ماهى تجربتك مع المستعمل ؟؟؟

[M_HaFeZ]

ياريت كل واحد يقولنا تجاربه مع المستعمل
ياترى حس انه اتنصب عليه ؟ صرف كتير ؟ معقول قصاد السعر ؟ وقع على حاجه ممتازه؟
ولا عمرك ماهتكرر انك تشترى مستعمل والزيرو زيرو ولو ايه ؟

وياريت برضه اللى يحكى يقول جاب منين وايه افضل الطرق لشراء المستعمل
اتمنى انه يكون دليل ومرجع للاخوه اللى بيفكروا فى المستعمل
وياريت التثبت

[ows212]

انا ليا تجربتين
الأولى كانت 131 موديل 1983 تركى ...مش راشة برة بوية بلادها.. اصحابها كانوا بيعاملوها زى ولادهم ...العربية كانت ممتازة ..مشكلتها معايا كانت ان مافيهاش كماليات
كمان انا ما حافظتش عليها .. عملت معايا دقة نقص وانا مسافر اسكندرية ..الكاوتش ضرب مرتين وشوفنا الويل انا واللى معايا ...بعتها لأخويا وكسبت فيها .. وهو كمان بعد سنتين تلاتة باعها وكسب فيها ..الراجل اللى معاه العربية دلوقت معرفة مقتنع بيها تماما و بيجيلو ناس كتير علشان يشتروها بس هو مش عايز
التانية كانت كورولا 1993 .... اشتريناها علشان سعرها كان لقطة حسب كلام اخويا
للأسف العربية كانت تعبانة ... وصرفنا عليها وشدناها .. وبعد كده فتحت بقها تانى
وحالتها ما كانتش عجبانى فبعتها دى بقى خسرت فيها مش اقل من 8000 جنيه
وفعلا كانت غلطة بس الحمد لله ....
بعد كده قررت ما اركبش غير عربية جديدة والحمد لله
بصراحة الزيرو زيرو

[dr_3eshoo]

تجربه مع المستعمل كانت البسات الي معايا
كانت لقطه سعرها كان كويس و من واحد قريبنا
المهم تعبت نتيجه للاهمال الشديد مفيثش صيانه مفيش مفيش عفشه بتتربط مافيش زوايا بتتعمل مافيش ترصيص بيتعمل كده
و قررنا اننا نشدها
و رحت على القاهره ام الدنيا و نزلت على واحد اسمه احمد عزت شغال في توكيل فولكس
المهم سلمت رقبتي و شوف ايه الصح و اعمله
غير الي كان بايظ و غير الحجات السليمه زي الشدادات و الكوبلن الشمال الي لحد النهرده مش لاقي سبب تغيرهم و طبعا مقصات و بيض دركسيون و السربنتينه الداخليه للتكييف و شويه حجات مش فاكرها
المهم اكتشفت اني اتلزق على قفايا من الميكانيكي الي شد العربيه و صرفت 10000 جنيه اونطه في اونطه و بعدها 400 جنيه طرمبه ميه و بعدها 4000 جنيه اسطوانه و ديسك و فتيس بس ال4000 جنيه دول غباوه مني انا مش من العربيه
انا بصراحه بحب العربيه دي جدا و انقذت حياتي كتييييييييييييييييييييييييييييييييييييييير طبعا الحافظ هو ربنا بس بجد العربيه دي و انا راكبها بحس بالامان و الطمئنينه و خصوصا اني بنام و انا سايق ده العادي بتاعي
انا قررت اني بعد كده اركب زيرو من الاصفار و يمكن اقل من الاصفار لو في و التعامل يبقى مع التوكيل و العربيه تتباع على 100 الف كيلو علشان مااحطش رقبتي تحت سكينه اي ميكانيكي جاهل الاهي ربنا يبعتلهم محمد علي باشا يعملهم مزبحه زي مزبحه المماليك

[mohamed2002]

انا ليا تجربتين
الأولى كانت 131 موديل 1983 تركى

ال 131 المفروض انها ايطالي ؟,الشاهين والدوجان تركي ؟صح

[Noha.M]

تجربتي مع السيتي كانت كويسة جداااااااا و استعمالها كان نضف فعلا

مع انى مش من هواة المستعمل . لكن فعلا العربية اولا مكانتش عاملة كتير اوى و كمان كانت نضيفة من برة بس شوية تجريحات كدة

