تحذير هام لجميع الأعضاء من العفشجى حمادة امام

[محمد يوسف]

السلام عليكم

أنا حبيت أنقل تجربتى مع عفشجى شهير جدا ف ى المنتدى اسمه حمادة امام فى البحر الأعظم رحت له بعد ماقريت اشادة الناس بيه فى المنتدى

والموضوع كالتالى :

أنا باعمل كل صياناتى الدورية فى التوكيل (ميكانيكا وكهربا وعفشة) وأخر صيانة كانت فى شهر 7 الماضى وكله تمام

من شهرين كده تقريبا كنت باحس برجرجة فى العربية على الطريق المكسر وشوية كركبة ونشفان فى المطبات ده غير خنقة فى السحب شوية بس ماكنتش فاضى أبص عليها

من أسبوع لقيت نفسى فى شارع البحر الأعظم وعندى شوية وقت فافتكرت عفشجى اتكتب فيه شعر هنا فى المنتى اسمه حمادة امام فقلت أعدى عليه يكشف على العفشة ويربطها ولو فيه حاجة يظبطها بالمرة..طبعا رحت لقيت زحمة وعربيات ع الجنبين ودور وكده..المهم ركنت واستنيت ساعة لغاية الدكتور مافضى وجه دور عربيتى
الباشا دخل تحت العربية دقيقة وبعدين خرج دماغه ودار هذا الحوار :

هو : هى العربية بتعمل ايه معاك ياباشا

أنا : شوية رجرجة فى الأرض المكسرة ونشفان عفشة فى المطبات

هو : بس دى مش زوايا

أنا : ماقلتش زوايا أنا قلت لك بص لى عالعفشة

هو : طب انت عندك المساعدين اللى قدام بايظين !!!!

أنا : بايظين ازاى يعنى مش فاهم؟

هو : طب اركب معايا نلف لفة

طبعا راح ناطط ع الدركسيون وأنا قعدت جنبه وخد لفة حوالين الورشة والأرض هناك زفت وهو عما يقول : أستغفر الله العظيم ..لا حول ولا قوة الابالله...الخ ( مع انه كان بيسب الدين للصنايعية كل دقيقة)

المهم خلصت اللفة وركن العربية قدام الورشة ونزل :

هو : ناولنى ورقة وقلم يابنى من عندك

تناول الورقة والقلم وبدأ يكتب :

هو : بص يا أستاذ ..تجيب لى جوز مساعدين أمامى..ومعاهم جوز بطاحات ... و تجيب لى جوز المقصات الأمامى بالجلب بتاعته

أنا (مبرق طبعا) : بس يا أسطى.....

هو (قاطعنى) : وتجيب لى قاعدة فتيس شمال علوى..وشداد فتيس سفلى .. وقاعدة ماتور زيت يمين

أنا : بس دول تبع الميكانيكى

هو (بدكترة شديدة) : يابيه احنا هنا أجدع من أى ميكانيكى

أنا : طب بالراحة عليا ..المقصات تتغير ليه ؟ والمساعدين مالهم ؟ والفتيس والماتور فيهم ايه؟ أنا باعمل صيانة دورية والعربية لابتحدف ولا بتميل ولا الدركسيون بيخبط..دى مجرد رجرجة عفشة تحت رجلى ..انت كده حاتغير لى العفشة كلها

هو : اسمع اللى باقوله ياباشا أنا فاهم باقول لك ايه..المهم كل الحاجات دى لازم تجيبها لى من التوكيل أصلى

أنا : اشمعنى؟

هو : هو كده ولو جبت لى قطع غيار من بره التوكيل مش حاركبهم

أنا : طيب والحاجات دى تعمل كام فى التوكيل تقريبا

هو : فى حدود 2000 : 2500 ومصنعيتى 500

وحانكبس لك البيض وبارات الطرف عندنا ب 300 جنيه

واعمل حسابك شهرين تلاتة وحانغير المساعدين اللى ورا !!!!

