عاااااايز رأيكم ومحتااار بجد

[Medo007]

السلام عليكم
يا رب تكونوا بخير وصحة وسعادة , الموضوع بإختصار ان طالع فدماغي أوى اجيب موتوسكل صيني اليومين دول وأقضي بيه مشواري جوه المدينة أوفر من العربية بكتير في البنزين وسواقة الموتوسكلات من ساعة لما سوقتها وهي عاجباني جدا , خدتها هوايا , مش عارف اعمل ايه , ولو جبتها هتوفر عليا كتير المشاوير اللى جوه البلد في البنزين واستهلاك العربية وكل حاجة وأخلى العربية للسفريات فقط , بس الحاجات اللى مخوفانى من الموضوع , المنظر العام ليا , من عربية اركب موتوسكل صيني , مش قصدي حاجة والله بس , حاسس اني هبقى محرج شوية وانا راجع بيها كده , وانا بفكر اجيب بوكسر 150 سي سي الهندي , الموتوسكل ده تحفة وسعره 5000 جنيه , يريت اشوف اراء كل الأعضاء والناس تشاركني وشكرا مقدما :)

[mbx4e]

هيوفر عليك وقت خصوصا في الزحمه بس احذر الوقعات

[mohamed ismail]

والله فكرة حلوة. انا شايف تسيبك من حكاية شكلي هايبقي ايه دي واعمل اللي فيه المصلحة. لازم نبقي شعب عملي زي باقية خلق ربنا

[semi]

ههههههههه قرأت افكاري انا فعلا بفكر في كده وناوي باذن الله
طبعا حل عملي جدا جدا بشوف الموتوسيكلات بتنطط من جنبي وانا واقف ولا بعمل حاجه
يكفي كمية الضغط العصبي اللي بعاني منه وانا واقف ومتعطل وزحمة وخناق
غير البنزين اللي طاير نصه على الفاضي في الزحمة دي
بس هو مشكلته حاجه واحدة البهايم بتسوق كتير ولو قابلت حد منهم ووقعك لا قدر الله
وقعته وحشه :(
بخصوص المنظر هاتلك فيسبه شكلها حلو شوية او حل الموضوع بشكل افضل وهاتلك Race
لو هتبيع العربية حنى فهو موتوسيكل وبرستيج في نفس الوقت

[akmm]

فكره جميله واشترى الصينى متداول بكثره وفى حاله اعده البيع حتبيعه دون خساره كبيره فى الثمن خاصه انه مطلوب بكثره والمستعمل منه على وجه الأخص .

[benmatar]

طبعا فكرة عملية واقتصادية بس مش أمنية!!!!!
إيه؟؟؟؟؟
يعني طبعا حضرتك مستحيل تطلع كوبري بيه ولا دائري ولا طريق سريع
لأن النظرية المرورية عندنا في مصر متطابقة بالظبط مع نظرية الغابة ((( البقاء للأقوى والأكبر حجما والأمتن صاجا)))
هتقوللي همشي على اليمين وآخد بالي، أقولك عربيات كتيييير مش هتاخد بالها ولا هتعمل اعتبار للموتوسيكل وده للأسف الشديد
لو عندنا مرور بجد ووعي واحترام مش هركب غير موتوسيكلات بس حضرتك شايف العربيات الصغيرة بتداس فما بالك بالموتوسيكل؟؟
بس لو الاستخدام داخل المدينة ولوسط العاصمة أو مشاوري حول البيت مش اسفار ولا كباري ولا محاور، ده كده يكون كويس.
بالإضافة إلى إن النظرة والمعاملة قد تختلف لما تركب الموتوسيكل بدل العربية وبرضه ده للأسف الشديد ولتفشي النفاق الاجتماعي وبعض المشاكل النفسية وده مش من المواطن العادي بس وإنما ممكن المعاملة لا تكون كما ينبغي من كمين مرور مثلا أو أثناء دخولك جراج خاص مثلا أو ما شابه. رغم أن الإنسان هو نفسه والتقدير والاحترام يكون للشخص وليس للمظهر ودي من اسباب الانهايار الشديد اللي عايشينه..
وأخيرا وأنا لست بخبير بالموتوسيكلات أبدا بس اسمع إن الفيسبا أكثر أمانا والصيني أسوأ الأنواع وأخطرها.

[amr_8800]

لأن النظرية المرورية عندنا في مصر متطابقة بالظبط مع نظرية الغابة ((( البقاء للأقوى والأكبر حجما والأمتن صاجا)))
.