بس مزعلتش اوى لما بعتها عشان ملحقتش ارتبط بيها عاطفيا

[casper2010]

المستعمل زي البطيخة بس لازم يكون فيه حته قرعة حتي لو مابانتش في الأول
يعني العربية لو وحشة هتعملها علي ايدك حته حته ... و هتتسك كتير اوي لحد ما تعرف :
1- الميكانيكا
2- الناس الوحشة و الحلوة كمان
بس في المقابل هتاخد
1- خبرة كبيرة (لو انت مركز مع العربية و الميكانيكية)
2- عربية كفائتها عالية بسعر رخيص(ممكن يكون النص في بعض الأحيان)
3- الفلوس الباقية من تمن الزيرو تستفيد بيه في حياتك

[casper2010]

علي فكرة احمد عزت انا ليا تجربه وحشة معاه يا ريت يا عيشو تاكد لو كلامي مضبوط علشان الناش ما تنضرش

[ows212]

ال 131 المفروض انها ايطالي ؟,الشاهين والدوجان تركي ؟صح

فيات كشركة ايطالية بس ال 131 فىمنها ايطالى والمانى وتركى ...زى دلوقت مثلا الماتريكس تركى ... والبوينتر برازيلى

[hazem_khidr]

البيجو 505 سنه 98 كانت حالتها حلوه اوي يدوب كانت محتاجه تترش لو يعني كنت عاوز اخليها عروسه :)
و كنت جايبها من تاجر عربيات ما بيشتغلش غير في ال 505 بس و العربيه كانت مع عيله اعرفها غاويين 505 و ما بيركبوش غيرها و فعلا كانت تحفه
افتكر يوم ما جات و طلعت اجربها علي الطريق وصلت لحد 100 بالقوه و العربيه قطعت و قعدت تنتش و رجعت و انا مضايق من نفسي اوي.
بعد كده حاولت معاها واحده واحده لحد ما بقت بتجيب 160 و 170 كمان
و لما كنت اطلع بيها علي الاول و يدوب ادوس سنه بسيطه بنزين كان العجل يأمرك علي الارض لوحده ههههههه
كان موتورها تحفه فعلا و عاشت و عمرها ما عملت حركه نقص .
السوزوكي سويفت سنه 2005 و كانت يدوب عامله 60 الف كيلو كانت مع دكتوره و انا اخدتها من تاجر بس برضه تاجر ما بيشتغلش غير في النضيف
كان فيها كذا خبطه تترد علي البارد و اكصدامتها مش اد كده و شويه شغل خفيف انما اساسيات و موتور و عفشه كانت رائعه
قعدت سنه و قمت شاددها و مغير الاكصدامات و الفوانيس الاماميه و رش نضيف بقت حكايه
كنت راكنها مره و راجع اركبها لقيت واحده و واحد واقفين علي العربيه
و بيقولولي لو تسمح
قولتلهم خير تحت امركم
فالست قالتلي العربيه دي كانت بتاعتنا و لو عندك نيه للبيع انا مستعده اخدها منك تاني:)
قولتلها تحت امرك العربيه من غير فلوس بس انا مش ببيع بصراحه
الغريبه انها عرفت العربيه رغم اني غيرت نمرها مرتين هههههههههههههه.
يعني الحمد لله ما جبتش عربيه مستعمله وحشه قبل كده لاني بشوفها كويس و افرجها لكذا واحد
اه ممكن يبقي فيها شويه شغل خفيف انما الاساسيات تكون سليمه اهم حاجه

[Abdo_Eldesokey]

أو تجربة ليا مع المستعمل تويوتا كورولا 2003 ... كان قبلها 128 مو 97 زيرو

والصراحة تجربة سيئة للغاية ... العربية من برة وجوه عروسة وفابريقة وكل الكلام التعبان بتاع السوق المصري وماشية 37 ألف كيلو بس ...

المهم العربية بعد ما مشيت بيها شوية فتحت بقها ... العفشة سيئة للغاية ومتهانة ع الآخر ... وكل يومين تلاتة تصرفلها 500 جنيه لحد ما صرفت عليها 4000 جنيه خلاص شهرين ... ربنا يهديها

[M_HaFeZ]

أو تجربة ليا مع المستعمل تويوتا كورولا 2003 ... كان قبلها 128 مو 97 زيرو

والصراحة تجربة سيئة للغاية ... العربية من برة وجوه عروسة وفابريقة وكل الكلام التعبان بتاع السوق المصري وماشية 37 ألف كيلو بس ...