مشيت من عنده طبعا مش شايف قدامى وكاره العربية وحاسس انى أحسن لى أروح أركنها فى مقلب الزبالة ..اتصلت بالتوكيل سألت عن سعر الحاجة اللى طلبها لقيتها بالظبط عاملة 9700 جنيه (يانهار اسود ومنيل !!!) رحت متصل بيه :

أنا : ياهندسة الحاجات ب 9700 جنيه فى التوكيل

هو : طب قول لى الأسعار كده واحدة واحدة
ابتديت أرص له أسعار التوكيل

هو : طب هات لى المساعدين kyb بس البطاحات توكيل

أنا : اشمعنى؟

هو : طب خلاص هاتهم أى حاجة !!!!!!!!!!

هو : ومش حانغير المقصات خلاص

أنا : طب كنا حانغيرهم ليه أصلا

هو : نضافة..عموما حاعمل لك جلب بتاعة تويوتا كورولا تظبط المقصات

أنا : ؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!

هو : وبالنسبة للقواعد انت تجيلى يوم بدرى قوى نفك القواعد كلها وتشوف اللى محتاج يتغير بجد نجيبه على أبوه من التوكيل

أنا : ؟؟؟؟؟؟؟؟؟؟؟؟!!!!!!!!!!!!!!!

هو : وهاتلى الحاجة كلها مع بعض عشان نخلص مرة واحدة أنا قلبى عليك

طبعا حسيت انه بيعك وحايودينى ف داهية

بعدها بيومين فضيت نفسى ورحت طالع على ورشة الحاج صابر العفشجى فى عين الصيرة..الراجل شاف العربية ولف بيها وبعدين قال لى : اتكل على الله يابيه عربيتك زى الفل مافيهاش حاجة

أنا (ماكنتش مفهمة الحوار التانى) : طب ماتبص كويس ياهندسة ع المساعدين والبطاحات والمقصات

هو : يابيه أمال أنا كنت بالعب..يابيه عربيتك بسم الله ماشاء الله عليها زى الفل

أنا : !!!!!!!!!!!!!!!!!!!!!!!!!!!

خدت العربية وطلعت على فيصل وكنت رتبت معاد بالتليفون مع المهندس المحترم محمد فضالى صاحب مركز توب جير ...العربية اترفعت واتفحصت بمنتهى الدقة وكل اللى فيها كان التالى :

1- العفشة سايبة (اتربطت بمسدسات الهوا)

2- الفرامل الخلفية اترجلشت

3- الطنابير اتنضفت

4- عمة الهوا اتفكت واتنضفت مع الفلتر

5- تنضيف البوابة واضافة منظف دورة وقود ليكوى مولى

والعربية ماشية زى الفل وهديت ونعمت وسحبها زاد

وطبعا لما حكيت للمهندس فضالى حكاية حمادة امام كان فى منتهى الدهشة والذهول

والصنايعى اللى عنده كان فى توكيل تويوتا قبل كده طلع عارف حمادة امام وقاللى على حوار بيعملوه العفشجية اليومين دول انهم مابقوش بيصلحوا بيغيروا على طول

وقال لى حاجة فى منتهى الخطورة : انهم ممكن يخموا صاحب العربية ويفهموه ان المساعدين ولا المقص بايظين وهما زى الفل ويخللوه يغيرهم وياخدوا هما اللى اتفك من العربية يبيعوه بعد كده على انه استيراد

الخلاصة :

1-لاتذهبوا للعفشجى حمادة امام نهائيا .. وعدوا صوابعكم وراه وورا العفشجية عموما

2-مركز توب جير محترم جدا وفاهمين كويس

[lanos2004]

الراجل ده الناس بتشكر فيه جدا حضرتك متاكد من الكلام دة
معدش فيه ذمه ولا ضمير راحت الناس الحلوه خلاص

[محمد يوسف]

الراجل ده الناس بتشكر فيه جدا حضرتك متاكد من الكلام دة

ازاى مش متأكد ؟ ده حصل معايا شخصيا وبالتفاصيل اللى كتبتها بالمللى وبينى وبينه ربنا لو افتريت عليه فى حرف

وأنا عارف ان ناس كتير بتشكر فيه وأنا رحت له بناء على كده وحبيت أنبه الناس بعد اللى حصل معايا

[Ahmed_Adham]

الراجل ده الناس بتشكر فيه جدا حضرتك متاكد من الكلام دة
معدش فيه ذمه ولا ضمير راحت الناس الحلوه خلاص

ماهو لو قالي غير كذا وكذا وغيرتهم من غير ما أخد رأي حد تاني اكيد هشكر فيه لأنه طلع العيب وصلحه واللي مطلعش عيب أصلا. وفكره تغيير اللي شغال عشان ياخد القديم فكره موجوده من زمان في الصنايعيه الحراميه. هرجع وأقول الله أعلم.

