غلطان وبعترف بس الناس جرالها ايه !!

[no2nn]

يا جدعان انا عندي مشكله واظن ان كتير عندو نفس المشكله بس عندي بزياده
من تلت ساعه كنت واخد العربيه وبملاها بنزين في شارع الهرم من اول بنزينه شل وانت جاي من نفف الجيزه بعد ونبي كده مليت البنزين واخدت اول يوتيرن بعد البنزينه .. يوتيرن قدام التوحيد والنور كده وراجع ع البيت والمشكله اني مسرع بالعربيه والمشكله دي وصلت بيا اني اقفل عداد السرعه عشان ميرخمش عليا بصوتو لو عديت ال 120 المهم ماشي ع الشمال طبعا وبقلب نور للي قدامي اللي واخد حارتين ( اللي جنب الرصيف والحاره اللي جنبها ) اموت واعرف الناس دي بتستفيد ايه لما بتمشي ما بين حارتين !!!
المهم بعد عناء الباشا وسعلي عشان اعدي وبرمي عيني بعيد لقيت ناس عايزه تعدي ناس كتير قلبتلهم نووور وضربت كلاكس جااااامده ومجهز رجلي ع الفرامل لو حصل حاجه طبعا كل ده وايدي لسا ع الكلاكس وابص الاقي كل الناس بتعدي !!!!!!!
امال انا بضربلكو كلاكس وبقلب نور لييييييييييييييييييييييييييييييييييييييه !!!!!!!!!!!!!!!!!!!!!!!!!
الحمد لله كلهم عدو بسلام وابص الاقيلك ست عجوزه وقفت قدام العربيه وانا سرعتي تقريبا كانت 80 او 90 مش متاكد لان العداد مقفول زي ما قول
طبعا ضربت فرامل بس مش جامد اوووي عشان العربيه متزحفش عشان مفيش abs
وقمت واخد غرزه بينها وبين الناس اللي عدو الحاره اللي انا فيها مكانوش حتى عدو كل الشارع
وكان بيني وبينها بالظبط عقله صباع !!!!!!
انا مختدش بالي منها اصلا
انا عيني كانت ع المرايه اليمين وفجاه لقيتها قدامي والحمد لله الذي لطف وقدر اني مطيرش الست دي
والمووضوع كلو مخدش غير ثانيه ونص او اقل !!!!!
اول ما اخدت الغرزه لقيت رجلي ع البنزين ومش عايزه تترفع ومرضتش اقف لاني لو وقفت بصراحه معرفش كان ممكن اعمل ايه !!!
الناس بقت غربيه اوي
الناس بقت تبلطج ع الناس اللي سايقه العربيات
المفروض الناس تعدي لما ميكونش في عربيات مش ينقو العربيات ويعدو قدامها !!
انا عارف والله اني غلطان وده مش بمزاجي اانا مدمن سرعه !!
دلوقتي كل اللي انا طالبه من حضراتك كاخوه ليا انكو توضحولي الناس ليه بتنقي العربيات اللي ماشيه ع الشمال وتعدي قدامها
وياريت لو حد حصلو موقف مشابه يحكيه عشان محسش اني لوحدي عشان الست دي قفلتني بعد اللي حصل ده !!
وربنا يستر علينا وعليكم
والسلام ختام



العربيه ( كيا سيراتو 2008 )

[Hyper3G]

بالراحة شوية .. حافظ على نفسك

[MOHAMED OSAMA]

لو الطريق مش سريع يبقه مفروض انك تهدى واخرك يكون 60 -70
انما لو طريق سريع براحتك
وربنا يسترها علينا كلنا

[pegpus]

مع كل احترامى لحضرتك
السرعه لها اماكن و طرق و حدود وأوقات وبعد نظر انا قاربت على 50 سنه ولازلت مدمن سرعه حتى الأن ولكنى من خلال خبرتى أتحدث

[MohammedAladel]

كويس إنك معترف بإن الغلط غلطك برضه والمشكلة مشكلتك وحلها أنك تمشى على مهلك فى المدينة وبلاش تهور وبعدين
مش أى عربية تستحمل الجرى مش السيراتو اللى تجرى بيها عشان مش هتعرف توقفها وكمان مش معاك abs

[Khaled Online]

لما اللي سايقين يلتزموا بتعليمات وآداب المرور، نبقى نستفسر عن المشاة اللي معندهمش راجل مرور يعديهم ولا أماكن عبور طريق واضحة، والحمدلله إنك ماوقفتش عشان انت غلطان والناس مش مستحملة والله أعلم كان ممكن يحصل إيه. احمد ربنا وبلاش اللي بتعمله ده

[MARTINDALE]

انت الغلطان . اللي ماشي في الشارع ممكن يكون سلوكه خطاء وبيعدي بطريقه غلط بس مسئوليتي اني اركز واتوقع الحاجات دي واتفاداه حفاظا على سلامته وسلامتى . محدش هيعذرك ابدا لو لخبطت حد حتى لو كنت مش غلطان 1000% .

[rockana9112007]

انا ملاحظ حاجة فى كلامك ,,,,,,,انك مدى لنفسك العذر انك تقفل العداد ..........اصل حضرتك مدمن سرعة

ومش مدى اى عذر للناس اللى ماشية على رجليها ...............

