مرور السلام -مافيا النصب وبيع الوهم-

[rego]

مرور السلام - مافيا النصب وبيع الوهم -

أنتشرت أساليب النصب المختلفه وتفحلت في إدارة مرور السلام بشرق القاهره. والذي يعد من أكبر إدارات المرور في مصر ,حيث يخدم منطقة شرق القاهره والتي يصل عدد سكانها إلى الملايين ,ويصل عدد المتعاملين مع مرور السلام للمئات وربما الألاف يومياً,مما أدي إلي تساقط العشرات من الضحايا يومياً فريسه لعمليات النصب والبلطجه وبدون أدني تدخل من أي مسئول..

توصيف عملية الإحتيال على المواطن وخطواتها والقائمين بها :

-تتكون العصابة من عدة أفراد ) من 10 الي 15 شخص ( والذين تختلف أدوارهم وأماكن تواجدهم أثناء عملية النصب على المواطن,وذلك بالإضافه لحماية عدد من البلطجيه والمسجلين لهم .
-أماكن تواجدهم تكون دائما أمام مدخل المرور مباشرة-أمام الأكشاك وماكينات التصوير- المقاهي المجاوره للمرور –أمام منافذ شهادة المخالفات والتجديد وإستلام الرخص.
-تبدأ عملية النصب بمجرد دخول المواطن شارع إدارة المرور حيث يتم رصده من قبل أحد العناصر المتواجده في الأماكن السابق ذكرها, ويتم تقييم المواطن من هيئته وملابسه وسيارته ومن معه..
-يتم الإستفسار من المواطن عن سبب الحضور )إصدار رخصه-تجديد رخصه-شهادة مخالفات ( وذلك لتحديد نوع عملية النصب.
-يتم إغراء المواطن عن طريق عرض بعض الخدمات الوهمية عليه مثل إستخراج رخصه بدون أي إختبارات أو تجديد الرخصه وإصدار شهادة المخالفات (في 10 دقائق) دون أي عناء أو إنتظار في الطابور وذلك نظير مقابل بسيط لايتعدي 10 جنيهات لتجديد الرخصة والمخالفات و500 جنيه لإصدار رخصه جديده بدون أي إختبارات.
-بعد إقتناع المواطن يتم إصطحابه الي أحد المقاهي البعيده نسبياً عن المرور ليسهل رصد تحركاته ويكون بعيداً عن كافة الأحداث بداخل المرور .
-يتم طلب 20 جنيه نظير الخدمه وأجرة العسكري بالداخل ثم يتم أخذ بطاقة ورخصة المواطن.
-يترك المواطن لمدة ساعه أو ساعتين في المقهي لايهامه بوجود خطوات فعلية ومشاكل وزحام داخل المرور وذلك على خلاف الواقع .
-يذهب أحد الأفراد الي أحد العاملين بـمنفذ الإستعلام عن قيمة المخالفات بالكمبيوتر (من المعارف الذين يتقاضون نسبه ثابته عن كل رخصه (ويقدم له الرخصه والبطاقه ليقوم بدوره وهو كتابة القيمه الحقيقيه للمخالفات في ورقه يسلمها لهذا الشخص .
-يذهب الشخص بعد ذلك لمكان عملية التزوير ) ويكون في الغالب مدخل أحد المباني القريبه أو أحد اكشاك التصوير التابعه لهم ( حيث يقوم بتزوير ورقه بها قيمة مخالفات وهميه )من 500 ج إلي 1000 ج ) متضمنه رقم الرخصه وامضاء وهمي منسوب لوكيل نيابة المرور,مع تغليف الورقه بالبلاستيك لإيهام المواطن بصحه صدورها من وكيل النيابه
-تعرض الورقه المزوره على المواطن ويخير إما ان يدفع القيمه كامله(1000 ج) لوكيل النيابه أو ان يقوم المحتال بتخفيض تلك القيمه إلي (500 ج) بحكم علاقته مع وكيل النيابه على حد زعمه وذلك نظير نسبة 10% من قيمة المخالفات (10 ج عن كل 100 ج ( فلا يجد المواطن سوي الاستجابه ودفع المبلغ المخفض+النسبه المطلوبه فوراً و كاملاً للمحتال.
- يذهب بعد ذلك المحتال لإستكمال خطوات الترخيص العاديه من إستخراج شهادة المخالفات الحقيقية وتحديد الضريبه وتجديد الرخصه )عن طريق المعارف في جميع المنافذ السابقه ( وينتظر لحين استلام الرخصه بنفسه وتسليمها للمواطن بالمقهي.
- بذلك يدفع المواطن مبلغ )20 ج +500 ج +50 ج (حوالي 570 جنيه نصباً واحتيالاً وذلك مخالفه للقيمه الحقيقيه لشهادة المخالفات وهي 5 ج في حالة عدم وجود أي مخالفات ولا عزاء للمواطنين.
-تم رصد طرق أخري للإحتيال ولكن تظل طريقة شهادة المخالفات هي أشهرهم وأكثرهم إنتشارا لسهولتها ولعائدها المادي الضخم على المحتالين..

