ركنت مكان واحد ورجعت لقيته سايب ذكرى على العربية

[semi]

السلام عليكم ورحمة الله

عادة متأصلة في الشعب المصري من عشرات السنين ترسخت في المواطن المصري العبيط
نتيحة تراكم بعض الطبقات من الجهل والغل والكثير من قلة الادب لتنتج لنا تلك العادة
التي ينفرد بها ذلك المواطن العبيط في محيطه العربي والعالمي
بعد المقدمة اللي شخصيا مش فاهم منها حاجه نقول المفيد
كنت راكن العربية في مكان قصاد عيني ببص لقيت بعض الشباب الظريف اللطيف عملها مصطبة
واذا بواحد منهم ماسك كوباية الشاي في ايد ومريح على العربية بضهره والايد التانية مريحة على المراية
في منظر تدمع له العين
جريت وخدت العربية وسبتلهم المكان كله وروحت ركنت تحت بيت
ساعة زمن ورجعت لقيت حتة قطن محطوطة تحت السبويلر بتاع العربية
شلتها ورمتها ومعرفش كان فيها جاز ولا انهي بلوى المهم اني ببص مكانها لقيتها معلمة
على شنطة العربية والدهان اتكرمش
مكنتش مصدق عيني ان في شخص ممكن يعمل كده
لكن دي الحقيقة للاسف وكل اللي عملته اني فوضت امري لله
ودي مش اول مره تحصلي في مرة قبل كده مشيت بالعربية لقيت العربية عمالة تلعب
وفي الاخر اكتشفت ان واحد مهوي مسامير الطارة الشمال ادام عشان برضه ركنت مكانه !!!

طبعا اكيد ناس في المنتدى هنا معانا حصل معاها مواقف كتيرة من النوع ده واكيد اسوء كمان من اللي حصلي وربما يكون المنتدى موجود فيه ناس بتعمل الحركات دي ارجوكم اطلعوا بره الموضوع عشان لو ردت بأي مبرر انا واثق اني هخسر عضويتي بسببك

[BESO516]

لا حول ولا قوه الا بالله

ماهو ده المصرى هتعمل فى ايه ربنا مديله عقل عشان يشغله فى اذيه البشر وحسبى الله ونعم الوكيل فى الناس دى فعلا

[ahmed_h_g]

أكيد شخص مريض اللى يعمل حركه زى كده

[MohammedAladel]

ربنا كبير

[mshmshm3]

بص انت غلطان انك مشيت العربية علشان عيال ساندين عليها كنت عصرت علي نفسك لمونة و قولتلهم بعد اذنكم ياشباب العربية انتو عارفين الصاج ورق و مايستحملش كانو هايمشو
بالنسبة للجاز اللي عمل في العربية كدة علشان انت ركنت مكانه فهو اغبي انسان علي وش الارض هو بيقولك انا اللي عملت كدة و انا بركن هنا يعني ممكن تعمله كل يوم مصيبة شكل في عربيته

[ahmad--ezzat]

حسبي الله ونعم الوكيل في الناس دي...ربنا مبيسيبش لا تقلق

[shiko85]

طيب لو واحد قافل عليك الجراج و لما تكلمه يقولك " انا باكل اعملك ايه يعنى استنى " و هو مش من الشارع اصلا و جاى يركن غلاسه
او تقول لواحد 5 مرات فيومين ان ده جراج و بردوا مفيش فايده و يعشق الفتيس و يشد الهاند بريك
والله فيه ناس عجيبه مش عارف ازاى بفكروا كده
للأسف الذوق مش بينفع مع بعض الناس ولازم الصوت العالى او الأذى
بس انا بتكلم على جراج بتاع بيتى يعنى مش من حق اى حد انه يقفل عليا
مش عارف اقولك ايه بس انا بحس ان فيه ناس بتعمل كده حقد و غل و ناس بتعمل كده فاكراها شطاره و اللى بوظلك الدهان ده
انا والله من كتر ما بعانى من مشكله الجراج بقيت فكل مشوار ادور على جراج عام اركن فيه علشان مقفلش على حد و لو مش لاقى بحاول على اد مأقدر انى ابعد عن المحلات المقفوله و مداخل العمارات
بس رغم الحاجات اللى بنشوفها الأيام دى لسه فيه ناس محترمه جدا
المحترم بيفضل طول عمره محترم
متزعلش

