عايز اعرف رأيكك في وضع حديد او ارصفة ادام المحلات

[semi]

السلام عليكم ورحمة الله

مكنتش اتصور في يوم اني همر بالموقف ده بس في محل انا هفتحه
وجميع الناس من حولي بينصحوني يقولي محدش يركن ادام المحل
وانا كنت طول عمري بضايق لما اروح اركن ادام محل ويقولي مينفعش الركنه دي يااستاذ
ويفضل وقفلي لحد ما امشي من ادام المحل
وبصراحة كنت بضحك وبقول شر البلية وان قمة التخلف انك تفتكر اني همنع عنك رزقك
لكن لما اتحطت بنفس الموقف لقيت الناس كلها اللي اعرفها واللي مش اعرفها بتنصحني بنفس النصيحة
اللي يقولي هاتلك لوحة حطها واللي يقولي حطلك عمودين ولا رصيفين ادام المحل
وانا معارض جدا بصراحة بس المشكلة انهم اجمعوا كلهم على كده لدرجة اني حاسس ربما يكون في شئ
انا مش شايفه او اسباب لسه مش اعرفها تخليني اوصل اني اعمل كده
عايز اعرف ارائكم ليه اصحاب المحلات بتعمل كده لاني نفسي اعرف برضه؟؟

[ahmad--ezzat]

موضوع ابن ستين .......
كل الناس عملت الموضوع ده...محلات وغير محلات....الشارع عندي مليان من الكلام ده...وكل واحد عامل احتلال قدام بيته....حاجه تقرف

[M.Al-Hefnawy]

موضوع وضع حديد قدام المحلات أو شغل المكان بأي شيء لو القانون بيطبق صح ... يبقى إشغال طريق وله غرامة بس الحقيقة مش عارف قيمتها قد أيه.

المشكلة ان كل الناس لما تيجي تركن قدام محل في الشارع يحسسوك إنك ركنت على الرصيف وسديت باب المحل ويقولك دا باب رزق ... هي العربية لما تقف قدام المحل هي اللي هتمنع الرزق ... ناس غريبة والله.

نصيحة بلاش تعمل الموضوع ده ... الطريق له حق والناس من حقها تركن في أي مكان طالما فاضي وربنا يجازيك خير إن شاء الله.

[Dr.Mostafa Anwar]

الحقيقة لما نيجي نناقش موضوع زي ده من الأفضل يكون في نموذج نقارن عليه ... يعني لازم نتفق إن أي دولة محترمة وحضارية فيها نظام بيمشي على الكل بدون أي إستثناءات ..

طيب لو فكرنا في موضوع المحلات والركنة على الأرصفة اللي قدامها هنلاقي إن مثلا في أوروبا وأمريكا إن المناطق التجارية اللي هيا وسط البلد بيكون ممنوع منعا باتا الركن في الشارع وبالتالي كل المحلات بتكون مكشوفة بشكل كامل للمارة ... وده شئ أنا شايفه طبيعي جدا وعادل لأن أصحاب المحلات دي بيدفعوا ضرايب وكهربا ورسوم للمحليات بألوف الدولارات وفي المقابل برده بيبيعوا كويس ويكسبوا ... وعشان كده برده تلاقي هناك لو حد من الباعة الجائلين فكر بس إنه يعمل فرشة قدام أي محل وللا يبيع حاجة كده في الشارع هيتنفخ أولا من أصحاب المحلات أنفسهم قبل ما يجيبوله الشرطة توديه في ستين داهية ...

بس في معضلة تانية بقى في مصر إن مافيش تخطيط نهائي لأي حاجة ... مبارك الله يمسيه بالشر كان سايب الفوضى تضرب في البلد والمشكلات تنشأ وتستمر وتتعقد لحد ما تصبح تقريبا غير قابلة للحل إلا بنسفها تماما زي موضوع الميكروباص والباعة الجائلين والركنة في الشوارع لحد ما بقت صف تالت ورابع وإلخ إلخ إلخ ...

فلو عاوزين نبقى زي الدول المحترمة والمتقدمة يبقى أول شئ يتم توفير شبكة ضخمة وسريعة ونظيفة وآدمية ومنتظمة من المواصلات العامة بكل أنواعها وأشكالها "مترو،تروماي،أوتوبيس،ميني باص،ميكروباص،تاكسي،إلخ إلخ" + بناء جراجات عملاقة تتسع لآلآف السيارات وتكون مرتبطة بالمواقف المركزية للمواصلات + عمل قوانين عاجلة لتنظيم الشارع مثل "إشارات المرور للسيارات والمارة ، الأرصفة ، علامات المرور المنظمة ، غلق بعض المناطق وجعلها للمشاة فقط ، غلق بعض الشوارع وجعلها للمواصلات العامة فقط ، إلخ إلخ إلخ"

وحتى يتم عمل تلك التعديلات والإصلاحات فأظن أن الوضع لا يوجد فيه لوم على من يركن سيارته أمام أي محل ولا على أي صاحب محل يقتطع جزء من الطريق أمام محله لمنع ركن أي سيارة أمامه ...