إقتراحات لحل المشاكل السابق ذكرها ولتحسين المنظومه المروريه

إقتراحات لإجهاض عمليات النصب والإحتيال والرشوة :

1 – قصر الإستعلام عن شهادة المخالفات واستلام شهادة البراءة على الموطن نفسه او بتوكيل منه وبمراجعه كل من الرخصه والبطاقه و صورة المواطن فى كلا المنفذين .
2 – منع دخول أى مدنيين من خارج القسم الى داخل منافذ الخدمة دون وجود سبب للدخول مثل تجديد ترخيص أو إستخراج رخصه جديده أو إستعلام عن مخالفات .
3 – تركيب كاميرات مراقبه إلكترونيه بداخل أقسام التجديد والإستعلام عن المخالفات .
4 – قصر إستلام الرخصه على صاحب الرخصه الأساسى أو الموكل له بذلك بحضور أى منهما ومطابقة البطاقه وصورته .
5 – منع دخول بعض الأشخاص المعروفين بالإسم والشكل وبتكرار دخولهم يومياً من أصحاب السوابق فى النصب والبلطجه إلى أرض إدارة المرور وعند الإشتباه فى أى شخص يسمح له بالدخول بعد تصوير بطاقته الشخصيه والإستفسار عن سبب وجوده .
6 – تغليظ عقوبة الرشوه أو المحسوبيه على أى عسكرى أو موظف بالمرور .
7 – عمل تفتيش دورى من رئيس الوحده على جميع الأقسام داخل وحدة المرور فى اوقات متفرقه .
8 – منع تعامل أى عسكرى خارج شبابيك الخدمه مع المواطنين إلا بأمر من رئيس الوحده .
9 – الإعلان فى عدة اماكن مرئيه وواضحه عن خطوات التجديد أو الترخيص بالتفصيل مع وضع صوره ضوئيه من النماذج الرسميه لجميع الخطوات .
10 – الإعلان عن رقم طوارىء أو مباحث لمواجهة أى حالة تزوير أو الإبلاغ عن أشخاص مشتبه بهم داخل أرض المرور.

إقتراحات لتحسين المنظومه المروريه ككل والتيسير على المواطنين :

1 – تفعيل خدمة الإستعلام عن المخالفات عن طريق الإنترنت وعن طريق الموبايل مع إضافة خدمة الدفع بالفيزا أو عند الإستلام بالمنزل ( مثل الرقم القومى ) حيث ان الخدمه الحاليه للاستعلام فقط .
2 – إضافه شباك للخدمه المميزه ( بمصاريف إضافيه ) داخل المرور .
3 – تقسيم المرور الى إدارات أصغر ( على حسب منطقة الخدمه )
4 – فصل خدمة سيارات الأجره عن الملاكى عن الدراجات الناريه .
5 – زيادة ورديات العمل الى ورديتين لإستيعاب الكم الهائل من المواطنين والتخفيف عليهم .
6 – استخدام الأنظمه الإلكترونيه الحديثه فى الكشف عن البيانات وتنظيم العمل والإستغناء عن الاف الملفات الورقيه والوقت المهدر فى كتابة العديد من البيانات المسجله من قبل وايضاً لتوفير وقت تسليم الملفات يدويا عن طريق العسكرى من شباك لأخر و الحفاظ على بيانات السيارات من التلف و الحريق و ما شابه .
7 – بحث امكانيه توسيع المرور فى الأراضى الفضاء المحيطه به مع تحسين الخدمات الداخليه كالنظافه والحمامات والأدوات الصوتيه كالميكروفونات وتحسين اماكن الإنتظار للتخفيف عن المواطن
8 – تواجد بعض الضباط المسئولين لخدمة المواطنين والإستجابه الفوريه لبلاغاتهم وشكواهم .
9 – تحسين الدخل المادى للعاملين بالمرور لتحفيزهم على رفض الرشوة والوساطه مع ضرورة التوعيه الدينية و الأخلاقيه لذلك .
10 – استخدام وتعميم بعض الخدمات مثل الخدمه المميزه أو خدمات توصيل شهادة المخالفات أو خدمة الإستعلام عن المخالفات من الإنترنت و الموبايل كوسيله لزيادة الدخل من اجل تحسين مستوى العاملين بالمرور و تحسين المنظومه المرورية ككل.


