السيارات القادمة من ليبيا

[Ahmed.Fahmy]

السلام عليكم يا شعب المنتدى الكريم

سؤال على الطاير كده

ايه نظام العربيات اللى بتيجى من ليبيا دى

منتشر جدا على الFacebook سيارات ليبى

هى بتتجمرك وللا ينفع يتمشى بيها بنمر الجماهيرية وللا بيضربولها ورق وللا ايه النظام؟؟؟؟

[MOSHAKS]

على حد علمى السيارات ديه بياخدوها لما تكون عندك عربية عاملة حادثة ومش نافعة فبدل متغير نص مثلا تروح تجيب عربية من دول وتنقل رقم الشاسيه بتاعك عليها وتركب عربية زيرو ويمكن بمواصفات اعلى.انما معتقدش ان ليها ورق. يعنى تعتبر قطع غيار والله واعلم

[akmm]

وحتى نقل رقم الشاسيه يعتبر تزوير لأنه ياما بتعيد حفر الأرقام بتاعه العربيه التالفه على شاسيه الأخرى مع كشط اومحو الأرقام السليمه ... او بقطع جزء الأرقام بالكامل مع إعاده لحامه على الشاسيه الجديد ... يعنى كله من الآخر عك إجرامى .

[semi]

في اتفاقية بين مصر وليبيا لدخول اي سيارة لمواطن ليبي بالنمر الليبية وبدون اي جمارك
هل بقى بيبقى له فترة سماح مش متأكد
لكن مينفعش طبعا تشتريها لانه بالمرور هيطالبك بورق الاستخلاص الجمركي

[hossam_elwani]

في اتفاقية بين مصر وليبيا لدخول اي سيارة لمواطن ليبي بالنمر الليبية وبدون اي جمارك
هل بقى بيبقى له فترة سماح مش متأكد
لكن مينفعش طبعا تشتريها لانه بالمرور هيطالبك بورق الاستخلاص الجمركي

يعنى معدش فيه جمرك سلوم اطلاقا ومابقوش يستلمو اللوحات اساسا

[OMAR61995]

أنا كل العربيات اللى بشوفها من ليبيا بتبقى نمر ليبيا مش جمرك

[Ahmed.Fahmy]

طيب وبعدين
يعنى ممكن واحد ليبى يجيب عربية ويعيش بيها هنا 20 سنة مثلا وللا ايه؟

[Land_Cruiser]

طيب وبعدين
يعنى ممكن واحد ليبى يجيب عربية ويعيش بيها هنا 20 سنة مثلا وللا ايه؟

اكيد ليها مده محدده طبعا. اذا كانت العربيات اللى هى نمرها منطقه حره بتاعه بورسعيد ليها مده معينه يبقى هيسيبوا عربيات جايه من ليبيا و لا سوريا الى الأبد؟ الجمارك لا تتهاون فى الحكايه دى أبدا

[kimokaim]

هناك اتفاقية مصرية ليبية وبتنص على دخول العربيات المصرية لليبيا بالنمر المصرية والعكس صحيح

والقيادة داخل البلدين بالرخص لكل دولة دون الحاجة للرخصة الدولية

العربيات الليبية تدخل تريبتيك سنة كاملة مقسمة على ستة اشهر تجدد في المطار وده خاص بالعربيات الليبية فقط

طبعا ممكن حد يقول هو في عربيات مصرية تدخل ليبيا اصﻻ !

اه طبعا عربيات النقل الثقيل بالهبل تدخل ليبيا يوميا لنقل البضائع من الرخام لﻻبرة

وعربيات نقل العمال المصريين ايضا

العربيات الليبية ممكن تحط جمرك السلوم او تدخل بالنمر الليبية

يعني هو مخير اما ياخذ ستيكر ويلزقه او ياخذ نمر جمرك

وممكن تسألوا اي حد راكب عربية نمر ليبية او جمرك السلوم

[S O P H O S]

اعتقد اتفاقية فعلا
لان العربيات بتمشي عادي وبشكل كبير ..

[amdd]

العربية بتدخل من السلوم عادى ممكن يتركب عليها جمرك السلوم لو هتقعد فتره طويلة نسبيا اما لو هتقعد فتره بسيطة لا تتجاوز 3 اشهر تقريبا بتدخل بنفس نمرها من الجماهيرية

[kimokaim]

ﻻ عادي لحد ستة اشهر من غير جمرك السلوم

والرخص شفتها بعيني ستة اشهر وكانت نمر ليبيا مش جمرك سلوك

[benmatar]

اليومين دول اللي بيحب يعمل حاجة يعملها
تضحكو لما تلاقوا معارض في الطريق الساحلي وفي مطروح بتبيع عربيات نمرها ليبي وكأن شيئا لم يكن أو كأننا في طرابلس، بياخدوها الجماعة العرب واصحاب المزارع أو ناس كتير مش بتحتك بالمرور ولا الكماين ولا اللجان واللي راح الوادي الجديد أو الواحات أو الصعيد الجواني عارف، وممكن تعيش بيها 100 سنة من غير ما تشوف عسكري مرور. وعااااااااااااااااادي خالص

[الريس حميدو]

ساكلمك عن نظام الجمرك الخاص بنا حتى تاخذ فكرة وممن تسأل اذا كان فيه تشابه ولا لاء
القانون الجزائري يسمح للجزائري الذي يعيش في الخارج ان يحضر معه سيارته عند عودته لكن لفترة ثلاثة اشهر فقط عليها بعدها ان يعيدها الى بلدها الاصلي او يقوم بدفع الجمرك عليها اذا كانت زيرو لان السيارات المستعملة ممنوع استيرادها نهائيا مهما كانت مواصفاتها
ماذا نعمل نحن نعمل جولة كده في اروربا نشتري سيارة مستعملة بس تكون حالتها ممتازة
ندخل بها الى الجزائر عبر الميناء فناخذ ترخيص بالسير لمدة ثلاتة شهور تمام ؟
بعد كده لما تنتهي فترة الترخيص وفي الايام الاخيرة ناخذ السيارة في لفة لتونس وانت و مزاجك بقه لو عايز تتفسح خذلك مشوار ولا اثنين او لف في نقطة الحدود التونسية وارجع مرة ثاني للجزائر واستمتع يا سيدي ببف باف ختم وترخيص جديد لثلاثة اشهر اخرى

[hugan]

كده فهمت
لاني كنت باستغرب جدا العربيات عليها نمر ليبيا وماشيه في الشارع عادي بدون نمر الجمرك المصري
لكن العربيات الليبي النمر بتاعتها طويله وبلانجليزي عني لو حد فيهم عمل حاجه بعربيته ولا خبط حد وجري
نمره العربيه علي ما حد يكتبها ويدور عليها تكون العربيه رجعت ليبيا بالسلامه