المهم العربية بعد ما مشيت بيها شوية فتحت بقها ... العفشة سيئة للغاية ومتهانة ع الآخر ... وكل يومين تلاتة تصرفلها 500 جنيه لحد ما صرفت عليها 4000 جنيه خلاص شهرين ... ربنا يهديها

طيب ممكن حضرتك توضح اكتر المشاكل اللى حصلت
موديل 2003 وكورلا اللى سمعتها ممتازه فى السوق
وكمان 37 الف كيلو ..؟؟
انا باستفتسر مش باشكك فى كلامك والله

[amr_elrashidy]

أو تجربة ليا مع المستعمل تويوتا كورولا 2003 ... كان قبلها 128 مو 97 زيرو

والصراحة تجربة سيئة للغاية ... العربية من برة وجوه عروسة وفابريقة وكل الكلام التعبان بتاع السوق المصري وماشية 37 ألف كيلو بس ...

المهم العربية بعد ما مشيت بيها شوية فتحت بقها ... العفشة سيئة للغاية ومتهانة ع الآخر ... وكل يومين تلاتة تصرفلها 500 جنيه لحد ما صرفت عليها 4000 جنيه خلاص شهرين ... ربنا يهديها

لو حضرتك شارى من حد متعرفوش..ممكن اوى اوى يكون مظبط العداد ..و عالفكرة التجار بتعمل بلاوى فى العربيات..ممكن اوى تكون متهانة و طلعان عين اللى جابوها بس فابريقة بره و جوه و ده اساس شغلهم

[amr_elrashidy]

انا تجاربى مع المستعمل كتير الحقيقة..اولهم فيليشيا..فابريقة بره و جوه و 44 الف كم و مفهاش الهوا..غيرتلها جوز طنابير و تيل و بقت تمام..شهر بالظبط لقيت عفشتها زى الزفت و ناشفة و تقيلة و منيلة بنيلة..بعتها و خسرت 2000ج
التانية لانوس 99 نازلة لمهندس فى شركة دايو مخصوص..كان فيها كل حاجه ممكن تتخيلها حتى الابانوس اصلى و الستارة الكهرباء اصلى..حالتها ممتازة..بعد 8 شهور تقريبا الفرامل بتاعتها كانت مجننانى و استهلاكها فى البنزين عالى ..بعتها و مخسرتش نكلة
لانسر 96 اوتوماتيك فابريقة بره و جوه..زى الفل..مفهاش الهوا فعلا..شوية و غيرتلها جوز مساعدين قدام و لكن العربية كانت بحالتها فعلا..دى كانت احسن عربية جبتها..بعد فترة اتزنقت فى الفلوس قلت ابيع و اصغر العربية شوية..جبت تويوتا ستارلت 93
راشة بره(مع انى بتخنق من العربية اللى مش فابريقة) لبست تمام بقى فى العربية دى
مع انها كانت واقفة على حيلها اوى و شكلها محترم..بعد فترة اكتشفت انها عاوزة 4 مساعدين و بلية فتيس و علبة الدركسيون كانت بتشاور عقلها(قطع غيارها اغلبها استعمال و غالية) طبعا كام شهر و قلبت ابوها..دلوقت معايا كيا بيكانتو..جبتها و انا عارف انها عاوزة اويلسيل كرنك..المهم عالبال ماحليت المشكلة بتاعة الكرنك دى كنت دفعتلى حوالى 2000..بس بصراحة عربية لحد دلوقت ممتازة و انا متسمك بيها على الرغم من كل اللى ركبته ده لكن دى عربية لذيذة و موفرة اوى فى البنزين و يمكن ده اللى مخلينى قافش فيها...من الاخر الزيرو زيرووووووووو فعلا..ربنا يعطينا و يرزقنا

[tamim]

انا بقى اركب زيرو ان شاء الله تكون عجلة

[MMamdouh]

المستعمل بيبقى حالة مش موديل... ممكن عربية موديل 2006 و تبقى كنبة لانها كانت بتتاجر و عربية موديل 2000 و ريحة لفابريكة لسة فيها

MMamdouh