بعض الفيديوهات التي توضح أمثله للوساطه والزحام والمعامله الغير آدميه وتدني مستوي الخدمه والنظافه بمرور إدارة السلام:

http://www.youtube.com/watch?v=moihSbJl8Yw
http://www.youtube.com/watch?v=AQFn7CK9RsE
http://www.youtube.com/watch?v=jXkoCd52tHE
http://www.youtube.com/watch?v=rZX_hv5TY6A
http://www.youtube.com/watch?v=cVKl1KNNXH0

امثله لبعض الشكاوي والشهادات المكتوبه من قبل المواطنين :

http://www.nilemotors.net/Nile/35795-a.html

نرجو الإهتمام بهذا الموضوع والعمل على توصيله للجهات المسؤله عن طريق القنوات الحكوميه الرسميه إلي جانب التوعيه بنشر الموضوع في جميع القنوات المدنيه الأخري مثل الإعلام والصحافه ومواقع التواصل الإجتماعي والمنتديات مع المساعده بتقديم أي شهادات أو معلومات من مواد مرئيه أو مسموعه للجهات المسؤله وذلك لنشر الوعى بين المواطنين و الحيلوله دون سقوط المزيد من الضحايا لمثل تلك العمليات من النصب والإحتيال ...


شكاوي وزارة الداخليه- الإداره العامه للمرور
تليفون : 27959111 - 27953981 - 27955005
فاكس : 27960682
العنوان : شارع الشيخ ريحان، القاهرة
الرقم البريدى : 11641
البريد الإلكترونى : center@iscmi.gov.eg
الموقع الإلكتروني: http://www.moiegypt.gov.eg/Arabic/Co.../showComplains
مع إختيار الإداره العامه لمرور القاهره

شكاوي مجلس الوزراء
الموقع الإلكتروني:

http://www.complain.idsc.gov.eg/GCP/Default.aspx

للتواصل معنا أو للإقتراحات :
shbabmnmasr@gmail.com

[Karim_Monir]

موضوع اكثر من رائع يا ...
اعذرني مش هاقول اسمك عشان انت فتحت ابواب جهنم على ناس لا ضمير لهم
بحكم كوني تابع لمرور السلام بيكون من اسوء ايام حياتي وقت دخوله
ولي زميلة في الشغل اتنصب عليها في 1500 جنيه هناك بنفس الاسلوب
هاحاول اقنعها تعمل عضوية وتدخل كتب تجربتها بالتفصيل
وانا هناك مش بدي ودني غير للموظفين فقط واركن في جراج المرور عشان ماتعاملش معاهم اطلاقا
وبتفادي الاحتكاك بيهم تماما لانهم عصابات منظمة

[Ahmed_Adham]

هوه احنا ليه دايما لازم نشتكي عشان المسؤولين ياخدو بالهم ان فيه مشكله؟ ليه هما ميلفوش على الاماكن التابعه ليهم ويسمعو من الناس مشاكلهم ايه؟ حسبي الله ونعم الوكيل فى كل واحد بياخد مرتبه مبيشتغلش بضمير.

على فكره كل وحدات المرور فى مصر كده تقريبا. تعقيدات كتييييييييييييير وقرف ملوش أى لازمه. أنا لما كنت برخص العربيه فضلت 4 أيام اروح المرور قبل الموظفين وأمشي بعدهم ولما زهقت قلت لواحد قريبنا مستشار وجه معايا والرخصه جت فى ربع ساعه واحنا قاعدين في مكتب مدير الوحده. طب ما كان من الاول! حسبي الله ونعم الوكيل مليون مره!

[limo]

موضوع جميل جدا بالنسبه للمخالفات خلوا بالكوا ان وكيل النيابه شخصيا لا يملك تخفيض المخالفات لان القاهره والجيزه شغاله على شبكه واحده متصله بمكتب المحامى العام بالدراسه وهوه الوحيد الذى يملك الاعفاء من المخالفات او تخفيضها اذا تقدم صاحب الشأن بتظلم له شخصيا حتى وكيل النيابه لا يملك الارتفاع الى الحد الاقصى

[SonaSteel]

اولا مشكور وربنا يجزيك خير علي النصيحة ديه بجد
الله يلعنه المرور ده ........ انا بكره نفسي وانا رايح ربنا ياخده ولا يولع ولا يغور في داهيه
حسبي الله ونعم الوكيل واشكال ما يعلم بيها الا ربنا وبلطجية حتي الموظفين
تحس انك داخل ارض العدو مش ترخص عربية
انا نفسي انقل منه حتي لو عنوان وهمي ..... ربنا يستر

[semi]