[SYD]

للأسف الزحام والتخوف علي عربيتك بيخليك تتمسك بمكانك في الركن اللي ممكن يكون قدام بيتك او تحت عينيك
ليه انا اركن بعيد علشان حد ركن مكاني (اقصد بحد انه جاري) لكن واحد ضيف جي وهيمشي علي طوول مفيش مشكلة
مشكلتي ان احيانا بلاقي ناس جت ركنت العربية ويبيتها يومين - انا في خلال اليومين دوول بدوخ علي ركنة قريبة من البيت وفي الأخر العربية بعيدة عني ومش بسمع حتي الأنذار بتاعها

انا ضد الأذية - ولما حد بيركن مكاني - اقصي حاجة بعملها بحطله ورقة مكتوب عليها ان دة مكاني تحت المساحات او بلزقها علي الزجاج
في ناس بشوفها بتهوي العجل - ودة غلط لأنه هيبات بالشكل دة ومش هيعرف يمشي اساسا

معلش - ربنا يعوض عليك

[amr_8800]

يا باشا الي بوظلك الدهان ده مش مريض وبس ده جواه كميه من الحقد والغل وكره الاخر
ده لو كان رما القطنه على العربيه قاصد
وربنا يعوض عليك

[blazer]

الى بيفتكر ان الشارع ملكية ليه او حق مكتسب انه يركن هنا عشان امام منزله او امام محلة او حتى امام عمارت ويإذى الناس او يحجز مكان ليه بحديده
إنسان ظالم و بيجور على حق غيره ومفيش اى مبرر لى الى هو بيعملة
وانه كدا بيإذى الناس بافعاله
وحسبى الله ونعم الوكيل فى كل واحد حاجز مكان لعربيتة بحديده او بسلسله او بحجر او بانه يخلى بواب او سايس ميوقفش حد

[MARTINDALE]

بص انا اترمي على عربيتي ميه نار لكن انا بيني وبينك مستبعد انها تعمد.
اللي هيرميلك قطنه هيرميها على الكبوت او الشنطه مش هيحشرها تحت السبويلر وفي كل الاحوال ربنا كبير ومش بيسيب حد وكله عنده بحساب .

[Olala]

الناس عندها كبت والله

فعلا الناس عندها كبت من زمان وبعد الثوره كل واحد بياخد حقه بقله ادب دلوقتى
ومتقدرش تتكلم لانك فى الاخر مش هتقدر تاخد حقك برضه ٠
انا كنت راكنه ورا واحد والله سايبه الهاند بريك والفتيس على N
نزلت من عند الدكتور لقيت مرايتى مدلدله على باب العربيه

[Ahmed_Ramadan]

هو كله كوم و الشخص الحيوان المريض اللى هوالك مسامير العجل ....... ده ممكن كان يسببلك فى كارثة لا قدر الله !!!!!!

[elpasha1]

حسبى الله ونعم الوكيل

[أحمد كمال]

حسبي الله ونعم الوكيل في الناس دي...ربنا مبيسيبش لا تقلق

و زعلوا اوي يا عزت من موضوعي التاني اللي اللي انت عارفه و فاهم قصدي عليه !!

ربنا يهدي

للاسف ناس كتير فاكرة انه شارع ابوها و ورثوه

و الحيوان اللي هوا مسامير العجلة ده ما فكرش مثلا ان ممكن العجلة تفك و العربية تلف و يعمل حادثة يقتل واحد واقف على رجله و لا راكب عجلة و لا موتوسيكل و لا حتى راكب العربية نفسه و يبقى دمه في رقبته؟؟؟؟؟؟؟؟ كل ده عشان ايه عشان ركن "مكانه" و هو اصلا لا مكانه و لا زفت على راسه