هوه ايه الفرق بين العربيات العادية العربيات للمعاقين ؟

[Heshoo Shosha]

السلام عليكم ورحمة الله وبركاته

عايز أعرف الفرق بين سيارات المعاقين والعادية.. ودايما بلاقي عربيات المعاقين اسعارها ف الأرض .. ده غير ان بيبقى مكتوب منتهية الحظر (يعني إيه ؟) .. حد يرسينا

[MohammedAladel]

أنا شفت دايو لانوس معاقين مانيوال والفرق الوحيد اللى لاحظته

دواسة الدبرياج عادى جدا فى الشمال فى الأرض لكن متوصل منها عصاية لحد الدريكسيون فوق على شمال الدريكسيون

بحيث إن الدبرياج يبقى إيده الشمال بدل رجله الشمال

أعتقد إن العربيات دى بتبقى جميع الكماليات يعنى كل حاجة نازلة فيها بس مش متأكد الصراحة


بس نفرض إن الرجل الغير سليمة هى اليمين يبقى صعب إنه يسوق والله أعلم

[MohammedAladel]

ياريت ياجماعة نقول عربيات ذوى الاحتياجات الخاصة بدلا من معاقين وياريت حضرتك تعمل مشاركة بتغيير عنوان الموضوع

[haissam24h]

الفرق بين العاديه وذوى الاحتياجات
ان ذوى الاحتياجات عربيتهم محترمه جايه من برة مصر استعمال نظيف وخفيفه وفول اوبشن بمعنى الكلمه
وكوالتى العربيه بيبقى عالى قوى فى التقفيل والصالون والاجاء الى راكبه عكس العاديه

مثال بسيط شوف لانوس مصرى ولانوس احتياجات خاصه شوف التقفيل هنا وهنا وهتلاقى نفسك بتقول ده احنا بيضحك علينا من الوكيل وتقفيل صالون زباله بمعنى الكلمه فى المصرى فى الانوس شوف الفرق هتلاقيه شاسع
وكل الفرق ومش كثير موضوع العصا الى بتفصل الدبرياج ده كل الفرق وبعدين اسعار
ونفس الشى فى البى ام والباسات واليجتا الاحتياجات والاوكتافيا كمان نظفتهم مش هتلاقيها فى الوكيل المصرى نهائى فى تقفيل وكوالتى واوبشن وكماليات

بالنسبه للسعر ذى بعض ويمكن الاحتياجات اعلى كمان

هو عيب الاحتياجات بس اوقات بيبقى المتوافر لقطع الغيار استيراد وحاليا بقا سهل جديد فى 90 % من الحاجه

[hossam_elwani]

انا كنت بدور على نوبيرا 2 اوتو بريميوم خالصه حظر اجبها منين ؟؟؟

[A.Saad]

بيكون راكب ليها اجهزة مساعدة للقيادة حسب الاعاقة

[A.Saad]

الاجهزة ممكن ازالتها او تغييرها مش ثابته
لكن لو سقت بدونها والعربية مرخصة انها بالاجهزة بيكون فيها مخالفة وممكن تدفع فرق الجمرك

[semi]

العربية بتبقى مجهزة انك تتعامل معها بدون الارجل او جاية عربية عادية وبيتم تركيب الاجهزة لها
لكن الميزة انها جاية من بلدها ومعفية من الجمارك وعليها حظر بيع لمدة 5 سنين
وبعدين يتشال الحظر وتتباع عادي
اذا انت اشترتها وهي لسه في الحظر اولا مينفعش تنقلها باسمك
تفضل باسم المالك الاصلي ثانيا لو اتمسكت في لجنة هتبقى مشكلة طبعا
وفي ناس بالتأكيد بتعمل الحركة دي بس بيبقوا الناس اللي عليهم حصانة او من الشرطة
لان محدش هيوقفهم زي قاضي او مستشار او قوات مسلحة او ظابط شرطة
وسلملي على الكوسة

[MohammedAladel]

نسيت أقول إن أى حد يقدر يسوقها عادى جدا بالدواسات العادية فى ظل وجود عصا الدبرياج اللى فى الدريكسيون

لكن قانونا غلط زى ما قال الأعضاء

[Heshoo Shosha]

مشكورين يا جماعة على التوضيح .. ;)