هههههههه مرور السلام معانااااااااااااااااااااة
بس النقطة اللي انت ذكرتها العيب مش على البلطجي العيب على المواطن اللي عايز يستسهل
حتى لو الشخص ده هيخلصلك الاجراءات كلها في ساعتين بدل ما العملية ممكن تاخد منك ايام
فانت كده بتشجعه على الاستغلال وبتشجع رشوة الموظف اللي واقف على الشباك
وبتعطل مصالح الناس اللي واقفة اصلا ادام الشباك عشان الموظف ياخد الورق من ورا الشباك
وطبعا انا كل ما اروح هناك بلاقي فعلا الناس دي بتطلعلي وتقولي اخلصلك اللي انت عايزه
بمليغ وقدره ارفض واقوله شكرا لنفس الاسباب بالاعلى
المشكلة في المرور هي الزحمة فقط وموضوع الرشاوي في ناس تصعب عليك اصلا
زي بتوع البصمة وطالما انت بتدفع وبتاخد حقك فقط مش اكتر منه فمفيش مشكلة
لكن لازم يشوفوا حل في الزحمة بتاعة المرور دي حاجه تقرف طبعا

[mazagngi2010]

هو ده الاختبار !!!!!!!!!!!!
ياحلاوه بيضا

[tareksakr]

يعد تجربة مريرة لاكثر من اسبوع لتجديد ترخيص سيارتي السابقة والمعاملة السيئة الغير ادمية اقسمت الا ادخل هذا المرور الفاشل مرة اخري وسيارتي الحالية سجلتها باسم ابن خالتي في مرور الشروق ساعتين زمن وتخلص الرخصة والتجديد ومافيش زحمة الي ان يضعوا حل للمهازل اللي في مرور السلام

[El Prince]

انا عن نفسى بروح من بدرى حوال الساعة 9 صباحاً واركن عربيتى في جراج المرور
و كل تعاملاتى مع الموظفين فقط ولا اتعامل معاهم اطلاقا و بفضل كمان عدم الاحتكاك بيهم تماما لأن حركاتهم الحقيقة مستفزة - يعنى لو ما نفعتهوش بفلوس يرخم فى موضوع الطوابير و تحس انهم عصابة منظمة

بخلص على حوالى الساعة 2 او 3 الظهر و اخد رخصتى و اتنفس الصعداء بعد لما أخرج من المرور و مدينة الحرب (السلام) بأكملها !!!

[rego]

بداية .أشكر الجميع وخاصة أستاذ كريم على الردود الطيبة .بس اتمني المشاركة والمساعدة من الكل يا جماعة عشان نحرك الموضوع ده بإذن الله ..وجاري التنسيق لعمل مقابلة مع مدير إدارة المرور قريب إن شاء الله لطرح المشكلة واقتراحات الحل . مفيش أي حاجة حتتغير إلا لما احنا نحاول نغيرها بنفسنا يا جماعة .ايديكم معانا يارجالة ...

[Amr Axel]

تسلم ايديك يا فندم ع الموضوع
فعلا الموضوع سئ هناك بالرغم اني غير تابع لمرور السلام
الا ان بمجرد اني اعدي من عنده الاقي هجوم عليا للاستفسار عن سبب مجيئي رخصة يا بيه ترخيص يا باشا مخالفات يا باشا زي ما حضرتك ذكرت ده اللي بشوفه فعلا

[ahma8]

المرور ده ازمة من زمان و الاقسام برضو و السجل المدنى
حاجة معروفة و محوفظة من زمان

وجهوه عابثة و الفساد فى كل مكان
حاجة زباله يعنى

[eng.m7md.ali]

المشكلة مش في الناس ولا البلطجية
المشكلة في الامن والشرطة اللي ساكتة عليهم
مش معقول مش عارفين يقضوا على الفئة الضالة دي

يعني اكيد اكيد اغلب البلطجية اللي هناك الصبح في المرور وبالليل بيلقطوا رزقهم على المواطنين الغلابة

[ali_333]

بداية .أشكر الجميع وخاصة أستاذ كريم على الردود الطيبة .بس اتمني المشاركة والمساعدة من الكل يا جماعة عشان نحرك الموضوع ده بإذن الله ..وجاري التنسيق لعمل مقابلة مع مدير إدارة المرور قريب إن شاء الله لطرح المشكلة واقتراحات الحل . مفيش أي حاجة حتتغير إلا لما احنا نحاول نغيرها بنفسنا يا جماعة .ايديكم معانا يارجالة ...

ومدير ادارة المرور عارف وساكت اهمال ولا عارف وساكت عشان بيقبض نسبة؟

لازم الناس تتكاتف عشان يقضو عالفساد ...احنا شيلنا راس الافعة مبارك مش معقولة مش حنقدر
نخلص على اطفال الافعى

[rego]

ومدير ادارة المرور عارف وساكت اهمال ولا عارف وساكت عشان بيقبض نسبة؟

لازم الناس تتكاتف عشان يقضو عالفساد ...احنا شيلنا راس الافعة مبارك مش معقولة مش حنقدر
نخلص على اطفال الافعى

اعتقد ان مدير المرور الحالي كان ماسك مرور السلام ده لفتره أصلا..