان منظر زي الزفت ضابط ولسه متخرج شاب ملازم وعمال بيلم قتاوي بس بصراحه كنت ماشي من غير فوانيس ولا اكصدام ولا نمر كنت بصلح عربيتي زمان
بس قالي اسحب رخصه العربيه قولتله ولما انت تسحبها انا امشي بايه مكنش معايا رخصتي كان وصل وخلصان من سنه
قالي يبقى غرامه 20 جنيه وقعد يضحك وانا ضحكت واتدهمله ومشيت

[ahmed_mido1889]

كنت خدت رقم الونش وبلغت في الوزاره بالمكان والتاريخ والتوقيت وتنفخه

علشان ننضف البلد منهم

[amrico]

شكله بيتفرج على رامز جلال كتير
انا كنت متصور في اخر موضوعك انه هايكتبلك وصل مخالفه مكتوب عليه انا اسف انا كنت بهزر معاك وبعدين يقول نسمع سقفه كبيره لإيفو يا جماعه