[احمد المصرى]

فعلا مفيش اى نوع من انواع الضمير بجد


حسبى الله ونعم الوكيل


معلش مركز توب جير دا فين بالظبط واخد منك كام على تربيط العفشه

[محمد يوسف]

فعلا مفيش اى نوع من انواع الضمير بجد


حسبى الله ونعم الوكيل


معلش مركز توب جير دا فين بالظبط واخد منك كام على تربيط العفشه

فى فيصل شارع النهضة وليه اعلان هنا فى المنتدى وفيه كل التفاصيل :

http://www.nilemotors.net/Nile/251299-a.html

وتربيط العفشة ب 20 جنيه وهو بيعمل خصم ع الاجمالى للى من نايل موتورز

[محمد يوسف]

ماهو لو قالي غير كذا وكذا وغيرتهم من غير ما أخد رأي حد تاني اكيد هشكر فيه لأنه طلع العيب وصلحه واللي مطلعش عيب أصلا. وفكره تغيير اللي شغال عشان ياخد القديم فكره موجوده من زمان في الصنايعيه الحراميه. هرجع وأقول الله أعلم.

عندك حق يا أحمد فعلا

أنا لو كان قاللى مساعد واحد مثلا ولا بطاحة ولا كده كنت حامشى وراه على طول

بس هو ضرب فى العالى قوى وده اللى قلقنى وبعدين انه مش عارف أسعار الحاجة صح (يقول لى من 2000 ل 2500 وتطلع عشر تلاف) وبعدين تراجع بشكل غريب حسسنى انه عايز يعمل مصلحة وخلاص ..بيقول لى كان حايغير المقصات نضافة...ياخبر اسود !!!!

[moumen_hs]

طيب ياباشا الحاجات الى عملتها فى توب جير العفشة وتنظيف والمنظف والمصنعية كلها عملت كام وياريت بالتفصيل لو أمكن

[akmm]

؟؟؟؟؟؟؟؟؟؟؟؟؟؟؟؟؟؟؟؟ ... مش عارفين نقول ايه عن قله الضمير .. وصلت لكده ؟

[saadelden]

انا اتعاملت معاه , كل الي شوفته انه فاهم ف القديم و الدايو و العربيات المنتشره
لكن ماشوفتش عنده عربيات حديثه

[محمد يوسف]

طيب ياباشا الحاجات الى عملتها فى توب جير العفشة وتنظيف والمنظف والمصنعية كلها عملت كام وياريت بالتفصيل لو أمكن

بص ياباشا :

فحص وتربيط عفشة 20 جنيه
رجلاش فرامل خلفية 30
تنظيف الطنابير باسبراى خاص مجانا
الكشف على السير والزيوت والرادياتير مجانا
تنظيف عمة الهواء وتنظيف البوابة بالكامل 60
منظف بوابة 35
منظف رشاشات وقود ليكوى مولى 35
كشف كامل على السيارة بجهاز تحديد الأعطال 40

يبقى الاجمالى 220 جنيه

خصم خاص 20 جنيه لنايل موتورز

دفعت 200 جنيه

بس بصراحة ايديهم تتلف فى حرير وعندهم ضمير وأمانة فى التعامل

[Ahmed_Adham]

بيقول لى كان حايغير المقصات نضافة...ياخبر اسود !!!!

أيوه نضافه لجيبك

[mahmoudselim]

بص ياباشا طالما بتقول بيسب الدين كنت سيبتة مشيت من الاول

[ahmedeg1]

بص ياباشا طالما بتقول بيسب الدين كنت سيبتة مشيت من الاول

و ده من ضمن الاسباب اللى خلتنى ماروحلهوش تانى من اكتر من 3 سنين

[mahmoudselim]

و ده من ضمن الاسباب اللى خلتنى ماروحلهوش تانى من اكتر من 3 سنين

ماهو بالعقل كدا واحد استغفر الله العظيم مش هامة رضي ربنا علية, هتهمة انت في حاجة ولا مصلحتك ليها قيمة عندة!! طبعا لا.