حد جرب شركة ادفعلى edfa3ly

[freeman207]

الف شكر يارجالة يبقى على البركة

[أبو_يوسف]

تقريبا الاتنين زي بعض في الاسعار..
انا خلطت بين ادفعلي وصفحة على الفيسبوك كان اسمها buy america online
يبقى ميزة ادفعلى انها في القاهرة وعاملين عرض خصم 50% على الجمارك لحد يوم 23/9

[Karim_Monir]

timtim وقريب ان شاء الله لو لينا عمر
هاتلاقيهم معاك في المنتدي
وخصم خاص للاعضاء كمان بكود لنايل موتورز :-)
انت نايل موتورزاوي وافتخر :-)

[eslamsubaru]

شركة محترمة جدا و عن تجربة : انا لسه جايب منهم حاجات للسوبارو و مخدتش وقت 3 اسابيع و جت من اليابان . همة بياخدو 15 دولار على كل كيلو جرام وزن غير ان انت بتدفع ثمن الحاجة اللى على النت و لو فيه مصاريف لشحن الحاجة لامريكا من مكان بيعها عادة دى بتكون 10 دولار. و احسن ميزه انها بتريحك من عناء احضار الحاجة من الجمرك المصرى .. بجد شركة تستحق الاشادة و لها مستقبل كبير انشاء الله.

[Y a r i s]

طيب وهو الدفع لازم يكون من طريق النيت ولا ممكن اروحلهم واديهم فلوسهم في ايديهم .... وهل بياخودوا ١٥ دورلا على الكيلو بس بكل مشتملاتها ولا يقلك لسه في خمسه في الميه عمولة ولسه في جمارك الا صحيح اكسسورات العربيات عليها جمارك !

وهل بياخدوا بالدولار ولا بالجنية المصري

[أبو_يوسف]

في اكتر من طريقة دفع منها انك تروح تدفع في الشركة..
وعلى صفحتهم على الفيس بوك ابعت بس اللينك بتاع اللي عايز تشتريه هايرودوا عليك بالتكلفة كلها بالتفصيل..

[freeman207]

timtim وقريب ان شاء الله لو لينا عمر
هاتلاقيهم معاك في المنتدي
وخصم خاص للاعضاء كمان بكود لنايل موتورز :-)
انت نايل موتورزاوي وافتخر :-)

تسلم ياكريم باشا وهو ده المتوقع من بيتنا الجميل نايل موتورز

[dede_dodo88]

أنا أتعاملت معاهم كتير.. كل فترة كده بحتاج أشتري حاجات من أمريكا و هما مريحني في الموضوع ده خصوصاً أن الشركة قريبة من بيتي و في الشارع اللي ورا شغلي xD
أنا بتعامل معاهم من أول لما كانوا مجرد صفحة على الفيسبوك قبل ما يعملوا السايت بتاعهم, بس الدنيا دلوقتي أسهل بكتير و ظبطوا السايت بتاعم جامد دلوقتي,, ممكن تدفع عن طريق تحويل بنكي لحسابهم في البنك على طول أو كاش أو بالكريدت كارد عندهم في المكتب و بيحسبهالك بالجنيه المصري.. و الحاجة بتاخد في حدود من أسبوعين لثلاثة عشان توصل..

[cutie_honey]

تجربتي مع شركة ادفعلي.كوم Edfa3ly.com

يا جماعة انا عملت كذا اوردر معاهم واقسم بالله معاملتهم سيئة لاقصى درجة في حال ما اذا واجهتك مشكلة
بس طول ما انت عميل جميل محظوظ معندوش مشاكل وبيدفعلهم بس (زي اسم الشركة) مفيش اي مشكلة

انا في حاجات ضاعت في الاوردر بتاعي وكلمتهم بعد اكتر من ساعة في محاولات لان خطوط تليفوناتهم كلها على طول بايظة
.... حجتهم ان عندهم ضغط فظيع كالعادة.... المهم ان بعد محاولات مستميتة للوصول اليهم يرد عليا الموظف ويقوللي " حاضر يا فندم حنحل مشكلتك وعمره في حياته ما يتصل تاني

ضيعولي حاجتي ورافضين يعوضوني واكلمهم ما يتصلوش تاني ويخلصوا من المكالمة كل مرة بعذر
كأنني بشحت منهم

ده غير انني اشتريت جهاز من امازون كان بايظ ـــ دي مش مشكلتهم انا عارفةـ--
بس انا من حقي على الأقل الفاتورة ولا ايه؟
طلبت فاتورة عشان اقدر اصلح الجهاز في التوكيل هنا في مصر - او اشحنه بمعرفتي تاني لأمريكا -- بس رافضين والجهاز دافعة فيه اكتر من ٣٠٠ دولار يعني ١٩٠٠ جنيه مرمي في المطبخ بايظ

اسوأ شركة في الكون اقسم بالله
انا كنت من اكتر المشجعين ليهم لان الفكرة كنت اراها فكرة عبقرية وشباب عاملينها وكدة
بس يفتقرون لأساليب التعامل مع العملاء ومش بعيد في وسط المكالمة الموظف يقفل السكة وترجع تتصل تاني يقولك اصل الخط قطع (حصلت معايا فوق ال٥ مرات)
الموظفين جداد وطلاب جامعات يفتقرون الى الخبرة وغير مدربين على استقبال الشكاوى وحل مشاكل العملاء
انا عملت معاهم ٣ اوردرات وكله مشاكل :)
ومانفسيش حد يخش في المعاناة النفسية اللي انا مريت فيها بسبهم وحرق الدم والاعصاب ،لما قلتلهم انا ححكي علي مشاكلي معاكم للناس قالولي اللي يريحك يا فندم ( بالعربي كدة طز فيكي)
،كل مرة اروحلهم لمكتبهم في مصر الجديدة الاقي ناس بتتخانق فمن الواضح انني لست انا فقط سيئة الحظ مثل ما كنت اعتقد

انا دي اول مشاركة ليا مع اني مسجلة من ٢٠٠٩ بس عشان احذر الناس وحكتب علي تجربتي في كل المنتديات معاهم عشان انا من شهر اكتوبر وانا متبهدلة واروحلهم وتليفونات وكل حاجة عملتها وبرده ما اخدتش حقي ويبقي فقط شكوي في جهاز حماية المستهلك ،انشالله قريب حعملها .
واللي عايز حاجة من امريكا او انجلترا - شوب اند شيب من ارامكس تحفة والله وعمري ما قابلت مشكله معاهم بس لازم يكون عندك فيزا كارد او ماستر

[freeman207]

بصراحة ياجماعة الحمد لله عملت الاوردر وجالى بعد اسبوعين من دفع الفلوس بجد شركة ممتازة