[ayman_omer2007]

بالنسبة للحجارة والكلام ده قمة الاستفزاز
ملاقيش بقى حد عنده الاكواز بتاعت المرور عشان احطها قدام العمارة
هههههههههههه بهزر

[shiko85]

كان لينا شغل بنخلصه فورشه و اتأخر ميعاد الاستلام اسبوع او اكتر علشان واحد ركن عربيته قدام باب الورشه و العمال اللى فالورشه مش عارفين حتى يفتحوا الباب
متخيل الموقف
شوف خسروا كام فالأسبوع ده
و حاليا نفس المشكله فالجراج, مهما نكتب و نقول للناس ان ده جراج لازم نلاقى حد قافل علينا
انا مكنتش عايز اعمل حديد قدام الجراج بس الناس هى اللى خلتنى اقرر اعمله

[HeMa_LanCeR]

لو المحل مش تباع مجال السيارات
يعني مش هتحتاج عربية تقف عندك وتشتغل فيها
يبقي ممكن تعمل حديتين الفرق ما بينهم متر بحيث يعدي الأشخاص فقط

[OMAR61995]

بلاش أحسن
أصلاً ملكية المحل تنتهى عند بابه بس
يعنى ممنوع يحط رجل كرسى حتى على الرصيف
ما بالك بقى بحد يشغل الأسفلت اللى هو ملكية الدولة !!

[Olala]

فى محلات فعلا الواحد لازم فعلا ميقفش قدامها زى مثلا بتوع تغيير ازاز العربيه
وزى محلات تغيير الزيت وتظبيط العجل والكلام ده
فى ناس تانيه باه مش المفروض يحطوا اى حواجز
يعنى انا شفت بعينى كافيهات الراجل حاطط كراسى والله والله لنص الشارع وعامل ازمه جامده
تفتكر ان شرطه المرافق تعمل حاجه؟
اللى بعض الناس مش واخده بالها منه٠٠٠٠ ان ربنا قاسم لكل واحد نصيبه
يعنى لو جت الدنيا كلها وقفت قدام محلك نصيبك برضه اللى هتاخده

[Elawany13]

أنا بقول للى بيعمل كده .... لا بارك الله فى تجارتك
لإنه بيغتصب حق مش حقه
حسبى الله ونعم الوكيل

[mahmoudselim]

اعمل ال انت مقتنع بية تماما وارضي ربك وضميرك وماتسمعش كلام حد هيخليك تأذي الناس او تعمل حاجة غلط .وخليني افكرك بحديث اعتقد انة لة علاقة بالموضوع فيما معناة.( إذا استعنت فاستعن بالله , واعلم أن الأمة لو اجتمعت على أن ينفعوك بشيء لم ينفعوك إلا بشيء قد كتبه الله لك , وإن اجتمعوا على أن يضروك بشيء لم يضروك إلا بشيء قد كتبه الله عليك , رفعت الأقلام وجفت الصحف ") . احنا نفسنا البلد دي تبقي احسن وتتغير للافضل وكل واحد بيتدي بنفسة علي قد ما يقدر , أبتدي انت بنفسك وغير العقليات المتخلفة ال في البلد دي, وماتخلهمش يخلوك زيهم. الكلام دا لا هو في ديننا نهائي وبالعكس بيكون فيها حرمانية, ولا دا سلوك ناس محترمة ومتحضرة. واي دولة محترمة ومتحضرة في العالم استحااااااااالة تلاقي فيها الكلام دا, الا لو بموافقة الجهات المختصة . خد قرارك وتوكل علي الله.

[MohammedAladel]

حسبى الله ونعم الوكيل

[Elawany13]

[img3]http://sphotos-h.ak.fbcdn.net/hphotos-ak-ash4/308251_10151177741857241_2035869864_n.jpg[/img3]

[Elawany13]

مثال من المهازل اللى بتحصل فى شوارعنا من اصحاب السيارات الملاكى واصحاب المحلات والمقاهى وغيرهم اللى بيعتبروا الشارع ملهوش صاحب

http://www.nilemotors.net/Nile/309797-elawany13.html

[falcon191]

أنا بحي كاتب الموضوع ده لأنه بيفكر في حق الطريق ويا ريت الفكر ده ينتشر بين الناس في مصر ،بس للأسف مش هينتشر إلا في صورة عقاب أو غرامة.