انا عاوز احكيلك حاجة حصلتلى ومن بعديها حرمت اجرى فى مناطق سكنية

انا مرة برضة كنت ماشى بسرعة فى شارع الهرم وكنت رايح على الجيزة لقيت واحد ست كبيرة ولابسة اسود فى اسود فجأة بتعدى الطريق قلبت نور وكلاكسات لاقيتها اتسمرت فى نص الشارع قصادى .......بصراحة انا فاديتها بالعافية .....بس كنت متغاظ منها جدااااااااا وقفت جمبها عشان اديها كلمتين فى جنابها

ولما وقفت وبصتلها انا تنحت وجسمى كلة قشعر

تخيل انى لاقيتها لابسة نظارة كعب كوباية معمولة من يجى 30 سنة ..... الست دى طلع نظرها ضعيف جداااا جدااا ويادوب شايفا متر قصادها

تخيل انا لو كنت خبط الست دى ...انا مكنتش هسامح نفسى ابداااا ....نظريا هيا اللى غلطانة .بتعدى الشارع من وسط الطريق بدون ماتاخد بالها .........بس فعلاااا انا اكتشفت انى لازم اعذر الناس واعمل ليهم حساب


انا والدتى نظرها ضعيف كان ممكن تكون مكان الست دى

وخلى بالك ربنا مابيسبش

[aldesha989]

خلى بالك بس السرعه مش حلوه على طول ولازم تكون مركز فى الطريق اوى

انا مره عندنا على البحر فى اسكندريه راجع من المعموره ونازل عند ميامى كده ولقيت تلات عربيات واقفين على البحر انا قول لسه هقف واحنا على البحر اطلع فكيك واخد منهم الغرزه واخلع لسه بخلع لقيت كميه بشر لا تعد بتعدى وواحده بتشتمنى مع انى ما كنتش بجرى روحت واقف جنبيهم بقينا اربع عربيات هههههههههههههههه

وكأننا بنحميهم علشان يعدو الطريق

اصلآ فى حاجه اسمها انفاق وفى حاجه اسمها اشارات بس الناس ماعندهاش مشكلة مش بتفرق معاهم

وبرضه من شهر 9 اللى فات كنت نازل انا وقريبى وصحابه بعربية واحد صاحبهم المهم
ماشين على البحر ولقينا اسعاف وزحمه وعربية عريس وعروسه واقفه والعروسه قاعده جوا وقفنا شمال بعد الاسعاف بحاجه بسيطه ونزلنا نساعد

لقينا راجل واتنين ستات فى عربيه الاسعاف
ايه اللى حصل ؟
كانو بيعدو الطريق مع ان اقسم بالله العظيم النفق قصادهم او بينه وبينهم عشره متر
ايه بقى اللى يعديهم على البحر واحنا عندنا طريق البحر عامل زى الطرق السريعه ؟ وفى انفاق ؟
ليه يعملو كده لا قدر الله حد مات ؟
ليه حد يموت وليه حد يدخل السجن وليه حد يتحرق دمه ونفسيته تتعب ؟
انا زعلت اقسم بالله على العريس والعروسه ليلة دخلتهم مش هتتنسى طول الحياه ده يقولها انتى فقر ودى تقوله وش امك نحس هههههههههههههههههههههههههههه

ربنا يهدينا بقى احنا بقينا صعاب مع بعض والله ومع نفسنا كمان

[bassemali]

شارع الهرم ده ماينفعش تمشي فيه أكتر من 60 حد أقصى .. لأن عبور المشاه فيه كتير وانت بتقول أنك عمال تكلكس وتقلب نور وده عمل إرتباك للمشاه ... ولازم تعرف ان اللي مابيعرفش يسوق لما بيجي يعدي الشارع مابيبقاش عارف المسافه اللي بينه وبين العربيه اللي جايه كافيه ولا ممكن تعملك أزمه أصلا .

[Sehsss]

أنا هاسألك سؤال، لو انت ماشي بهدوء كنت هاتتفاداها أسهل صح.. على فكرة أنا مدمن سرعة برضه بس في طرق معينة فقط

[SAMEH_FOUAD]

اولا شوف ياباشا شارع الهرم اللى انصحك , انك ماتجريش فية نهااااااااااائى , ودة لعدة اسباب

1- الناس بتعدى بغشومية شديدة جدااااااااااااااااا , تحس انهم راميين نفسهم ومش عايزينها , وكل شوية لازم تلاقى واحد طلعلك من تحت الارض ماتعرفش طلع منين

2- الميكروباصات كتير جدااااااااااا وتحس انهم استولوا على الشارع , وممكن يقفوا فى اى حتى وفى اى وقت بدون سابق انذار , ولو خبطهم هتلاقى نفسك اللى غلطان حتى لو هو اللى غلطان والف مين هيوجب معاهم

3- شارع الهرم كلة شوارع جانبية احتمال كبير جدااااااا , تلاقى واحد داخل شارع يمين او شمال فجأءة من غير اى اشارات وانت لو لحقت تقف ممكن اللى وراك مايلحقش يقف

4- ماتجريش ولا على شمال ولا على يمين لان الشمال هتلاقى u-turn كتير وعربيات بتلف مرة واحدة وفى نص الشارع , ولو جريت يمين هتلاقى اى حد راح واقف ومش هتلحق نفسك

فانصحك فى الشارع دة ماتفكرش تجرى نهائى , وخد كلامى دة وخليك فاكرة كويس

وان شاء الله ربنا يكفينا ويكفيك شر الحوادث وشر الطريق

[Elawany13]

اتق الله فى نفسك
اتق الله فى عربيتك
اتق الله فى المشاه

[semi]

المفروض ان في كباري مشاه مخصصة لهم
والمفروض ان في ردارات مخصصة لك :)
بما ان مفيش الاتنين يبقى متلومش حد خااالص

[S O P H O S]

ربنا يستر طريقك ..