ههههههههههههههههههههههههه
والله عند حضرتك حق
بس على فكره برضو في مشكله كبيره اوي في الي بيسوقو الموتسيكلات وبجد انا بعاني منهم بتلاقيهم يعدو جنبك من اليمين ومن الشمال وسعات من سرعتهم بسمع صوت موتسيكل بس مش بشوفو غير لما الاقيه معدي من جنبي

ععموما السواقه في مصر بقت محتاجه تركيز اوي وبجد احنا بنبذل مجهود كبير جدا وضغط عصبي واحنا بنسوق واكتر من اي مكان تاني في العالم

وربنا يستر طريق الكل
كملها بالستر من عندك يا رب

[OMAR61995]

طيب شوف سكوتر
شكله حلو و موفر و زى الفل

حاجة زى sym fiddle 2

[Hobgoblin]

Vespa LML

[hany79]

سيادتك انا زمايلي كتير في الشغل قرروا ياخدوا الخطوة دي و انا مستني اشوف حيعملوا ايه
هو الاسكوتر اكتر امان و اشيك بس غالي شوية يعني الهوندا الايليت ١٢٥ سي سي اقصى حمولة ١٥٠ كيلو بيعمل ٩٥٠٠ جنيه زيرو و استهلاك البنزين ٣لتر في ١٠٠ كم و فيه البيجو بس ده أغلى شوية في حاجة ٥٠ سي سي تقريبا ب ٧٥٠٠ جنيه بس ده معتقدش انه عملي لانه حيبقى ضعيف قوي المقارب للهوندا الايليت بيعمل ١٠٥٠٠ جنيه و في الاعلى شوية ١٥٠ سي سي سعره ١٢٥٠٠ جنيه لو عجبك الموضوع و فيه امكانيات في بيجو اعلى تقريبا ٤٠٠ سي سي بيوصل ٤٨٠٠٠ جنيه و ده كتير على انك تجيب اسكوتر الا اذا كنت غاوي و معجب بيه و في البياجيو الايطالي لسه شايف واحد ٣ عجلات ٢ في الامام وواحدة خلفية و ده سعره تقريبا ٦٦٠٠٠ بس حكاية و الميكانيسم بتاعو في الملفات جامد جدا.
بص ربنا يوفقك بس خد بالك من نفسك و طظ في نظرة اي حد خليك عملي

[Amanda]

انا اخى اشترى واحد من الصينى وهقول احضرتك رأيى
- بلاش تبيع العربية وخليه بجانب العربيةلان العربية لا غنى عنها خاصة فى وجود الاسرة
- بالنسبة لحكاية الشكل ايه المشكلة ؟ انا زمايلى دكاتره فى الخارج بيركبوا عجل !! لا تهتم بالاخرين طالما ما تفعله لا يضر ده بجانب انه عملى واخى بيسافر بيه كمان .
- اخر نصيحة حاثته صعبه جدا وفكر فى النقطة دى جيدا - وبلاش السرعة بيه نهائى - لان مجرد نقطة زيت على الارض او جاز بيفقد اتزان الموتوسيكل تماما وبالتالى لااااااااااااابد من الحذر من النقطة دى .
وفقك الله فى الاختيار

[Medo007]

شكرا لردودكم , الغريبة اني متوقعتش ان كل الناس هتتفق معايا في الاراء , وانا مش هبيع العربية انا هخلي المشاوير الداخلية بالموتوسكل والعربية تبقى للسفريات بس عشان استهلاك العربية والبنزين , وبالنسبة اني امشي بسرعة انا الحمدلله مش بحب السرعة وبالذات لما يبقى معايا الموتوسكل

[ahmedb1]

مشكلة الاسفلت الردئء والحفر في مصر دي في حد ذاتها خطر لانك لو وقعت منه ليك تتخيل احساس احتكاك الجلد بالاسفلت بالنسبة للامان الاسكوتر او الفيسبا اكثر امانا من الموتسيكل العادي او الريس لانه بيحمي الرجلين وفي النهاية بلاش منه فكر في فلوس البنزين والتعب او تضيع حياتك

[Medo007]

مشكلة الاسفلت الردئء والحفر في مصر دي في حد ذاتها خطر لانك لو وقعت منه ليك تتخيل احساس احتكاك الجلد بالاسفلت بالنسبة للامان الاسكوتر او الفيسبا اكثر امانا من الموتسيكل العادي او الريس لانه بيحمي الرجلين وفي النهاية بلاش منه فكر في فلوس البنزين والتعب او تضيع حياتك

الواحد لسة مقررش بصراحة وهصلى صلاة استخارة وربنا يعمل اللى فيه الخير , انا عايز حد من المنتدى يشجعني ويجيب معايا موتوسكل ساعتها هكون متحمس

[Olala]

هى المشكله فى نظره الستات ليك لان اول ما هيشفوك بالموتوسيكل هيعملوا كده
او هيمسكوا الشنطه اوى
او هيستعملوا الالكتريك
لانى اول واحده اول مابسمع موتوسيكل ومش راكبه عربيتى بجرى علطول على الرصيف هههههه
ده طبعا بناء على حادثه قديمه ليا من متوسيكل
بس الاكيد انها فكره رائعه وياريت الكل يقلدك هتحل مشاكل كتير فى المواصلات