اغير لبنزين 80 كحل لازمتى الماليه؟؟

[ahmmedbingo]

بسم الله الرحمن الرحيم

السلام عليكم ورحمة الله وبركاته ، اللهم صل على محمد وعلى آله وصحبه أجمعين.

فى البدايه اوضح انى مقدرش استغنى عن العربيه لظروف ان شغلى بعيد جدا عن بيتى وللأسف انا بمر بأزمه ماليه طاحنه وبفكر اغير من بنزين 92 لبنزين 80 وطبعا الفرق فى السعر مش محتاج شرح انا عربيتى بولو 1300 موديل 97 هل بنزين 80 هيضرها يعنى هيعمل اى مشاكل ياريت اللى يرد يكون متأكد من كلامه وشكرا جدا ليكم وربنا ما يحكم عليكم بزنقة او بأزمه هههههههه

[semi]

معتقدش هي العربية فقط عزمها هيقل جدا
يعني متحاولش تسرع بالعربية وامشي براحتك لانك لو عملت كده
هتسمع الموتور عمال يسقف وهيصعب عليك
ومتخليش حد يقنعك ان بنزين 92 بيبقى انضف من 80 ومش فيه شوائب
ده اعتقاد خاطئ كل ما في الموضوع ان 80 صعب احتراقه ومش بيدي طاقة زي 92
وان ده بيعتمد على موتور العربية مصمم ليحرق انهي اوكتين

[Land_Cruiser]

انصح حضرتك انك ترجع لكتالوج السياره و شوف رقم الاوكتان اللى كان موصى به كان كام و اقل حاجه كام لان ده كلام اللى صنعوا العربيه و اكتر ناس عارفينها. اى حاجه تانيه غير كده هتبقى اجتهادات فرديه او تجارب قد تصيب و قد تخيب

[aboomar22]

هو فين اصلا ال 80 دا بيتباع فى الشارع ب 1.50

[samoreception]

خالى بالك لانك ممكن تضر موتور العربية وبدل ما توفر هتصرف اكتر على صيانة الموتور
وربنا ان شاء الله يفك ضيقتك

[lanos2004]

خلط يا باشا وامشى بقلب جامد نص 80 ونص 92

[exact]

معتقدش هي العربية فقط عزمها هيقل جدا
يعني متحاولش تسرع بالعربية وامشي براحتك لانك لو عملت كده
هتسمع الموتور عمال يسقف وهيصعب عليك
ومتخليش حد يقنعك ان بنزين 92 بيبقى انضف من 80 ومش فيه شوائب
ده اعتقاد خاطئ كل ما في الموضوع ان 80 صعب احتراقه ومش بيدي طاقة زي 92
وان ده بيعتمد على موتور العربية مصمم ليحرق انهي اوكتين

تصحيح
حضرتك التسقيف بييجي نتيجة ان البنزين 80 بيولع بسرعه مش ببطء... وقت اما البستم يضغطه وقبل حدوث الشرارة وعشان كده بنغير توقيت الاشعال عشان نمنع التسقيف او الكركرة

لصاحب الموضوع... معلش انا ماعرفش عربيتك... بس هل هي فيها سبيراتير؟؟
وبعض العربيات زي اللانوس بيكون فيها فيشه لضبط قيمة الاوكتان فممكن شوية بحث عالنت احتمال يطلع في العربية حاجة مشابهه

[beshomilan]

مش عارف انصحك اقولك ايه
بس انت مستعد تسمع صوت التسقيف؟؟
ومستعد تخنق العربيه لو شغلت التكييف وانت ماشى؟؟
وتتنازل عن جزء من السحب؟؟

بص انا رايي جرب تفويله وشوف ايه اللى هيحصل وهتبقى جربت بنفسك

[lad]

اديها 80

[Eng.Geo]

ال compression ratio بتاعة موتورك 1:10
لازم 92 للأسف والا هتسقف وده خطر
ممكن تخلط نص 92 ونص 80 كحل وسط وماتدوسش عالنزين جامد في الغيارات العالية

[Yasser.Essam]

نصيحة مجرب والله الـ 80 مشكلته إنه بيقلل عزم العربيه وبيقلل سحبها

بس الكلام ده بتعوضه برجلك انك بتسايس العربيه ومتدوسش بنزين جامد او بمعنى اصح متقرصش علي العربيه عشان متسمعش التسقيفه ..

انما كله فى السريع بيتساوى

والـ 80 نضيف زى الـ 90 والـ 92

هو بس الرقم الاوكتانى بيختلف .

رغم ان الموتور بتاعك معامل الانضغاط بتاعه 9 او 10 تقريباً

بس انت سايس العربيه ومش هتسمع تسقيف لحد ما ربنا يفك ضيقتك

لأن فرق السما والارض بـين الـ 80 والـ 92

الـ 80 بـ 90 قرش والـ 92 بـ 1.85 قرش

فرق جنيه فى اللتر :)

[golden_web_2007]

تجربتى بعد اول تفويلة بنزين 80 :
1- صوت تصقيف كل شوية .. (ماكونتش بسمعه فى الـ 92 نهائى)
2- سحب العربية مش عاجبنى خالص .. (اكنها مش عربيتى اللى كنت بجرى بيها)
3- التكييف كفاءته قلت .. (مع انى مش فاهم ايه العلاقة بين التكييف و البنزين)

معرفش بس حسيت ان الفرق اللى هوفره هيقابله عدم رضا عن أداء العربية ..
فــــــــــــ أرجع بنزين 92 تانى أريح لى بئا ـــــــــــــــــــكدا شــــــــــــكــــــــراً ...

[Y a r i s]

تجربتى بعد اول تفويلة بنزين 80 :
1- صوت تصقيف كل شوية .. (ماكونتش بسمعه فى الـ 92 نهائى)
2- سحب العربية مش عاجبنى خالص .. (اكنها مش عربيتى اللى كنت بجرى بيها)
3- التكييف كفاءته قلت .. (مع انى مش فاهم ايه العلاقة بين التكييف و البنزين)

معرفش بس حسيت ان الفرق اللى هوفره هيقابله عدم رضا عن أداء العربية ..
فــــــــــــ أرجع بنزين 92 تانى أريح لى بئا ـــــــــــــــــــكدا شــــــــــــكــــــــراً ...

معليش يا استاذ جولدن. هو حضرتك جربت بانزين ٨٠ على انهو عربية من بتوعك الفراري ولا اللمبرجيني ارجو التوضيح وشكراً

[elpasha1]

توكل على الله وحط ال 80 دا انا حطيتة فى اللانوس وزى الفل
سحب قليل شوية وتسقيفة طبعا
لكن ابن الذين بيرقد فى العربية
وربنا يفك ضيقتك

[golden_web_2007]

ههههههههههههههه .. لاء اللمبورجينى و الفيرارى دى انا كاتبهم تبعاً لمبدأ إوعدنا يارب ..
انا عربيتى دايو لانوس 99