تاثير ارتفاع الدولار على اسعار السيارات - موضوع للنقاش؟؟

[devil_storm]

يا شباب انهاردة سعر الدولار وصل 6.42 قرش!!! انا حاسس انى بحلم يا ترى ما تاثير ده على اسعار السيارات؟؟؟ اكيد اسعار السيارات كلها حتزيد الفترة الجاية و هل اسعار السيارات فى المعارض و التوكيلات لسه ذى ما هى و لا زادت بالفعل؟؟؟ سنة 2013 باينة من اولها.

يا ريت اللى عنده معلومة عن تاثير ارتفاع الدولار على اسعار السيارات يفدنا...

[petra_b2]

تصدق انا داخل عمال اعمل سيرش على الموضوع ده من بدري ...

اللي اتوقعه ان كل السيارات المستورد حتزيد بنفس النسبه .. وكل اللي عنده في المعارض حيرفع السعر من دلوقتي عشان يكسب .. اهو فرق وجايله من الهوا .. يقوله لا ؟!

[khalid_adel]

مرسي بيقولك ازمه الدولار سوف تنحل في خلال ايام وسيرجع لمعدله الطبيعي :)

[petra_b2]

مرسي من يوم ما مسك وهوه بيقول .. بس المشكله اللي انا شايفها عند مرسي اكبر من حكاية الدولار .. دي جزء من المشكله السياسيه .. لازم يلاقولها حل ..

وبعدين هم التجار مبيصدقو يزودو السعر .. في رايك لو كانو زودوه حيرجعو يخفضوه تاني ؟؟!!

[kimokaim]

الجشع حيخليها ترتفع من بكرة

وحماية المستهلك جهاز مضروب بالناااااااار ووبتصرف عليه الحكومة على الفاضي

طبعا في سلع مركونة على الرف حتﻻقيها زادت

جشع وطمع وخسة ونذالة

[Recaro]

يا جماعه انتوا بتحكوا على التجار كما لو انهم شياطين ليه، على فكره كتير من الصفقات اللى بتحصل ما بين مستورد مصرى ومصدر أجنبى بتتم بتسهيلات فى السداد 30 أو 60 أو 90 يوم
بمعنى انى اشتريت مثلا حاويه من المانيا بسعر ألف دولار يتسددوا بعد 90 يوم وسعر الجنيه انخفض قصاد الدولار بعد شهر وفضل ينخفض لحد ما جه موعد السداد بقى الالف دولار اللى كانوا بست الاف جنيه بسبع الاف يبقى انا بابيع بالمصرى اللى سعره قل وهاسدد بالدولار اللى سعره ولع يعنى ممكن الاقى نفسى فى الاخر محتاج ادفع اكتر ما قبضت...
كمان التاجر بيبيع بضاعته ومحتاج يشترى غيرها عشان يدور فلوسه، فهيشترى بالسعر الغالى الجديد، يعنى يتبرع الراجل من جيبه مثلا عشان الناس ترضى !!

[S O P H O S]

ولـسـه ,,

[Land_Cruiser]

هو السؤال بقى لو فرضنا ان التجار بتغلى الاسعار علشان سعر الدولار .طيب يا ترى لما الدولار يرجع لطبيعته تانى الاسعار هتنزل تانى ؟؟ ده سؤال مهم علشان اللى مقبل على الشراء يعرف يستنى و لا يشترى

[shaaban2008]

هو السؤال بقى لو فرضنا ان التجار بتغلى الاسعار علشان سعر الدولار .طيب يا ترى لما الدولار يرجع لطبيعته تانى الاسعار هتنزل تانى ؟؟ ده سؤال مهم علشان اللى مقبل على الشراء يعرف يستنى و لا يشترى

استحاله الكلام ده يحصل ياباشا
انت نسيت ان احنا في مصر ولا ايه

[egyptiandiver]

و اشمعنى يا جماعة جت على العربيات؟ كل حاجة فيها مكون مستورد لازم تزيد... الفرق 5-6 % إنخفاض في سعر العملة المصرية يا ريت الزيادة تكون بنفس المعدل بس. ربنا يسترها علينا

[kimokaim]

لﻻسف ايوة في تجار فجار وفي تجار بيخافوا ربنا وبيعمل حساب الغﻻبة ده قليل جدا

انا تاجر بس تاجر تصدير وليس استيراد شركة تصدير خاصة وخﻻص مش عايز اشتغل في اﻻستيراد لعدة اسباب

والحمد لله اشعر اني بخدم بلدي بتوفير العملة الصعبة بس اغلب التصدير بيكون خام وجزء منه متصنع

ولﻻسف من اليوم يعني من النهاردة التجار المحترمين !!!!! غلوا عليا السعر وحضطر ارفع السعر على عمﻻئي الكرام

طبعا حنعمل شكل جديد للتسويق وتسهيﻻت للدفع وكل ده علشان المنافسة مع حيتان السوق في البلدان يلي بنصدرلها !!!

ربنا يسهلها ويسترها

[د.اشرف هنداوى]

رينو و بروتون زودوا اسعارهت 3 الاف جنيه

[devil_storm]

للاسف كل العربيات غليت ذى م توقعت... الهيونداى زادت 6000 و الشيفرولية زادت 5000 و الرينو زاد 3000 و احتمال تزيد تانى و الكيا زادت 3000 و احتمال تزيد تانى و البروتون زادت و الدياهتسوا زادت و اللى ما زادش اكيد حيزيد اليومين دول.

بجد انا بداءت اكره الثورة و اللى عملته فى البلد... الجنية قيمته بتقل و الضرائب بتزيد و الدعم بيتشال و الفقر بيزيد و الاقتصاد بيوقع و الشغل مفيش و البطاله بتزيد و الجريمة و السرقة زادت و الامن مفيش و البلطجية و الباعة المتجولين ملوا الشوارع و الحكومه ضعيفة و خبرتها على ادها و الاخوان مش شايفين غير نفسهم و بس ذى الحس الوطنى زمان!!!

[SAMEH_FOUAD]

كل الناس بتعمل ثورة عشان تخلص من الحكم المستبد وتتطربق فوق دماغهم , وتعيش عيشة نظيفة تليق بكرامة الانسان

الا احنا عملنا ثورة واطربقت فوق دماغنا احنا , من ساعة ماعملنا الثورة وكل حاجة فى النازل اى كانت

حتى الاخلاق كل واحد بعد الثورة قالك انا مابقيتش اخاف وبقى يقتل ويبجح ويضرب فى اخوة المواطن

ربنا يعدينا على خير من المحنة دية

وعلى فكرة طالما سوق السيارات الجديدة ارتفع , طبيعى جدا ان سوق السيارات المستعملة هيرتفع واكتر , لان اللى مش بأمكانة يشترى عربية حديثة , اصبح دلوقتى مافيش خيار امامة غير السيارات المستعملة , فالطلب هيزيد والعربية سعرها هيرتفع لان اللى هيبيع وعايز يغير مش هتكفية الفلوس دية عشان يشترى حاجة جديد فلازم يغلى , صباح الفل يعنى